ಟಾಸ್ಕ್ ರದ್ದು, ಒಗ್ಗಟ್ಟಿನ ಕೊರತೆ; ಈ ವಾರ ಕಿಚ್ಚನ ಪಂಚಾಯ್ತಿಯ ಪ್ರಮುಖ ವಿಷಯಗಳಿವು

ಬಿಗ್ ಬಾಸ್ ಕನ್ನಡದ ವೀಕೆಂಡ್ ಬಂತೆಂದರೆ ಸಾಕು, ಮನೆಯೊಳಗೆ ಒಂದೆಡೆ ಸಂಭ್ರಮದ ವಾತಾವರಣವಿದ್ದರೆ, ಇನ್ನೊಂದೆಡೆ ಸ್ಪರ್ಧಿಗಳ ಎದೆಯಲ್ಲಿ ನಡುಕ ಶುರುವಾಗುತ್ತದೆ. ವಾರಪೂರ್ತಿ ಆಡಿದ ಆಟ, ಮಾಡಿದ ಎಡವಟ್ಟುಗಳು, ತಂತ್ರ-ಪ್ರತಿತಂತ್ರಗಳು ಮತ್ತು ಆಡಿದ ಮಾತುಗಳನ್ನೆಲ್ಲಾ ಬಿಚ್ಚಿಟ್ಟು ಸರಿ-ತಪ್ಪಿನ ಲೆಕ್ಕಾಚಾರ ಮಾಡಲು ಕಿಚ್ಚ ಸುದೀಪ್ ಅವರು ‘ಕಿಚ್ಚನ ಪಂಚಾಯ್ತಿ’ ವೇದಿಕೆಗೆ ಆಗಮಿಸುತ್ತಾರೆ. ಸುದೀಪ್ ಅವರ ಖಡಕ್ ನೋಟ, ಗಂಭೀರ ಪ್ರಶ್ನೆಗಳು ಮತ್ತು ಸಮಯೋಚಿತ ಚಾಟಿ ಬೀಸುವ ಮಾತುಗಳು ಪ್ರತಿಯೊಬ್ಬ ಸ್ಪರ್ಧಿಯನ್ನೂ ಇಕ್ಕಟ್ಟಿಗೆ ಸಿಲುಕಿಸುತ್ತವೆ. ಈ ವಾರ ಸಾಕಷ್ಟು ವಿಷಯಗಳ ಬಗ್ಗೆ ಚರ್ಚೆ ನಡೆಯಬೇಕಿದೆ.

ತಾಂಡವ್ ರಾಮ್ ರೀ-ಎಂಟ್ರಿ

ಈ ವಾರದ ಚರ್ಚೆಯಲ್ಲಿ ಮುಖ್ಯವಾಗಿ ಮುನ್ನೆಲೆಗೆ ಬರುವುದು ತಾಂಡವ್ ರಾಮ್ ಅವರ ರೀ-ಎಂಟ್ರಿ ವಿಚಾರ. ಈ ಮೊದಲು ಅವರನ್ನು ಫೇಕ್ ಎಲಿಮಿನೇಷನ್ ಮಾಡಿ ಸೀಕ್ರೆಟ್ ರೂಮ್‌ಗೆ ಕಳುಹಿಸಲಾಗಿತ್ತು. ಇದೀಗ ಅವರನ್ನು ಮತ್ತೆ ಬಿಗ್ ಬಾಸ್ ಮನೆಗೆ ಕರೆತಂದ ಬಗ್ಗೆ ಮನೆಯ ಸದಸ್ಯರ ಅಭಿಪ್ರಾಯವನ್ನು ಸುದೀಪ್ ಕೇಳುವ ಸಾಧ್ಯತೆ ಇದೆ. ತಾಂಡವ್ ಅವರ ಈ ವಾಪಸಾತಿಯಿಂದ ಮನೆಯ ಒಳಗಿನ ಗೇಮ್ ಪ್ಲಾನ್ ಮತ್ತು ಸದಸ್ಯರ ತಂತ್ರಗಳು ಹೇಗೆ ಬದಲಾಗಿವೆ ಎಂಬುದರ ಮೇಲೆಯೂ ಸುದೀಪ್ ಬೆಳಕು ಚೆಲ್ಲಲಿದ್ದಾರೆ.

ಉಸ್ತುವಾರಿಗಳ ತಪ್ಪು ಲೆಕ್ಕಾಚಾರ ಮತ್ತು ಟಾಸ್ಕ್ ರದ್ದು

ವಾರದ ಟಾಸ್ಕ್‌ನಲ್ಲಿ ಉಸ್ತುವಾರಿಯಾಗಿದ್ದ ಮಂಜು ಹಾಗೂ ಲಿಖಿತ್ ಅವರ ತಪ್ಪು ನಿರ್ಧಾರ ಮತ್ತು ಗೊಂದಲಮಯ ಲೆಕ್ಕಾಚಾರದಿಂದಾಗಿ ಕ್ಯಾಪ್ಟನ್ಸಿ ಓಟವೇ ರದ್ದಾಗಿದ್ದರ ಬಗ್ಗೆ ಗಂಭೀರವಾಗಿ ವಿಚಾರಣೆ ನಡೆಯಲಿದೆ. ನ್ಯಾಯಸಮ್ಮತವಾಗಿ ನಿರ್ಣಯ ತೆಗೆದುಕೊಳ್ಳಬೇಕಾದ ಜಾಗದಲ್ಲಿದ್ದುಕೊಂಡು ಜವಾಬ್ದಾರಿಯಿಲ್ಲದೆ ವರ್ತಿಸಿದ್ದಕ್ಕೆ ಇಬ್ಬರಿಗೂ ಸುದೀಪ್ ಅವರಿಂದ ಸಖತ್ ಕ್ಲಾಸ್ ಸಿಗಲಿದೆ. ಜೊತೆಗೆ, ಕಷ್ಟಪಟ್ಟು ಆಡಿದ ಇತರ ಸ್ಪರ್ಧಿಗಳ ಶ್ರಮವನ್ನು ಇವರ ಎಡವಟ್ಟಿನಿಂದ ವ್ಯರ್ಥ ಮಾಡಿದ್ದಕ್ಕೆ ಮನೆಯವರ ಆಕ್ರೋಶಕ್ಕೂ ಕಿಚ್ಚನ ವೇದಿಕೆಯಲ್ಲಿ ಉತ್ತರ ಕಂಡುಕೊಳ್ಳಲಾಗುತ್ತದೆ.

ಒಗ್ಗಟಿನ ವಿಷಯ

ಈ ವಾರ ಕೊಟ್ಟ ಗ್ರೂಪ್ ಟಾಸ್ಕ್ ಒಂದರಲ್ಲಿ ಗಾನವಿ ತಂಡದಲ್ಲಿ ಒಗ್ಗಟ್ಟೇ ಇರಲಿಲ್ಲ. ಈ ವಿಷಯ ಮುಖ್ಯವಾಗಿ ಚರ್ಚೆಯಾಗಲಿದೆ. ಗಾನವಿ ಟಾಸ್ಕ್ ಗೆಲ್ಲಿಸಿಕೊಟ್ಟರೂ ಅವರು ಕೆಟ್ಟವರಾಗಬೇಕಾಯಿತು. ಇದು ಈ ವೀಕೆಂಡ್​ನ ಮುಖ್ಯ ವಿಷಯ ಆಗಬಹುದು.

ಗಾನವಿ ಅವರ ಕೂಗಾಟ ಹಾಗೂ ಕಳಪೆ ಪಟ್ಟ

ಇನ್ನೊಂದೆಡೆ, ವಾರವಿಡೀ ಅನಗತ್ಯವಾಗಿ ಕೂಗಾಡುತ್ತಾ, ಸಣ್ಣಪುಟ್ಟ ವಿಚಾರಗಳಿಗೂ ಗಲಾಟೆ ಮಾಡುತ್ತಾ ಹತಾಶೆ ಹೊರಹಾಕಿದ ಗಾನವಿ ಅವರನ್ನು ಸುದೀಪ್ ಪ್ರಶ್ನಿಸಲಿದ್ದಾರಾ ಎಂಬ ಕುತೂಹಲ ವೀಕ್ಷಕರಿಗೆ ಇದೆ.

ಇದನ್ನೂ ಓದಿ: ಪುರುಷ ಸ್ಪರ್ಧಿಗಳಿಗೆ ಹೊಡೆದು ಬಿಗ್ ಬಾಸ್ ಮನೆಯಿಂದ ಹೊರಗೆ ಹೋಗಲು ಆಸಿಯಾ ನಿರ್ಧಾರ

ಯಶಸ್ ಬಗ್ಗೆ

ಯಶಸ್ ಅವರ ಆಟದ ವೈಖರಿಯ ಬಗ್ಗೆಯೂ ಕಿಚ್ಚನ ಪಂಚಾಯ್ತಿಯಲ್ಲಿ ಚರ್ಚೆ ನಡೆಯುವ ಸಾಧ್ಯತೆ ಇದೆ. ಯಶಸ್ ಅವರು ಆಟದಲ್ಲಿ ಸಕ್ರಿಯವಾಗಿ ಪಾಲ್ಗೊಳ್ಳುವುದಕ್ಕಿಂತ ಹೆಚ್ಚಾಗಿ ಕೇವಲ ಮನೆಯ ಹೆಣ್ಣುಮಕ್ಕಳ ಜೊತೆಯಲ್ಲೇ ಸುತ್ತಾಡುತ್ತಾ, ತಿರುಗಾಡುತ್ತಾ ಅವರ ಗುಂಪಿಗಷ್ಟೇ ಸೀಮಿತವಾಗಿದ್ದಾರೆ ಎಂಬ ವಿಚಾರ ಸ್ಪಷ್ಟವಾಗಿದೆ. ಆಟವನ್ನು ಮರೆತು ಕೇವಲ ಗೆಳತಿಯರ ಬಳಗದಲ್ಲೇ ಕಾಲ ಕಳೆಯುತ್ತಿರುವುದಕ್ಕೆ ಸುದೀಪ್ ಅವರು ಚಾಟಿ ಬೀಸಲಿದ್ದು, ಒಬ್ಬ ಸಶಕ್ತ ಸ್ಪರ್ಧಿಯಾಗಿ ಹೊರಬರಲು ಎಚ್ಚರಿಕೆ ನೀಡುವ ಸಾಧ್ಯತೆ ಇದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.