ಸುಪಾರಿ ನೀಡಿ ಉದ್ಯಮಿ ಮೇಲೆ ಹಲ್ಲೆ: ‘ಅಯೋಗ್ಯ’ ಸಹನಟಿ ವಿರುದ್ಧ FIR

ಬೆಂಗಳೂರು: ಸ್ಯಾಂಡಲ್​ವುಡ್​ನ ಸಹ ನಟಿ ದೃಶ್ಯ ಅಲಿಯಾಸ್ ನಿತ್ಯನ್ ವಿರುದ್ಧ ರಿಯಲ್ ಎಸ್ಟೇಟ್ ಉದ್ಯಮಿ ರಾಜೇಶ್ ಹಲ್ಲೆ ಆರೋಪ ಮಾಡಿದ್ದು, ಇಬ್ಬರೂ ಪರಸ್ಪರ ದೂರು-ಪ್ರತಿದೂರು ದಾಖಲಿಸಿದ್ದಾರೆ.

ಹಣ ವಾಪಸ್ ಕೇಳಿದ್ದಕ್ಕೆ ಹಲ್ಲೆ?:
ಕೊಟ್ಟ ಹಣ ವಾಪಸ್ ಕೇಳಿದ್ದಕ್ಕೆ ಕುಂದಾಪುರ ಮೂಲದ ರಿಯಲ್ ಎಸ್ಟೇಟ್ ಉದ್ಯಮಿ ರಾಜೇಶ್ ಮೇಲೆ ಹಲ್ಲೆ ಮಾಡಲಾಗಿದೆ. ಶ್ರೀರಂಗಪಟ್ಟಣ ತಾಲೂಕಿನ ಬೆಳಗೋಳದ ಬಲಮುರಿ ಸಮೀಪ ರಾಜೇಶ್​ನನ್ನು ಕಿಡಿಗೇಡಿಗಳು ಅಡ್ಡಗಟ್ಟಿದ್ದಾರೆ.

ದೃಶ್ಯ ಬಳಿ ಹಣ ಕೇಳ್ತೀಯಾ ಅಂತ ಪ್ರಶ್ನಿಸಿ ನಾಲ್ವರು ದುಷ್ಕರ್ಮಿಗಳ ಗ್ಯಾಂಗ್ ಹಲ್ಲೆ ಮಾಡಿದ್ದಾರೆ. ಬೇಸ್ ಬ್ಯಾಟ್, ಲಾಂಗ್​ನಿಂದ ಉದ್ಯಮಿ ರಾಜೇಶ್ ಮೇಲೆ ಹಲ್ಲೆ ನಡೆಸಿದ ಗ್ಯಾಂಗ್ ಹಿಗ್ಗಾಮುಗ್ಗ ಥಳಿಸಿ ರೇಸರ್​ನಿಂದ ಹಲ್ಲೆ ನಡೆಸಿ ಎಸ್ಕೇಪ್‌ ಆಗಿದ್ದಾರೆ ಎನ್ನಲಾಗಿದೆ.

ಸ್ಥಳೀಯರು ತಕ್ಷಣ ರಾಜೇಶ್​ನನ್ನು ಕೆ.ಆರ್.ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಬಳಿಕ ಅಯೋಗ್ಯ ಚಿತ್ರದ ಸಹನಟಿ ದೃಶ್ಯ ಮತ್ತು ಆಕೆಯ ತಂದೆ ಮನ್ಮಥ ವಿರುದ್ಧ ಕೆಆರ್​ಎಸ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ. ಕೇಸ್ ದಾಖಲಾಗುತ್ತಿದ್ದಂತೆ ದೃಶ್ಯ ಮತ್ತು ಆಕೆಯ ತಂದೆ ಮನ್ಮಥ ಎಸ್ಕೇಪ್ ಆಗಿದ್ದಾರೆ ಎನ್ನಲಾಗಿದೆ.

ನಿತ್ಯನ್​ರಿಂದಲೂ ಪ್ರತಿದೂರು:
ಉದ್ಯಮಿ ರಾಜೇಶ್ ಹಾಗೂ ಪ್ರಶಾಂತ್ ವಿರುದ್ಧ ಹೈದ್ರಾಬಾದ್​ನ ಬಂಜಾರ ಹಿಲ್ಸ್ ಠಾಣೆಯಲ್ಲಿ ಪ್ರತಿದೂರು ದಾಖಲಾಗಿದೆ. ರಾಜೇಶ್ ನಮ್ಮ ಮನೆಗೆ ಅತಿಕ್ರಮ ಪ್ರವೇಶ ಮಾಡಿ ಧಮ್ಕಿ ಹಾಕಿದ್ದಾನೆ. ಪ್ರಶಾಂತ್ ವಿರುದ್ಧ ಈ ಹಿಂದೆ ಅತ್ಯಾಚಾರ ದೂರು ದಾಖಲಿಸಿದ್ದೆ. ಈ ಕೇಸ್ ವಾಪಸ್ ತೆಗೆದುಕೊಳ್ಳುವಂತೆ ರಾಜೀಶ್ ಧಮ್ಕಿ ಹಾಕಿದ್ದಾಗಿ ಸಹನಟಿ ದೃಶ್ಯ ಪ್ರತಿದೂರು ದಾಖಲಿಸಿದ್ದಾಳೆ.