Bengaluru News: ವಿಮಾನ ಟಿಕೆಟ್​​ನಷ್ಟೇ ಇದೆ ಕ್ಯಾಬ್ ದರ; ಟ್ವಿಟರ್​​ನಲ್ಲಿ ಅಳಲು ತೋಡಿಕೊಂಡ ಪ್ರಯಾಣಿಕರು

ಬೆಂಗಳೂರು: ವಿಮಾನ ಪ್ರಯಾಣ ಮಾಡಬೇಕೆಂದು ವಿಮಾನ ನಿಲ್ದಾಣಕ್ಕೆ (Bangalore Airport) ಹೊರಟಾಗ ಅಲ್ಲಿಗೆ ತೆರಳುವ ಕ್ಯಾಬ್​ಗೂ (Cab Price) ವಿಮಾನದಷ್ಟೇ ಟಿಕೆಟ್ ದರ ನೀಡಬೇಕಾಗಿ ಬಂದರೋ? ಬೆಂಗಳೂರಿನ ಸಾರ್ವಜನಿಕರಿಗೆ ಈಗ ಇಂಥದ್ದೊಂದು ಸಮಸ್ಯೆ ಸೃಷ್ಟಿಯಾಗಿದೆ. ಈ ವಿಚಾರವಾಗಿ ಹಲವು ಮಂದಿ ಟ್ವೀಟ್ ಮಾಡುವ ಮೂಲಕ ಅಳಲು ತೋಡಿಕೊಂಡಿದ್ದಾರೆ.

@Badass_Superdad ಎಂಬ ಟ್ವಿಟರ್​ ಹ್ಯಾಂಡಲ್​ನಿಂದ, ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ತೆರಳಲು ಇರುವ ಕ್ಯಾಬ್ ದರ ಹಾಗೂ ವಿಮಾನಯಾನ ದರದ ವಿವರದ ಸ್ಕ್ರೀನ್​ಶಾಟ್ ಟ್ವೀಟ್ ಮಾಡಲಾಗಿದೆ. 52 ಕಿಲೋಮೀಟರ್​ ದೂರದಲ್ಲಿರುವ ವಿಮಾನ ನಿಲ್ದಾಣಕ್ಕೆ ತೆರಳಲು ಪ್ರೀಮಿಯರ್, ಎಕ್ಸ್​​ಎಲ್​ ಹಾಗೂ ರೆಂಟಲ್​​​ ಮಾದರಿಯ ಕ್ಯಾಬ್​ಗಳ ದರ 2584 ರೂ.ನಿಂದ 4051 ರೂ.ವರೆಗೆ ದರ ಇದೆ. ಸರಿಸುಮಾರು ವಿಮಾನ ಟಿಕೆಟ್​ಗೆ ನೀಡಿದಷ್ಟೇ ದರ ಕ್ಯಾಬ್​ಗೂ ಇದೆ ಎಂದು ಉಲ್ಲೇಖಿಸಲಾಗಿದೆ.

ಕ್ಯಾಬ್ ದರವು ನಾನು ವಿಮಾನ ಟಿಕೆಟ್‌ಗೆ ಪಾವತಿಸಿದ ದರದ ಸನಿಹದಲ್ಲಿದೆ ಎಂದು ಅವರು ಟ್ವೀಟ್‌ನಲ್ಲಿ ತಿಳಿಸಿದ್ದಾರೆ.

ಅನೇಕ ನೆಟಿಜನ್​ಗಳು ಮೇಲಿನ ಟ್ವೀಟ್​ಗೆ ಪ್ರತಿಕ್ರಿಯಿಸಿದ್ದಾರೆ. ನಗರದ ವಿವಿಧ ಕಡೆಗಳಿಂದ ವಾಯು ವಜ್ರ ಹಾಗೂ ಬಿಎಂಟಿಸಿಯ ಇತರ ಬಸ್​ ಸೇವೆಗಳು ಲಭ್ಯವಿದ್ದು ಅದನ್ನು ಉಪಯೋಗಿಸಿಕೊಳ್ಳಿ ಎಂದು ಕೆಲವರು ಸಲಹೆ ನೀಡಿದ್ದಾರೆ. ವಾಯು ವಜ್ರ ಬಸ್​​ನಲ್ಲಿ ಕ್ಯಾಬ್​ ದರದ ಆರನೇ ಒಂದರರಷ್ಟು ಮಾತ್ರವೇ ದರ ಇದೆ ಎಂದೂ ಉಲ್ಲೇಖಿಸಿದ್ದಾರೆ.

ವಿಮಾನ ನಿಲ್ದಾಣವು ಎಲೆಕ್ಟ್ರಾನಿಕ್ ಸಿಟಿಯಿಂದ 50 ಕಿ.ಮೀ ಗಿಂತ ಹೆಚ್ಚು ದೂರದಲ್ಲಿರುವುದರಿಂದ ಇದು ಸಮಂಜಸವಾದ ಬೆಲೆ ಎಂದೂ ಕೆಲವರು ಪ್ರತಿಪಾದಿಸಿದ್ದಾರೆ.

ಬೆಂಗಳೂರಿನಲ್ಲಿ ಉದ್ಯೋಗದಲ್ಲಿ ಮುಂದುವರಿಯುವುದಕ್ಕಿಂತ ಕ್ಯಾಬ್ ಡ್ರೈವರ್ ಆಗುವುದು ಉತ್ತಮ ಎಂದು ಕೆಲವರು ತಮಾಷೆ ಮಾಡಿದ್ದಾರೆ.

ರಾಜ್ಯದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ