ಕಾಲಕ್ಕೆ ತಕ್ಕಂತೆ.. ಅಭಿಮಾನಿಯ ತಂಗಿ ಮದುವೆಗೆ ವಿಡಿಯೋ ಕಾಲ್ ಮೂಲಕ ಶುಭ ಹಾರೈಸಿದ ಪವರ್ ಸ್ಟಾರ್!

ಬಳ್ಳಾರಿ: ಬಿಗ್ ಸೆಲೆಬ್ರಿಟಿ ಎನಿಸಿಕೊಂಡಿರುವ ಅದೂ ನಮ್ಮ ನೆಚ್ಚಿನ ನಟರೊಬ್ಬರು ನಮ್ಮದೇ ಮದುವೆಗೆ ಅಥವಾ ನಮ್ಮವರ ಮದುವೆಯ ಸಮಾರಂಭದಲ್ಲಿ ಭಾಗಿಯಾದ್ರೆ ಎಷ್ಟು ಖುಷಿಯಾಗುತ್ತೇ ಅಲ್ವಾ! ಆದ್ರೆ ಇಂತಹ ಘಟನೆಗಳು ನಡೆಯೋದು ತೀರಾ ಅಪರೂಪ ಅಲ್ವಾ? ಅದ್ರೆ ಸ್ಯಾಂಡಲ್​ವುಡ್​ನ ಪವರ್ ಸ್ಟಾರ್, ಸಹೃದಯಿ ಪುನೀತ್ ರಾಜ್​ಕುಮಾರ್ ತನ್ನ ಅಪ್ಪಟ ಅಭಿಮಾನಿಯೊಬ್ಬರ ಸಹೋದರಿಯ ಮದುವೆಗೆ ವಿಡಿಯೋ ಕಾಲ್ ಮಾಡಿ, ಶುಭ ಹಾರೈಸಿದ್ದಾರೆ. ಇದರಿಂದ ವಧು, ಅಭಿಮಾನಿಯ ಮನೆ ಮಂದಿ ಸೇರಿದಂತೆ ಮದುವೆ ಮನೆಯಲ್ಲಿ ನೆರೆದಿದ್ದ ಅಭಿಮಾನಿಗಳಿಗೆ ಫುಲ್ ಖುಷ್ ಆಗಿದೆ.

ಗಮನಾರ್ಹವೆಂದ್ರೆ ಕಾಲಕ್ಕೆ ತಕ್ಕಂತೆ ಪುನೀತ್ ರಾಜ್​ಕುಮಾರ್ ಇಲ್ಲಿ ತಮ್ಮ ಇರುವನ್ನು ಪ್ರದರ್ಶಿಸಿರುವುದು. ಒಂದು.. ಇದು ಕೊರೊನಾ ಕಾಲ. ಹೆಚ್ಚು ಜನ ಸೇರುವಂತಿಲ್ಲ; ಸೆಲೆಬ್ರೆಟಿಯಾಗಿ ಜನಜಂಗುಳಿಯಲ್ಲಿ ಅದರಲ್ಲೂ ಮದುವೆ ಮನೆಯಲ್ಲಿ ಪಾಲ್ಗೊಳ್ಳುವುದು ಕ್ಷೇಮಕರ ಅಲ್ಲ. ಇನ್ನು ಎರಡನೆಯದಾಗಿ.. ಕಾಲಾಯ ತಸ್ಮೈ ನಮಃ ಅಂದ್ರೆ ಇದು ಮೊಬೈಲ್ ವಿಡಿಯೋ ಕಾಲ್​ ಯುಗ. ತಂತ್ರ‘ಜ್ಞಾನ’ವನ್ನು ಸದ್ಬಳಕೆ ಮಾಡಿಕೊಂಡ ಸ್ಟಾರ್​ ನಟ.. ಅಭಿಮಾನಿಯ ಕೋರಿಕೆಯನ್ನು ಮನ್ನಿಸಿದ್ದಾರೆ.

ನಡೆದಿದ್ದೇನೆಂದ್ರೆ.. ಪುನೀತ್ ರಾಜ್ ಕುಮಾರ್ ಅವರ ಅಪ್ಪಟ ಅಭಿಮಾನಿಯಾದ ಕಿಚಡಿ ವಿಶ್ವ ಎಂಬುವವರ ಸಹೋದರಿ ಅಂಬಿಕಾ ಮದುವೆ ಇತ್ತೀಚೆಗೆ ಹೊಸಪೇಟೆ ನಗರದಲ್ಲಿ ನಡೆದಿದೆ. ಈ ಹಿನ್ನೆಲೆಯಲ್ಲಿ ಸಹೋದರಿಯ ಮದುವೆಗೆ ಬರುವಂತೆ ಹೊಸಪೇಟೆ ನಗರದ ಕಿಚಡಿ ವಿಶ್ವ ಹಾಗೂ ಜೋಗಿ ತಾಯಪ್ಪ ಪವರ್ ಸ್ಟಾರ್ ಪುನೀತ್ ರಾಜ್‍ಕುಮಾರ್ ಅವರನ್ನ ಆಹ್ವಾನಿಸಿದ್ದರು.

ಆದರೆ ಶೂಟಿಂಗ್​ನಲ್ಲಿ ಬ್ಯೂಸಿ ಇರುವ ಕಾರಣ ಅಪ್ಪು, ತನ್ನ ಅಭಿಮಾನಿಯ ಸಹೋದರಿಯ ಮದುವೆಗೆ ಬರಲು ಸಾಧ್ಯವಾಗಿಲ್ಲ. ಆದರೆ ಮದುವೆಯ ದಿನ ಸ್ವತ: ಪುನೀತ್ ವಿಡಿಯೋ ಕರೆ ಮಾಡಿ ಹೊಸ ವಧು ವರನಿಗೆ ಶುಭಾಶಯ ಕೋರಿದ್ದಾರೆ. ಈ ವಿಡಿಯೋ ಈಗ ಸಾಕಷ್ಟು ವೈರಲ್ ಆಗಿದ್ದು, ನೆಚ್ಚಿನ ನಟ ವಿಡಿಯೋ ಕಾಲ್ ಮಾಡಿ ಶುಭಾಶಯ ಕೋರಿದ್ದು ಅಭಿಮಾನಿಗಳ ಅಪಾರ ಸಂತಸಕ್ಕೆ ಕಾರಣವಾಗಿದೆ.