ನೂರಾರು ಕೋಟಿ ಹಗರಣದ ಆರೋಪದಲ್ಲಿ ಕೋಲಾರ ಡಿಸಿಸಿ ಬ್ಯಾಂಕ್​, ಬಿಜೆಪಿ ಹಾಗೂ ಜೆಡಿಎಸ್​ ಮುಖಂಡರ ಗಂಭೀರ ಆರೋಪ..!

ಕೋಲಾರ: ಕೋಲಾರ ಡಿಸಿಸಿ ಬ್ಯಾಂಕ್​ನಲ್ಲಿ ಬಹುದೊಡ್ಡ ಅವ್ಯವಹಾರ ನಡೆದಿದೆ ಅನ್ನೋದು ಕಳೆದ ಹಲವು ವರ್ಷಗಳಿಂದ ಕೇಳಿ ಬರುತ್ತಿರುವ ಗಂಭೀರ ಆರೋಪ. ಸಚಿವರು, ಸಂಸದರು, ಸೇರಿದಂತೆ ಹಲವು ದೊಡ್ಡ ದೊಡ್ಡ ನಾಯಕರೇ ವೇದಿಕೆಗಳಲ್ಲಿ ಈ ಬಗ್ಗೆ ಬಾಷಣ ಮಾಡುತ್ತಿದ್ದಾರೆ. ಆದರೆ ಹಗರಣ ಬಯಲಿಗೆ ಬರದಂತೆ ತಡೆಯುತ್ತಿದ್ದು, ಸಿದ್ದರಾಮಯ್ಯ (Siddaramaiah) ಡಿಸಿಸಿ ಬ್ಯಾಂಕ್ (DCC Bank)​ ಹಗರಣದ ಪಿತಾಮಹನಾಗಿದ್ದಾರೆ ಎಂದು ವರ್ತೂರ್ ಪ್ರಕಾಶ್ (Varthur Prakash)​ ಆರೋಪಿಸಿದ್ದಾರೆ.

ಡಿಸಿಸಿ ಬ್ಯಾಂಕ್​ನಲ್ಲಿ ನೂರಾರು ಕೋಟಿ ರೂಪಾಯಿ ಅವ್ಯವಹಾರ ಆರೋಪ ಏನು..!

ಕೋಲಾರ, ಚಿಕ್ಕಬಳ್ಳಾಪುರ ಜಿಲ್ಲಾ ಸಹಕಾರ ಕೇಂದ್ರ ಬ್ಯಾಂಕ್​ ಅಂದರೆ ಡಿಸಿಸಿ ಬ್ಯಾಂಕ್ ದಿವಾಳಿಯಾಗಿ ಹೋಗಿತ್ತು ಆದರೆ 2013 ರಲ್ಲಿ ಸಿದ್ದರಾಮಯ್ಯ ಸಿಎಂ ಆದ ನಂತರ ವಿಶೇಷ ಅನುಧಾನ ನೀಡುವ ಮೂಲಕ ಕೋಲಾರ ಡಿಸಿಸಿ ಬ್ಯಾಂಕ್​ಗೆ ಮರುಜೀವ ನೀಡಲಾಯಿತು. ಇದಾದ ನಂತರ ಕಳೆದ 9 ವರ್ಷಗಳಿಂದ ಕೋಲಾರ ಡಿಸಿಸಿ ಬ್ಯಾಂಕ್​ ರೈತರು ಹಾಗೂ ಮಹಿಳಾ ಸ್ವಸಹಾಯ ಗುಂಪುಗಳಿಗೆ ಶೂನ್ಯ ಬಡ್ಡಿದರಲ್ಲಿ ಸಾಲ ನೀಡುವ ಮೂಲಕ ಸಾಕಷ್ಟು ಹೆಸರು ಮಾಡಿತ್ತು. ಆದರೆ ಕಾಲ ಕ್ರಮೇಣ ಅಷ್ಟೇ ಭ್ರಸ್ಟಾಚಾರದ ಆರೋಪಗಳು ಡಿಸಿಸಿ ಬ್ಯಾಂಕ್​ ವಿರುದ್ದ ಕೇಳಿ ಬಂದಿದೆ. ಅದರಲ್ಲೂ ಕಳೆದ 9 ವರ್ಷಗಳಿಂದ ಡಿಸಿಸಿ ಬ್ಯಾಂಕ್​ ಅಧ್ಯಕ್ಷರಾಗಿ ಕೆಲಸ ಮಾಡುತ್ತಿರುವ ಬ್ಯಾಲಹಳ್ಳಿ ಗೋವಿಂದಗೌಡ ಅವರ ವಿರುದ್ಧವೂ ಕೂಡಾ ನೂರಾರು ಕೋಟಿ ರೂಪಾಯಿ ಅವ್ಯವಹಾರ ಹಾಗೂ ಶೂನ್ಯ ಬಡ್ಡಿದರದಲ್ಲಿ ಮಹಿಳಾ ಸ್ವಶಕ್ತಿ ಸಹಾಯ ಗುಂಪುಗಳಿಗೆ ನೀಡುವ ಸಾಲದ ಬಡ್ಡಿ ಕ್ಲೈಮ್​ ವಿಚಾರದಲ್ಲಿ ನೂರಾರು ಕೋಟಿ ರೂಪಾಯಿ ಅವ್ಯವಹಾರ ನಡೆದಿದೆ ಎಂದು ಆರೋಪಿಸಿದ್ದಾರೆ.

ಕಾಂಗ್ರೇಸ್​ ಶಾಸಕರು ಹಾಗೂ ಮುಖಂಡರಿಗೆ ಕೋಟ್ಯಾಂತರ ರೂಪಾಯಿ ಸಾಲ..!

ಇನ್ನು ಪ್ರಮುಖವಾಗಿ ಕೋಲಾರ ಜಿಲ್ಲೆಯ ಕಾಂಗ್ರೇಸ್​ ಶಾಸಕರಾದ ರಮೇಶ್​ ಕುಮಾರ್, ಎಸ್​.ಎನ್​. ನಾರಾಯಣಸ್ವಾಮಿ, ಅನಿಲ್​ ಕುಮಾರ್​, ಶ್ರೀನಿವಾಸಗೌಡ ಸೇರಿದಂತೆ ಹಲವು ಕಾಂಗ್ರೆಸ್​ ಮುಖಂಡರುಗಳಿಗೆ ಕೋಟ್ಯಾಂತರ ರೂಪಾಯಿ ಸಾಲದ ರೂಪದಲ್ಲಿ ಹಣ ನೀಡಲಾಗಿದೆ. ಇದರಲ್ಲೂ ಕೂಡ ಕೋಟಿ ಕೋಟಿ ಹಣ ಅವ್ಯವಹಾರ ನಡೆದಿದೆ ಅನ್ನೋ ಆರೋಪಗಳು ಕೇಳಿಬಂದಿದೆ. ಹೀಗೆ ಕಾಂಗ್ರೆಸ್​ ಶಾಸಕರುಗಳು ಹಾಗೂ ಕಾಂಗ್ರೆಸ್​ ಮುಖಂಡರುಗಳು ಸಾಲ ಪಡೆದಿರುವ ಕಾರಣದಿಂದಲೇ ಅವರೆಲ್ಲರೂ ಡಿಸಿಸಿ ಬ್ಯಾಂಕ್​ ಹಗರಣಗಳ ಬೆನ್ನೆಲುಬಾಗಿ ನಿಂತು ಬ್ಯಾಂಕ್​ ಹಗರಣ ಬಯಲಿಗೆ ಬಾರದಂತೆ ಕಾಪಾಡುತ್ತಿದ್ದಾರೆ ಅನ್ನೋದು ವರ್ತೂರ್ ಪ್ರಕಾಶ್​ ಆರೋಪ.

ಸರ್ಕಾರಕ್ಕೆ ಸಹಕಾರಿ ಇಲಾಖೆ ಅಧಿಕಾರಿಗಳೇ ದೂರು ನೀಡಿದ್ರು ಎಲ್ಲಾ ಗಪ್​ಚಿಪ್​..!

ಇನ್ನು ಡಿಸಿಸಿ ಬ್ಯಾಂಕ್​ ಸ್ತ್ರೀಶಕ್ತಿ ಮಹಿಳಾ ಸ್ವಸಹಾಯ ಸಂಘಗಳಿಗೆ ಸರ್ಕಾರದಿಂದ ನೀಡುವ ಬಡ್ಡಿ ಹಣವನ್ನು ದುರ್ಬಳಕೆ ಮಾಡಿಕೊಳ್ಳಲಾಗಿದೆ ಜೊತೆಗೆ ನಕಲಿ ಸ್ವಸಹಾಯ ಗುಂಪುಗಳನ್ನು ಸೃಷ್ಟಿಮಾಡಿಕೊಂಡು ಅದರ ಹೆಸರಲ್ಲಿ ಬ್ಯಾಂಕ್​ನ ಅಧ್ಯಕ್ಷರುಗಳು ಹಾಗೂ ಕೆಲವು ಕಾಂಗ್ರೆಸ್​​ ಶಾಸಕರುಗಳು, ಡಿಸಿಸಿ ಬ್ಯಾಂಕ್​ ಅಧ್ಯಕ್ಷ ಗೋವಿಂದಗೌಡರ ಹಿಂಬಾಲಕರು ಸಾಲದ ಹೆಸರಲ್ಲಿ ಹಣ ಪಡೆದುಕೊಂಡು ತಮ್ಮ ಇಚ್ಚಾನುಸಾರ ಖರ್ಚು ಮಾಡುತ್ತಿದ್ದಾರೆ. ಅದರ ಜೊತೆಗೆ ಸರ್ಕಾರ ಸರಿಯಾದ ಸಮಯಕ್ಕೆ ಸಾಲ ಮರುಪಾವತಿ ಮಾಡುವ ಸಂಘಗಳಿಗೆ ನೀಡುವ ಬಡ್ಡಿ ಕ್ಲೈಮ್​ ಹಣ ಕೂಡಾ ಗುಳುಂ ಮಾಡಲಾಗುತ್ತಿದೆ ಎಂದು ಆರೋಪಿಸಲಾಗುತ್ತಿದೆ. ಇನ್ನು ಈ ಬಗ್ಗೆ ಬಡ್ಡಿ ಕ್ಲೈಮ್​ ವಿಚಾರವಾಗಿ ನಡೆದಿರುವ ಅವ್ಯವಹಾರಗಳ ಕುರಿತು ಜಿಲ್ಲಾ ಸಹಕಾರಿ ನಿಭಂದಕರೇ ಸರ್ಕಾರಕ್ಕೆ ವರದಿ ಸಲ್ಲಿಕೆ ಮಾಡಿದ್ದರೂ ಕೂಡ ಸಿದ್ದರಾಮಯ್ಯ ಅವರ ಪ್ರಭಾವ ಬಳಿಸಿ ಎಲ್ಲರ ಬಾಯಿ ಮುಚ್ಚಿಸಲಾಗಿದೆ ಅನ್ನೋದು ವರ್ತೂರ್ ಪ್ರಕಾಶ್​ ಆರೋಪ.

ಗೋವಿಂದಗೌಡ ಅವರ ಪಾಪದ ಕೊಡ ತುಂಬಿದೆ ಜೈಲು ಸೇರುವ ದಿನ ಸನಿಹ..!

ಇಷ್ಟು ದಿನ ಯಾರು ಏನೇ ಪ್ರಭಾವ ಬಳಸಿ ಡಿಸಿಸಿ ಬ್ಯಾಂಕ್​ ಅವ್ಯವಹಾರ ಬಯಲಾಗದಂತೆ ತಡೆದಿದ್ದರೋ ಗೊತ್ತಿಲ್ಲ ಆದರೆ ಈಗ ಡಿಸಿಸಿ ಬ್ಯಾಂಕ್​ ಅಧ್ಯಕ್ಷ ಗೋವಿಂದಗೌಡ ಅವರ ಪಾಪದ ಕೊಡ ತುಂಬಿದೆ ನಾನು ಸಿಎಂ ಬಸವರಾಜ ಬೊಮ್ಮಾಯಿ ಅವರ ಜೊತೆಗೆ ಮಾತುಕತೆ ನಡೆಸಿದ್ದು, ಕೋಲಾರ ಡಿಸಿಸಿ ಬ್ಯಾಂಕ್​ ಹಗರಣದ ವರದಿ ಇರುವ ಪೈಲ್​ ವಿಧಾನಸೌಧ ಮೂರನೇ ಮಹಡಿ ತಲುಪಿದೆ, ವಿಧಾನಸಭೆ ಚುನಾವಣೆ ಒಳಗಾಗಿ ಡಿಸಿಸಿ ಬ್ಯಾಂಕ್​ ಅಧ್ಯಕ್ಷರು ಜೈಲು ಪಾಲಾಗೋದು ಖಚಿತ, ಇದರಲ್ಲಿ ಯಾವುದೇ ಪ್ರಭಾವ ಬಳಸದೆ ಕಾನೂನಿನ ಪ್ರಕಾರವಾಗಿ ಕ್ರಮ ಕೈಗೊಳ್ಳಲಾಗುತ್ತದೆ ಎಂದು ವರ್ತೂರ್ ಪ್ರಕಾಶ್ ಆರೋಪಿಸಿದ್ದಾರೆ.

ಡಿಸಿಸಿ ಬ್ಯಾಂಕ್​ ವಿರುದ್ದ ಸಚಿವ ಮುನಿರತ್ನ ಕೆಂಡಾಮಂಡಲ..!

ಇನ್ನು ಡಿಸಿಸಿ ಬ್ಯಾಂಕ್​ನಲ್ಲಿ ಸಾಲ ನೀಡುವ ವೇಳೆಯಲ್ಲೂ ಕೂಡ ಕೇವಲ ಕಾಂಗ್ರೆಸ್​ ಶಾಸಕರುಗಳನ್ನು ಮುಂದಿಟ್ಟುಕೊಂಡು, ಮಹಿಳಾ ಸ್ತ್ರೀಶಕ್ತಿ ಸಂಘಗಳಿಗೆ ಸಾಲ ನೀಡುವ ಮೂಲಕ ಡಿಸಿಸಿ ಬ್ಯಾಂಕ್​ ಕೇವಲ ಕಾಂಗ್ರೇಸ್​ ಪಕ್ಷಕ್ಕೆ ಸೀಮಿತವಾದ ಬ್ಯಾಂಕ್​ ಎನ್ನುವಂತೆಯೂ ಇಲ್ಲಿ ನಡೆದುಕೊಳ್ಳಲಾಗುತ್ತಿದೆ. ಇದು ಡಿಸಿಸಿ ಬ್ಯಾಂಕ್ ಅಧ್ಯಕ್ಷ ಗೋವಿಂದಗೌಡ ಅವರ ಮನೆಯ ಸ್ವತ್ತಲ್ಲ, ಕೊಡುವ ಸಾಲ ಅವರಪ್ಪನ ಮನೆಯಿಂದ ಅವರ ತಾತನ ಮನೆಯಿಂದ ತಂದು ಕೊಡುತ್ತಿಲ್ಲ ಇದು ಕೇಂದ್ರ ಸರ್ಕಾರ ನಬಾರ್ಡ್​ ಬ್ಯಾಂಕ್​ ಮೂಲಕ ರೈತರು ಹಾಗೂ ಮಹಿಳೆಯರಿಗೆ ನೀಡುತ್ತಿರುವ ಸಾಲ ಎಂದು ಸಚಿವ ಮುನಿರತ್ನ ಬಹಿರಂಗ ವೇದಿಕೆಯಲ್ಲೇ ಆರೋಪ ಮಾಡಿದ್ದಾರೆ.

ಜೆಡಿಎಸ್​ ಮುಖಂಡರಿಂದಲೂ ಡಿಸಿಸಿ ಬ್ಯಾಂಕ್ ವಿರುದ್ದ ಆರೋಪ…!​

ಇನ್ನು ಡಿಸಿಸಿ ಬ್ಯಾಂಕ್​ ಮೇಲಿನ ಆರೋಪ ಕೇವಲ ಬಿಜೆಪಿಗಷ್ಟೇ ಸೀಮಿತ ವಾಗಿಲ್ಲ ಬದಲಾಗಿ ಜೆಡಿಎಸ್​ ಪಕ್ಷ ಹಾಗೂ ಅವರ ಮುಖಂಡರು ಕೂಡಾ ಡಿಸಿಸಿ ಬ್ಯಾಂಕ್​ ಹೆಸರಲ್ಲಿ ಇಡೀ ಸಹಕಾರಿ ಕ್ಷೇತ್ರವನ್ನೇ ದುರುಪಯೋಗ ಪಡಿಸಿಕೊಂಡಿದ್ದಾರೆ ಡಿಸಿಸಿ ಬ್ಯಾಂಕ್​ ಅಧ್ಯಕ್ಷ ಗೋವಿಂದಗೌಡ ಸಾಕಷ್ಟು ಅವ್ಯವಹಾರಗಳನ್ನು ಮಾಡಿ ಎಲ್ಲೆಡೆ ತಮ್ಮ ಹಣದ ಪ್ರಭಾವ ಬಳಿಸಿ ಎಲ್ಲರ ಬಾಯಿ ಮುಚ್ಚಿಸಿದ್ದಾರೆ ಒಂದಲ್ಲ ಒಂದು ದಿನ ಅದು ಹೊರಗೆ ಬಂದೇ ಬರುತ್ತದೆ ಎಂದು ಜೆಡಿಎಸ್​ ವಿಧಾನಪರಿಷತ್​ ಸದಸ್ಯ ಗೋವಿಂದರಾಜು ಕೂಡಾ ಆರೋಪಿಸಿದ್ದಾರೆ. ಅಲ್ಲದೆ ಡಿಸಿಸಿ ಬ್ಯಾಂಕ್ ಸಾಲ ನೀಡಿ ಈಗ ಸಿದ್ದರಾಮಯ್ಯ ಅವರಿಗಾಗಿ ಮಹಿಳಾ ಸಮಾವೇಶವನ್ನು ಮಾಡುತ್ತಿದ್ದಾರೆ ಎಂದು ಆರೋಪಿಸಿದ್ದಾರೆ.

ಒಟ್ಟಾರೆ ಹಲವು ವರ್ಷಗಳಿಂದ ಡಿಸಿಸಿ ಬ್ಯಾಂಕ್​ನಲ್ಲಿ ನಡೆದಿದೆ ಎನ್ನಲಾದ ಅವ್ಯವಹಾರದ ಬಗ್ಗೆ ಸಾಕಷ್ಟು ಬಾರಿ ಚರ್ಚೆಗೆ ಬರುತ್ತಿದೆ ಆದರೂ ಈಬಗ್ಗೆ ಧ್ವನಿ ಎತ್ತಿದವರ ಧ್ವನಿ ಬೇಗ ಅಡಗಿಹೋಗುತ್ತಿದೆ ಹಾಗಾಗಿ ಇದರಲ್ಲಿ ಏನಾದರೂ ನಡೆದಿದೆಯಾ ಅನ್ನೋದರ ಕುರಿತು ಸರ್ಕಾರ ತನಿಖೆ ನಡೆಸಿದಾಗ ಮಾತ್ರವೇ ಡಿಸಿಸಿ ಬ್ಯಾಂಕ್​ ನಲ್ಲಿ ನಿಜಕ್ಕೂ ಅವ್ಯವಹಾರ ಆಗಿದ್ಯಾ ಇಲ್ಲಾವಾ ಅನ್ನೋ ಹಲವು ಅನುಮಾನಗಳಿಗೆ ತೆರೆ ಬೀಳಲು ಸಾಧ್ಯ.

ವರದಿ: ರಾಜೇಂದ್ರಸಿಂಹ ಟಿವಿ9 ಕೋಲಾರ

ರಾಜ್ಯದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ