ಸುಕನ್ಯಾ ಸಮೃದ್ದಿ, ಕೆವಿಪಿ, ಎನ್ಎಸ್ಸಿ, ಪಿಪಿಎಫ್, ಟೈಮ್ ಡೆಪಾಸಿಟ್ ಸ್ಕೀಮ್ಗಳಿಂದ ಸಿಗುವ ಲಾಭವೆಷ್ಟು? ಇಲ್ಲಿದೆ ಲೆಕ್ಕಾಚಾರ
ಸುಕನ್ಯಾ ಸಮೃದ್ಧಿ, ಪಿಪಿಎಫ್, ಕೆವಿಪಿ, ಎನ್ಎಸ್ಸಿ ಮತ್ತು ಪೋಸ್ಟ್ ಆಫೀಸ್ ಟೈಮ್ ಡೆಪಾಸಿಟ್ ಯೋಜನೆಗಳು ಎಷ್ಟು ಲಾಭ ತರಬಲ್ಲುವು? ಈ ₹10 ಲಕ್ಷ ಹೂಡಿಕೆ ಮಾಡಿ 20-21 ವರ್ಷಗಳವರೆಗೆ ಕಾಯ್ದುಕೊಂಡರೆ ಸಿಗುವ ರಿಟರ್ನ್ಸ್ನ ಲೆಕ್ಕಾಚಾರ ಇಲ್ಲಿದೆ. ಸುಕನ್ಯಾ ಸಮೃದ್ಧಿ ಮತ್ತು ಪಿಪಿಎಫ್ ಸ್ಕೀಮ್ಗಳಲ್ಲಿ ಕಂತುಗಳಲ್ಲಿ ಹೂಡಿಕೆ ಮಾಡುವುದರಿಂದ ಒಟ್ಟಾರೆ ರಿಟರ್ಸ್ ತುಸು ಕಡಿಮೆ.
Updated on: Oct 01, 2026 | 5:30 PM
ದೀರ್ಘಾವಧಿಯ ಹೂಡಿಕೆಗೆ ಸರ್ಕಾರದ ಸಣ್ಣ ಉಳಿತಾಯ ಯೋಜನೆಗಳು (Small Savings Schemes) ಅತ್ಯಂತ ಸುರಕ್ಷಿತ ಹಾಗೂ ಭರವಸೆಯ ಮಾರ್ಗವಾಗಿವೆ. ಪ್ರಸ್ತುತ ಇವುಗಳಿಗೆ ಶೇ. 8.2ರವರೆಗೂ ಬಡ್ಡಿ ಕೊಡಲಾಗುತ್ತಿದೆ. ಜೊತೆಗೆ ಕೆಲ ಯೋಜನೆಗಳಿಗೆ ತೆರಿಗೆ ಅನುಕೂಲಗಳೂ ಇವೆ. ಪಿಪಿಎಫ್ನಂತಹ ಸ್ಕೀಮ್ಗಳಿಗೆ ಮಾಡುವ ಹೂಡಿಕೆಗಳಿಗೆ ಟ್ಯಾಕ್ಸ್ ಡಿಡಕ್ಷನ್ ಪಡೆಯಬಹುದು. ಈ ಸ್ಕೀಮ್ಗಳು ಬ್ಯಾಂಕುಗಳ ರೆಗ್ಯುಲರ್ ಎಫ್ಡಿಗಳಿಗಿಂತ ಹೆಚ್ಚಿನ ಬಡ್ಡಿ ಕೊಡುತ್ತವೆ. ನೀವು ಈ ಯೋಜನೆಗಳಲ್ಲಿ 20-21 ವರ್ಷ ಹತ್ತು ಲಕ್ಷ ರೂ ಹೂಡಿಕೆ ಮಾಡಿದರೆ ಎಷ್ಟು ಆದಾಯ ಗಳಿಸಬಹುದು ಎನ್ನುವ ಲೆಕ್ಕಾಚಾರ ಇಲ್ಲಿದೆ.
ಗಮನಿಸಬೇಕಾದ ಸಂಗತಿ ಎಂದರೆ, ಇಲ್ಲಿ ಆಯ್ದುಕೊಂಡಿರುವ ಸ್ಮಾಲ್ ಸೇವಿಂಗ್ಸ್ ಸ್ಕೀಮ್ಗಳಲ್ಲಿ ಪಿಪಿಎಫ್ ಮತ್ತು ಸುಕನ್ಯಾ ಸಮೃದ್ಧಿ ಯೋಜನೆಗಳಿಗೆ ವಾರ್ಷಿಕ ಹೂಡಿಕೆ ಮಿತಿ ಇರುತ್ತದೆ. ಕಿಸಾನ್ ವಿಕಾಸ್ ಪತ್ರ ಮೊದಲಾದವು ಫಿಕ್ಸೆಡ್ ಡೆಪಾಸಿಟ್ ರೀತಿ ಲಂಪ್ಸಮ್ ಆಗಿ ಹೂಡಿಕೆ ಮಾಡಬಹುದು. ಈ ಯೋಜನೆಗಳ ವಿವರ ಮತ್ತು ಅವುಗಳಿಂದ ಸಿಗುವ ರಿಟರ್ಸ್ ವಿವರ ಇಲ್ಲಿದೆ:
ಇದನ್ನೂ ಓದಿ: 3ನೇ ಕ್ವಾರ್ಟರ್ಗೆ ಸಣ್ಣ ಉಳಿತಾಯ ಯೋಜನೆಗಳಿಗೆ ಬಡ್ಡಿದರ ಘೋಷಣೆ; ವಿವಿಧ ಸ್ಕೀಮ್ಗಳ ಬಡ್ಡಿದರದಲ್ಲಿ ಇಲ್ಲ ಬದಲಾವಣೆ
1. ಸುಕನ್ಯಾ ಸಮೃದ್ಧಿ ಯೋಜನೆ (SSY)
ಪ್ರಸ್ತುತ ಬಡ್ಡಿದರ: ಶೇ. 8.2 (ವಾರ್ಷಿಕ ಚಕ್ರಬಡ್ಡಿ)
ಅವಧಿ: ಯೋಜನೆ ಅವಧಿ 21 ವರ್ಷಗಳು (ಮೊದಲ 15 ವರ್ಷ ಮಾತ್ರ ಕಂತು ಪಾವತಿ).
ಹೂಡಿಕೆ ವಿವರ: ವಾರ್ಷಿಕ ಗರಿಷ್ಠ ಪರಿಮಿತಿ ₹1.5 ಲಕ್ಷ ಇದೆ. ₹10 ಲಕ್ಷ ಮೊತ್ತವನ್ನು 15 ವರ್ಷಗಳಿಗೆ ಹಂಚಿ (ವರ್ಷಕ್ಕೆ ಸುಮಾರು ₹66,667) ಠೇವಣಿ ಮಾಡಿ 21 ವರ್ಷಗಳವರೆಗೆ ಇರಿಸಿದರೆ, ಯೋಜನೆ ಪರಿಪಕ್ವಗೊಳ್ಳುವಾಗ (21 ನೇ ವರ್ಷದ ಕೊನೆಯಲ್ಲಿ) ಒಟ್ಟು ಮೊತ್ತ ಅಂದಾಜು ₹31.5 ಲಕ್ಷದಿಂದ ₹32 ಲಕ್ಷ ತಲುಪುತ್ತದೆ.
2. ಸಾರ್ವಜನಿಕ ಭವಿಷ್ಯ ನಿಧಿ (PPF)
ಪ್ರಸ್ತುತ ಬಡ್ಡಿದರ: ಶೇ. 7.1 (ವಾರ್ಷಿಕ ಚಕ್ರಬಡ್ಡಿ)
ಅವಧಿ: ಮೂಲ ಅವಧಿ 15 ವರ್ಷ. ನಂತರ ತಲಾ 5 ವರ್ಷಗಳಂತೆ ವಿಸ್ತರಿಸಬಹುದು.
ಹೂಡಿಕೆ ವಿವರ: ಪ್ರತಿ ವರ್ಷ ₹66,667 ರಂತೆ 15 ವರ್ಷ ಹೂಡಿಕೆ ಮಾಡಿ (ಒಟ್ಟು ₹10 ಲಕ್ಷ ಮೂಲಧನ), ನಂತರ ಹೆಚ್ಚುವರಿ ಹೂಡಿಕೆ ಮಾಡದೇ ಕೇವಲ ಬಡ್ಡಿಗೆ 21 ವರ್ಷಗಳವರೆಗೆ ಬಿಟ್ಟರೆ, ಕೊನೆಯಲ್ಲಿ ಒಟ್ಟು ಮೊತ್ತ ಸುಮಾರು ₹27.5 ಲಕ್ಷದಿಂದ ₹28 ಲಕ್ಷ ತಲುಪುತ್ತದೆ.
3. ಕಿಸಾನ್ ವಿಕಾಸ ಪತ್ರ (KVP)
ಪ್ರಸ್ತುತ ಬಡ್ಡಿದರ: ಶೇ. 7.5 (ವಾರ್ಷಿಕ ಚಕ್ರಬಡ್ಡಿ)
ಅವಧಿ: 115 ತಿಂಗಳುಗಳಲ್ಲಿ (9 ವರ್ಷ 7 ತಿಂಗಳು) ಹಣ ದ್ವಿಗುಣಗೊಳ್ಳುತ್ತದೆ.
ಹೂಡಿಕೆ ವಿವರ: ಆರಂಭಿಕ ₹10 ಲಕ್ಷವು 115 ತಿಂಗಳಿಗೆ ₹20 ಲಕ್ಷವಾಗುತ್ತದೆ. ಆ ₹20 ಲಕ್ಷವನ್ನು ಮುಂದಿನ 115 ತಿಂಗಳಿಗೆ (ಒಟ್ಟು 230 ತಿಂಗಳು) ಮರುಹೂಡಿಕೆ ಮಾಡಿದರೆ ₹40 ಲಕ್ಷ ತಲುಪುತ್ತದೆ.
4. ರಾಷ್ಟ್ರೀಯ ಉಳಿತಾಯ ಪತ್ರ (NSC)
ಪ್ರಸ್ತುತ ಬಡ್ಡಿದರ: ಶೇ. 7.7 (ವಾರ್ಷಿಕ ಚಕ್ರಬಡ್ಡಿ)
ಅವಧಿ: 5 ವರ್ಷಗಳ ಯೋಜನೆ.
ಹೂಡಿಕೆ ವಿವರ: ₹10 ಲಕ್ಷವನ್ನು ಪ್ರತಿ 5 ವರ್ಷಕ್ಕೊಮ್ಮೆ ಸತತವಾಗಿ 4 ಬಾರಿ (20 ವರ್ಷಗಳು) ಮರುಹೂಡಿಕೆ ಮಾಡುತ್ತಾ ಹೋದರೆ, 20 ನೇ ವರ್ಷದ ಅಂತ್ಯಕ್ಕೆ ಈ ಮೊತ್ತವು ಅಂದಾಜು ₹44.2 ಲಕ್ಷ ತಲುಪುತ್ತದೆ. (21 ನೇ ವರ್ಷದ ವೇಳೆಗೆ ಇದು ಸುಮಾರು ₹47.6 ಲಕ್ಷ ತಲುಪುವ ಸಾಮರ್ಥ್ಯ ಹೊಂದಿದೆ.
5. ಪೋಸ್ಟ್ ಆಫೀಸ್ 5 ವರ್ಷಗಳ ಟೈಮ್ ಡೆಪಾಸಿಟ್ (PO Time Deposit)
ಪ್ರಸ್ತುತ ಬಡ್ಡಿದರ: ಶೇ. 7.5 (ವಾರ್ಷಿಕ ಚಕ್ರಬಡ್ಡಿ ಲೆಕ್ಕಾಚಾರ)
ಅವಧಿ ನಿಯಮ: 5 ವರ್ಷಗಳ ಅವಧಿ.
ಹೂಡಿಕೆ ವಿವರ: ₹10 ಲಕ್ಷವನ್ನು 5 ವರ್ಷಗಳ ಅವಧಿಗೆ ಹೂಡಿಕೆ ಮಾಡಿ, ಬಡ್ಡಿಯನ್ನು ಹಿಂಪಡೆಯದೆ ಸತತ 4 ಅವಧಿಗಳಿಗೆ (20 ವರ್ಷಗಳು) ಮರುಹೂಡಿಕೆ ಮಾಡಿದರೆ ಅಂದಾಜು ₹42.4 ಲಕ್ಷ ತಲುಪುತ್ತದೆ. 21 ನೇ ವರ್ಷದ ವೇಳೆಗೆ ಒಟ್ಟು ಮೊತ್ತ ಸುಮಾರು ₹45.6 ಲಕ್ಷ ಆಗುತ್ತದೆ.
ವಿವಿಧ ಯೋಜನೆಗಳಲ್ಲಿ 20-21 ವರ್ಷಕ್ಕೆ 10 ಲಕ್ಷ ರೂ ಹೂಡಿಕೆ ಮಾಡಿದರೆ ಸಿಗುವ ರಿಟರ್ನ್
| ಯೋಜನೆ ಹೆಸರು | ಸಂಭಾವ್ಯ ಆದಾಯ |
| ರಾಷ್ಟ್ರೀಯ ಉಳಿತಾಯ ಪತ್ರ (NSC) | 20 ವರ್ಷಕ್ಕೆ ₹44 ಲಕ್ಷ |
| ಪೋಸ್ಟ್ ಆಫೀಸ್ ಟೈಮ್ ಡೆಪಾಸಿಟ್ (5 ವರ್ಷ) | 21 ವರ್ಷಕ್ಕೆ ₹45.6 ಲಕ್ಷ |
| ಕಿಸಾನ್ ವಿಕಾಸ ಪತ್ರ (KVP) | 19 ವರ್ಷಕ್ಕೆ ₹40 ಲಕ್ಷ |
| ಸುಕನ್ಯಾ ಸಮೃದ್ಧಿ ಯೋಜನೆ (SSY) | 21 ವರ್ಷಕ್ಕೆ ₹31.5 – ₹32.0 ಲಕ್ಷ |
| ಸಾರ್ವಜನಿಕ ಭವಿಷ್ಯ ನಿಧಿ (PPF) | ₹27.5 – ₹28.0 ಲಕ್ಷ |
NSC, 5-Year TD ಮತ್ತು KVP ಯೋಜನೆಗಳಲ್ಲಿ ಆರಂಭದಲ್ಲೇ ₹10 ಲಕ್ಷದ ಪೂರ್ಣ ಮೊತ್ತವನ್ನು ಒಟ್ಟಿಗೆ (Lump sum) ಹೂಡಿಕೆ ಮಾಡಲು ಅವಕಾಶವಿರುವುದರಿಂದ, ಚಕ್ರಬಡ್ಡಿಯ ಆಧಾರದ ಮೇಲೆ ಅವುಗಳ ಆದಾಯದ ಮೊತ್ತ ಹೆಚ್ಚಾಗಿ ಕಾಣಿಸುತ್ತದೆ. ಆದರೆ, ಸುಕನ್ಯಾ ಸಮೃದ್ಧಿ ಮತ್ತು PPF ಯೋಜನೆಗಳಲ್ಲಿ ವಾರ್ಷಿಕ ಗರಿಷ್ಠ ₹1.5 ಲಕ್ಷದ ಮಿತಿ ಇರುವುದರಿಂದ, ₹10 ಲಕ್ಷವನ್ನು 15 ವರ್ಷಗಳ ಕಂತುಗಳಲ್ಲಿ ವಿಂಗಡಿಸಿ ಹೂಡಿಕೆ ಮಾಡಬೇಕಾಗುತ್ತದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
