Bengaluru Night Curfew: ನೈಟ್ ಕರ್ಫ್ಯೂ ಶುರು: ಬೆಂಗಳೂರಿನ ರಸ್ತೆಗಳು ಬಂದ್; ರಸ್ತೆ ರಸ್ತೆಗಳಲ್ಲೂ ಖಾಕಿ ಕಾವಲು

ಪಾದರಾಯನಪುರದಲ್ಲಿ ಸ್ವಲ್ಪ ಮಟ್ಟಿಗೆ ಜನರ ಓಡಾಟ ಕಂಡುಬರುತ್ತಿದೆ. ಗಲ್ಲಿಗಲ್ಲಿಯಲ್ಲಿರುವ ಕೆಲ ಅಂಗಡಿಗಳು ಇನ್ನೂ ಬಂದ್ ಆಗಿಲ್ಲ. ಈ ಹಿಂದೆ ಪಾದರಾಯನಪುರ
ಕೊರೊನಾ‌ ಹಾಟ್​ಸ್ಪಾಟ್ ಆಗಿತ್ತು ಎಂಬುದನ್ನು ಇಲ್ಲಿ ಸ್ಮರಿಸಬಹುದು.

ಬೆಂಗಳೂರಿನ 8ನೇ ಮೈಲಿ ನವಯುಗ ಟೋಲ್ ಬಳಿ ಫ್ಲೈಒವರ್ ಬಂದ್ ಆದ ಕಾರಣ ಆ್ಯಂಬುಲನ್ಸ್​ಗೆ ಸಂಚರಿಸಲು ತೊಡಕುಂಟಾಯಿತು. ಕೆಲ ನಿಮಿಷಗಳ ಬಳಿಕ 8ನೇ ಮೈಲಿ ನವಯುಗ ಟೋಲ್ ಸರ್ವೀಸ್ ರಸ್ತೆಯಲ್ಲಿ ಆ್ಯಂಬುಲನ್ಸ್ ತೆರಲಿದ ಘಟನೆ ನಡೆಯಿತು.

ರಾಜಧಾನಿಯಲ್ಲಿ ನೈಟ್ ಕರ್ಫ್ಯೂ ಜಾರಿಯಾದರೂ ವಾಹನಗಳ ಸಂಚಾರ ಸಂಪೂರ್ಣವಾಗಿ ನಿಂತಿಲ್ಲ. ಏರ್​ಪೋರ್ಟ್ ರಸ್ತೆಯಲ್ಲಿ ಎಂದಿನಂತೆ ವಾಹನಗಳ ಸಂಚಾರ ನಡೆಯುತ್ತಿದೆ. 10 ಗಂಟೆಯಾದರೂ ಹೆಚ್ಚಿನ ಸಂಖ್ಯೆಯಲ್ಲಿ ಖಾಸಗಿ ಬಸ್​ ಮತ್ತು ಕಾರುಗಳು ಬರುತ್ತಿವೆ. ವಾಹನ ದಟ್ಟಣೆ ಹೆಚ್ಚಿರುವ ಕಾರಣ ಫ್ಲೈ ಒವರ್​ನ್ನು ಪೊಲೀಸರು ಬಂದ್ ಮಾಡಿಲ್ಲ. ಸದ್ಯ ವಾಹನಗಳು ಸಂಚರಿಸಲು ಕಾಲಾವಕಾಶ ನೀಡಿ 11 ಗಂಟೆಯ ನಂತರ ಪ್ಲೈ ಒವರ್ ಬಂದ್ ಮಾಡುವ ಸಾಧ್ಯತೆ ಹೆಚ್ಚಿದೆ.

ಕೆ.ಆರ್.ಪುರಂ ವ್ಯಾಪ್ತಿಯಲ್ಲಿನ ಅಂಗಡಿಗಳನ್ನು ಪೊಲೀಸರು ಮುಚ್ಚಿಸುತ್ತಿದ್ದಾರೆ. ಹತ್ತು ಗಂಟೆ ನಂತರವೂ ಅಂಗಡಿಗಳನ್ನು ತೆರೆದಿದ್ದವರಿಗೆ ಪೊಲೀಸರು ವಾರ್ನಿಂಗ್ ನೀಡುತ್ತಿದ್ದಾರೆ.
ಕೆಆರ್ ಪುರಂ, ಐಟಿಐ ಹಾಗೂ ಭಟ್ರಹಳ್ಳಿ ಗೇಟ್​ನಲ್ಲಿ ಅಂಗಡಿಗಳು ಬಂದ್ ಆಗಿವೆ. ಬಂದ್ ಆಗದ ಅಂಗಡಿಗಳಿಗೆ ಪೊಲೀಸರು ಎಚ್ಚರಿಕೆ ನೀಡುತ್ತಿದ್ದಾರೆ.

ನೈಟ್ ಕರ್ಫ್ಯೂ ಆರಂಭಕ್ಕೂ ಮುನ್ನ ಬಾರ್ ಮುಂದೆ ಕುಡುಕರ ಬಡಿದಾಟ ಘಟನೆಯೂ ನಡೆಯಿತು. ಬೆಂಗಳೂರಿನ ಹೆಸರಘಟ್ಟ ರಸ್ತೆಯಲ್ಲಿರುವ ಕುಮಾರ್ ಬಾರ್ ಅ್ಯಂಡ್ ರೆಸ್ಟೋರೆಂಟ್ ಬಳಿ ಮದ್ಯಪ್ರಿಯರು ಹೆಚ್ಚಿನ ಸಂಖ್ಯೆಯಲ್ಲಿ ನೆರೆದಿದ್ದರು. ರಾತ್ರಿ 10ಗಂಟೆ ನಂತರ ಬಾರ್ ಬಂದ್ ಆಗುವ ಕಾರಣ ಪಾನಮತ್ತರಾಗಿ ಪರಸ್ಪರ ಬಡಿದಾಟ ನಡೆಸಿಕೊಂಡರು. ಬಾಗಲಗುಂಟೆ ಪೋಲಿಸ್ ಠಾಣೆ ವ್ಯಾಪ್ತಿಯಲ್ಲಿ ನಡೆದ ಕುಡುಕರ ಬಡಿದಾಟ ರಸ್ತೆಯಲ್ಲಿ ತೆರಳುವ ಜನರಿಗೆ ಮನರಂಜನೆ ನೀಡಿತು.