ಜ್ವರ ಬಂದಾಗ ಸ್ನಾನ ಮಾಡುವ ಮುನ್ನ ಈ 5 ವಿಷಯಗಳನ್ನು ತಪ್ಪದೇ ತಿಳಿದುಕೊಳ್ಳಿ

ಜ್ವರ ಬಂದಾಗ ಸ್ನಾನ ಮಾಡಬಾರದು, ಸ್ನಾನ ಮಾಡಿದರೆ ಜ್ವರ ಮತ್ತಷ್ಟು ಹೆಚ್ಚಾಗುತ್ತದೆ ಎಂಬ ನಂಬಿಕೆ ಹಲವರಲ್ಲಿದೆ. ಆದರೆ ಜ್ವರ ಇರುವ ವ್ಯಕ್ತಿ ತನ್ನ ದೇಹದ ಸ್ಥಿತಿ ಮತ್ತು ಸ್ನಾನದ ವಿಧಾನವನ್ನು ಗಮನದಲ್ಲಿಟ್ಟುಕೊಂಡು ಸ್ನಾನ ಮಾಡಬಹುದು. ವಿಶೇಷವಾಗಿ ತಣ್ಣನೆಯ ನೀರಿನಿಂದ ಸ್ನಾನ ಮಾಡುವುದನ್ನು ತಪ್ಪಿಸಿ, ಆರಾಮದಾಯಕವಾದ ಉಗುರು ಬೆಚ್ಚಗಿನ ನೀರನ್ನು ಬಳಸುವುದು ಉತ್ತಮ. ಸ್ನಾನವು ದೇಹದ ತಾಪಮಾನವನ್ನು ನೇರವಾಗಿ ಗುಣಪಡಿಸುವುದಿಲ್ಲ; ಆದರೆ ಬೆವರು, ಅಸ್ವಸ್ಥತೆ ಮತ್ತು ದೇಹದ ಅಂಟುತನವನ್ನು ಕಡಿಮೆ ಮಾಡಿ ತಾತ್ಕಾಲಿಕ ಆರಾಮ ನೀಡಬಹುದು. ಹಾಗಾದರೆ ಜ್ವರ ಬಂದಾಗ ಉಗುರುಬೆಚ್ಚಗಿನ ನೀರಿನಿಂದ ಏಕೆ ಸ್ನಾನ ಮಾಡಬೇಕು, ಯಾರು ಸ್ನಾನ ಮಾಡಬಾರದು ಎಂಬುದನ್ನು ಸ್ಟೋರಿ ಮೂಲಕ ತಿಳಿದುಕೊಳ್ಳಿ.

ಜ್ವರ ಬಂದಾಗ ಸ್ನಾನ ಮಾಡಬಹುದೇ?

ಸಾಮಾನ್ಯ ಜ್ವರ ಇದ್ದು, ವ್ಯಕ್ತಿಗೆ ತಲೆತಿರುಗುವಿಕೆ ಅಥವಾ ತೀವ್ರ ದೌರ್ಬಲ್ಯ ಇಲ್ಲದಿದ್ದರೆ ಸ್ನಾನ ಮಾಡಬಹುದು. ಉಗುರು ಬೆಚ್ಚಗಿನ ನೀರಿನಿಂದ ತ್ವರಿತವಾಗಿ ಸ್ನಾನ ಮಾಡುವುದರಿಂದ ದೇಹ ಸ್ವಚ್ಛವಾಗಿರುತ್ತದೆ ಮತ್ತು ಕೆಲವರಿಗೆ ಆರಾಮದ ಅನುಭವವಾಗಬಹುದು. ಆದರೆ ಸ್ನಾನ ಮಾಡುವುದರಿದ ವೈರಲ್ ಅಥವಾ ಬ್ಯಾಕ್ಟೀರಿಯಾ ಸೋಂಕು ಗುಣವಾಗುವುದಿಲ್ಲ. ಆದ್ದರಿಂದ ಸ್ನಾನವನ್ನು ಆರಾಮ ನೀಡುವ ಕ್ರಮವೆಂದು ಪರಿಗಣಿಸಬೇಕು.

ತಣ್ಣೀರಿನಿಂದ ಸ್ನಾನ ಮಾಡುವುದು ಸರಿಯೇ?

ಜ್ವರ ಇಳಿಸಲು ತಣ್ಣೀರಿನಿಂದ ಸ್ನಾನ ಮಾಡುವುದು ಸೂಕ್ತವಲ್ಲ. ತಣ್ಣೀರು ದೇಹದಲ್ಲಿ ನಡುಕ ಉಂಟುಮಾಡಬಹುದು. ನಡುಕ ಆರಂಭವಾದಾಗ ದೇಹ ಹೆಚ್ಚುವರಿ ಶಾಖವನ್ನು ಉತ್ಪಾದಿಸುವುದರಿಂದ ವ್ಯಕ್ತಿಗೆ ಇನ್ನಷ್ಟು ಅಸ್ವಸ್ಥತೆ ಉಂಟಾಗಬಹುದು. ಅದೇ ರೀತಿ ತುಂಬಾ ಬಿಸಿ ನೀರಿನಿಂದ ಸ್ನಾನ ಮಾಡುವುದೂ ಬೇಡ. ಹೆಚ್ಚು ಬಿಸಿಯಾದ ನೀರು ತಲೆತಿರುಗುವಿಕೆ, ದೌರ್ಬಲ್ಯ ಅಥವಾ ಚರ್ಮದ ಅಸ್ವಸ್ಥತೆಯನ್ನು ಹೆಚ್ಚಿಸಬಹುದು.

ಉಗುರುಬೆಚ್ಚಗಿನ ನೀರು ಏಕೆ ಒಳ್ಳೆಯದು?

ಅತಿಯಾಗಿ ಬಿಸಿಯಾಗಿರದ, ಅತಿಯಾಗಿ ತಣ್ಣಗಿರದ ನೀರು ದೇಹಕ್ಕೆ ಆರಾಮದಾಯಕವಾಗಿರುತ್ತದೆ. ಜ್ವರದಿಂದ ಬೆವರುತ್ತಿರುವಾಗ ಸ್ನಾನ ಮಾಡಿದರೆ ದೇಹದ ಮೇಲಿರುವ ಬೆವರು ಮತ್ತು ಕೊಳೆಯನ್ನು ತೆಗೆದುಹಾಕಬಹುದು. ಆದರೆ ನೀರು ತುಂಬಾ ಬಿಸಿಯಾಗಿರಬಾರದು ಮತ್ತು ಸ್ನಾನವನ್ನು ಹೆಚ್ಚು ಹೊತ್ತು ಮಾಡಬಾರದು.

ಇದನ್ನೂ ಓದಿ: ಮಕ್ಕಳಿಂದ ದೊಡ್ಡವರವರೆಗೆ.. ಅವಲಕ್ಕಿ ತಿನ್ನುವುದರಿಂದ ಸಿಗುವ ಪ್ರಯೋಜನ?

ಸ್ನಾನ ಮಾಡಲು ಸಾಧ್ಯವಾಗದಿದ್ದರೆ?

ಜ್ವರದ ಜೊತೆಗೆ ತೀವ್ರ ದೌರ್ಬಲ್ಯ, ತಲೆತಿರುಗುವಿಕೆ ಅಥವಾ ನಿಲ್ಲಲು ಕಷ್ಟವಾಗುತ್ತಿದ್ದರೆ ಬಾತ್‌ರೂಮ್‌ಗೆ ಹೋಗಿ ಸ್ನಾನ ಮಾಡಬೇಕೆಂದಿಲ್ಲ. ಇಂತಹ ಸಂದರ್ಭದಲ್ಲಿ ಉಗುರು ಬೆಚ್ಚಗಿನ ನೀರಿನಲ್ಲಿ ನೆನೆಸಿದ ಮೃದುವಾದ ಬಟ್ಟೆಯಿಂದ ಮುಖ, ಕುತ್ತಿಗೆ, ಕೈ, ಕಾಲು ಮತ್ತು ದೇಹವನ್ನು ನಿಧಾನವಾಗಿ ಒರೆಸಬಹುದು.

ಸ್ನಾನದ ಬಳಿಕ ಏನು ಮಾಡಬೇಕು?

ಸ್ನಾನ ಮಾಡಿದ ತಕ್ಷಣ ದೇಹ ಮತ್ತು ಕೂದಲನ್ನು ಚೆನ್ನಾಗಿ ಒರೆಸಿಕೊಳ್ಳಬೇಕು. ತೇವವಾದ ಬಟ್ಟೆಯಲ್ಲಿ ಹೆಚ್ಚು ಹೊತ್ತು ಇರಬಾರದು. ಹಗುರವಾದ, ಆರಾಮದಾಯಕ ಬಟ್ಟೆ ಧರಿಸಿ ವಿಶ್ರಾಂತಿ ಪಡೆಯುವುದು ಉತ್ತಮ. ಜ್ವರದ ಸಂದರ್ಭದಲ್ಲಿ ಸಾಕಷ್ಟು ನೀರು ಮತ್ತು ಇತರ ದ್ರವಗಳನ್ನು ಸೇವಿಸುವುದು ಕೂಡ ಮುಖ್ಯ.

ಜ್ವರ ಬಂದಾಗ ಸ್ನಾನ ಮಾಡುವುದು ಸಾಮಾನ್ಯವಾಗಿ ನಿಷೇಧವಲ್ಲ. ಆದರೆ ತಣ್ಣೀರು ಅಥವಾ ತುಂಬಾ ಬಿಸಿನೀರನ್ನು ತಪ್ಪಿಸಿ, ಆರಾಮದಾಯಕ ಉಗುರು ಬೆಚ್ಚಗಿನ ನೀರಿನಿಂದ ಕಡಿಮೆ ಸಮಯ ಸ್ನಾನ ಮಾಡುವುದು ಉತ್ತಮ. ಜ್ವರದ ಕಾರಣವನ್ನು ಪತ್ತೆಹಚ್ಚಿ ಸೂಕ್ತ ಚಿಕಿತ್ಸೆ ಪಡೆಯುವುದೇ ಮುಖ್ಯ.

ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ