ಸುಂದರ ಯುವತಿಯ Friend Request ಬಂದರೆ ಇರಲಿ ಎಚ್ಚರ..! ನೀವೂ ವಂಚಕರ ಜಾಲದಲ್ಲಿ ಸಿಕ್ಕಿಬೀಳಬಹುದು..

ಮೈಸೂರು: ಇತ್ತೀಚೆಗಂತೂ ಹೈಟೆಕ್​ ವಂಚನೆಯ ದಂಧೆ ಹೆಚ್ಚಾಗಿ ಬಿಟ್ಟಿದೆ.. ತಂತ್ರಜ್ಞಾನ ಅಭಿವೃದ್ಧಿಯಾದಷ್ಟೂ ಮೋಸದ ಜಾಲವೂ ವಿಸ್ತರಿಸುತ್ತಿದೆ. ಅಂಥ ವಂಚನೆಯ ಸಾಲಿಗೆ ಈಗ ಮತ್ತೊಂದು ಸೇರ್ಪಡೆಯಾಗಿದ್ದು.. ಅದು ಹನಿ ವಿಡಿಯೋ ಟ್ರ್ಯಾಪ್..

ಫೇಸ್​ಬುಕ್ ಪ್ರೊಫೈಲ್​ಗಳೇ ಟಾರ್ಗೆಟ್​
ಇದೂ ಕೂಡ ಹನಿಟ್ರ್ಯಾಪ್​ನಂತಹ ವಂಚನೆ.. ಈ ಜಾಲದಲ್ಲಿ ವಂಚಕರು ಮೊದಲು ಫೇಸ್​ಬುಕ್​ ಪ್ರೊಫೈಲ್​ ಪರಿಶೀಲನೆ ಮಾಡುತ್ತಾರೆ. ಅದರ ಮೂಲಕವೇ ನೀವು ಶ್ರೀಮಂತರಾ ಎಂಬುದನ್ನೂ ಚೆಕ್​ ಮಾಡಿಕೊಳ್ಳುತ್ತಾರೆ. ನಂತರ ನಿಮಗೆ ಸುಂದರ ಯುವತಿಯ ಭಾವಚಿತ್ರವಿರುವ ಅಕೌಂಟ್​ನಿಂದ ಫ್ರೆಂಡ್ ರಿಕ್ವೆಸ್ಟ್ ಕಳಿಸುತ್ತಾರೆ.

ಹಾಗೇ, ಮೆಸೆಂಜರ್​ನಲ್ಲೂ ಮೆಸೇಜ್​ಗಳು ಶುರುವಾಗುತ್ತವೆ. ನೀವು ಚೂರೇಚೂರು ಆಸಕ್ತಿ ತೋರಿಸಿದರೂ ಅಲ್ಲಿಗೆ ಮುಗಿಯಿತು.. ಹಳ್ಳಕ್ಕೆ ಬಿದ್ದಿರಿ ಎಂದೇ ಅರ್ಥ.. ನಂತರ ಮಾಡರ್ನ್​ ಡ್ರೆಸ್​ ಧರಿಸಿದ ಫೋಟೋಗಳು, ಸೆಕ್ಸ್​ ಮೆಸೇಜ್​ಗಳು ಬರಲು ಪ್ರಾರಂಭವಾಗುತ್ತವೆ.. ಈ ಮೂಲಕ ನಿಮ್ಮೆಲ್ಲ ವಿಚಾರಗಳನ್ನೂ ನಿಮ್ಮಿಂದಲೇ ತಿಳಿದುಕೊಳ್ಳುತ್ತಾರೆ.

ಮಧ್ಯರಾತ್ರಿ ವಿಡಿಯೋ ಕಾಲ್​
ಇಷ್ಟೆಲ್ಲ ಆದ ಮೇಲೆ ನೀವು ಸಂಪೂರ್ಣವಾಗಿ ಬಲೆಗೆ ಬಿದ್ದಿದ್ದೀರಿ ಎಂಬುದನ್ನು ಖಚಿತಪಡಿಸಿಕೊಂಡು ವಂಚಕರು ತಮ್ಮ ಅಸಲಿ ಆಟ ಶುರು ಮಾಡುತ್ತಾರೆ. ನಿಮ್ಮ ಮೊಬೈಲ್​ ನಂಬರ್ ಕೂಡ ಪಡೆದುಕೊಳ್ಳುತ್ತಾರೆ. ಮಧ್ಯರಾತ್ರಿಯಲ್ಲಿ ವಾಟ್ಸ್​ಆ್ಯಪ್​ ಅಥವಾ ಮೆಸೆಂಜರ್​ನಲ್ಲಿ ವಿಡಿಯೋ ಕಾಲ್​ ಮಾಡುತ್ತಾರೆ. ಬಣ್ಣಬಣ್ಣದ ಮಾತುಗಳನ್ನಾಡುತ್ತಾರೆ. ನಂತರ ತಾವೂ ಬೆತ್ತಲೆಯಾಗಿ, ನಿಮ್ಮನ್ನೂ ಬೆತ್ತಲಾಗುವಂತೆ ಪ್ರಚೋದಿಸುತ್ತಾರೆ..

ಒಮ್ಮೆ ಆ ಹುಡುಗಿಯ ಮಾತಿಗೆ ಮರುಳಾಗಿ ನೀವು ಬಟ್ಟೆಬಿಚ್ಚಿದರೆ ಅಲ್ಲಿಗೆ ನೀವು ಎಲ್ಲವನ್ನೂ ಕಳೆದುಕೊಂಡಿರಿ ಎಂದೇ ಅರ್ಥ.. ಅದೇ ಬೆತ್ತಲೆ ವಿಡಿಯೋ ರೆಕಾರ್ಡ್ ಮಾಡಿಟ್ಟುಕೊಂಡು ಬ್ಲ್ಯಾಕ್​ಮೇಲ್​ ಶುರು ಮಾಡುತ್ತಾರೆ.. ಒಮ್ಮೆ ನೀವು ಬೆತ್ತಲಾಗದೆ ಇದ್ದರೆ ಮತ್ತೊಂದು ರೀತಿಯ ಬೆದರಿಕೆ ಶುರುವಾಗುತ್ತದೆ.. ನಿಮ್ಮ ಸಾಮಾನ್ಯ ವಿಡಿಯೋ ಮತ್ತು ಆಕೆ ಬೆತ್ತಲಾದ ವಿಡಿಯೋವನ್ನು ಮರ್ಜ್​ ಮಾಡಿಟ್ಟುಕೊಂಡು ಬ್ಲ್ಯಾಕ್​ಮೇಲ್​ ಮಾಡಲು ಶುರುವಿಟ್ಟುಕೊಳ್ಳುತ್ತಾರೆ.

ವಿಡಿಯೋ ಇಟ್ಟುಕೊಂಡು ಹಣಕ್ಕೆ ಡಿಮ್ಯಾಂಡ್ ಮಾಡುವ ಈ ಜಾಲ, ಕೊಡದೆ ಇದ್ದರೆ ರೆಕಾರ್ಡ್ ವಿಡಿಯೋವನ್ನು ನಿಮ್ಮ ಕುಟುಂಬ, ಸ್ನೇಹಿತರಿಗೆ ಕಳಿಸುವುದಾಗಿ ಬೆದರಿಕೆ ಹಾಕುತ್ತಾರೆ. ಇದು ಅಂತಿಂಥಾ ಜಾಲವಲ್ಲ.. ಇದರಲ್ಲೀಗ ಶ್ರೀಮಂತರ ಮಕ್ಕಳು, ಉದ್ಯಮಿಗಳು, ಗಣ್ಯರು ಸಿಲುಕಿದ್ದಾರೆ. ಕೆಲವರು ಸೈಬರ್​ ಕ್ರೈಂನಲ್ಲಿ ದೂರು ದಾಖಲಿಸಿದ್ದು, ಮತ್ತೊಂದಿಷ್ಟು ಜನ ಸುಮ್ಮನೆ ಇದ್ದಾರೆ. ಮಾಹಿತಿ ಪ್ರಕಾರ, ಈ ಜಾಲ ಹೊರರಾಜ್ಯದಿಂದಲೇ ಕೃತ್ಯ ಎಸಗುತ್ತಿದೆ. ಆಯಾ ಪ್ರಾದೇಶಿಕ ಭಾಷೆಯಲ್ಲೇ ಇವರ ಸಂವಹನ ಇರುತ್ತದೆ.

ಫೇಸ್​ಬುಕ್​ನಲ್ಲಿ ಫ್ರೆಂಡ್​ ರಿಕ್ವೆಸ್ಟ್ ಕಳಿಸುವ ಅಪರಿಚಿತ ಯುವತಿಯರ ಬಗ್ಗೆ ಎಚ್ಚರಿಕೆಯಿಂದ ಇರಿ. ಒಮ್ಮೆ ಈಗಾಗಲೇ ಫ್ರೆಂಡ್ಸ್ ಆಗಿದ್ದರೆ ಅವರ ಮೆಸೇಜ್​, ಮಾತುಗಳಿಗೆ ಮರುಳಾಗಬೇಡಿ. ಒಂದು ವೇಳೆ ಬ್ಲ್ಯಾಕ್​ ಮೇಲ್​ ಮಾಡಿ, ಹಣಕ್ಕೆ ಒತ್ತಾಯಿಸಿದರೆ ಹತ್ತಿರದ ಠಾಣೆಗೆ ದೂರು ನೀಡಿ ಅಥವಾ ಹಿರಿಯ ಅಧಿಕಾರಿಗಳನ್ನು ಸಂಪರ್ಕಿಸಿ. ಮಾಹಿತಿ ನೀಡಿದವರ ಹೆಸರನ್ನು ಗೌಪ್ಯವಾಗಿ ಇಡಲಾಗುವುದು ಎಂದು ಮೈಸೂರು ಕಾನೂನು ಮತ್ತು ಸುವ್ಯವಸ್ಥೆ ಡಿಸಿಪಿ ಡಾ. ಎ.ಎನ್​. ಪ್ರಕಾಶ್​ ಗೌಡ ಹೇಳಿದ್ದಾರೆ.