ಚೀಟ್ ಡೇ ಹೃದಯಕ್ಕೆ ಹಾನಿಕರವೇ? ಇಷ್ಟದ ಆಹಾರ ತಿನ್ನುವಾಗ ಈ ವಿಷಯ ನೆನಪಿರಲಿ!

ಆರೋಗ್ಯಕರ ಆಹಾರ ಪದ್ಧತಿ ಪಾಲಿಸುವವರು ಕೆಲವೊಮ್ಮೆ ಬರ್ಗರ್, ಪಿಜ್ಜಾ, ಫ್ರೆಂಚ್ ಫ್ರೈಸ್ ಅಥವಾ ಡೆಸರ್ಟ್‌ನಂತಹ ಇಷ್ಟದ ಆಹಾರವನ್ನು ತಿನ್ನಲು “ಚೀಟ್ ಮೀಲ್” ಅಥವಾ “ಚೀಟ್ ಡೇ” ಮಾಡಿಕೊಳ್ಳುತ್ತಾರೆ. ಆದರೆ ಇಂತಹ ಆಹಾರ ಹೃದಯದ ಆರೋಗ್ಯಕ್ಕೆ ಹಾನಿ ಮಾಡುತ್ತದೆಯೇ ಎಂಬ ಪ್ರಶ್ನೆ ಹಲವರಲ್ಲಿದೆ. ತಜ್ಞರ ಪ್ರಕಾರ, ಹೃದಯದ ಆರೋಗ್ಯವನ್ನು ನಿರ್ಧರಿಸುವುದು ಒಂದೇ ಒಂದು ಊಟವಲ್ಲ; ಆದರೂ ಕೂಡ ಇಂತಹ ಚೀಟ್ ಮೀಲ್ ಯಾವ ರೀತಿ ಆರೋಗ್ಯಕ್ಕೆ ಹಾನಿಕಾರಕವಾಗಬಹುದು ಮತ್ತು ಯಾರು ಹೆಚ್ಚು ಜಾಗರೂಕರಾಗಿರಬೇಕು ಎಂಬುದನ್ನು ಸ್ಟೋರಿ ಮೂಲಕ ತಿಳಿದುಕೊಳ್ಳಿ.

ಚೀಟ್ ಮೀಲ್ ಹೃದಯಕ್ಕೆ ಹಾನಿಕರವೇ?

ಒಟ್ಟಾರೆ ಆಹಾರದಲ್ಲಿ ಹೆಚ್ಚಿನ ಭಾಗ ಪೌಷ್ಟಿಕ ಮತ್ತು ಸಮತೋಲಿತವಾಗಿದ್ದರೆ, ಅಪರೂಪಕ್ಕೆ ಇಷ್ಟದ ಆಹಾರವನ್ನು ಮಿತವಾಗಿ ಸೇವಿಸುವುದು ಸಾಮಾನ್ಯವಾಗಿ ಸಮಸ್ಯೆಯಾಗುವುದಿಲ್ಲ ಎಂದು ಆರೋಗ್ಯ ತಜ್ಞರು ಹೇಳುತ್ತಾರೆ. ಆದರೆ ಚೀಟ್ ಮೀಲ್‌ನಲ್ಲಿ ಏನಿದೆ ಮತ್ತು ಅದನ್ನು ಎಷ್ಟು ಬಾರಿ ಸೇವಿಸುತ್ತೀರಿ ಎಂಬುದು ಕೂಡ ಮುಖ್ಯವಾಗುತ್ತದೆ. ಸ್ಯಾಚುರೇಟೆಡ್ ಫ್ಯಾಟ್, ಉಪ್ಪು ಮತ್ತು ಹೆಚ್ಚುವರಿ ಸಕ್ಕರೆ ಹೆಚ್ಚಿರುವ ಆಹಾರವನ್ನು ಪದೇಪದೇ ಸೇವಿಸುವುದರಿಂದ ಕಾಲಕ್ರಮೇಣ ಕೊಲೆಸ್ಟ್ರಾಲ್, ರಕ್ತದೊತ್ತಡ ಮತ್ತು ತೂಕದ ಮೇಲೆ ಪರಿಣಾಮ ಬೀರುವ ಸಾಧ್ಯತೆಯಿದೆ.

ಬರ್ಗರ್, ಪಿಜ್ಜಾ, ಫ್ರೈಸ್‌ ತಿನ್ನಬಹುದೇ?

ರೆಸ್ಟೋರೆಂಟ್ ಶೈಲಿಯ ಬರ್ಗರ್, ಫ್ರೆಂಚ್ ಫ್ರೈಸ್, ಹೆಚ್ಚು ಚೀಸ್ ಇರುವ ಪಿಜ್ಜಾ ಅಥವಾ ರಿಚ್ ಡೆಸರ್ಟ್‌ಗಳಲ್ಲಿ ಹೆಚ್ಚಿನ ಸ್ಯಾಚುರೇಟೆಡ್ ಫ್ಯಾಟ್, ಸೋಡಿಯಂ ಮತ್ತು ಹೆಚ್ಚುವರಿ ಸಕ್ಕರೆ ಇರಬಹುದು. ಇದರ ಜೊತೆಗೆ ಹೆಚ್ಚಿನ ಪ್ರಮಾಣದ ಆಹಾರ ಸೇವಿಸಿ, ನಂತರ ಸಕ್ಕರೆ ಪಾನೀಯ ಅಥವಾ ಡೆಸರ್ಟ್ ತೆಗೆದುಕೊಂಡರೆ ಒಟ್ಟು ಕ್ಯಾಲೊರಿ ಮತ್ತು ಪೋಷಕಾಂಶಗಳ ಅಸಮತೋಲನ ಇನ್ನಷ್ಟು ಹೆಚ್ಚಬಹುದು.

ಚೀಟ್ ಮೀಲ್ ಅನ್ನು ಆರೋಗ್ಯಕರವಾಗಿ ಹೇಗೆ ಬದಲಿಸಬಹುದು?

ಇಷ್ಟದ ಆಹಾರವನ್ನು ಸಂಪೂರ್ಣವಾಗಿ ಬಿಟ್ಟುಬಿಡುವ ಅಗತ್ಯವಿಲ್ಲ. ಅದರ ಪ್ರಮಾಣವನ್ನು ನಿಯಂತ್ರಿಸುವುದು ಬಹಳ ಮುಖ್ಯ. ಸಾಧ್ಯವಾದಷ್ಟು ಗ್ರಿಲ್ ಮಾಡಿದ ಅಥವಾ ಕಡಿಮೆ ಎಣ್ಣೆಯಲ್ಲಿ ತಯಾರಿಸಿದ ಆಯ್ಕೆಗಳನ್ನು ಆರಿಸಬಹುದು. ಆಹಾರದ ಜೊತೆಗೆ ತರಕಾರಿಗಳನ್ನು ಸೇರಿಸಿ. ಸಕ್ಕರೆ ಪಾನೀಯದ ಬದಲು ನೀರು ಕುಡಿಯಿರಿ. ಡೆಸರ್ಟ್ ಬೇಕಿದ್ದರೆ ಹಂಚಿಕೊಂಡು ತಿನ್ನಬಹುದು. ಒಂದು ಚೀಟ್ ಮೀಲ್ ನಲ್ಲಿಯೇ ಎಲ್ಲವನ್ನೂ ಅತಿಯಾಗಿ ಸೇವನೆ ಮಾಡಲು ಹೋಗಬೇಡಿ.

ಇದನ್ನೂ ಓದಿ: ಸಾಂಬಾರ್ ಸೊಪ್ಪಿನಲ್ಲಿ ಇಷ್ಟೆಲ್ಲಾ ಆರೋಗ್ಯ ಗುಣಗಳಿವೆಯೇ? ತಿಳಿಯಿರಿ ಪ್ರಮುಖ ಪ್ರಯೋಜನಗಳು

ಯಾರು ಹೆಚ್ಚು ಜಾಗರೂಕರಾಗಿರಬೇಕು?

ಅಧಿಕ ರಕ್ತದೊತ್ತಡ, ಹೆಚ್ಚಿನ ಕೊಲೆಸ್ಟ್ರಾಲ್, ಮಧುಮೇಹ, ಅಧಿಕ ತೂಕ ಅಥವಾ ಕುಟುಂಬದಲ್ಲಿ ಹೃದಯ ಸಂಬಂಧಿ ಕಾಯಿಲೆ ಇರುವವರು ತಮ್ಮ ಆಹಾರ ಪದ್ಧತಿಯ ಬಗ್ಗೆ ಹೆಚ್ಚು ಗಮನಹರಿಸಬೇಕು. ರಕ್ತದೊತ್ತಡ, ರಕ್ತದಲ್ಲಿನ ಸಕ್ಕರೆ ಮತ್ತು ಕೊಲೆಸ್ಟ್ರಾಲ್ ಮಟ್ಟಗಳನ್ನು ನಿಯಮಿತವಾಗಿ ಪರಿಶೀಲಿಸುವುದು ಸಹ ಮುಖ್ಯ. ಹೃದಯದ ಆರೋಗ್ಯಕ್ಕೆ ಒಂದು ದಿನದ ಪರಿಪೂರ್ಣ ಆಹಾರಕ್ಕಿಂತ ದೀರ್ಘಕಾಲದ ನಿರಂತರ ಆರೋಗ್ಯಕರ ಜೀವನಶೈಲಿ ಹೆಚ್ಚು ಮಹತ್ವದ್ದಾಗಿದೆ. ಒಟ್ಟಿನಲ್ಲಿ, ಚೀಟ್ ಮೀಲ್ ಎಂದರೆ ನಿಯಮಿತವಾಗಿ ಅತಿಯಾಗಿ ತಿನ್ನುವ ದಿನವಲ್ಲ. ಮಿತವಾಗಿ, ಸರಿಯಾದ ಪ್ರಮಾಣದಲ್ಲಿ ಮತ್ತು ಸಮತೋಲಿತ ಆಹಾರದ ಭಾಗವಾಗಿ ಇಷ್ಟದ ಆಹಾರವನ್ನು ಸೇವಿಸಬೇಕು.

ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ