YouTube: ಭಾರತದ ಜಿಡಿಪಿಗೆ 2021ರಲ್ಲಿ ಯೂಟ್ಯೂಬರ್​ಗಳಿಂದ 10 ಸಾವಿರ ಕೋಟಿ ರೂ. ಕೊಡುಗೆ; ವರದಿ

ನವದೆಹಲಿ: ಉದ್ಯಮ ಪೂರಕ ವಾತಾವರಣದೊಂದಿಗೆ ಭಾರತದಲ್ಲಿ (India) ಹೆಚ್ಚು ಸ್ಪರ್ಧಾತ್ಮಕವಾಗಿ ಕಾರ್ಯನಿರ್ವಹಿಸುತ್ತಿರುವ ಯೂಟ್ಯೂಬ್ (YouTube) 2021ರಲ್ಲಿ ಜಿಡಿಪಿಗೆ 10,000 ಕೋಟಿ ರೂ. ಕೊಡುಗೆ ನೀಡಿದೆ ಎಂದು ವರದಿಯಾಗಿದೆ. ತಂತ್ರಜ್ಞಾನ ಕಂಪನಿಗಳು, ದೇಶೀಯ ಇಂಟರ್​ನೆಟ್ ಸಂಸ್ಥೆಗಳೊಂದಿಗೆ ಪೈಪೋಟಿಗೆ ಇಳಿದಿರುವ ಯೂಟ್ಯೂಬ್ ಹೆಚ್ಚಿನ ಸಂಖ್ಯೆಯಲ್ಲಿ ಜನರು ತಮ್ಮದೇ ಚಾನೆಲ್​ಗಳನ್ನು ಸೃಷ್ಟಿಸಲು ಪ್ರೋತ್ಸಾಹಿಸುತ್ತಿದೆ. ಈ ಮೂಲಕ ಕ್ರಿಯೇಟರ್​ಗಳನ್ನು ಸೆಳೆಯುತ್ತಿದೆ. ಸುಮಾರು 7.5 ಲಕ್ಷ ಪೂರ್ಣಾವಧಿಯ ಉದ್ಯೋಗ ಸೃಷ್ಟಿಸಿದೆ ಎಂದು ಕನ್ಸಲ್ಟಿಂಗ್ ಸಂಸ್ಥೆ ‘ಆಕ್ಸ್​ಫರ್ಡ್ ಎಕನಾಮಿಕ್ಸ್’​ನ ವರದಿ ತಿಳಿಸಿದೆ. 2020ರ ಮಾರ್ಚ್​​ 3ರಿಂದ 2022ರ ವರೆಗಿನ ದತ್ತಾಂಶಗಳನ್ನು ಪರಿಗಣಿಸಿಕೊಂಡು ಈ ವರದಿ ಸಿದ್ಧಪಡಿಸಲಾಗಿದೆ.

2020ರಲ್ಲಿ ಯೂಟ್ಯೂಬ್ ವ್ಯವಸ್ಥೆಯು ಭಾರತದ ಜಿಡಿಪಿಗೆ 6,800 ಕೋಟಿ ರೂ. ಕೊಡುಗೆ ನೀಡಿದೆ. 6,83,900 ಪೂರ್ಣಾವಧಿ ಉದ್ಯೋಗ ಸೃಷ್ಟಿಗೆ ನೆರವಾಗಿದೆ ಎಂದು ವರದಿ ತಿಳಿಸಿದೆ.

ಯೂಟ್ಯೂಬರ್​ಗಳ ಸೃಷ್ಟಿಗೆ ಪೂರಕ ವಾತಾವರಣದ ಮೂಲಕ ಭಾರತದ ಆರ್ಥಿಕತೆಗೆ ಯೂಟ್ಯೂಬ್​ ಬಲ ತುಂಬುತ್ತಿರುವುದು ಮತ್ತು ಉದ್ಯೋಗಾವಕಾಶಗಳನ್ನು ಸೃಷ್ಟಿಸುತ್ತಿರುವುದು ಸಂತಸ ಮೂಡಿಸಿದೆ. ವೀಕ್ಷಕರ ಜತೆ ತೊಡಗಿಸಿಕೊಳ್ಳಲು ಹೊಸ ವಿಧಾನಗಳನ್ನು ಕ್ರಿಯೇಟರ್​​ಗಳಿಗೆ ನೀಡುವ ಮೂಲಕ ನಾವು ಬಹು ದೂರ ಕ್ರಮಿಸಿದ್ದೇವೆ ಎಂದು ಯೂಟ್ಯೂಬ್​ನ ದಕ್ಷಿಣ, ಆಗ್ನೇಯ ಏಷ್ಯಾ ವಿಭಾಗದ ನಿರ್ದೇಶಕ ಅಜಯ್ ವಿದ್ಯಾಸಾಗರ್ ತಿಳಿಸಿದ್ದಾರೆ.

ಇದನ್ನೂ ಓದಿ: No Cost EMI: ನೋ ಕಾಸ್ಟ್ ಇಎಂಐ ಆಯ್ಕೆ ಮಾಡುವ ಮುನ್ನ ಈ ವಿಚಾರಗಳನ್ನು ತಿಳಿದಿರಿ

ಈ ವರ್ಷ 5,633 ಮಂದಿಯನ್ನು ಸಮೀಕ್ಷೆಗೆ ಒಳಪಡಿಸಲಾಗಿದೆ. ಈ ಪೈಕಿ 523 ಉದ್ಯಮಗಳು ಹಾಗೂ 4,021 ಯೂಟ್ಯೂಬ್ ಬಳಕೆದಾರರು ಎಂದು ‘ಆಕ್ಸ್​ಫರ್ಡ್ ಎಕನಾಮಿಕ್ಸ್’ ವರದಿ ತಿಳಿಸಿದೆ. 10,000 ಸಬ್​ಸ್ಕ್ರೈಬರ್​ಗಳನ್ನು ಹೊಂದಿರುವ ಯೂಟ್ಯೂಬರ್​ಗಳು ತಮ್ಮ ವಿಡಿಯೊಗಳಿಗೆ ಯೂಟ್ಯೂಬ್​ನಿಂದ ಮತ್ತು ಇತರ ಮೂಲಗಳಿಂದ ಆದಾಯ ಗಳಿಸಲು ಯೂಟ್ಯೂಬ್ ಅನುವು ಮಾಡಿಕೊಟ್ಟಿದೆ ಎಂದು ಗೂಗಲ್ ತಿಳಿಸಿದೆ. 10,000ಕ್ಕಿಂತ ಕಡಿಮೆ ಸಬ್​​ಸ್ಕ್ರೈಬರ್​ ಇರುವ ಕೆಲವು ಯೂಟ್ಯೂಬರ್​ಗಳಿಗೂ ಆದಾಯ ಗಳಿಸಲು ಅವಕಾಶ ನೀಡಲಾಗಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿ ಓದಲು ಇಲ್ಲಿ ಕ್ಲಿಕ್ ಮಾಡಿ