ದಕ್ಷಿಣ ಸಂಚಾರ ವಿಭಾಗ ಪೊಲೀಸರ ವಿಶೇಷ ಕಾರ್ಯಾಚರಣೆ; 85 ವಾಹನಗಳ ಮೇಲೆ ಬರೋಬ್ಬರಿ 1 ಕೋಟಿ 7 ಲಕ್ಷ ದಂಡ
ದಕ್ಷಿಣ ಸಂಚಾರ ವಿಭಾಗ ಪೊಲೀಸರು ವಿಶೇಷ ಕಾರ್ಯಾಚರಣೆ ನಡೆಸಿದ್ದು 84 ದ್ವಿಚಕ್ರ ವಾಹನಗಳು ಮತ್ತು 1 ಕಾರನ್ನು ವಶಕ್ಕೆ ಪಡೆದಿದ್ದಾರೆ. ವಶಪಡಿಸಿಕೊಂಡ ಒಟ್ಟು 85 ವಾಹನಗಳ ಮೇಲೆ ಬರೋಬ್ಬರಿ 1 ಕೋಟಿ 7 ಲಕ್ಷ ದಂಡ ಬಾಕಿ ಇದೆ. ಸದ್ಯ ವಾಹನ ಮಾಲೀಕರಿಗೆ ನೋಟಿಸ್ ಜಾರಿ ಮಾಡಲಾಗಿದೆ.
Updated on:Feb 17, 2024 | 2:41 PM
ಬೆಂಗಳೂರು, ಫೆ.17: ಟ್ರಾಫಿಕ್ ನಿಯಮ ಉಲ್ಲಂಘಿಸಿ 50 ಸಾವಿರ ರೂ.ಗಿಂತ ಹೆಚ್ಚಿನ ಮೊತ್ತದ ದಂಡವಿದ್ದ ವಾಹನಗಳ ವಿರುದ್ದ ದಕ್ಷಿಣ ಸಂಚಾರ ವಿಭಾಗ ಪೊಲೀಸರು ವಿಶೇಷ ಕಾರ್ಯಾಚರಣೆ ನಡೆಸಿದ್ದಾರೆ. ಕಾರ್ಯಾಚರಣೆ ವೇಳೆ 84 ದ್ವಿಚಕ್ರ ವಾಹನಗಳು ಮತ್ತು 1 ಕಾರನ್ನು ವಶಕ್ಕೆ (Seized) ಪಡೆಯಲಾಗಿದೆ. ವಶಪಡಿಸಿಕೊಂಡ ವಾಹನಗಳ ಮೇಲೆ ಒಟ್ಟು 10,210 ವಿವಿಧ ಸಂಚಾರ ನಿಯಮ (Traffic Rules) ಉಲ್ಲಂಘನೆ ಪ್ರಕರಣಗಳು ದಾಖಲಾಗಿವೆ. ಒಟ್ಟು 85 ವಾಹನಗಳ ಮೇಲೆ ಬರೋಬ್ಬರಿ 1 ಕೋಟಿ 7 ಲಕ್ಷ ದಂಡ ಬಾಕಿ ಇದೆ. ಸದ್ಯ ಎಲ್ಲಾ ವಾಹನಗಳನ್ನು ಸೀಜ್ ಮಾಡಿ ಮಾಲೀಕರಿಗೆ ನೋಟಿಸ್ ಜಾರಿ ಮಾಡಲಾಗಿದೆ.
ರಾಜ್ಯದಲ್ಲಿದೆ ಬರೋಬ್ಬರಿ 91,58,577 ಹಳೆಯ ವಾಹನಗಳು
ವಾಹನ ದಟ್ಟಣೆಯಿಂದ ಸದಾ ಗಿಜಿಗುಡುವ ಸಿಲಿಕಾನ್ ಸಿಟಿಯ ರಸ್ತೆಗಳಲ್ಲಿ ಇನ್ನೂ ಕೂಡ ಹಳೆಯ ವಾಹನಗಳ ಸಂಚಾರ ಮುಂದುವರೆದಿದೆ. ಗುಜರಿ ಸೇರಬೇಕಿದ್ದ ವೆಹಿಕಲ್ಸ್ ರಾಜಧಾನಿಯ ರಸ್ತೆಯಲ್ಲಿ ಹೊಗೆಯುಗುಳುತ್ತಾ ಸಂಚಾರ ಮಾಡ್ತಿದ್ದು, ಪರಿಣಾಮ ಮಾಲಿನ್ಯ ಪ್ರಮಾಣ ಕೂಡ ಹೆಚ್ಚಾಗ್ತಿದೆ. ನಗರದಲ್ಲಿ ಬರೋಬ್ಬರಿ 33 ಲಕ್ಷ ಹಳೆಯ ವಾಹನಗಳು ಇರೋದನ್ನ ಖುದ್ದು ಸಾರಿಗೆ ಇಲಾಖೆಯ ಅಂಕಿ ಅಂಶಗಳೇ ಬಯಲು ಮಾಡಿವೆ.
ಇದನ್ನೂ ಓದಿ: ಮಂಗಳೂರಿನಲ್ಲಿ ಮೊದಲಿದ್ದ ಶಾಂತಿ ಈಗ ಇಲ್ಲ: ಜಿ ಪರಮೇಶ್ವರ್
ರಾಜ್ಯದಲ್ಲಿ ಇನ್ನೂ ಕೂಡ 15 ವರ್ಷದ ಹಳೆಯ ಬರೋಬ್ಬರಿ 91,58,577 ವಾಹನಗಳು ಇದ್ದು, ಈ ಪೈಕಿ ಬೆಂಗಳೂರಿನಲ್ಲಿ 33,00,558 ಹಳೆಯ ವಾಹನಗಳು ಇರೋದನ್ನ ಖುದ್ದು ಸಾರಿಗೆ ಇಲಾಖೆಯ ಅಂಶಗಳೇ ರಿವೀಲ್ ಮಾಡಿದೆ. ನಗರದಲ್ಲಿ 15 ವರ್ಷದ ಹಳೆಯ 27,89364 ಸಾರಿಗೇತರ ವಾಹನ, 1,13,339 ಸರಕು ವಾಹನ. 1,35,988 ಲಘು ಸರಕು ವಾಹನಗಳಿವೆ. 20,554 ಹಳೆಯ ಬಸ್ಸುಗಳು, 63,346 ಟ್ಯಾಕ್ಸಿಗಳು, 1,77,967 ಹಳೆಯ ಲಘು ವಾಹನಗಳು ಸೇರಿ ಒಟ್ಟು 33 ಲಕ್ಷದ 558 ಹಳೆಯ ವಾಹನಗಳು ಇರೋದನ್ನ ಖುದ್ದು ಸಾರಿಗೆ ಇಲಾಖೆಯ ಅಂಕಿ ಅಂಶಗಳೇ ರಿವೀಲ್ ಮಾಡಿದೆ.
ನೋಂದಣಿಯಾಗಿ 15 ವರ್ಷ ಪೂರೈಸಿರುವ ಹಳೆಯ ವಾಹನಗಳಿಗೆ ಮುಕ್ತಿ ನೀಡುವ ನಿಟ್ಟಿನಲ್ಲಿ ಕೇಂದ್ರ ಸರ್ಕಾರ ದೇಶದೆಲ್ಲೆಡೆ ವಾಹನಗಳ ಸ್ಕ್ರ್ಯಾಪಿಂಗ್ ನೀತಿ ಅಥವಾ ಗುಜರಿ ನೀತಿಯನ್ನ ಜಾರಿಗೆ ತಂದಿದೆ. ವಾಹನಗಳ ಸ್ಕ್ರ್ಯಾಪಿಂಗ್ ನೀತಿ ಅನ್ವಯ 15 ವರ್ಷದ ಹಳೆಯ ವಾಹನಗಳನ್ನ ಟೆಸ್ಟಿಂಗ್ ಮಾಡಿಸಿ, ಅವುಗಳು ಸಂಚಾರಕ್ಕೆ ಯೋಗ್ಯವಾಗಿದೆಯಾ ಅನ್ನೋದನ್ನ ಪರಿಶೀಲನೆ ಮಾಡಬೇಕು. ಸಂಚಾರಕ್ಕೆ ಯೋಗ್ಯವಲ್ಲದ ವಾಹನಗಳನ್ನ ಗುಜರಿಗೆ ಹಾಕಬೇಕು ಅನ್ನೋ ನಿಯಮ ಇದೆ. ಬಟ್ ಇದು ಕೇವಲ ಬಾಯ್ ಮಾತಿಗೆ ಸೀಮಿತವಾದಂತೆ ಕಾಣ್ತಿದ್ದು, ಇನ್ನೂ ಕೂಡ ಹೊಗೆಯನ್ನ ಉಗುಳುತ್ತಾ ಹಳೆಯ ವಾಹನಗಳು ನಗರದಲ್ಲಿ ಸಂಚಾರ ಮಾಡುತ್ತಿವೆ. ಈ ಬಗ್ಗೆ ವಾಹನ ಸವಾರರು ಕೇಂದ್ರ ಮತ್ತು ರಾಜ್ಯ ಸರ್ಕಾರ ಗುಜರಿ ಪಾಲಿಸಿ ಬಗ್ಗೆ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಬೇಕು ಎಂದು ತಿಳಿಸಿದ್ದಾರೆ.
ರಾಜ್ಯದ ಪ್ರಮುಖ ಸುದ್ದಿಗಳನ್ನು ಓದಲು ಇದರ ಮೇಲೆ ಕ್ಲಿಕ್ ಮಾಡಿ
Published On - 2:19 pm, Sat, 17 February 24
