Rakhi Sawant: ರಾಖಿ ಸಾವಂತ್​ ಪತಿ ಆದಿಲ್ ಖಾನ್​ ಬಂಧನ; ‘ಸಾಯೋ ತನಕ ಕ್ಷಮಿಸಲ್ಲ’ ಎಂದು ತುತ್ತು ತಿನ್ನಿಸಿದ ನಟಿ

ನಟಿ ರಾಖಿ ಸಾವಂತ್​ (Rakhi Sawant) ಅವರು ಕೇವಲ ವಿವಾದಗಳಿಂದಲೇ ಸುದ್ದಿ ಆಗುತ್ತಿದ್ದಾರೆ. ಅವರ ವೈಯಕ್ತಿಕ ಜೀವನದಲ್ಲಿ ಬಿರುಗಾಳಿ ಎದ್ದಿದೆ. ಕೆಲವೇ ತಿಂಗಳ ಹಿಂದೆ ಆದಿಲ್​ ಖಾನ್​ ಜೊತೆ ರಾಖಿ ಸಾವಂತ್​ ಮದುವೆ ನೆರವೇರಿತ್ತು. ಆದರೆ ಈಗ ಅವರ ಸಂಸಾರದಲ್ಲಿ ಬಿರುಕು ಮೂಡಿದೆ. ಗಂಡ-ಹೆಂಡತಿ ನಡುವಿನ ಗಲಾಟೆ ಬೀದಿಗೆ ಬಂದಿದೆ. ಅಷ್ಟೇ ಅಲ್ಲ, ಪತಿ ಆದಿಲ್​ ಖಾನ್​ ವಿರುದ್ಧ ರಾಖಿ ಸಾವಂತ್​ ಅವರು ದೂರು ದಾಖಲಿಸಿದ್ದಾರೆ. ಮುಂಬೈನ ಓಶಿವರ ಪೊಲೀಸರು ಆದಿಲ್​ ಖಾನ್​ (Adil Khan) ಅವರನ್ನು ಬಂಧಿಸಿದ್ದಾರೆ. ಈ ಕುರಿತು ಸ್ವತಃ ರಾಖಿ ಸಾವಂತ್​ ಅವರು ಮಾಧ್ಯಮಗಳ ಜೊತೆ ಮಾಹಿತಿ ಹಂಚಿಕೊಂಡಿದ್ದಾರೆ. ಅದರ ಜೊತೆಗೆ ಅವರ ಒಂದು ವಿಡಿಯೋ (Rakhi Sawant Viral Video) ವೈರಲ್​ ಆಗಿದೆ. ಪತಿಗೆ ಅವರು ತುತ್ತು ತಿನ್ನಿಸಿದ ದೃಶ್ಯ ಆ ವಿಡಿಯೋದಲ್ಲಿದೆ.

ರಾಖಿ ಸಾವಂತ್​ ಮತ್ತು ಆದಿಲ್​ ಖಾನ್​ ನಡುವಿನ ಸಂಬಂಧದಲ್ಲಿ ಸಮಸ್ಯೆ ಎದುರಾಗಿದೆ. ಪರಸ್ತ್ರೀ ಜೊತೆ ಆದಿಲ್​ ಖಾನ್​ ಅಫೇರ್​ ಇಟ್ಟುಕೊಂಡಿದ್ದಾರೆ ಎಂದು ರಾಖಿ ಸಾವಂತ್​ ಆರೋಪಿಸಿದ್ದಾರೆ. ‘ಇದು ನಾಟಕ ಅಲ್ಲ. ಅವನು ನನ್ನ ಜೀವನ ಹಾಳು ಮಾಡಿದ್ದಾನೆ. ನನಗೆ ಹೊಡೆದಿದ್ದಾನೆ. ನನ್ನ ಹಣ ಕದ್ದಿದ್ದಾನೆ. ಆತ ಖುರಾನ್​ ಮೇಲೆ ಪ್ರಮಾಣ ಮಾಡಿದ್ದರೂ ಕೂಡ ನಂತರ ನನಗೆ ಮೋಸ ಮಾಡಿದ’ ಎಂದು ರಾಖಿ ಸಾವಂತ್​ ಹೇಳಿದ್ದಾರೆ.

ಇದನ್ನೂ ಓದಿ: Rakhi Sawant: ಬೀದಿಗೆ ಬಂತು ಆದಿಲ್​ ಖಾನ್​-ರಾಖಿ ಸಾವಂತ್​ ಮದುವೆ ಗಲಾಟೆ; ಪತಿ ಮೇಲೆ ಅನೈತಿಕ ಸಂಬಂಧದ ಆರೋಪ

ಕಳೆದ ಕೆಲವು ದಿನಗಳಿಂದ ರಾಖಿ ಸಾವಂತ್​ ಮತ್ತು ಆದಿಲ್​ ಖಾನ್​ ನಡುವೆ ಜಟಾಪಟಿ ನಡೆಯುತ್ತಲೇ ಇತ್ತು. ಸೋಮವಾರ (ಫೆ.6) ರಾತ್ರಿ ಇಬ್ಬರೂ ಒಂದೆಡೆ ಭೇಟಿ ಆಗಿದ್ದಾರೆ. ಒಟ್ಟಿಗೆ ಕುಳಿತು ಊಟ ಮಾಡಿದ್ದಾರೆ. ಈ ವೇಳೆ ಪತಿಗೆ ರಾಖಿ ಸಾವಂತ್​ ತುತ್ತು ತಿನ್ನಿಸಿದ್ದಾರೆ. ಇಷ್ಟೆಲ್ಲ ನಡೆದ ನಂತರ ಆದಿಲ್​ ಖಾನ್​ ಬಂಧನವಾಗಿದೆ.

ಈ ರೀತಿ ಕಿರಿಕ್ ಮಾಡಿಕೊಂಡಿರುವಾಗ ಪತಿಗೆ ತುತ್ತು ತಿನ್ನಿಸಿದ್ದು ಯಾಕೆ ಎಂಬ ಬಗ್ಗೆ ರಾಖಿ ಸಾವಂತ್ ಪ್ರತಿಕ್ರಿಯೆ ನೀಡಿದ್ದಾರೆ. ‘ಮನೆಯಲ್ಲಿ ನಾನು ಅವನಿಗೆ ಯಾವಾಗಲೂ ಊಟ ಮಾಡಿಸುತ್ತಿದ್ದೆ. ಶತ್ರುಗಳು ಮನೆಗೆ ಬಂದಾಗಲೂ ನೀರು ಕೊಡುತ್ತೇವೆ. ಈತ ನನ್ನ ಗಂಡ. ಸಾಯೋ ತನಕ ಅವನನ್ನು ಪ್ರೀತಿಸುತ್ತೇನೆ. ಆದರೆ ಎಂದಿಗೂ ಕ್ಷಮಿಸುವುದಿಲ್ಲ’ ಎಂದು ರಾಖಿ ಸಾವಂತ್​ ಹೇಳಿದ್ದಾರೆ.

ಈ ವಿಡಿಯೋಗಳನ್ನು ನೋಡಿ ನೆಟ್ಟಿಗರು ಬಗೆಬಗೆಯಲ್ಲಿ ಪ್ರತಿಕ್ರಿಯಿಸಿದ್ದಾರೆ. ಇವರ ವರ್ತನೆ ಅರ್ಥವೇ ಆಗುವುದಿಲ್ಲ ಎಂದು ಅನೇಕರು ಕಮೆಂಟ್​ ಮಾಡುತ್ತಿದ್ದಾರೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.