ವಿಮಾ ಕಂಪನಿಗಳು ದಿವಾಳಿ ಎದ್ದರೆ ಗ್ರಾಹಕರ ಹಣಕ್ಕೆ ಏನು ಕಥೆ? ಸುರಕ್ಷತಾ ವ್ಯವಸ್ಥೆ ನಿರ್ಮಿಸುವಂತೆ ಪ್ರಧಾನಿಗೆ ಮನವಿ
ಜೀವ ವಿಮಾ ಸಂಸ್ಥೆಗಳು ದಿವಾಳಿಯಾಗಿಬಿಟ್ಟರೆ ಅವುಗಳ ಗ್ರಾಹಕರ ಇನ್ಷೂರೆನ್ಸ್ ಪ್ಲಾನ್ಗಳಿಗೆ ಏನು ಆಗುತ್ತದೆ? ಬ್ಯಾಂಕುಗಳಲ್ಲಿ ಗ್ರಾಹಕರ 5 ಲಕ್ಷ ರೂ ಡೆಪಾಸಿಟ್ಗಳಿಗೆ ವಿಮಾ ಭದ್ರತೆ ಇರುವಂತೆ ವಿಮಾ ಪ್ಲಾನ್ಗಳಿಗೆ ಏನಿದೆ ಭದ್ರತೆ? ಬಿಜೆಪಿ ಸಂಸದ ಅಜೀತ್ ಮಾಧವರಾವ್ ಗೋಪಚಡೆ ಅವರು ಇಂಥದ್ದೊಂದು ವಿಚಾರವನ್ನು ಸಂಸತ್ತಿನಲ್ಲಿ ಪ್ರಸ್ತಾಪಿಸಿದ್ದಾರೆ. ಪ್ರಧಾನಿ ಗಮನಕ್ಕೂ ತಂದಿದ್ದಾರೆ.
ನವದೆಹಲಿ, ಅಕ್ಟೋಬರ್ 1: ಬ್ಯಾಂಕುಗಳಲ್ಲಿ ಗ್ರಾಹಕರ ಠೇವಣಿ ರಕ್ಷಿಸಲು ಒಂದು ಕಾನೂನು ಇದೆ. ಜೀವ ವಿಮಾ ಗ್ರಾಹಕರ ಹಣ ರಕ್ಷಿಸಲು ಏನಿದೆ ಕಾನೂನು? ಜನಪ್ರತಿನಿಧಿಯೊಬ್ಬರು ಈ ಪ್ರಶ್ನೆಯನ್ನು ಕೇಳಿದ್ದಾರೆ. ನೇರ ಪ್ರಧಾನಿಯವರಿಗೇ ಪತ್ರ ಬರೆದು ಮನವಿ ಮಾಡಿದ್ದಾರೆ. ಲೈಫ್ ಇನ್ಶೂರೆನ್ಸ್ ಕಂಪನಿಯೊಂದು ದಿವಾಳಿಯಾದರೆ ಅಥವಾ ಕಾರ್ಯನಿರ್ವಹಿಸಲು ವಿಫಲವಾದರೆ, ಲಕ್ಷಾಂತರ ಪಾಲಿಸಿದಾರರ ಹಿತಾಸಕ್ತಿಯನ್ನು ಕಾಪಾಡಲು ಮತ್ತು ಅವರ ಹಣಕ್ಕೆ ರಕ್ಷಣೆ ನೀಡಲು ಬಲವಾದ ‘ಸೇಫ್ಟಿ ನೆಟ್’ (ಸುರಕ್ಷತಾ ವ್ಯವಸ್ಥೆ) ರೂಪಿಸಬೇಕು ಎಂದು ಬಿಜೆಪಿ ರಾಜ್ಯಸಭಾ ಸಂಸದ ಅಜೀತ್ ಮಾಧವರಾವ್ ಗೋಪಚಡೆ ಅವರು ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಮನವಿ ಮಾಡಿದ್ದಾರೆ.
ಪಾಲಿಸಿದಾರರ ಹಿತರಕ್ಷಣೆ: ವಿಮಾ ಕಂಪನಿಗಳು ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿದರೆ, ಸಾಮಾನ್ಯ ಜನರು ಹೂಡಿಕೆ ಮಾಡಿದ ಪ್ರೀಮಿಯಂ ಹಣ ಮತ್ತು ವಿಮಾ ಮೊತ್ತಕ್ಕೆ ಅಪಾಯ ಎದುರಾಗದಂತೆ ಸರ್ಕಾರ ತಕ್ಷಣವೇ ಮಧ್ಯಪ್ರವೇಶಿಸಿ ಕ್ರಮ ತೆಗೆದುಕೊಳ್ಳಬಹುದಾದ ರಕ್ಷಣಾತ್ಮಕ ನಿಯಮಗಳನ್ನು ಜಾರಿಗೆ ತರಬೇಕು ಎಂದು ಈ ಪತ್ರದಲ್ಲಿ ವಿನಂತಿಸಲಾಗಿದೆ.
ಬ್ಯಾಂಕಿಂಗ್ ಮಾದರಿಯ ಸುರಕ್ಷತೆ: ಬ್ಯಾಂಕಿಂಗ್ ಕ್ಷೇತ್ರದಲ್ಲಿ ಠೇವಣಿದಾರರ ಹಣಕ್ಕೆ ‘DICGC’ (ಡಿಪಾಸಿಟ್ ಇನ್ಶೂರೆನ್ಸ್ ಅಂಡ್ ಕ್ರೆಡಿಟ್ ಗ್ಯಾರಂಟಿ ಕಾರ್ಪೊರೇಷನ್) ಮೂಲಕ ನಿರ್ದಿಷ್ಟ ಪ್ರಮಾಣದ ಭದ್ರತೆ ಇರುವಂತೆಯೇ, ಜೀವ ವಿಮಾ ರಂಗದಲ್ಲೂ ಪಾಲಿಸಿದಾರರ ಹೂಡಿಕೆಗೆ ಬಲವಾದ ಗ್ಯಾರಂಟಿ/ಸುರಕ್ಷತಾ ಚೌಕಟ್ಟು ಅಗತ್ಯವಿದೆ ಎಂಬುದನ್ನು ಒತ್ತಿಹೇಳಲಾಗಿದೆ.
ಶಾಸನಾತ್ಮಕವಾದ ಪಾಲಿಸಿದಾರರ ಭದ್ರತಾ ಯೋಜನೆ ರಚಿಸಬೇಕು. ಲೈಫ್ ಇನ್ಷೂರೆನ್ಸ್, ಲಾಂಗ್ ಟರ್ಮ್ ಮತ್ತು ಜನರಲ್ ಇನ್ಷೂರೆನ್ಸ್ ಪಾಲಿಸಿದಾರರಿಗೆ ಬೇರೆ ಬೇರೆ ಮಟ್ಟದ ಪ್ರೊಟೆಕ್ಷನ್ ನಿಯಮಗಳನ್ನು ರಚಿಸಬಹುದು ಎಂದು ಅಜೀತ್ ಮಾಧವರಾವ್ ಅವರು ಸಲಹೆ ನೀಡಿದ್ದಾರೆ.
ಒಂದು ವೇಳೆ, ಇನ್ಷೂರೆನ್ಸ್ ಕಂಪನಿ ದಿವಾಳಿ ಎದ್ದರೆ, ಅದರೊಂದಿಗೆ ಇರುವ ಸಾರ್ವಜನಿಕರ ಇನ್ಷೂರೆನ್ಸ್ ಪಾಲಿಸಿಗಳನ್ನು ಬೇರೆ ವಿಮಾ ಸಂಸ್ಥೆಗೆ ಸಕಾಲಿಕವಾಗಿ ವರ್ಗಾವಣೆ ಮಾಡುವಂತಹ ಒಂದು ವ್ಯವಸ್ಥೆ ರಚಿಸಬೇಕು ಎಂದೂ ಬಿಜೆಪಿ ಸಂಸದರು ಸೆಪ್ಟೆಂಬರ್ 25ರಂದು ಪ್ರಧಾನಿಗೆ ಬರೆದ ಪತ್ರದಲ್ಲಿ ತಿಳಿಸಿದ್ದಾರೆ.
ಇದನ್ನೂ ಓದಿ: ಸುಕನ್ಯಾ ಸಮೃದ್ದಿ, ಕೆವಿಪಿ, ಎನ್ಎಸ್ಸಿ, ಪಿಪಿಎಫ್, ಟೈಮ್ ಡೆಪಾಸಿಟ್ ಸ್ಕೀಮ್ಗಳಿಂದ ಸಿಗುವ ಲಾಭವೆಷ್ಟು? ಇಲ್ಲಿದೆ ಲೆಕ್ಕಾಚಾರ
ಖಾಸಗಿ ವಿಮಾ ವಲಯದ ಬೆಳವಣಿಗೆ: ದೇಶದಲ್ಲಿ ಖಾಸಗಿ ಜೀವ ವಿಮಾ ಕಂಪನಿಗಳ ಸಂಖ್ಯೆ ಹೆಚ್ಚಾಗುತ್ತಿದ್ದು, ನಿಯಂತ್ರಣ ಪ್ರಾಧಿಕಾರವಾದ ‘IRDAI’ ಮೂಲಕ ಪಾಲಿಸಿದಾರರ ಕುಂದುಕೊರತೆ ನಿವಾರಣೆ ಹಾಗೂ ಹಣಕಾಸು ಭದ್ರತೆಯನ್ನು ಇನ್ನಷ್ಟು ಬಿಗಿಗೊಳಿಸಬೇಕಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ