ಬಿಗ್​ಬಾಸ್ ಮನೆಗೆ ಬಂದ ಅಮ್ಮನನ್ನು ಮಾತನಾಡಿಸಲಾಗದೆ ತ್ರಿವಿಕ್ರಮ್ ಕಣ್ಣೀರು

ಬಿಗ್​ಬಾಸ್ ಮನೆಯಲ್ಲಿ ಈ ವಾರ ಸಂಭ್ರಮವೋ ಸಂಭ್ರಮ. ಬಿಗ್​ಬಾಸ್ ಮನೆಗೆ ಸ್ಪರ್ಧಿಗಳ ಕುಟುಂಬದವರು ಆಗಮಿಸುತ್ತಿದ್ದಾರೆ. ಇಂದು (ಮಂಗಳವಾರ) ಮೊದಲಿಗೆ ಭವ್ಯಾರ ಸಹೋದರಿ, ಸಹೋದರಿಯ ಮಗಳು ಮತ್ತು ಅವರ ತಾಯಿ ಆಗಮಿಸಿದರು. ಈ ವೇಳೆ ಭವ್ಯಾ ಬಹಳ ಖುಷಿಪಟ್ಟರು. ಭವ್ಯಾ ಅವರ ಮನೆಯವರು ಸಹ ಬಿಗ್​ಬಾಸ್​ ಸ್ಪರ್ಧಿಗಳೊಡನೆ ಬಹಳ ಚೆನ್ನಾಗಿ ಬೆರೆತರು. ಆ ನಂತರ ತ್ರಿವಿಕ್ರಮ್ ಅವರ ತಾಯಿ ಬಂದರಾದರೂ ಅವರನ್ನು ಮಾತನಾಡಿಸಲು ತ್ರಿವಿಕ್ರಮ್​ಗೆ ಸಾಧ್ಯ ಆಗಲಿಲ್ಲ.

ತ್ರಿವಿಕ್ರಮ್ ಅವರ ತಾಯಿ ಬರುವ ಮುಂಚೆ ತ್ರಿವಿಕ್ರಮ್ ಹಾಗೂ ಅವರ ತಾಯಿ ಒಟ್ಟಿಗಿರುವ ಫೋಟೊ ಒಂದನ್ನು ಕಳಿಸಲಾಯ್ತು. ತ್ರಿವಿಕ್ರಮ್, ತನ್ನ ತಾಯಿ ಬರುತ್ತಾರೆಂದು ಬಹಳ ಖುಷಿಯಲ್ಲಿದ್ದರು. ಆದರೆ ಬಿಗ್​ಬಾಸ್, ತ್ರಿವಿಕ್ರಮ್ ಅನ್ನು ಆಕ್ಟಿವಿಟಿ ರೂಂಗೆ ಕರೆದರು. ಅಲ್ಲಿ ಅವರಿಗೆ ಅವರದ್ದೇ ತಾಯಿಯ ಚಿತ್ರದ ತುಣುಕುಗಳನ್ನು ನೀಡಿ, ಈ ಫಸಲ್ ಅನ್ನು ಹತ್ತು ನಿಮಿಷದಲ್ಲಿ ಪೂರೈಸಿದರೆ ಮಾತ್ರವೇ ನಿಮ್ಮ ತಾಯಿಯನ್ನು ಭೇಟಿ ಆಗಲು ಅನುಮತಿ ನೀಡಲಾಗುತ್ತದೆ ಎಂದು ಸವಾಲು ಹಾಕಲಾಯ್ತು.

ಫಸಲ್ ಪ್ರಾರಂಭ ಆಗುವ ತುಸು ಸಮಯದ ಮುಂಚೆ ತ್ರಿವಿಕ್ರಮ್ ತಾಯಿ ಬಿಗ್​ಬಾಸ್ ಮನೆ ಒಳಗೆ ಬಂದರು. ಎಲ್ಲರೂ ಅವರ ತಾಯಿಯನ್ನು ಚೆನ್ನಾಗಿ ಮಾತನಾಡಿಸುತ್ತಿದ್ದರು. ಆದರೆ ಅದನ್ನೆಲ್ಲ ಟಿವಿ ಮೂಲಕ ನೋಡುತ್ತಿದ್ದ ತ್ರಿವಿಕ್ರಮ್ ಫಸಲ್ ಪೂರೈಸುವಲ್ಲಿ ನಿರತರಾಗಿದ್ದರು. ಆದರೆ ಬಿಗ್​ಬಾಸ್ ನೀಡಿದ ನಿಗದಿತ ಸಮಯದಲ್ಲಿ ತ್ರಿವಿಕ್ರಮ್​ಗೆ ಫಸಲ್ ಪೂರೈಸಲು ಸಾಧ್ಯವಾಗಲಿಲ್ಲ. ಆಗ ಬಿಗ್​ಬಾಸ್, ತ್ರಿವಿಕ್ರಮ್ ಅವರ ತಾಯಿಯನ್ನು ಬಿಗ್​ಬಾಸ್ ಮನೆಯಿಂದ ಹೊರಗೆ ಹೋಗುವಂತೆ ಹೇಳಿದರು. ಅಂತೆಯೇ ಬೇಸರದಲ್ಲಿಯೇ ಅವರು ಬಿಗ್​ಬಾಸ್ ಮನೆಯಿಂದ ಹೊರಗೆ ಹೋದರು. ಆಕ್ಟಿವಿಟಿ ರೂಂನಲ್ಲಿ ತ್ರಿವಿಕ್ರಮ್​ ಅತ್ತು, ಕರೆದರು, ಇನ್ನೊಂದು ಅವಕಾಶಕ್ಕಾಗಿ ಗೋಗರೆದರೂ ಸಹ ಬಿಗ್​ಬಾಸ್ ಅವಕಾಶ ನೀಡಲಿಲ್ಲ.

ಇದನ್ನೂ ಓದಿ:ಎದುರಾಳಿಗಳ ಕಾಟಕ್ಕೆ ಬಿಗ್​ಬಾಸ್ ​ಮುಂದೆ ಕಣ್ಣೀರು ಹಾಕಿದ ಭವ್ಯಾ

ತ್ರಿವಿಕ್ರಮ್ ಅವರ ತಾಯಿ ಬಿಗ್​ಬಾಸ್ ಮನೆಯಿಂದ ಹೋಗುವ ಮುಂಚೆ, ನನಗೆ ಬಹಳ ಸಂಕಟ ಆಗುತ್ತಿದೆ. ಆದರೆ ಮಗನನ್ನು ಕೇಳಿದೆ ಎಂದು ಹೇಳಿ ಎಂದು ಎಲ್ಲರಿಗೂ ಹೇಳಿಯೇ ಹೋದರು. ಅವರು ಹೋದ ಮೇಲೆ ಹೊರಗೆ ಬಂದ ತ್ರಿವಿಕ್ರಮ್​ಗೆ, ಅವರ ತಾಯಿ ಕೊಟ್ಟ ಸರ ಇನ್ನಿತರೆ ವಸ್ತುಗಳನ್ನು ನೀಡಲಾಯ್ತು. ಈ ಬಗ್ಗೆ ತ್ರಿವಿಕ್ರಮ್ ಬೇಸರ ಪಟ್ಟುಕೊಳ್ಳುತ್ತಿರುವಾಗಲೇ ತ್ರಿವಿಕ್ರಮ್ ಅವರ ತಾಯಿಯನ್ನು ಗುಟ್ಟಾಗಿ ಒಳಗೆ ಕಳಿಸಿದರು ಬಿಗ್​ಬಾಸ್. ಆಗ ಮಗನ್ನು ತಬ್ಬಿ ಬಹಳ ಅತ್ತುಬಿಟ್ಟರು ಅವರ ತಾಯಿ. ಆ ದೃಶ್ಯ, ಬಿಗ್​ಬಾಸ್ ಸ್ಪರ್ಧಿಗಳಿಗೆ ಕಣ್ಣೀರು ತರಿಸಿತು.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ