ಅತಿಯಾಗಿ ಬಿಸಿ ಟೀ, ಕಾಫಿ ಕುಡಿಯುತ್ತಿದ್ದೀರಾ? ಅನ್ನನಾಳದ ಕ್ಯಾನ್ಸರ್ ಅಪಾಯದ ಬಗ್ಗೆ ವೈದ್ಯರ ಎಚ್ಚರಿಕೆ

ಬೆಳಗ್ಗೆ ಎದ್ದ ತಕ್ಷಣ ಅಥವಾ ಕೆಲಸದ ನಡುವೆ ಒಂದು ಕಪ್ ಬಿಸಿ ಟೀ, ಕಾಫಿ ಕುಡಿಯುವುದು ಅನೇಕರ ದಿನಚರಿಯ ಭಾಗವಾಗಿದೆ. ಆದರೆ ಪಾನೀಯಗಳನ್ನು ಅತಿಯಾಗಿ ಬಿಸಿ ಇರುವಾಗಲೇ ಕುಡಿಯುವ ಅಭ್ಯಾಸ ಆರೋಗ್ಯದ ಮೇಲೆ ಪರಿಣಾಮ ಬೀರಬಹುದು. ವಿಶೇಷವಾಗಿ ಪದೇಪದೇ 65 ಡಿಗ್ರಿ ಸೆಲ್ಸಿಯಸ್‌ಗಿಂತ ಹೆಚ್ಚಿನ ಉಷ್ಣಾಂಶದ ಪಾನೀಯಗಳನ್ನು ಸೇವಿಸುವುದರಿಂದ ಅನ್ನನಾಳದ ಕ್ಯಾನ್ಸರ್ ಅಪಾಯ ಹೆಚ್ಚಾಗುವ ಸಾಧ್ಯತೆಯಿದೆ ಎಂದು ಸಂಶೋಧನೆಗಳು ಸೂಚಿಸಿವೆ. ಹಾಗಾದರೆ ಟೀ, ಕಾಫಿ ಕುಡಿಯುವುದನ್ನು ನಿಲ್ಲಿಸಬೇಕೇ ಅಥವಾ ಈ ರೀತಿ ಆಗದಂತೆ ಯಾವ ರೀತಿ ಮುನ್ನೆಚ್ಚರಿಕೆಗಳನ್ನು ವಹಿಸಬೇಕು ಎಂಬುದನ್ನು ಸ್ಟೋರಿ ಮೂಲಕ ತಿಳಿದುಕೊಳ್ಳಿ.

ಅತಿಯಾದ ಬಿಸಿ ಪಾನೀಯಗಳು ಅನ್ನನಾಳಕ್ಕೆ ಹೇಗೆ ಹಾನಿ ಮಾಡುತ್ತವೆ?

ಅನ್ನನಾಳವು ಬಾಯಿ ಮತ್ತು ಹೊಟ್ಟೆಯನ್ನು ಸಂಪರ್ಕಿಸುವ ಸ್ನಾಯುಗಳಿಂದ ಕೂಡಿದ ಕೊಳವೆಯಾಗಿದೆ. ಇದರ ಒಳಭಾಗದಲ್ಲಿ ರಕ್ಷಣಾತ್ಮಕ ಲೋಳೆಯ ಪದರವಿರುತ್ತದೆ. ಅತಿಯಾಗಿ ಬಿಸಿಯಾಗಿರುವ ಟೀ, ಕಾಫಿಯನ್ನು ಪದೇಪದೇ ಕುಡಿಯುವುದರಿಂದ ಈ ಪದರಕ್ಕೆ ಹಾನಿಯಾಗಬಹುದು. ಇದರಿಂದ ಉರಿಯೂತ ಉಂಟಾಗಿ ಜೀವಕೋಶಗಳು ಪದೇಪದೇ ಹಾನಿಗೊಳಗಾಗುವ ಸಾಧ್ಯತೆಯಿದೆ. ದೀರ್ಘಕಾಲ ಇಂತಹ ಉಷ್ಣತೆಯ ಪ್ರಭಾವಕ್ಕೆ ಒಳಗಾಗುವುದು ಜೀವಕೋಶಗಳಲ್ಲಿ ಅಸಹಜ ಬದಲಾವಣೆಗಳಿಗೆ ಕಾರಣವಾಗಬಹುದು.

65 ಡಿಗ್ರಿಗಿಂತ ಹೆಚ್ಚು ಬಿಸಿ ಪಾನೀಯ ಅಪಾಯವೇ?

ವಿಶ್ವ ಆರೋಗ್ಯ ಸಂಸ್ಥೆಯ ಅಂತರರಾಷ್ಟ್ರೀಯ ಕ್ಯಾನ್ಸರ್ ಸಂಶೋಧನಾ ಸಂಸ್ಥೆ (IARC) 65 ಡಿಗ್ರಿ ಸೆಲ್ಸಿಯಸ್‌ಗಿಂತ ಹೆಚ್ಚಿನ ಉಷ್ಣಾಂಶದ ಪಾನೀಯಗಳ ಸೇವನೆಯನ್ನು ಮನುಷ್ಯರಲ್ಲಿ ಕ್ಯಾನ್ಸರ್ ಉಂಟುಮಾಡುವ ಸಾಧ್ಯತೆಯಿರುವ ಅಂಶವೆಂದು ಗ್ರೂಪ್ 2A ವಿಭಾಗದಲ್ಲಿ ವರ್ಗೀಕರಿಸಿದೆ. ವಿಶೇಷವಾಗಿ ಅನ್ನನಾಳದ ಪೊರೆಯ ಜೀವಕೋಶಗಳಿಗೆ ಸಂಬಂಧಿಸಿದ ಕ್ಯಾನ್ಸರ್ (Oesophageal Squamous Cell Carcinoma) ಅಪಾಯದೊಂದಿಗೆ ಇದರ ಸಂಬಂಧ ಕಂಡುಬಂದಿದೆ. ಆದರೆ ಒಮ್ಮೆ ಅತಿಯಾಗಿ ಬಿಸಿ ಪಾನೀಯ ಕುಡಿದರೆ ಕ್ಯಾನ್ಸರ್ ಬರುತ್ತದೆ ಎಂದರ್ಥವಲ್ಲ. ಪದೇಪದೇ ಇಂತಹ ಅಭ್ಯಾಸ ಹೊಂದಿರುವುದರಿಂದ ಅಪಾಯ ಹೆಚ್ಚಾಗಬಹುದು.

ಟೀ, ಕಾಫಿ ಕುಡಿಯುವುದನ್ನು ನಿಲ್ಲಿಸಬೇಕೇ?

ಇಲ್ಲ. ಟೀ ಅಥವಾ ಕಾಫಿಯ ಸೇವನೆಗಿಂತ ಅವುಗಳನ್ನು ಕುಡಿಯುವ ಉಷ್ಣಾಂಶ ಮುಖ್ಯವಾಗಿದೆ. ಆದ್ದರಿಂದ ಪಾನೀಯ ತಯಾರಿಸಿದ ತಕ್ಷಣ ಕುಡಿಯದೆ ಸ್ವಲ್ಪ ಸಮಯ ತಣ್ಣಗಾಗಲು ಬಿಡಬೇಕು. ಬಾಯಿ ಅಥವಾ ಗಂಟಲು ಸುಡುವಷ್ಟು ಬಿಸಿಯಾಗಿದ್ದರೆ ಸೇವಿಸಬಾರದು.

ಅನ್ನನಾಳದ ಕ್ಯಾನ್ಸರ್‌ನ ಲಕ್ಷಣಗಳೇನು?

ಆಹಾರ ನುಂಗಲು ತೊಂದರೆಯಾಗುವುದು, ಕಾರಣವಿಲ್ಲದೆ ತೂಕ ಕಡಿಮೆಯಾಗುವುದು, ಎದೆಯ ಹಿಂದೆ ನಿರಂತರ ನೋವು, ಪದೇಪದೇ ವಾಂತಿಯಾಗುವುದು ಮತ್ತು ವಾಂತಿಯಲ್ಲಿ ರಕ್ತ ಕಾಣಿಸಿಕೊಳ್ಳುವುದು ಪ್ರಮುಖ ಎಚ್ಚರಿಕೆಯ ಲಕ್ಷಣಗಳಾಗಿವೆ. ಇವು ಕಂಡುಬಂದರೆ ವೈದ್ಯರನ್ನು ಸಂಪರ್ಕಿಸಬೇಕು. ಅಗತ್ಯವಿದ್ದರೆ ಎಂಡೋಸ್ಕೋಪಿ ಮತ್ತು ಬಯಾಪ್ಸಿ ಪರೀಕ್ಷೆಗಳನ್ನು ಮಾಡಬಹುದು.

ಯಾವ ಮುನ್ನೆಚ್ಚರಿಕೆಗಳನ್ನು ವಹಿಸಬೇಕು?

• ಟೀ, ಕಾಫಿ ತಯಾರಿಸಿದ ತಕ್ಷಣ ಕುಡಿಯಬೇಡಿ.
• ಸ್ವಲ್ಪ ತಣ್ಣಗಾದ ನಂತರವೇ ಸೇವಿಸಿ.
• ಬಾಯಿ ಮತ್ತು ಗಂಟಲು ಸುಡುವಷ್ಟು ಬಿಸಿಯಾಗಿರುವ ಪಾನೀಯಗಳನ್ನು ತಪ್ಪಿಸಿ.
• ತಂಬಾಕು ಸೇವನೆ ಮತ್ತು ಮದ್ಯಪಾನದಿಂದ ದೂರವಿರಿ.
• ನುಂಗಲು ತೊಂದರೆ ಅಥವಾ ಕಾರಣವಿಲ್ಲದೆ ತೂಕ ಇಳಿಕೆಯಾದರೆ ವೈದ್ಯರನ್ನು ಸಂಪರ್ಕಿಸಿ.

ಒಟ್ಟಿನಲ್ಲಿ, ಟೀ ಮತ್ತು ಕಾಫಿಯನ್ನು ಸಂಪೂರ್ಣವಾಗಿ ತ್ಯಜಿಸುವ ಅಗತ್ಯವಿಲ್ಲ. ಅವುಗಳನ್ನು ಅತಿಯಾಗಿ ಬಿಸಿಯಾಗಿರುವಾಗ ಕುಡಿಯುವುದನ್ನು ತಪ್ಪಿಸುವುದು ಅನ್ನನಾಳದ ಆರೋಗ್ಯ ಕಾಪಾಡಿಕೊಳ್ಳಲು ಸಹಾಯಕವಾಗಬಹುದು.

ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ