ಬಹಳ ಜನ ನನ್ನನ್ನು ನಾಶ ಮಾಡಲು ಬಂದಿದ್ದರು: ದುನಿಯಾ ವಿಜಯ್

ವಿನೋದ್ ಪ್ರಭಾಕರ್ (Vinod Prabhakar) ನಟನೆಯ ‘ಫೈಟರ್’ ಸಿನಿಮಾದ ಕಾರ್ಯಕ್ರಮದಲ್ಲಿ ನಟ, ನಿರ್ದೇಶಕ ದುನಿಯಾ ವಿಜಯ್ ಭಾಗವಹಿಸಿ ಗೆಳೆಯ ವಿನೋದ್ ಪ್ರಭಾಕರ್​ಗೆ ಶುಭಾಶಯ ತಿಳಿಸಿದರು. ಸ್ವತಃ ಫೈಟರ್ ಆಗಿದ್ದು ಬಳಿಕ ನಾಯಕ ನಟನಾದ ಆ ಬಳಿಕ ನಿರ್ದೇಶಕ, ನಿರ್ಮಾಪಕನೂ ಆಗಿರುವ ದುನಿಯಾ ವಿಜಯ್, ತಾವು ಫೈಟರ್ ಆಗಿದ್ದ ದಿನಗಳಲ್ಲಿ ಅನುಭವಿಸಿದ ಕಷ್ಟ, ಅವಮಾನಗಳನ್ನು ‘ಫೈಟರ್’ ವೇದಿಕೆ ಮೇಲೆ ನೆನಪು ಮಾಡಿಕೊಂಡರು.

”ಹಂಗೋ ಹಿಂಗೊ ಫೈಟರ್ ಆಗಿದ್ದಾನೆ. ಇವನು ಹೀರೋ ಆಗ್ತಾನಂತೆ ಅಂದ್ರು, ಹೀರೋ ಆದೆ. ಬಹಳಷ್ಟು ಜನ ನಮ್ಮನ್ನು ನಾಶ ಮಾಡಲು ಬಂದಿದ್ದರು. ಆದರೆ ಯಾರೂ ಯಶಸ್ಸು ಗಳಿಸಲಿಲ್ಲ. ತುಂಬಾ ಜನ ಕೆಟ್ಟದು ಮಾಡಿದರು. ತುಂಬಾ ಜನ ಒಳ್ಳೆಯದು ಮಾಡಿದರು. ಆದರೆ ನಮ್ಮ ವಿರುದ್ಧ ಕೊಂಕು ಮಾತನಾಡುವವರು ಇಂದಿಗೂ ಮಾತನಾಡುತ್ತಲೇ ಇದ್ದಾರೆ. ನಾನು ಬೆಳೆಯುತ್ತಲೇ ಇದ್ದೀನಿ” ಎಂದರು ವಿಜಯ್.

”ಸಿನಿಮಾ ಮಾಡುವ ಹುಚ್ಚು ಇದ್ದಿದ್ದ ಕಾರಣದಿಂದಲೇ ಫೈಟಿಂಗ್ ಕಲಿತೆ. ಫೈಟರ್ ಸಂಘವನ್ನು ಬಹಳ ಕಷ್ಟಪಟ್ಟು ಸೇರಿಕೊಂಡೆ. ಡ್ಯಾನಿ ಮಾಸ್ಟರ್ ತಂಡದಲ್ಲಿದ್ದೆ. ಆರಂಭದಲ್ಲಿಯೇ ನನಗೆ ಹಲವು ಗಾಯಗಳಾಗಿದ್ದವು. ಅದಾದ ಮೇಲೆ ನಟನೆ ಕಲಿತುಕೊಂಡೆ. ನಟನಾಗುವ ಪ್ರಯತ್ನ ಮಾಡಿದಾಗ, ಇವನ್ಯಾವನು ಫೈಟರ್ ನಟನಾಗ್ತಾನಂತೆ ಎಂದೆಲ್ಲ ಕುಹುಕ ಮಾಡಿದರು. ಆದರೆ ನಾನು ಬಿಡಲಿಲ್ಲ” ಎಂದರು.

ಇದನ್ನೂ ಓದಿ:ರಾಬರ್ಟ್ ಜೋಡಿ ಮತ್ತೆ ತೆರೆಗೆ, ಮತ್ತೊಂದು ಸಿನಿಮಾ ಮುಗಿಸಿದ ವಿನೋದ್ ಪ್ರಭಾಕರ್

”ದುನಿಯಾ’ ಸಿನಿಮಾ ಮಾಡಿದಾಗಲೂ ಸಹ ಫೈಟರ್ ಇವನು ನಟನಾಗಿ ಏನು ಮಾಡ್ತಾನೆ, ಕರಿಯರ್ ಮುಗಿಸಿ ಬಿಡೋಣ ಎಂದುಕೊಂಡರು. ಪ್ರಯತ್ನ ಪಟ್ಟರು ಅವರು ಪಟ್ಟ ಪ್ರಯತ್ನದಿಂದಲೇ ನಾನು ಬೆಳೆಯುತ್ತಾ ಹೋದೆ. ನಟನನ್ನು ಮುಗಿಸಿಬಿಡೋಣ ಅಂದುಕೊಂಡರು, ನಿರ್ಮಾಪಕ ಆದೆ. ನಿರ್ಮಾಪಕನ್ನು ಮುಗಿಸಿ ಬಿಡೋಣ ಅಂದುಕೊಂಡರು, ನಿರ್ದೇಶಕ ಆದೆ. ಹೀಗೆ ಒಟ್ಟಿನಲ್ಲಿ ಫೈಟ್ ಬಿಡಬಾರದು. ಸದಾ ಫೈಟರ್ ಆಗಿರಬೇಕು” ಎಂದರು ವಿಜಿ.

ವಿನೋದ್ ಪ್ರಭಾಕರ್ ಬಗ್ಗೆಯೂ ಮಾತನಾಡಿದ ನಟ ದುನಿಯಾ ವಿಜಯ್, ”ಎಷ್ಟೇ ವರ್ಷಗಳಾದರೂ ಅದೇ ಫಿಟ್​ನೆಸ್ ಅನ್ನು, ದೇಹದಾರ್ಡ್ಯವನ್ನು ನಿಭಾಯಿಸುವುದು ಸುಲಭವಾದ ಕೆಲಸ ಅಲ್ಲ. ಅದರ ಹಿಂದೆ ಅವರು ಎಷ್ಟು ಶ್ರಮ ಪಟ್ಟಿದ್ದಾರೆ. ಎಷ್ಟು ನೋವು ತಿಂದಿದ್ದಾರೆ, ಎಷ್ಟು ಗಾಯಗಳನ್ನು ಮಾಡಿಕೊಂಡಿದ್ದಾರೆ ಎಂಬುದು ಊಹಿಸಬಲ್ಲೆ. ಹಾಗಾಗಿ ಅಂಥಹವರನ್ನು ನಿರ್ದೇಶನ ಮಾಡುವ ನಿರ್ದೇಶಕರು, ಆ ಸಿನಿಮಾದ ಬಳಿಕ ಅವರಿಗೆ ಇನ್ನೂ ಐದು ಸಿನಿಮಾಗಳು ಸಿಗುವಂತೆ ಸಿನಿಮಾ ನಿರ್ದೇಶನ ಮಾಡಬೇಕು” ಎಂದು ವಿಜಯ್ ಮನವಿ ಮಾಡಿದರು. ವಿನೋದ್ ಪ್ರಭಾಕರ್ ನಟನೆಯ ‘ಫೈಟರ್’ ಸಿನಿಮಾ ಅಕ್ಟೋಬರ್ 06ಕ್ಕೆ ಬಿಡುಗಡೆ ಆಗಲಿದೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ