Daily Devotional: ದೇವಾಲಯಗಳಲ್ಲಿ ದಕ್ಷಿಣೆ ನೀಡುವುದರ ಹಿಂದಿನ ಫಲ ಏನು?

ಬೆಂಗಳೂರು, ನವೆಂಬರ್ 28: ಭಾರತೀಯ ಸಂಪ್ರದಾಯದಲ್ಲಿ, ದೇವಸ್ಥಾನಗಳಿಗೆ ಭೇಟಿ ನೀಡಿದಾಗ ಅಥವಾ ಧಾರ್ಮಿಕ ಕಾರ್ಯಗಳನ್ನು ನೆರವೇರಿಸಿದ ನಂತರ ದಕ್ಷಿಣೆ ನೀಡುವುದು ಒಂದು ಪ್ರಮುಖ ಆಚರಣೆಯಾಗಿದೆ. ದಕ್ಷಿಣೆ ಎಂದರೆ ಕೇವಲ ಕಾಣಿಕೆಯಲ್ಲ, ಅದಕ್ಕೊಂದು ಆಳವಾದ ಅರ್ಥ ಮತ್ತು ಮಹತ್ವವಿದೆ. ಯಜ್ಞ-ಯಾಗಾದಿಗಳು, ಹೋಮಗಳು ಮತ್ತು ಇತರ ದೇವತಾ ಕಾರ್ಯಗಳು ಮುಗಿದ ನಂತರ ಪುರೋಹಿತರಿಗೆ, ಅರ್ಚಕರಿಗೆ ಅಥವಾ ಜ್ಯೋತಿಷಿಗಳಿಗೆ ನೀಡುವ ಹಣವನ್ನು ದಕ್ಷಿಣೆ ಎನ್ನಲಾಗುತ್ತದೆ.

ಇದು ಕೇವಲ ಕನಿಕರದಿಂದ ಅಥವಾ ತೋರಿಸಿಕೊಳ್ಳಲು ನೀಡುವ ದಾನವಲ್ಲ. ಬದಲಾಗಿ, ನಿರ್ದಿಷ್ಟ ಕಾರ್ಯ ಮಾಡಿದ ನಂತರ ಉಂಟಾಗುವ ಕೃತಜ್ಞತೆ ಮತ್ತು ಸಂತೃಪ್ತಿಯ ಭಾವನೆಯ ಸಂಕೇತ. ನಮಗೆ ಪುಣ್ಯ ಲಭಿಸಲು ಮತ್ತು ಕರ್ಮಗಳನ್ನು ಕಳೆದುಕೊಳ್ಳಲು ಈ ದಕ್ಷಿಣೆಯನ್ನು ನೀಡಲಾಗುತ್ತದೆ. ಇದರಿಂದ ಪಾಪಗಳು ನಾಶವಾಗಿ, ಪುಣ್ಯ ಲಭಿಸುತ್ತದೆ, ಶುಭ ಉಂಟಾಗುತ್ತದೆ ಮತ್ತು ನಮ್ಮ ಕರ್ಮಗಳು ಶುದ್ಧಗೊಳ್ಳುತ್ತವೆ. ದಕ್ಷಿಣೆ ನೀಡುವ ಮೂಲಕ ದೇವರು ಹಾಗೂ ವ್ಯಕ್ತಿ ಇಬ್ಬರೂ ಸಂತೃಪ್ತರಾಗುತ್ತಾರೆ ಎಂದು ನಂಬಲಾಗಿದೆ. ನಕಾರಾತ್ಮಕ ಶಕ್ತಿಗಳು ದೂರವಾಗಿ ಸಕಾರಾತ್ಮಕ ಶಕ್ತಿಗಳು ಪ್ರಾಪ್ತವಾಗುತ್ತವೆ. ಈ ಕಾಣಿಕೆ ಯಾವಾಗಲೂ ಪ್ರಾಮಾಣಿಕವಾಗಿ ಸಂಪಾದಿಸಿದ ಹಣದಿಂದ ಇರಬೇಕು ಎಂಬುದು ಮುಖ್ಯ ಎಂದು ಡಾ. ಬಸವರಾಜ ಗುರೂಜಿ ಹೇಳಿದ್ದಾರೆ.