ರಾಯಚೂರಿನ RTPSನ 5 ಘಟಕಗಳಲ್ಲಿ ವಿದ್ಯುತ್ ಉತ್ಪಾದನೆ ಸ್ಥಗಿತ; ಅಧಿಕಾರಿ ಶಶಿಕಾಂತ್ ಹೇಳಿಕೆ

ರಾಯಚೂರು: ತಾಲ್ಲೂಕಿನ ಶಕ್ತಿನಗರದಲ್ಲಿರೊ ಆರ್​ಟಿಪಿಎಸ್​ನ (RTPS) ಐದು ಘಟಕಗಳಲ್ಲಿ ವಿದ್ಯುತ್ ಉತ್ಪಾದನೆ ಸ್ಥಗಿತಗೊಂಡಿದೆ. ವಿದ್ಯುತ್ ಉತ್ಪಾದನೆ ಸ್ಥಗಿತಗೊಂಡ ಹಿನ್ನೆಲೆ ಟಿವಿ 9ಗೆ ಆರ್​ಟಿಪಿಎಸ್​ನ ಹಿರಿಯ ಅಧಿಕಾರಿ ಶಶಿಕಾಂತ್ ಪ್ರತಿಕ್ರಿಯಿಸಿದ್ದು, ಕಳೆದೊಂದು ವಾರದಿಂದ ರಾಜ್ಯಾದ್ಯಂತ ಮಳೆ, ಗಾಳಿ ಹಿನ್ನೆಲೆ ರಾಜ್ಯಾದ್ಯಂತ ಬಹುತೇಕ ಕಡೆ ವಿದ್ಯುತ್ ಬೇಡಿಕೆ ಕಡಿಮೆಯಾಗಿದೆ. ಹೀಗಾಗಿ ಆರ್​ಟಿಪಿಎಸ್​ನಿಂದ ಬೇಡಿಕೆಗೆ ತಕ್ಕಂತೆ ವಿದ್ಯುತ್ ಉತ್ಪಾದನೆ ಪಡಲಾಗುತ್ತಿದೆ. ಹೀಗಾಗಿ ಸದ್ಯ 8 ಘಟಕಗಳ ಪೈಕಿ 3ರಲ್ಲಿ ಮಾತ್ರ ವಿದ್ಯುತ್ ಉತ್ಪಾದನೆ ಮಾಡಲಾಗುತ್ತಿದ್ದು, ಸಾಮಾನ್ಯ ದಿನಗಳಲ್ಲಿ 8 ಘಟಕಗಳಿಂದ 1720 ಮೆಗಾ ವ್ಯಾಟ್ ವಿದ್ಯುತ್ ಉತ್ಪಾದನೆ ಮಾಡಲಾಗುತ್ತದೆ. ಆರ್​ಟಿಪಿಎಸ್​ನ 1, 2, 3, 6 ಮತ್ತು 7 ನೇ ಘಟಕಗಳು ಸ್ಥಗಿತವಾಗಿವೆ. ಸದ್ಯ 3 ಘಟಕಗಳಿಂದ ಕೇವಲ 450-500 ಮೆಗಾ ವ್ಯಾಟ್ ವಿದ್ಯುತ್ ಮಾತ್ರ ಉತ್ಪಾದನೆ ಮಾಡಲಾಗುತ್ತಿದೆ. ಕಲ್ಲಿದ್ದಿಲು ಸಮಸ್ಯೆ ಇಲ್ಲವೇ ಇಲ್ಲ. ಎಷ್ಟು ಪ್ರಮಾಣದಲ್ಲಿ ಕಲ್ಲಿದ್ದಲು ಸ್ಟಾಕ್ ಇರಬೇಕು ಅಷ್ಟು ನಮ್ಮಲ್ಲಿದೆ ಎಂದು ಶಶಿಕಾಂತ್ ಹೇಳಿದ್ದಾರೆ.

ಕರೆಂಟ್ ಹೋಗಲ್ಲ, ಯೋಚನೆ ಮಾಡಬೇಡಿ: ಇಂಧನ ಸಚಿವ ಸುನಿಲ್ ಕುಮಾರ್

ಬಾಗಲಕೋಟೆ: ಕರ್ನಾಟಕದ ಬೇಡಿಕೆಗೆ ತಕ್ಕಷ್ಟು ವಿದ್ಯುತ್ ಉತ್ಪಾದನೆಯಾಗುತ್ತಿದ್ದು, ಲೋಡ್ ಶೆಡಿಂಗ್ ಅಗತ್ಯವಿಲ್ಲ ಎಂದು ಬಾಗಲಕೋಟೆಯಲ್ಲಿ ಇಂಧನ ಸಚಿವ ಸುನಿಲ್ ಕುಮಾರ್ ಹೇಳಿದರು. ಕಲ್ಲಿದ್ದಲು ಕೊರತೆ ಕಾರಣಕ್ಕೆ ರಾಜ್ಯದಲ್ಲಿ ವಿದ್ಯುತ್ ಉತ್ಪಾದನೆ ಕಡಿಮೆ ಮಾಡಿಲ್ಲ. ಕಳೆದ ಮೂರು ದಿನಗಳಿಂದ ಅಕಾಲಿಕ ಮಳೆಯಾಗುತ್ತಿರುವ ಹಿನ್ನೆಲೆಯಲ್ಲಿ ರೈತರ ಕೃಷಿ ಪಂಪ್​ಸೆಟ್​ಗಳಿಗೆ ವಿದ್ಯುತ್ ಬೇಡಿಕೆ ಕಡಿಮೆಯಾಗಿತ್ತು. ಹೀಗಾಗಿ ಮೂರು ಘಟಕಗಳಲ್ಲಿ ಉತ್ಪಾದನೆ ಸ್ಥಗಿತಗೊಳಿಸಲಾಗಿದೆ. ವಿದ್ಯುತ್ ಪೂರೈಕೆ ವಿಚಾರದಲ್ಲಿ ರಾಜ್ಯದ ಜನರು ತಪ್ಪು ಅಭಿಪ್ರಾಯಕ್ಕೆ ಬರುವುದು ಬೇಡ. ಕಲ್ಲಿದ್ದಲು ಕೊರತೆ ಕಾರಣಕ್ಕೆ ರಾಜ್ಯದಲ್ಲಿ ವಿದ್ಯುತ್ ಉತ್ಪಾದನೆ ಕಡಿಮೆ ಮಾಡಿಲ್ಲ. ಕರ್ನಾಟಕದಲ್ಲಿ ಲೋಡ್ ಶೆಡಿಂಗ್​ನ ಅಗತ್ಯವೇ ಬೀಳುವುದಿಲ್ಲ ಎಂದು ಸ್ಪಷ್ಟಪಡಿಸಿದರು.

ಭಾರತದಲ್ಲಿ ವಿದ್ಯುತ್ ಕೊರತೆಯುಂಟಾಗುತ್ತಿರುವುದಕ್ಕೆ ಕಾರಣಗಳೇನು?

ಭಾರತದಾದ್ಯಂತ ಬೇಸಿಗೆಯ ಆರಂಭದೊಂದಿಗೆ, ಆಗಾಗ್ಗೆ ವಿದ್ಯುತ್ ಕಡಿತವಾಗುತ್ತಿದೆ. ಮೂಲಗಳನ್ನು ಉಲ್ಲೇಖಿಸಿದ ಎಸ್ ಆಂಡ್ ಪಿ ಗ್ಲೋಬಲ್ ಕಮ್ಯುನಿಟಿ ಇನ್‌ಸೈಟ್ಸ್, ಹಲವಾರು ಭಾರತೀಯ ರಾಜ್ಯಗಳು ಆಗಾಗ್ಗೆ ವಿದ್ಯುತ್ ಕಡಿತಕ್ಕೆ(Power cuts) ಸಾಕ್ಷಿಯಾಗಬಹುದು ಏಕೆಂದರೆ ಹೆಚ್ಚುತ್ತಿರುವ ಬೇಸಿಗೆಯ ಬೇಡಿಕೆಯ ನಡುವೆ ವಿದ್ಯುತ್ ಸ್ಥಾವರಗಳು ಸಾಕಷ್ಟು ಕಲ್ಲಿದ್ದಲು ಪೂರೈಕೆಯನ್ನು(coal supplies) ಹೊಂದಿಸಲು ಹೆಣಗಾಡುತ್ತಿವೆ ಎಂದು ಹೇಳಿದೆ. “ವಿದ್ಯುತ್ ಸಂಗ್ರಹಕ್ಕಾಗಿರುವ ಕಲ್ಲಿದ್ದಲು ದಾಸ್ತಾನುಗಳು ಕನಿಷ್ಠ ಒಂಬತ್ತು ವರ್ಷಗಳಲ್ಲಿ ಬೇಸಿಗೆಯ ಪೂರ್ವದ ಮಟ್ಟದಲ್ಲಿ ಕಡಿಮೆಯಿರುವುದರಿಂದ ಮತ್ತು ಕನಿಷ್ಠ 38 ವರ್ಷಗಳಲ್ಲಿ ವಿದ್ಯುತ್ ಬೇಡಿಕೆಯು (Electricity demand) ವೇಗವಾಗಿ ಏರುವ ನಿರೀಕ್ಷೆಯಿರುವುದರಿಂದ ಭಾರತವು ಈ ವರ್ಷ ಹೆಚ್ಚಿನ ವಿದ್ಯುತ್ ಕಡಿತವನ್ನು ಎದುರಿಸುವ ಸಾಧ್ಯತೆಯಿದೆ” ಎಂದು ರಾಯಿಟರ್ಸ್ ವರದಿ ಮಾಡಿದೆ. ಆಂಧ್ರಪ್ರದೇಶ, ಕರ್ನಾಟಕ, ಬಿಹಾರ, ಮಧ್ಯಪ್ರದೇಶ, ಜಾರ್ಖಂಡ್, ಪಂಜಾಬ್ ಮತ್ತು ಹರ್ಯಾಣ ಸೇರಿದಂತೆ ಇತರ ಕೆಲವು ರಾಜ್ಯಗಳು ಕಳೆದ ಕೆಲವು ದಿನಗಳಿಂದ ವಿದ್ಯುತ್ ಕಡಿತವನ್ನು ಅನುಭವಿಸಲು ಪ್ರಾರಂಭಿಸಿದೆ. ಮಹಾರಾಷ್ಟ್ರವು ಕೃಷಿ ವಿದ್ಯುತ್ ಗ್ರಾಹಕರ ಭಾಗಗಳಿಗೆ ವಿದ್ಯುತ್ ಪೂರೈಕೆಯನ್ನು ತಾತ್ಕಾಲಿಕವಾಗಿ ಕಡಿಮೆ ಮಾಡಿದೆ ಎಂದು ವರದಿಯಾಗಿದೆ. ಗುಜರಾತ್ ಮತ್ತು ತಮಿಳುನಾಡಿನಂತಹ ರಾಜ್ಯಗಳು ಸರ್ಕಾರಿ ಸ್ವಾಮ್ಯದ ವಿದ್ಯುತ್ ಕೇಂದ್ರಗಳಿಗೆ ದುಬಾರಿ ವಿದ್ಯುತ್ ಖರೀದಿಸಲು ಅವಕಾಶ ನೀಡುವ ಮೂಲಕ ಲೋಡ್ ಶೆಡ್ಡಿಂಗ್ ತಪ್ಪಿಸುತ್ತಿವೆ. ಕೊವಿಡ್ -19 ಪ್ರೇರಿತ ನಷ್ಟದ ನಂತರ ಪುನರಾಗಮನಕ್ಕೆ ಪ್ರಯತ್ನಿಸುತ್ತಿರುವ ಕೈಗಾರಿಕೆಗಳಿಗೆ ಅಡ್ಡಿಯಾಗುವುದರಿಂದ ವಿದ್ಯುತ್ ಕಡಿತವು ಭಾರತೀಯ ಆರ್ಥಿಕತೆಯನ್ನು ಪುನರುಜ್ಜೀವನಗೊಳಿಸಲು ಸವಾಲನ್ನು ಒಡ್ಡುತ್ತದೆ.

ಇದನ್ನೂ ಓದಿ:

Closing Bell: ಷೇರುಪೇಟೆ ಏರಿಳಿತದ ವಹಿವಾಟಿನಲ್ಲಿ ಸೆನ್ಸೆಕ್ಸ್ 703 ಪಾಯಿಂಟ್ಸ್, ನಿಫ್ಟಿ 215 ಪಾಯಿಂಟ್ಸ್ ಕುಸಿತ