ಕೊನೆಗೂ ಟೇಕ್​ ಆಫ್​ ಆಗಲಿದೆ ಬೀದರ್ ಏರ್​ಪೋರ್ಟ್, ಲೋಹದ ಹಕ್ಕಿಗಳ ಹಾರಾಟಕ್ಕೆ ಸಜ್ಜು!

ಬೀದರ್: ಎಲ್ರೂ ಬ್ಯುಸಿಯಾಗಿದ್ದಾರೆ.. ಕಾಮಗಾರಿ ಭರದಿಂದ ಸಾಗಿದೆ.. ಲೋಹದ ಹಕ್ಕಿಗಳ ಕಲರವಕ್ಕೆ ಕಾಲ ಕೂಡಿ ಬಂದಿದೆ. ವಿಮಾನದಲ್ಲಿ ಒಂದ್ ಸಾರಿ ಹಾರಾಡ್ಬೇಕು. ಮೋಡದ ಮರೆಯಲ್ಲಿ ಸಾಗಿ ಎಂಜಾಯ್​ ಮಾಡ್ಬೇಕು ಅನ್ನೋ ಕನಸು ಚಿಗುರೊಡೆದಿದೆ.

ಫೆ.7ರಂದು ಏರ್​​ಪೋರ್ಟ್​ಗೆ ಸಿಎಂ ಚಾಲನೆ!
ಗಡಿನಾಡು ಬೀದರ್ ಜಿಲ್ಲೆಯ ಜನರ ಬಹುದಿನಗಳ ಡ್ರೀಮ್ ಅದು. ಆಗಸದಲ್ಲಿ ಸುಯ್ ಸುಯ್​ ಅಂತ ವಿಮಾನಗಳ ಹಾರಾಡೋ ಕಾಲ ಸನ್ನಿಹಿತವಾಗ್ತಿದೆ. 2009 ರಲ್ಲಿ ಸಿಎಂ ಆಗಿದ್ದ ಬಿಎಸ್​ವೈ ಕಮಠಾಣ ರಸ್ತೆಯ ಚಿದ್ರಿ ಸಮೀಪ 3.54 ಕೋಟಿ ವೆಚ್ಚದಲ್ಲಿ ಏರ್​ಪೋರ್ಟ್​​​ ಟರ್ಮಿನಲ್​ಗೆ ಶಂಕುಸ್ಥಾಪನೆ ಮಾಡಿದ್ರು. ಕೇಂದ್ರ ಸರ್ಕಾರದ ಉಡಾನ್ ಯೋಜನೆಯಡಿ ಜಿಲ್ಲೆ ಆಯ್ಕೆಯಾಗಿತ್ತು.

ಆದರೆ, ಕೆಲವು ತಾಂತ್ರಿಕ ಸಮಸ್ಯೆಗಳಿಂದ ಕೋಟ್ಯಂತರ ರೂಪಾಯಿ ವೆಚ್ಚದಲ್ಲಿ ನಿರ್ಮಿಸಿದ ಟರ್ಮಿನಲ್ ಹಾಳಾಗ್ತಿತ್ತು. ಇದೀಗ ಕಾಲ ಕೂಡಿ ಬಂದಿದ್ದು ಫೆಬ್ರವರಿ 7ರಂದು ಸಿಎಂ ಬಿಎಸ್​ವೈ ಏರ್​ಪೋರ್ಟ್​​ನ್ನು ಲೋಕಾರ್ಪಣೆ ಮಾಡಲಿದ್ದಾರೆ. ಇದ್ರಿಂದ ಬೀದರ್ ಜಿಲ್ಲೆ ಜನರು ಖುಷ್ ಆಗಿದ್ದಾರೆ.

ವಿಮಾನಗಳ ಹಾರಾಟಕ್ಕೆ ದಿನಗಣನೆ ಆರಂಭ:
ಇನ್ನು, ದಶಕದ ಹಿಂದೆಯೇ ಅಧಿಕಾರಿಗಳು ರಾಜಕಾರಣಿಗಳು ಮನಸ್ಸು ಮಾಡಿದ್ರೆ ಸರ್ಕಾರದ ಬೊಕ್ಕಸಕ್ಕೆ ಕೋಟಿ ಕೋಟಿ ನಷ್ಟವಾಗ್ತಿರಲಿಲ್ಲ. ಏರ್​​ಪೋರ್ಟ್​ ಟರ್ಮಿನಲ್​​ನಲ್ಲಿ ಪ್ರಯಾಣಿಕರ ವಿಶ್ರಾಂತಿ ಕೊಠಡಿ, ಸುರಕ್ಷತಾ ಘಟಕ, ನಾಗರಿಕರ ಲಗೇಜ್‌ ಸ್ಕ್ಯಾನಿಂಗ್‌, ಟಿಕೆಟ್‌ ಕೌಂಟರ್‌ ಸೇರಿ ಸಕಲ ಸೌಲಭ್ಯ ಮಾಡಲಾಗಿತ್ತು.

ಇನ್ನೇನು ವಿಮಾನಗಳ ಹಾರಾಟ ಶುರುವಾಗ್ಬೇಕು ಅನ್ನೋವಷ್ಟರಲ್ಲಿ ಕೆಲವು ಸಮಸ್ಯೆಗಳಿಂದ ಏರ್​​ಪೋರ್ಟ್ ಟರ್ಮಿನಲ್ ನೆನೆಗುದಿಗೆ ಬಿದ್ದಿತ್ತು. ಇದೀಗ ಬೀದರ್ ಜಿಲ್ಲೆಯಲ್ಲಿ ವಿಮಾನಗಳ ಹಾರಾಟಕ್ಕೆ ಕಾಲ ಕೂಡಿ ಬಂದಿದೆ. ವಿಮಾನ ನಿಲ್ದಾಣದ ನಿರ್ವಹಣೆಯನ್ನ 2033 ರವರೆಗೆ ಜಿಎಂಆರ್ ಹೈದರಾಬಾದ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಲಿಮಿಟೆಡ್​​ನವರು ನಿರ್ವಹಿಸಲಿದ್ದಾರಂತೆ.