ಕೊರೊನಾ ಸಂಕಷ್ಟ ಕಾಲದಲ್ಲೂ ಕೈಯೊಡ್ಡಿದ ಪೊಲೀಸಪ್ಪ ಸಸ್ಪೆಂಡ್

ವಿಜಯಪುರ: ಕೊರೊನಾ ಸಂಕಷ್ಟ ಕಾಲದಲ್ಲೂ ಲೆಕ್ಕಿಸದೆ ಕೈಯೊಡ್ಡಿದ ಪೊಲೀಸ್ ಅಧಿಕಾರಿಗಳ ಸಂಖ್ಯೆ ಹೆಚ್ಚಾಗುತ್ತಿದ್ದು, ಇಂದೂ ಒಬ್ಬ ಪೊಲೀಸಪ್ಪ ಸಸ್ಪೆಂಡ್ ಆಗಿ ಮನೆ ಸೇರಿದ್ದಾರೆ. ರಾಜ್ಯದಲ್ಲಿ ಇದುವರೆಗೂ ಸುಮಾರು 50ಕ್ಕೂ ಹೆಚ್ಚು ಮಂದಿ ಹೀಗೆ ಕೈಯೊಡ್ಡಿ, ಕರ್ತವ್ಯ ನಿರ್ಲಕ್ಷಿಸಿ ಮನೆ ಸೇರಿಕೊಂಡಿದ್ದಾರೆ.

ಭೀಮಾತೀರದ ಚಡಚಣ ಪೊಲೀಸ್ ಠಾಣೆಯ ವಿವಾದಿತ PSI ಮಹಾದೇವ ಯಲಿಗಾರ ಅಮಾನತಾಗಿದ್ದಾರೆ. ಇವರು ಇತ್ತೀಚೆಗಷ್ಟೇ ಚಡಚಣದಿಂದ ವಿಜಯಪುರ ಎಸ್​ಪಿ ಕಚೇರಿಗೆ ಒಒಡಿ ಮೇಲೆ ವರ್ಗಾವಣೆಯಾಗಿದ್ದರು. ಆದರೆ, ಎಸ್​ಪಿ ಕಚೇರಿಗೆ ಮಹಾದೇವ ಹಾಜರಾಗಲಿಲ್ಲ.

ಚಡಚಣ ತಾಲೂಕಿನ ಜಿಗಜೇವಣಗಿ, ದೇವರನಿಂಬರಗಿಯಲ್ಲಿ ಕೊರೊನಾ ವಾರಿಯರ್ಸ್ ಕೃತಜ್ಞತೆ ಸಮಾರಂಭದಲ್ಲಿ PSI ಮಹಾದೇವ ಭಾಗಿಯಾಗಿದ್ದರು. ಅಂದು ಸಾಮಾಜಿಕ ಅಂತರ ಸೇರಿದಂತೆ ಯಾವುದೇ ಮುನ್ನೆಚ್ಚರಿಕೆ ಕ್ರಮಗಳನ್ನು ಕೈಗೊಂಡಿರಲಿಲ್ಲ. ಅಷ್ಟೇ ಅಲ್ಲದೆ ಚಡಚಣ ಎಪಿಎಂಸಿ ವರ್ತಕರಿಂದ, ವ್ಯಾಪಾರಸ್ಥರಿಂದ ಬಡವರಿಗೆ ಆಹಾರ ಹಂಚುವುದಾಗಿ 50 ಸಾವಿರ ರೂಪಾಯಿ ಬಲವಂತವಾಗಿ ಹಣ, ಆಹಾರ ಕಿಟ್ ಪಡೆದ ಆರೋಪವಿತ್ತು.

ಇದರಿಂದ ಪೊಲೀಸ್ ಇಲಾಖೆಯ ಘನತೆಗೆ ಪೆಟ್ಟು ಬಿದ್ದಿತ್ತು. ಹಾಗಾಗಿ ಏ.8ರಂದು ಎಸ್​ಪಿ ಕಚೇರಿಗೆ ಒಒಡಿ ಮೇಲೆ ವರ್ಗವಣೆ ಮಾಡಲಾಗಿತ್ತು. ಆದರೆ, ವಿಜಯಪುರ ಎಸ್​ಪಿ ಕಚೇರಿಗೆ ಮಹಾದೇವ ಹಾಜರಾಗಲಿಲ್ಲ. ಈ ಹಿನ್ನೆಲೆಯಲ್ಲಿ ಇಲಾಖೆ ವಿಚಾರಣೆ ಬಾಕಿ ಇರಿಸಿ ಸೇವೆಯಿಂದ ಅಮಾನತು ಮಾಡಿ ಎಸ್​ಪಿ ಅನುಪಮ ಅಗ್ರವಾಲ್ ಆದೇಶಿಸಿದ್ದಾರೆ.

Published On - 5:25 pm, Wed, 13 May 20