ಚಳಿಗಾಲದಲ್ಲಿ ಮಕ್ಕಳಿಗೆ ಬಾಳೆಹಣ್ಣು ನೀಡಬಹುದೇ? ಶೀತ, ಕೆಮ್ಮು ಬರುತ್ತದೆಯೇ? ಪೋಷಕರು ತಿಳಿಯಬೇಕಾದ ವಿಷಯಗಳಿವು!

ಚಳಿಗಾಲ ಆರಂಭವಾಗುತ್ತಿದ್ದಂತೆ ಮಕ್ಕಳ ಆಹಾರದ ಬಗ್ಗೆ ಪೋಷಕರಲ್ಲಿ ಹಲವು ಗೊಂದಲಗಳು ಮೂಡುತ್ತವೆ. ಅದರಲ್ಲೂ ಬಾಳೆಹಣ್ಣು ತಿನ್ನಿಸಿದರೆ ಶೀತ ಅಥವಾ ಕೆಮ್ಮು ಬರುತ್ತದೆ ಎಂಬ ನಂಬಿಕೆ ಹಲವರಲ್ಲಿದೆ. ಹಾಗಾದರೆ ಚಳಿಗಾಲದಲ್ಲಿ ಮಕ್ಕಳಿಗೆ ಬಾಳೆಹಣ್ಣು ನೀಡಬಹುದೇ, ನಿರ್ದಿಷ್ಟ ಪ್ರಮಾಣದಲ್ಲಿ ಮತ್ತು ವಯಸ್ಸಿಗೆ ತಕ್ಕ ರೀತಿಯಲ್ಲಿ ಬಾಳೆಹಣ್ಣು ನೀಡಬಹುದೇ, ಇದರಲ್ಲಿ ಯಾವ ರೀತಿ ಪೋಷಕಾಂಶಗಳು ಇರುತ್ತವೆ ಎಂಬುದನ್ನು ಸ್ಟೋರಿ ಮೂಲಕ ತಿಳಿದುಕೊಳ್ಳಿ.

ಬಾಳೆಹಣ್ಣಿನಲ್ಲಿ ಯಾವೆಲ್ಲ ಪೋಷಕಾಂಶಗಳಿವೆ?

ಸಾಮಾನ್ಯವಾಗಿ ಬಾಳೆಹಣ್ಣಿನಲ್ಲಿ ಪೊಟ್ಯಾಸಿಯಂ, ವಿಟಮಿನ್ ಬಿ6, ವಿಟಮಿನ್ ಸಿ, ಮೆಗ್ನೀಸಿಯಂ, ನಾರಿನಾಂಶ ಮತ್ತು ಕಾರ್ಬೋಹೈಡ್ರೇಟ್‌ಗಳಿವೆ. ಇವು ದೇಹಕ್ಕೆ ಶಕ್ತಿ ಒದಗಿಸಲು, ಸ್ನಾಯುಗಳು ಮತ್ತು ನರಗಳ ಸಾಮಾನ್ಯ ಕಾರ್ಯನಿರ್ವಹಣೆಗೆ ಹಾಗೂ ಜೀರ್ಣಕ್ರಿಯೆಗೆ ಸಹಾಯ ಮಾಡುತ್ತವೆ. ಇದರಲ್ಲಿರುವ ಕಾರ್ಬೋಹೈಡ್ರೇಟ್‌ಗಳು ಮಕ್ಕಳಿಗೆ ಶಕ್ತಿಯನ್ನು ಒದಗಿಸುತ್ತವೆ. ನಾರಿನಾಂಶವು ಕರುಳಿನ ಚಟುವಟಿಕೆಗೆ ಸಹಕಾರಿಯಾಗಿದ್ದು, ಮಲಬದ್ಧತೆಯನ್ನು ನಿಯಂತ್ರಿಸಲು ನೆರವಾಗಬಹುದು. ಆದರೆ ಬಾಳೆಹಣ್ಣೊಂದೇ ಮಕ್ಕಳ ಸಂಪೂರ್ಣ ಪೌಷ್ಟಿಕಾಂಶದ ಅಗತ್ಯವನ್ನು ಪೂರೈಸುವುದಿಲ್ಲ. ಸಮತೋಲಿತ ಆಹಾರದ ಭಾಗವಾಗಿ ನೀಡಬೇಕು.

ಚಳಿಗಾಲದಲ್ಲಿ ಬಾಳೆಹಣ್ಣು ತಿನ್ನಿಸಿದರೆ ಶೀತವಾಗುತ್ತದೆಯೇ?

ಬಾಳೆಹಣ್ಣು ತಿನ್ನುವುದರಿಂದ ನೇರವಾಗಿ ಶೀತ ಅಥವಾ ನೆಗಡಿ ಉಂಟಾಗುತ್ತದೆ ಎಂಬುದಕ್ಕೆ ವೈಜ್ಞಾನಿಕ ಪುರಾವೆಗಳಿಲ್ಲ. ಸಾಮಾನ್ಯ ಶೀತವು ವೈರಸ್‌ಗಳಿಂದ ಹರಡುತ್ತದೆ. ಆದ್ದರಿಂದ ಚಳಿಗಾಲ ಬಂದಿದೆ ಎಂಬ ಕಾರಣಕ್ಕೆ ಮಕ್ಕಳಿಗೆ ಬಾಳೆಹಣ್ಣು ನೀಡುವುದನ್ನು ಸಂಪೂರ್ಣವಾಗಿ ನಿಲ್ಲಿಸುವ ಅಗತ್ಯವಿಲ್ಲ. ಮಕ್ಕಳಿಗೆ ಈಗಾಗಲೇ ಶೀತ ಅಥವಾ ಕೆಮ್ಮು ಇದ್ದರೂ ಬಾಳೆಹಣ್ಣನ್ನು ಎಲ್ಲ ಸಂದರ್ಭಗಳಲ್ಲೂ ನಿಷೇಧಿಸುವ ಅಗತ್ಯವಿಲ್ಲ. ಆದರೆ ತಿಂದ ನಂತರ ಅಸ್ವಸ್ಥತೆ, ಅಲರ್ಜಿಯ ಲಕ್ಷಣಗಳು ಅಥವಾ ಬೇರೆ ತೊಂದರೆ ಕಂಡುಬಂದರೆ ಮಕ್ಕಳ ವೈದ್ಯರನ್ನು ಸಂಪರ್ಕಿಸಬೇಕು.

ಇದನ್ನೂ ಓದಿ: 45 ದಿನ ಬಾಳೆಹಣ್ಣು ತಿಂದರೆ ರಕ್ತದೊತ್ತಡ ನಿಯಂತ್ರಣಕ್ಕೆ ಬರುತ್ತದೆಯೇ? ಇಲ್ಲಿದೆ ಮಾಹಿತಿ

ಮಕ್ಕಳಿಗೆ ಬಾಳೆಹಣ್ಣು ಹೇಗೆ ನೀಡಬೇಕು?

ಆರು ತಿಂಗಳು ಪೂರ್ಣಗೊಂಡ ನಂತರ, ಮಗು ಇತರ ಘನ ಆಹಾರಗಳನ್ನು ಸ್ವೀಕರಿಸಲು ಸಿದ್ಧವಾಗಿದ್ದರೆ, ಮೆತ್ತಗೆ ಹಿಸುಕಿದ ಬಾಳೆಹಣ್ಣನ್ನು ಪರಿಚಯಿಸಬಹುದು. ಆರಂಭದಲ್ಲಿ ಸ್ವಲ್ಪ ಪ್ರಮಾಣದಲ್ಲಿ ನೀಡಿ ಮಗುವಿನ ಪ್ರತಿಕ್ರಿಯೆಯನ್ನು ಗಮನಿಸಬೇಕು.

• ಶಿಶುಗಳಿಗೆ ಚೆನ್ನಾಗಿ ಹಿಸುಕಿದ ಅಥವಾ ಪ್ಯೂರಿ ಮಾಡಿದ ಬಾಳೆಹಣ್ಣು ನೀಡಿ.
• ಸ್ವಲ್ಪ ದೊಡ್ಡ ಮಕ್ಕಳಿಗೆ ವಯಸ್ಸಿಗೆ ತಕ್ಕಂತೆ ಮೃದುವಾದ ಸಣ್ಣ ತುಂಡುಗಳಾಗಿ ನೀಡಬಹುದು.
• ಮಗು ತಿನ್ನುವಾಗ ಕುಳಿತುಕೊಂಡಿರಲಿ ಅವರು ತಿನ್ನುವಾಗ ಅವರನ್ನು ಗಮನಿಸುತ್ತಿರಿ.
• ಫ್ರಿಜ್‌ನಿಂದ ತೆಗೆದ ತಣ್ಣನೆಯ ಹಣ್ಣಿನ ಬದಲು ಸಾಮಾನ್ಯ ತಾಪಮಾನದಲ್ಲಿರುವ ಹಣ್ಣನ್ನು ನೀಡಬಹುದು.

ರಾತ್ರಿ ಬಾಳೆಹಣ್ಣು ನೀಡಬಾರದೇ?

ರಾತ್ರಿ ಬಾಳೆಹಣ್ಣು ತಿನ್ನಿಸಿದರೆ ಕಫ ಹೆಚ್ಚಾಗುತ್ತದೆ ಅಥವಾ ಜೀರ್ಣಕ್ರಿಯೆಗೆ ತೊಂದರೆಯಾಗುತ್ತದೆ ಎಂಬ ನಂಬಿಕೆಗೆ ಸಾಕಷ್ಟು ವೈಜ್ಞಾನಿಕ ಪುರಾವೆಗಳಿಲ್ಲ. ಮಕ್ಕಳಿಗೆ ಬಾಳೆಹಣ್ಣು ನೀಡುವ ಸಮಯಕ್ಕಿಂತ ಅವರ ವಯಸ್ಸು, ಹಸಿವು ಮತ್ತು ಜೀರ್ಣಶಕ್ತಿಗೆ ಹೆಚ್ಚು ಮಹತ್ವ ನೀಡಬೇಕು. ತಿಂದ ನಂತರ ಹೊಟ್ಟೆ ಉಬ್ಬರ ಅಥವಾ ಅಸ್ವಸ್ಥತೆ ಕಂಡುಬಂದರೆ ಪ್ರಮಾಣವನ್ನು ಗಮನಿಸಿ ವೈದ್ಯರ ಸಲಹೆ ಪಡೆಯಿರಿ. ಒಟ್ಟಿನಲ್ಲಿ, ಚಳಿಗಾಲದಲ್ಲಿ ಮಕ್ಕಳಿಗೆ ಬಾಳೆಹಣ್ಣು ನೀಡಬಹುದು. ಆದರೆ ಆರು ತಿಂಗಳಿಗಿಂತ ಕಡಿಮೆ ವಯಸ್ಸಿನ ಶಿಶುಗಳಿಗೆ ತಾಯಿಹಾಲು ಅಥವಾ ಸೂಕ್ತ ಶಿಶು ಆಹಾರವೇ ಮುಖ್ಯ; ವೈದ್ಯರ ಸಲಹೆಯಿಲ್ಲದೆ ಘನ ಆಹಾರ ಆರಂಭಿಸಬಾರದು. ಬಾಳೆಹಣ್ಣನ್ನು ವಯಸ್ಸಿಗೆ ತಕ್ಕ ರೂಪದಲ್ಲಿ, ಮಿತ ಪ್ರಮಾಣದಲ್ಲಿ ನೀಡುವುದು ಉತ್ತಮ.

ಸೂಚನೆ: ಈ ಲೇಖನ ಸಾಮಾನ್ಯ ಆರೋಗ್ಯ ಮಾಹಿತಿಗಾಗಿ ಮಾತ್ರ. ಮಗುವಿಗೆ ಆಹಾರ ಅಲರ್ಜಿ, ನಿರಂತರ ಕೆಮ್ಮು, ಉಸಿರಾಟದ ತೊಂದರೆ ಅಥವಾ ಇತರ ಅನಾರೋಗ್ಯದ ಲಕ್ಷಣಗಳಿದ್ದರೆ ಮಕ್ಕಳ ವೈದ್ಯರನ್ನು ಸಂಪರ್ಕಿಸಿ.

ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ