ನೈಟ್ ಕರ್ಫ್ಯೂಗೂ ಡೋಂಟ್ ಕೇರ್, KRS​ ಬಳಿ ಕಾವೇರಿ ತೀರದಲ್ಲಿ ರೇವ್ ಪಾರ್ಟಿ!?

ಮಂಡ್ಯ: ಮಿರ ಮಿರ ಮಿಂಚೋ ಲೈಟಿಂಗ್.. ಮತ್ತೇಟಿನ ನಡುವೆ ಕಿವಿಗೆ ಗುನುಗ್ತಿರೋ​ ಸಾಂಗ್​​.. ಟೇಬಲ್ ಮೇಲೆ ಗುಂಡು-ತುಂಡು ಇಟ್ಕೊಂಡು ಫುಲ್ ಡಿಸ್ಕಷನ್. ಇಲ್ಲಿ ಸಾಮಾಜಿಕ ಅಂತರಕ್ಕೂ ಡೋಂಟ್​ ಕೇರ್. ರೂಲ್ಸ್​​​ಗಳನ್ನ ಬ್ರೇಕ್​ ಮಾಡಿ ಮೋಜು-ಮಸ್ತಿ. ಕರ್ಫ್ಯೂ ಉಲ್ಲಂಘಿಸಿ ಕತ್ತಲೆಯಲ್ಲಿ ಪಾರ್ಟಿ ದರ್ಬಾರ್. ಕೊರೊನಾ ಸಂಕಷ್ಟದ ನಡುವೆ ಇದು ಬೇಕಿತ್ತಾ ಸ್ವಾಮಿ.. ಇದು ಬೇಕಿತ್ತಾ..?

ಕರ್ಫ್ಯೂ ನಿಯಮ ಉಲ್ಲಂಘಿಸಿ ಶ್ರೀಮಂತರ ಮೋಜು-ಮಸ್ತಿ!
ಯೆಸ್​​.. ಕೊರೊನಾ ಕೂಪಕ್ಕೆ ಬಿದ್ದು ಇಡೀ ದೇಶವೇ ಕಂಗೆಟ್ಟು ಕೂತಿದೆ. ಕರುನಾಡು ಕೊರೊನಾ ಕೂಪಕ್ಕೆ ಬಿದ್ದು ಕಂಪಿಸ್ತಿದ್ರೆ ಸಕ್ಕರೆ ನಾಡು ಮಂಡ್ಯ ನಂಜಿನ ನಂಟಿಗೆ ನಲುಗಿ ಹೋಗಿದೆ. ದೇಶದಲ್ಲಿ ಲಾಕ್​ಡೌನ್ ರಿಲೀಫ್ ಕೊಟ್ಟು ಹಲವು ಖಡಕ್ ರೂಲ್ಸ್ ಜಾರಿಗೆ ತಂದಿದ್ದಾರೆ. ಆದ್ರೆ, ಮಂಡ್ಯದಲ್ಲಿ ಇದನ್ನೇ ಬಂಡವಾಳ ಮಾಡ್ಕೊಂಡಿರೋ ಕೆಲ ಪ್ರತಿಷ್ಠಿತರು. ಶ್ರೀಮಂತರು. ಹಣವಂತರು ಕರ್ಫ್ಯೂ ರೂಲ್ಸ್ ಬ್ರೇಕ್ ಮಾಡಿದ್ದಾರೆ. ಕೆಆರ್​ಎಸ್​ ಬಳಿ ಕಾವೇರಿ ನದಿ ತಟದಲ್ಲಿ ರೇವ್ ಪಾರ್ಟಿ ಆಯೋಜಿಸಿ ಮೋಜಿನಾಟ ಆಡಿದ್ದಾರೆ. ದೊಡ್ಡದಾಗಿ ಪೆಂಡಾಲ್​ ಹಾಕಿ ಆರ್ಕೆಸ್ಟ್ರಾದ ಧ್ವನಿವರ್ಧಕ ಬಳಸಿ ಪಾರ್ಟಿ ಮಾಡಿರೋದು ದೊಡ್ಡ ವಿವಾದಕ್ಕೆ ಕಾರಣವಾಗಿದೆ.

ಇನ್ನು, ಕರ್ಫ್ಯೂ ನಡುವೆ ಇಷ್ಟೊಂದು ಮೋಜು-ಮಸ್ತಿ ಮಾಡಿದ್ದು ಮೈಸೂರು ಮೂಲದ ಸಂಜಯ್​ ಎಂಬುವರಿಗೆ ಸೇರಿದ ತೋಟದಲ್ಲಿ. ರೇವ್​ ಪಾರ್ಟಿಗೆ ಕಾರುಗಳಲ್ಲಿ ದಂಡು ದಂಡಾಗಿ ಶ್ರೀಮಂತರು ಆಗಮಿಸಿದ್ರು. ಇನ್ನೊಂದು ಇವರ ದೊಡ್ಡಸ್ತಿಕೆ ಏನಂದ್ರೆ ಕೆಆರ್​ಎಸ್ ಪೊಲೀಸ್​ ಠಾಣೆ ಬಳಿ ಪಾರ್ಟಿ ನಡೆಯುತ್ತಿದ್ರೂ ಪೊಲೀಸ್ರು ಗಪ್​ಚುಪ್​ ಆಗಿದಿದ್ದು ಸಾಕಷ್ಟು ಅನುಮಾನಕ್ಕೆ ಕಾರಣವಾಗಿದೆ. ಯಾಕ್​ ಸ್ವಾಮಿ ಕಿರಿಕಿರಿ ಮಾಡ್ತಿದ್ದೀರಾ ಅಂತಾ ಕೇಳಲು ಹೋಗಿದ್ದ ಸ್ಥಳೀಯರಿಗೆ ಆವಾಜ್ ಹಾಕಿದ್ದಾರಂತೆ.

ಕೆಆರ್​ಎಸ್​ ಠಾಣೆ ಬಳಿ ಪಾರ್ಟಿ ನಡೆಯುತ್ತಿದ್ದರೂ ಗಪ್​ಚುಪ್!
ಅದ್ಯಾವಾಗ ಕೆಆರ್​ಎಸ್​ ಬಳಿಯ ಕಾವೇರಿ ನದಿ ತೀರದಲ್ಲಿ ಪಾರ್ಟಿ ಮಾಡಿದ್ದು ಮಾಧ್ಯಮಗಳಲ್ಲಿ ದೊಡ್ಡ ಸದ್ದು ಮಾಡ್ತೋ ಖಾಕಿ ಪಡೆ ಅಲರ್ಟ್ ಆಗಿದೆ. ಅಲ್ಲಿ ಆಯೋಜಿಸಿದ್ದು ರೇವ್ ಪಾರ್ಟಿ ಅಲ್ಲ ಬರ್ತ್​ಡೇ ಪಾರ್ಟಿ ಅಂತ ಮಂಡ್ಯ ಎಸ್​ಪಿ ಪರಶುರಾಮ್​ ಪ್ರತಿಕ್ರಿಯಿಸಿದ್ರು. ಕೊರೊನಾ ನಡುವೆ ಪಾರ್ಟಿ ಆಯೋಜಿಸಿರೋರ ವಿರುದ್ಧ ಕೇಸ್ ದಾಖಲಿಸಲು ಸೂಚಿಸಿದ್ದೇನೆ ಅಂತ ಹೇಳಿದ್ರು.

ಒಟ್ನಲ್ಲಿ, ಇಡೀ ದೇಶವೇ ಕೊರೊನಾ ಕುಲುಮೆಗೆ ಬಿದ್ದಿ ಒದ್ದಾಡ್ತಿದೆ. ಆದ್ರೆ, ಲಾಕ್​ಡೌನ್​ ರಿಲೀಫ್​ ನಡುವೆ ರೂಲ್ಸ್ ಬ್ರೇಕ್ ಮಾಡಿ ಪಾರ್ಟಿ ಮಾಡಿದ್ದು ಎಷ್ಟು ಸರಿ. ಪೊಲೀಸರ ಅನುಮತಿ ಇಲ್ಲದೇ ಈ ಪಾರ್ಟಿ ನಡೀತಾ? ಶ್ರೀಮಂತರು ಏನ್​ ಮಾಡಿದ್ರೂ ಸರೀನಾ? ಲಾಕ್​ಡೌನ್​ ರೂಲ್ಸ್​ಗೂ ಬೆಲೆನೇ ಇಲ್ವಾ? ಸಾಮಾನ್ಯರಿಗೊಂದು ನ್ಯಾಯ.. ಹಣವಂತರಿಗೊಂದು ನ್ಯಾಯಾನಾ? ಅಂತ ಸ್ಥಳೀಯರು ಆಕ್ರೋಶ ಹೊರಹಾಕ್ತಿದ್ದಾರೆ.