ಹೂ ಬೆಳೆಗಾರರಿಗೆ ನೆರವಾದ ತೋಟಗಾರಿಕಾ ಇಲಾಖೆ, ಈವರೆಗೆ 80 ರೈತರಿಗೆ ಅನುದಾನ

ನೆಲಮಂಗಲ: ಕೊರೊನಾ ವೈರಸ್​ನಿಂದ ದೇಶದ ಆರ್ಥಿಕತೆ ಹಳ್ಳ ಹಿಡಿದಿದೆ. ವ್ಯಾಪಾರಿಗಳು ಉದ್ಯೋಗಿಗಳು ಕೂಲಿ ಕಾರ್ಮಿಕರು ರೈತರು ಎಲ್ಲರೂ ಸಹ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿ ಪರದಾಡುವ ಪರಿಸ್ಥಿತಿ ಎದುರಾಗಿದೆ. ಇಂತಹ ಸಮಯದಲ್ಲಿ ಹೂ ಬೆಳೆಗಾರರಿಗೆ ನೆರವಾಗುವ ನಿಟ್ಟಿನಲ್ಲಿ ರಾಜ್ಯ ಸರ್ಕಾರ ತೋಟಗಾರಿಕಾ ಇಲಾಖೆ ಅನುದಾನ ಬಿಡುಗಡೆ ಮಾಡಿದೆ.

ಲಾಕ್​ಡೌನ್​ನಿಂದ ದೇವಾಲಯಗಳು, ಗುಡಿ-ಗೋಪುರಗಳು, ಜಾತ್ರೆ-ಬಜಾರ್​ಗಳು, ಮದುವೆ-ಮುಂಜಿಗಳಂತ ಶುಭಕಾರ್ಯಕ್ಕೆ ಬ್ರೇಕ್ ಬಿದ್ದಿದ್ದು, ಶುಭ ಸಮಾರಂಭಗಳ ಮೆರಗನ್ನು ಹೆಚ್ಚಿಸುವ ಬಗೆಬಗೆಯ ಅಲಂಕಾರಿಕ ಪುಷ್ಪಗಳು ಸೇರಿದಂತೆ ಪೂಜೆಗೆ ಬಳಸುವ ಹೂಗಳನ್ನು ಕೊಳ್ಳುವವರಿಲ್ಲದೆ ಗಿಡದಲ್ಲೆ ಒಣಗಿ ಉದುರಿಹೋಗುವ ಪರಿಸ್ಥಿತಿ ಉಂಟಾಗಿದೆ.

ಕೊರೊನಾ ಕಾಲದಲ್ಲಿ ಕೈಗೆ ಬಂದಿದ್ದ ಬೆಳೆ ಮಾರಾಟವಾಗದೆ ಬೆಳೆಯನ್ನು ಬೆಳೆಯಲು ಪಡೆದಿದ್ದ ಸಾಲ ತೀರಿಸಲಾಗದೆ ಸಂಕಷ್ಟದಲ್ಲಿದ್ದ ರೈತರಿಗೆ ನೆರವಾಗಲು ತೋಟಗಾರಿಕಾ ಇಲಾಖೆ ಸಹಾಯಧನಕ್ಕೆ ಅರ್ಜಿ ಆಹ್ವಾನಿಸಿತ್ತು.

ಬೆಂಗಳೂರು ಗ್ರಾಮಾಂತರ ಜಿಲ್ಲೆ ನೆಲಮಂಗಲ ತಾಲೂಕಿನಲ್ಲಿ ತೋಟಗಾರಿಕಾ ಇಲಾಖೆಗೆ ಆನ್ಲೈನ್ ಮೂಲಕ 170 ಜನ ರೈತರು ಹಾಗೂ ನೇರವಾಗಿ ಕಚೇರಿಯಲ್ಲಿ 359 ರೈತರು ಸೇರಿದಂತೆ ಒಟ್ಟು 529 ಅರ್ಜಿಗಳು ಬಂದಿದ್ದವು. ಸರ್ಕಾರದಿಂದ ತೋಟಗಾರಿಕೆ ಇಲಾಖೆಗೆ 6 ಲಕ್ಷ 20 ಸಾವಿರ ರೂಗಳ ಅನುದಾನ ಬಂದಿದ್ದು, ಅದರಲ್ಲಿ ಇಲ್ಲಿಯವರೆಗೆ 80 ಜನ ಹೂ ಬೆಳೆಗಾರರಿಗೆ 5 ಲಕ್ಷದ 20 ಸಾವಿರ ಪರಿಹಾರ ಮೊತ್ತವನ್ನು ರೈತರ ಖಾತೆಗೆ ವರ್ಗಾಹಿಸಲಾಗಿದೆ.

Published On - 2:50 pm, Sat, 20 June 20