ಬೆಂಗಳೂರು: ದೂರವಾಣಿ ಬಿಡಿಭಾಗ ಜೋಡಣೆಯಲ್ಲಿ ಮಗ್ನರಾದ ಮಹಿಳಾಮಣಿಗಳು, 1950ರ ಅಪರೂಪದ ಚಿತ್ರ ವೈರಲ್

ಬೆಂಗಳೂರು, ಏಪ್ರಿಲ್​ 10: ಇಂಡಿಯನ್​ ಟೆಲಿಫೋನ್ ಇಂಡಸ್ಟ್ರೀಸ್​ ಲಿಮಿಟೆಡ್ (ITI) ಸ್ವಾತಂತ್ರ್ಯ ನಂತರ ಸ್ಥಾಪಿತವಾದ ಮೊದಲ ಸಾರ್ವಜನಿಕ ವಲಯ ಉದ್ಯಮವಾಗಿದೆ. ಸದ್ಯ ಸೋಶಿಯಲ್​ ಮೀಡಿಯಾದಲ್ಲಿ ಇಂಡಿಯನ್​ ಟೆಲಿಫೋನ್ ಇಂಡಸ್ಟ್ರೀಸ್​ ಲಿಮಿಟೆಡ್​​ನ (Telephone Industries) ಒದೊಂದು ಅಪರೂಪದ ಫೋಟೋ ಭಾರಿ ವೈರಲ್​ ಆಗುತ್ತಿದೆ. ಬೆಂಗಳೂರು ಮೂಲದ ಐಟಿಐ ಸಂಸ್ಥೆಯ 1950ರ ದಶಕದ ಕಪ್ಪು ಬಿಳುಪಿನ ಅಪರೂಪದ ಫೋಟೋ ಇದಾಗಿದ್ದು, ಸೀರೆಯುಟ್ಟ ಮಹಿಳೆಯರು ತಮ್ಮ ಕೆಲಸದಲ್ಲಿ ತೊಡಗಿರುವುದನ್ನು ಕಾಣಬಹುದು.

ಇಂಡಿಯನ್ ಹಿಸ್ಟರಿ ಪಿಕ್ಸ್​ ಎಂಬ ಎಕ್ಸ್​ ಖಾತೆಯೊಂದು ಬೆಂಗಳೂರಿನ ​ಇಂಡಿಯನ್​ ಟೆಲಿಫೋನ್ ಇಂಡಸ್ಟ್ರೀಸ್​ ಲಿಮಿಟೆಡ್​ನಲ್ಲಿ ಕೆಲಸ ಮಾಡುತ್ತಿರುವ ಮಹಿಳೆಯರ 1950ರ ದಶಕದ ಕಪ್ಪು ಬಿಳುಪಿನ ಅಪರೂಪದ ಫೋಟೋವನ್ನು ಹಂಚಿಕೊಂಡಿದೆ. ಚಿತ್ರದಲ್ಲಿ ಸಾಂಪ್ರದಾಯಿಕ ಸೀರೆಯುಟ್ಟ ಮಹಿಳೆಯರು ಏಕಾಗ್ರತೆಯಿಂದ ದೂರವಾಣಿ ಘಟಕಗಳನ್ನು ಜೋಡಿಸುತ್ತಿರುವುದನ್ನು ಕಾಣಬಹುದಾಗಿದೆ.

ಇಂಡಿಯನ್ ಹಿಸ್ಟರಿ ಪಿಕ್ಸ್ ಟ್ವೀಟ್​

ಈ ಒಂದು ಫೋಟೋ ಭಾರತದಲ್ಲಿ ಕೈಗಾರಿಕಾ ಯುಗದ ಆರಂಭಿಕ ದಿನಗಳನ್ನು ನೆನಪಿಸುವುದಲ್ಲದೆ, ಆ ದಶಕದಲ್ಲೂ ಮಹಿಳೆಯರು ತಾಂತ್ರಿಕ ಕ್ಷೇತ್ರದಲ್ಲಿ ತಮ್ಮ ಛಾಪು ಮೂಡಿಸಿರುವುದನ್ನು ಕಾಣಬಹುದಾಗಿದೆ. ಮಹಿಳೆಯರು ಮನೆಯಿಂದ ಆಚೆ ಹೋಗುವುದೇ ದೊಡ್ಡ ಸವಾಲಾಗಿದ್ದ ಸಂದರ್ಭದಲ್ಲಿ ಸಾರ್ವಜನಿಕ ವಲಯದಲ್ಲಿ ಮಹಿಳೆಯರು ಕೆಲಸ ಮಾಡುತ್ತಿರುವುದನ್ನು ಈ ಫೋಟೋ ಎತ್ತಿ ತೋರಿಸುತ್ತದೆ.

ಇದನ್ನೂ ಓದಿ: ಇನ್ಮುಂದೆ ರೆವಿನ್ಯೂ ಸ್ವತ್ತುಗಳಿಗೂ ದೊರೆಯಲಿದೆ ನಕ್ಷೆ ಮಂಜೂರಾತಿ ಭಾಗ್ಯ: ಇಲ್ಲಿದೆ ಮಾಹಿತಿ

1948 ರಲ್ಲಿ ಸ್ಥಾಪನೆಯಾದ ಇಂಡಿಯನ್​ ಟೆಲಿಫೋನ್ ಇಂಡಸ್ಟ್ರೀಸ್​ ಲಿಮಿಟೆಡ್, ಭಾರತದ ಮೊದಲ ಸಾರ್ವಜನಿಕ ವಲಯದ ಉದ್ಯಮ (ಪಿಎಸ್‌ಯು) ಆಗಿತ್ತು. ಇದು ದೇಶದಲ್ಲಿ ದೂರಸಂಪರ್ಕ ಉಪಕರಣಗಳ ತಯಾರಿಕೆಯಲ್ಲಿ ಪ್ರಮುಖ ಪಾತ್ರವಹಿಸಿದ್ದು, ಭಾರತದ ದೂರಸಂಪರ್ಕ ಜಾಲದ ಅಡಿಪಾಯ ಹಾಕಿತು. ಈ  ಫೋಟೋ ನೋಡುತ್ತಿದ್ದರೆ ಆ ಕಾಲದಲ್ಲೂ ಮಹಿಳೆಯರು ರಾಷ್ಟ್ರ ನಿರ್ಮಾಣಕ್ಕೆ ಸದ್ದಿಲ್ಲದೆ ತಮ್ಮ ಕೊಡುಗೆಯನ್ನು ನೀಡುತ್ತಿದ್ದರು ಎಂಬುದು ಸ್ಪಷ್ಟವಾಗುತ್ತದೆ.

ಈ ಕಪ್ಪು ಬಿಳುಪಿನ ಅಪರೂಪದ ಫೋಟೋ ವೈರಲ್​ ಆಗುತ್ತಿದ್ದಂತೆ ನೆಟ್ಟಿಗರು ಬಗೆಬಗೆಯಾಗಿ ಕಮೆಂಟ್​ ಮೂಲಕ ತಮ್ಮ ಮನದಾಳದ ಮಾತುಗಳನ್ನು ಹಂಚಿಕೊಂಡಿದ್ದಾರೆ. ಓರ್ವ ಎಕ್ಸ್​ ಬಳಕೆದಾರರು, ‘ರಾಷ್ಟ್ರದ ಅಭಿವೃದ್ಧಿ ಹಿಂದೆ ಕಾಣದ ಕೈ ಎಂದು ಬರೆದುಕೊಂಡಿದ್ದಾರೆ. 1950ರ ದಶಕದಲ್ಲಿ ಜಗತ್ತು ಅಭಿವೃದ್ಧಿ ಬಗ್ಗೆ ಮಾತುಗಳನ್ನು ಕೇಳುತ್ತಿದ್ದಾಗ, ಅದನ್ನು ಒಂದೊಂದಾಗಿ ಒಟ್ಟುಗೂಡಿಸಿದವರು ಮಹಿಳೆಯರೇ ಎಂದು ಕಮೆಂಟ್ ಮಾಡಿದ್ದಾರೆ.

ಇದನ್ನೂ ಓದಿ: ಶಾಲಾ ಶುಲ್ಕವಾಯ್ತು, ಇದೀಗ ಶಾಲಾ ವಾಹನ ಶುಲ್ಕ ಏರಿಕೆ ಸರದಿ: ಕೇಳೋರಿಲ್ಲ ಪೋಷಕರ ಗೋಳು!

ಇನ್ನು ಈ ಚಿತ್ರವು ಹಿಂದಿನ ಕಥೆಯನ್ನು ಹೇಳುವುದಲ್ಲದೆ, ದಶಕಗಳ ಹಿಂದೆ ತಾಂತ್ರಿಕ ಮತ್ತು ನಿರ್ಮಾಣ ಕಾರ್ಯಗಳಲ್ಲಿ ಮಹಿಳೆಯರು ಹೇಗೆ ತಮ್ಮನ್ನು ತಾವು ತೊಡಗಿಸಿಕೊಂಡಿದ್ದರು ಎಂದು ಇಂದಿನ ಪೀಳಿಗೆ ಯೋಚಿಸುವಂತೆ ಮಾಡುತ್ತದೆ ಎಂದಿದ್ದಾರೆ.

ಕರ್ನಾಟಕದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.