ಸಿಲಿಕಾನ್ ಸಿಟಿಯಲ್ಲಿ ಹವಾಮಾನ ವೈಪರೀತ್ಯ: ವೈರಲ್ ಜ್ವರಕ್ಕೆ ಬೆಚ್ಚಿಬಿದ್ದ ಬೆಂಗಳೂರಿಗರು, ಆಸ್ಪತ್ರೆಗಳಲ್ಲಿ ರೋಗಿಗಳ ದಂಡು!

ಬೆಂಗಳೂರು, ಅಕ್ಟೋಬರ್​​ 03: ಸಿಲಿಕಾನ್ ಸಿಟಿ ಜನರಲ್ಲಿ ವೈರಲ್ ಸೋಂಕು ಭೀತಿ ಶುರುವಾಗಿದೆ. ಮಕ್ಕಳು, ಹಿರಿಯರು ಸೇರಿದಂತೆ ಎಲ್ಲರೂ ಅನಾರೋಗ್ಯಕ್ಕೆ ತುತ್ತಾಗುತ್ತಿದ್ದಾರೆ. ಒಂದು ದಿನ ಮಳೆ, ಮತ್ತೊಂದು ದಿನ ಬಿರುಬಿಸಿಲು, ಈ ಅಕಾಲಿಕ ವಾತಾವರಣ ಆರೋಗ್ಯದಲ್ಲಿ ಏರುಪೇರು ಉಂಟು ಮಾಡುತ್ತಿದೆ.

ಬದಲಾಗುತ್ತಿರುವ ಹವಾಮಾನ ಜನರು ಸೇರಿದಂತೆ ಮಕ್ಕಳ ಮೇಲೂ ಪರಿಣಾಮ

ಬೆಂಗಳೂರಿನಲ್ಲಿ ಬದಲಾಗುತ್ತಿರುವ ಹವಾಮಾನ ಜನರು ಹಾಗೂ ಮಕ್ಕಳಲ್ಲಿ ಆರೋಗ್ಯದ ಮೇಲೆ ಪರಿಣಾಮ ಬೀರುತ್ತಿದೆ. ಒಂದೆಡೆ ಬಿಸಿಲಿನ ಬೇಗೆ, ಸಂಜೆ ವೇಳೆಗೆ ಮಳೆ. ಈ ಹವಾಮಾನ ವೈಪರೀತ್ಯದಿಂದ ವೈರಲ್ ಸೋಂಕು ಪ್ರಕರಣಗಳು ಹೆಚ್ಚುತ್ತಿವೆ. ಒಂದೇ ವಾರದಲ್ಲೇ ಜ್ವರ, ಕೆಮ್ಮು, ನೆಗಡಿ, ವಾಂತಿ, ಬೇಧಿ ಅಂತ ಆಸ್ಪತ್ರೆಗಳು ರೋಗಿಗಳಿಂದ ಫುಲ್ ಆಗಿವೆ.

ಇದನ್ನೂ ಓದಿ: ಉಪ್ಪು ಸೇವನೆ ಕುರಿತು ಖಾದರ್ ಮಹತ್ವದ ಕರೆ: ಜನ ನಿಯಮ ಪಾಲಿಸಬೇಕೆಂದ ಆರೋಗ್ಯ ಸಚಿವ

ವಯಸ್ಕರು ಹಾಗೂ ಮಕ್ಕಳು ವೈರಲ್ ಸೋಂಕಿನಿಂದ ಬಳಲುತ್ತಿದ್ದಾರೆ. ನಗರದ ಕೆ.ಸಿ. ಜನರಲ್, ವಿಕ್ಟೋರಿಯಾ, ಸಿ.ವಿ. ರಾಮನ್ ನಗರ ಆಸ್ಪತ್ರೆ ಸೇರಿದಂತೆ ಖಾಸಗಿ ಆಸ್ಪತ್ರೆಗಳಲ್ಲೂ ರೋಗಿಗಳ ಸಂಖ್ಯೆ ಹೆಚ್ಚಳವಾಗಿದೆ. ಜ್ವರ, ಶೀತ, ಕೆಮ್ಮು, ಸುಸ್ತು ಅಂತ ಜನ ಆಸ್ಪತ್ರೆಗಳತ್ತ ಬರುತ್ತಿದ್ದಾರೆ.

ಒಂದು ವಾರದ ಅಂಕಿ-ಅಂಶ ಹೀಗಿದೆ

• ವಾಂತಿ, ಬೇಧಿ – 3297 ಪ್ರಕರಣ
• SARI – 268 ಪ್ರಕರಣ
• ಇನ್ಫ್ಲುಯೆನ್ಜ- 274 ಪ್ರಕರಣ
• ಇಲಿ ಜ್ವರ – 94 ಪ್ರಕರಣ
• ಡೆಂಗ್ಯೂ – 242 ಕೇಸ್​
• ಮಲೇರಿಯಾ – 128 ಕೇಸ್​​

ಇಲಿ ಜ್ವರ, ಡೆಂಗ್ಯೂ, ಮಲೇರಿಯಾ ಕೇಸ್ ಕೂಡ ಜಾಸ್ತಿ

ವೈರಲ್ ಫೀವರ್ ಜೊತೆ ವಾಂತಿ, ಭೇದಿ ಪ್ರಕರಣಗಳು ಕಾಣಿಸಿಕೊಳ್ಳುತ್ತಿದೆ. ತೀವ್ರ ಇನ್ಫ್ಲುಯೆನ್ಜ ರೆಸ್ಪಿರೇಟರಿ ಇನ್ಫೆಕ್ಷನ್ ಕೇಸ್ 268 ಇದ್ದರೆ, ಇನ್ಫ್ಲುಯೆನ್ಜ ಪ್ರಕರಣಗಳು 274. ಇಲಿ ಜ್ವರ, ಡೆಂಗ್ಯೂ, ಮಲೇರಿಯಾ ಕೇಸ್ ಕೂಡ ಜಾಸ್ತಿ ಆಗುತ್ತಿವೆ. ಮಳೆ ಮತ್ತು ಬಿಸಿಲಿನಿಂದ ಹವಾಮಾನ ಬದಲಾಗುತ್ತಿರುವುದರಿಂದ ಆರೋಗ್ಯದ ಬಗ್ಗೆ ಗಮನ ಹರಿಸುವಂತೆ ವೈದ್ಯರು ಸೂಚಿಸಿದ್ದಾರೆ. ಮಳೆ ಬಂದ ಏರಿಯಾಗಳಲ್ಲಿ ಕುಡಿಯುವ ನೀರನ್ನು ಕಾಯಿಸಿ ಆರಿಸಿ ಬಳಸುವಂತೆ ಸೂಚನೆ ನೀಡಲಾಗಿದೆ.

ಇದನ್ನೂ ಓದಿ: ಕೋಲಾರದಲ್ಲಿ ವೈರಲ್ ಫೀವರ್: ಹೆಚ್1ಎನ್1 ಸೋಂಕು ಹೆಚ್ಚಳ; ಜಿಲ್ಲಾಸ್ಪತ್ರೆಯಲ್ಲಿ ಪ್ರತ್ಯೇಕ ಐಸೋಲೇಶನ್ ವಾರ್ಡ್

ಆರೋಗ್ಯ ಇಲಾಖೆಯಿಂದಲೂ ಎಲ್ಲಾ ಆಸ್ಪತ್ರೆಗಳಲ್ಲಿ ಸೂಕ್ತ ಚಿಕಿತ್ಸೆ ನೀಡುವಂತೆ ಸೂಚನೆ ನೀಡಲಾಗಿದೆ. ಜನರು ಮುನ್ನೆಚ್ಚರಿಕೆ ವಹಿಸಬೇಕಿದ್ದು, ರೋಗ ಲಕ್ಷಣ ಕಂಡುಬಂದ ತಕ್ಷಣ ವೈದ್ಯರನ್ನು ಸಂಪರ್ಕಿಸುವಂತೆ ಮನವಿ ಮಾಡಲಾಗಿದೆ. ಹವಾಮಾನ ಬದಲಾವಣೆ ಸಹಜವಾಗಿದ್ದರೂ, ನಿರ್ಲಕ್ಷ್ಯ ಮಾಡಿದರೆ ಆರೋಗ್ಯಕ್ಕೆ ಕುತ್ತು ಬರುವುದು ಖಚಿತ.

ಕರ್ನಾಟಕದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.