Natu-Natu: ಆಸ್ಕರ್ ವೇದಿಕೆ ಮೇಲೆ ನಾಟು-ನಾಟುಗೆ ಕುಣಿಯಲಿದ್ದಾರೆ ಈ ಯುವತಿ: ಯಾರೀಕೆ?
ಆಸ್ಕರ್ ವೇದಿಕೆ ಮೇಲೆ 'ನಾಟು-ನಾಟು' ಹಾಡಿಗೆ ಕುಣಿಯಲಿರುವ ಯುವತಿ ಈಕೆಯೇ? ಭಾರತದ ಸಿನಿಮಾ ಹಾಗೂ ನೃತ್ಯ ಪ್ರಿಯರಿಗೆ ಈ ಯುವತಿ ಅಪರಿಚತರೇನಲ್ಲ! ಹಾಗಿದ್ದರೆ ಯಾರೀಕೆ?
ಕೆಲವೇ ಗಂಟೆಗಳಲ್ಲಿ ಆಸ್ಕರ್ 2023 (Oscars 2023) ಪ್ರಶಸ್ತಿ ಪ್ರದಾನ ಸಮಾರಂಭ ಲಾಸ್ ಏಂಜಲ್ಸ್ನಲ್ಲಿ ಆರಂಭವಾಗಲಿದೆ. ಈ ಬಾರಿ ತೆಲುಗಿನ ಆರ್ಆರ್ಆರ್ (RRR) ಸಿನಿಮಾದ ನಾಟು-ನಾಟು (Natu Natu) ಹಾಡು ನಾಮಿನೇಟ್ ಆಗಿದ್ದು ಪ್ರಶಸ್ತಿ ಗೆಲ್ಲುವ ನಿರೀಕ್ಷೆ ಮೂಡಿಸಿದೆ. ಮಾತ್ರವಲ್ಲ ಆಸ್ಕರ್ ವೇದಿಕೆ ಮೇಲೆ ನಾಟು-ನಾಟು ಹಾಡಿನ ಲೈವ್ ಫರ್ಮಾರ್ಮೆನ್ಸ್ ಸಹ ನಡೆಯಲಿದೆ. ಗಾಯಕರಾದ ರಾಹುಲ್ ಸಿಪ್ಲಿಗಂಜ ಹಾಗೂ ಕಾಲಭೈರವ ವೇದಿಕೆ ಮೇಲೆ ಹಾಡು ಹಾಡಲಿದ್ದಾರೆ. ಆದರೆ ಹಾಡಿಗೆ ಕುಣಿಯುತ್ತಿರುವುದು ಜೂ ಎನ್ಟಿಆರ್-ರಾಮ್ ಚರಣ್ ಅಲ್ಲ ಬದಲಿಗೆ ಅಮೆರಿಕದ ಯುವತಿ!
ಹೌದು, ಜೂ.ಎನ್ಟಿಆರ್ ಹಾಗೂ ರಾಮ್ ಚರಣ್ ಅವರುಗಳು ನಾಟು-ನಾಟು ಹಾಡಿಗೆ ನರ್ತಿಸುತ್ತಾರೆ ಎನ್ನಲಾಗಿತ್ತು. ಆದರೆ ರಿಹರ್ಸಲ್ಗೆ ಸಾಕಷ್ಟು ಸಮಯ ಧಕ್ಕುವುದಿಲ್ಲ ಎಂಬ ಕಾರಣಕ್ಕೆ ಅವರು ನೃತ್ಯ ಮಾಡುವ ಅವಕಾಶವನ್ನು ಕೈಬಿಟ್ಟರು. ಆ ಅವಕಾಶ ಅಮೆರಿಕದ ನಟಿ ಹಾಗೂ ಡ್ಯಾನ್ಸರ್ ಲಾರೆನ್ ಗೋತ್ಲಿಬ್ ಪಾಲಾಗಿದೆ. ಬಳ್ಳಿಯಂತೆ ಬಳುಕಬಲ್ಲ ಅಮೆರಿಕದ ಈ ಚೆಲುವೆ ಭಾರತದ ಸಿನಿಮಾ ಪ್ರೇಕ್ಷಕರಿಗೆ, ನೃತ್ಯ ಪ್ರೇಮಿಗಳಿಗೆ ಹೊಸಬರೇನೂ ಅಲ್ಲ.
ಅಮೆರಿಕದ ಜನಪ್ರಿಯ ಡ್ಯಾನ್ಸರ್ಗಳಲ್ಲಿ ಒಬ್ಬರಾಗಿರುವ ಲಾರೆನ್ ಭಾರತದ ಜನಪ್ರಿಯ ಡ್ಯಾನ್ಸ್ ರಿಯಾಲಿಟಿ ಶೋ ಝಲಕ್ ದಿಕ್ಲಾಜಾ ನಲ್ಲಿ 2013 ರಲ್ಲಿ ಭಾಗವಹಿಸಿ ರನ್ನರ್ ಅಪ್ ಆದರು. ಅದೇ ವರ್ಷ ಅವರು ಪ್ರಭುದೇವ ನಟಸಿ, ರೆಮೊ ಡಿಸೋಜಾ ನಿರ್ದೇಶನ ಮಾಡಿದ್ದ ‘ಎಬಿಸಿಡಿ’ ಸಿನಿಮಾದಲ್ಲಿಯೂ ನಟಿಸಿದರು. ಆ ಬಳಿಕ ಸಾಲು ಸಾಲು ಹಿಂದಿ ಸಿನಿಮಾ ಹಾಗೂ ಟಿವಿ ಕಾರ್ಯಕ್ರಮಗಳಲ್ಲಿ ಕಾಣಿಸಿಕೊಳ್ಳುತ್ತಲೇ ಬಂದಿದ್ದಾರೆ.
ತಮಗೆ ನಾಟು-ನಾಟು ಹಾಡಿಗೆ ಆಸ್ಕರ್ನಲ್ಲಿ ನರ್ತಿಸುವ ಅವಕಾಶ ದೊರತಿರುವ ಬಗ್ಗೆ ಸಾಮಾಜಿಕ ಜಾಲತಾಣದಲ್ಲಿ ಖುಷಿ ಹಂಚಿಕೊಂಡಿದ್ದ ಲಾರೆನ್, ”ವಿಶೇಷ ಸುದ್ದಿ, ನಾನು ಆಸ್ಕರ್ನಲ್ಲಿ ನಾಟು-ನಾಟು ಹಾಡಿಗೆ ವಿಶೇಷ ಪ್ರದರ್ಶನ ನೀಡಲಿದ್ದೇನೆ. ವಿಶ್ವದ ಅತ್ಯಂತ ಪ್ರತಿಷ್ಠಿತ ವೇದಿಕೆಯಲ್ಲಿ ಭಾರತವನ್ನು ಪ್ರತಿನಿಧಿಸಲು ಉತ್ಸುಕಳಾಗಿದ್ದೇನೆ. ನಿಮ್ಮ ಶುಭ ಹಾರೈಕೆಗಳಿರಲಿ” ಎಂದು ಬರೆದುಕೊಂಡಿದ್ದರು. ಭಾರತದ ಕೆಲವು ಸೆಲೆಬ್ರಿಟಿಗಳು ಸೇರಿದಂತೆ ಹಲವರು ಲಾರೆನ್ಗೆ ಶುಭಾಶಯ ತಿಳಿಸಿದ್ದರು.
ಅಂತೆಯೇ ನಾಟು-ನಾಟು ಹಾಡಿಗೆ ತಾವು ತಮ್ಮ ತಂಡದೊಂದಿಗೆ ತಾಲೀಮು ಮಾಡುತ್ತಿರುವ ಕೆಲವು ವಿಡಿಯೋಗಳನ್ನು ಸಹ ಲಾರೆನ್ ಹಂಚಿಕೊಂಡಿದ್ದರು. ಮಾರ್ಚ್ 12 ರಂದು (ಭಾರತದ ಕಾಲಮಾನದಂತೆ ಮಾರ್ಚ್ 13) ಲಾಸ್ ಏಂಜಲಸ್ನ ಆಸ್ಕರ್ ಮುಖ್ಯ ವೇದಿಕೆಯಲ್ಲಿ ತಮ್ಮ ತಂಡದೊಂದಿಗೆ ಲಾರೆನ್ ನಾಟು-ನಾಟು ಹಾಡಿಗೆ ಕುಣಿಯಲಿದ್ದಾರೆ. ಹಾಡನ್ನು ಗಾಯಕರಾದ ರಾಹುಲ್ ಸಿಪ್ಲಿಗಂಜ್ ಹಾಗೂ ಕಾಲಭೈರವ ಹಾಡಲಿದ್ದಾರೆ.
ಲಾರೆನ್, ಹಿಂದಿಯ ಎಬಿಸಿಡಿ ಸಿನಿಮಾ ಮಾತ್ರವೇ ಅಲ್ಲದೆ, ಸುಶಾಂತ್ ರಜಪೂತ್ ನಟಿಸಿದ್ದ ಡಿಟೆಕ್ಟಿವ್ ಬ್ಯೂಮಕೇಶ ಬಕ್ಷಿ, ವರುಣ್ ಧವನ್ ನಟನೆಯ ಎಬಿಸಿಡಿ 2, ಅರ್ಷದ್ ವಾರ್ಸಿ ನಟನೆಯ ವೆಲ್ಕಮ್ ಟು ಕರಾಚಿ, ಪಂಜಾಬಿ ಸಿನಿಮಾ ಅಂಬರಸರಿಯಾ, ನವಾಜುದ್ದೀನ್ ಸಿದ್ಧಿಕಿ ನಟನೆಯ ಗೂಮ್ಕೇತು ಸಿನಿಮಾಗಳಲ್ಲಿ ವಿಶೇಷ ಹಾಡುಗಳಲ್ಲಿ ಕುಣಿದಿದ್ದಾರೆ ಕೆಲವು ಸಿನಿಮಾಗಳಲ್ಲಿ ಪೋಷಕ ಪಾತ್ರಗಳಲ್ಲಿ ನಟಿಸಿದ್ದಾರೆ. ಝಲಕ್ ದಿಖ್ಲಾಜಾ, ಬಿಗ್ಬಾಸ್ ಸೇರಿದಂತೆ ಹಲವು ಹಿಂದಿ ಟಿವಿ ಶೋಗಳಲ್ಲಿಯೂ ಈ ಡ್ಯಾನ್ಸರ್ ಕಾಣಿಸಿಕೊಂಡಿದ್ದಾರೆ. ಕೆಲವು ಇಂಗ್ಲೀಷ್ ಸಿನಿಮಾಗಳಲ್ಲಿಯೂ ಲಾರೆನ್ ನಟಿಸಿದ್ದಾರೆ.