ಫಹಾದ್ ಫಾಸಿಲ್ ಜನಪ್ರಿಯತೆಯನ್ನು ಮುಕ್ತಕಂಠದಿಂದ ಶ್ಲಾಘಿಸಿದ ರಾಜಮೌಳಿ

ಫಹಾದ್ ಫಾಸಿಲ್ ನಟನೆಯ ‘ಡೋಂಟ್ ಟ್ರಬಲ್ ದಿ ಟ್ರಬಲ್’ ಸಿನಿಮಾದ ಪ್ರೀ-ರಿಲೀಸ್ ಇವೆಂಟ್‌ನಲ್ಲಿ ಟಾಲಿವುಡ್‌ನ ನಿರ್ದೇಶಕ ಎಸ್. ಎಸ್. ರಾಜಮೌಳಿ ಭಾಗವಹಿಸಿ, ಮಲಯಾಳಂ ನಟ ಫಹಾದ್ ಫಾಸಿಲ್ ಅವರ ಅಭಿನಯ ಮತ್ತು ಜನಪ್ರಿಯತೆಯನ್ನು ಮುಕ್ತಕಂಠದಿಂದ ಹೊಗಳಿದ್ದಾರೆ. ಕಾರ್ಯಕ್ರಮದಲ್ಲಿ ಮಾತನಾಡಿದ ರಾಜಮೌಳಿ, ತಾವು ಫಹಾದ್ ಅವರ ನಟನೆಗೆ ದೊಡ್ಡ ಅಭಿಮಾನಿ ಎಂದು ಹೆಮ್ಮೆಯಿಂದ ಹೇಳಿಕೊಂಡಿದ್ದಾರೆ.

ರಾಜಮೌಳಿ ಅವರು ಒಟಿಟಿಯಲ್ಲಿ ಫಹಾದ್ ಫಾಸಿಲ್ ಅಭಿನಯದ ಹಲವು ಸಿನಿಮಾಗಳನ್ನು ವೀಕ್ಷಿಸಿದ್ದಾಗಿ ತಿಳಿಸಿದರು. ಪ್ರಾರಂಭದಲ್ಲಿ ಈ ಸಿನಿಮಾಗಳು ಕೇವಲ ‘ಕ್ಲಾಸ್’ ಪ್ರೇಕ್ಷಕರಿಗೆ ಅಥವಾ ನಿರ್ದಿಷ್ಟ ವರ್ಗದ ಜನರಿಗೆ ಮಾತ್ರ ಸೀಮಿತವಾಗಿರಬಹುದು ಎಂದು ತಾವು ಭಾವಿಸಿದ್ದಾಗಿ ರಾಜಮೌಳಿ ಒಪ್ಪಿಕೊಂಡರು.

ಆದರೆ ಸುಮಾರು 6-7 ವರ್ಷಗಳ ಹಿಂದೆ ನಡೆದ ಘಟನೆಯೊಂದನ್ನು ನೆನಪಿಸಿಕೊಂಡ ಅವರು, ತಮ್ಮ ಹೆಂಡತಿಯ 55 ವರ್ಷದ ಕಸಿನ್ ಒಬ್ಬರು ತಮ್ಮ ಬಳಿ ‘ನೀವು ಫಫಾ ಸಿನಿಮಾಗಳನ್ನು ನೋಡಿದ್ದೀರಾ?’ ಎಂದು ಪ್ರಶ್ನಿಸಿದ್ದರು ಎಂದರು. ಆ ಸಮಯದಲ್ಲಿ ‘ಫಫಾ’ ಎಂದರೆ ಯಾರೆಂದು ತಮಗೆ ತಿಳಿದಿರಲಿಲ್ಲ; ಆ ನಂತರವೇ ಅದು ಫಹಾದ್ ಫಾಸಿಲ್ ಎಂದು ತಿಳಿದು ಅವರ ಜನಪ್ರಿಯತೆಯ ವ್ಯಾಪ್ತಿ ಎಷ್ಟಿದೆ ಎಂಬುದು ಅರ್ಥವಾಯಿತು ಎಂದರು.

View this post on Instagram

A post shared by The Cue Studio (@cuestudio_)

ಫಹಾದ್ ಫಾಸಿಲ್ ಅವರ ನಟನೆ ಮತ್ತು ಸಿನಿಮಾಗಳ ಕ್ರೇಜ್ ಕೇವಲ ಒಂದು ವರ್ಗಕ್ಕೆ ಮಾತ್ರ ಸೀಮಿತವಾಗಿಲ್ಲ, ಅದು ಸಾಮಾನ್ಯ ಪ್ರೇಕ್ಷಕರ ಮನಸ್ಸನ್ನೂ ತಲುಪಿದೆ ಎಂದು ರಾಜಮೌಳಿ ಬಣ್ಣಿಸಿದರು. ಮುಂದುವರಿದು ತಮಾಷೆಯ ಧಾಟಿಯಲ್ಲಿ ಮಾತನಾಡಿದ ಅವರು, ಫಹಾದ್ ಅವರ ಜನಪ್ರಿಯತೆ ತೆಲುಗು ನಾಡಿನಾದ್ಯಂತ ಕೊರೊನಾಗಿಂತಲೂ ತೀವ್ರವಾಗಿ ಹರಡಿದೆ ಎಂದು ಹೊಗಳಿದರು.

ಇದನ್ನೂ ಓದಿ: 13 ಕೋಟಿ ರೂಪಾಯಿ ಕೊಟ್ಟು ಅಪರೂಪದ ಫೆರಾರಿ ಕಾರು ಖರೀದಿಸಿದ ಫಹಾದ್ ಫಾಸಿಲ್

ಅಂದಹಾಗೆ, ಫಹಾದ್ ಫಾಸಿಲ್ ನಾಯಕನಾಗಿ ನಟಿಸಿರುವ ‘ಡಾಂಟ್ ಟ್ರಬಲ್ ದಿ ಟ್ರಬಲ್’ ಚಿತ್ರವು ಪ್ರೇಕ್ಷಕರಲ್ಲಿ ಭಾರೀ ನಿರೀಕ್ಷೆ ಹುಟ್ಟುಹಾಕಿದ್ದು, ಅಕ್ಟೋಬರ್ 2 ರಂದು ವಿಶ್ವದಾದ್ಯಂತ ಚಿತ್ರಮಂದಿರಗಳಲ್ಲಿ ಅದ್ದೂರಿಯಾಗಿ ತೆರೆಕಾಣಲಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.