ಡೌನ್ ಡೌನ್ ಸರ್ವರ್​​​ ಡೌನ್! ಸಿಲಿಕಾನ್​ ಸಿಟಿ ಪಕ್ಕದಲ್ಲೇ ಇರುವ ರಾಮನಗರದಲ್ಲಿ ಸರ್ವರ್​ ಪ್ರಾಬ್ಲಂ, ಜನರಿಗೂ ಪ್ರಾಬ್ಲಂ

ರಾಮನಗರ: ಅದು ಸರ್ಕಾರಿ ಕಚೇರಿ.. ನಿತ್ಯ ನೂರಾರು ಜನರು ಅಲ್ಲಿಗೆ ಬರ್ತಾರೆ.. ಆದ್ರೆ, ಇಷ್ಟು ದಿನ ಅಧಿಕಾರಿಗಳಿಲ್ಲ, ಮೀಟಿಂಗ್, ಆಮೇಲೆ ಬನ್ನಿ, ಸಂಜೆ ಬನ್ನಿ ಅಂತೆಲ್ಲ ಮಾಮೂಲು ಸಬೂಬು ಕೊಟ್ಟು ಜನರನ್ನ ಅಲೆಸುತ್ತಿದ್ದರು.. ಆದ್ರೀಗ, ಸರ್ವರ್​ ಸಮಸ್ಯೆ (Computer server problem) ಎಂಬುದು ಧುತ್ತನೆ ಎದುರಾಗಿದೆಯಂತೆ! ಹಾಗಾಗಿ ಜನರ ಪರದಾಟಕ್ಕೆ ಮತ್ತೊಂದು ಸಬೂಬು ಸೇರಿಕೊಂಡಿದೆ. ತಿಂಗಳಿಂದ ಹೀಗೆ ಜನ ಸಮಸ್ಯೆಗೆ ಸಿಲುಕಿದ್ದಾರೆ (Ramanagara).

ಬೆಳಗ್ಗೆ ಬಂದ್ರೂ ಅದೇ ಮಾತು.. ಸಂಜೆ ಬಂದ್ರೂ ಅದೇ ಮಾತು.. ನಾಳೆ ಬಂದ್ರೂನೂ ಸೇಮ್​​ ಟು ಸೇಮ್ ಡೈಲಾಗ್! ಸರ್ವರ್​​​ ಡೌನ್​​ ಅನ್ನೋ ಮಾತು ಕೇಳಿ ಕೇಳಿ ಜನರೆಲ್ಲ ರೋಸತ್ತಿದ್ದಾರೆ.. ಕೆಲಸ ಕಾರ್ಯ ಬಿಟ್ಟು ಸರ್ಕಾರಿ ಕಚೇರಿಯಲ್ಲೇ ಹೊತ್ತು ಕಳೆಯುತ್ತಿದ್ದಾರೆ.. ಸರ್ವರ್​​​​ ಯಾವಾಗ ಸರಿಹೋಗುತ್ತೋ, ತಮ್ಮ ಸರದಿ ಯಾವಾಗ ಬರುತ್ತೋ ಅಂತ ಕಾಯ್ತಿದ್ದಾರೆ..

ಹೌದು.. ಒಂದು ದಿನವಲ್ಲ.. ವಾರವಲ್ಲ.. ಅನಾಮತ್ತು ಒಂದು ತಿಂಗಳಿನಿಂದ ಇದೇ ಕಥೆ.. ರಾಮನಗರದ ಉಪನೋಂದಣಿ ಕಚೇರಿಯಲ್ಲಿ ಸರ್ವರ್​ ಡೌನ್​ ಸಮಸ್ಯೆಯಿಂದಾಗಿ, ಜನರೆಲ್ಲ ಪರದಾಡ್ತಿದ್ದಾರೆ.. ಸರ್ವರ್​ ಸಮಸ್ಯೆಯಿಂದಾಗಿ ಆಸ್ತಿ ಖರೀದಿ, ಮಾರಾಟ, ಮದುವೆ ನೋಂದಣಿ ಸೇರಿದಂತೆ ಇತರೆ ಕಾರ್ಯಗಳು ಸ್ಥಗಿತವಾಗಿವೆ.. ದಿನಕ್ಕೆ ನಾಲ್ಕೈದು ಮಂದಿ ಕೆಲಸ ಮಾತ್ರ ಆಗ್ತಿದ್ದು, ಉಳಿದವರೆಲ್ಲ ಸಂಜೆ ತನಕ ಕಾಯ್ದು ಮನೆ ಕಡೆ ಹೋಗ್ತಿದ್ದಾರೆ..

ಘಟಾನುಘಟಿಗಳ ಕ್ಷೇತ್ರ- ಆದ್ರೂ ಅಧ್ವಾನಗಳ ಆಗರ ರಾಮನಗರ!
ಹೇಳಿ ಕೇಳಿ ರಾಮನಗರ, ಮಾಜಿ ಸಿಎಂ ಹೆಚ್​.ಡಿ.ಕುಮಾರಸ್ವಾಮಿ ಪತ್ನಿ, ಶಾಸಕಿ ಅನಿತಾ ಕುಮಾರಸ್ವಾಮಿ ಪ್ರತಿನಿಧಿಸುವ ಕ್ಷೇತ್ರ.. ಘಟಾನುಘಟಿ ರಾಜಕಾರಣಿಗಳ ಕಣ್ಣು ರಾಮನಗರದ ಮೇಲಿದೆ.. ಆದ್ರೆ, ಜನರ ಸಮಸ್ಯೆಯತ್ತ ಯಾರೊಬ್ಬರೂ ತಲೆ ಕೆಡಿಸಿಕೊಳ್ತಿಲ್ಲ.. ಒಂದು ತಿಂಗಳಿಂದ ಸಬ್ ರಿಜಿಸ್ಟರ್ ಕಚೇರಿಯ ಸರ್ವರ್ ನಲ್ಲಿ ಸಮಸ್ಯೆಯಾಗಿದ್ರೂ, ಪರಿಹರಿಸುವ ಗೋಜಿಗೆ ಅಧಿಕಾರಿಗಳು ಮುಂದಾಗಿಲ್ಲ.. ಈ ಕುರಿತು, ನೋಂದಣಿ ಇಲಾಖೆ ಅಧಿಕಾರಿ ಸುಮಾ ಅವರನ್ನ ಕೇಳಿದ್ರೆ, ಮೇಲಿನವ್ರನ್ನ ಕೇಳಿ ಅಂತ ಉಡಾಫೆ ಉತ್ತರ ಕೊಡ್ತಾರೆ.. ಜಿಲ್ಲಾ ನೋಂದಣಾಧಿಕಾರಿ ಕೂಡ ಇದೇ ರೀತಿಯ ಡೈಲಾಗ್ ಹೊಡೀತಾರೆ..

ಸಬ್ ರಿಜಿಸ್ಟರ್ ಕಚೇರಿಯಲ್ಲಿ ಸರ್ವರ್ ಸಮಸ್ಯೆ ಜತೆಗೆ ಬ್ರೋಕರ್ ಗಳ ಹಾವಳಿಯೂ ಹೆಚ್ಚಾಗಿದೆ.. ಬ್ರೋಕರ್​​​​​ಗಳ ಕೆಲಸ ಫಟಾಫಟ್ ಅಂತ ನಡೆಯುತ್ತೆ.. ಆದ್ರೆ, ಸಾಮಾನ್ಯ ಜನರತ್ತ ಯಾರೂ ಗಮನ ಕೊಡಲ್ವಂತೆ.. ಒಟ್ನಲ್ಲಿ, ಸರ್ಕಾರಿ ಕಚೇರಿಯಲ್ಲಿ ಒಂದು ಕೆಲಸ ಆಗಬೇಕು ಅಂದ್ರೆ ತಿಂಗಳುಗಟ್ಟಲೇ ತಿರುಗಬೇಕು.. ಇಂತದ್ರಲ್ಲಿ, ಸಾಲು ಸಾಲು ಸಮಸ್ಯೆಗಳಿಂದ ಸಬ್​ ರಿಜಿಸ್ಟರ್ ಕಚೇರಿ ಅಧ್ವಾನವಾಗಿದೆ.. ಅಧಿಕಾರಿಗಳು ಇನ್ನಾದ್ರೂ ಈ ಬಗ್ಗೆ ಗಮನ ಕೊಡ್ಬೇಕಿದೆ.
– ಪ್ರಶಾಂತ್ ಹುಲಿಕೆರೆ, ಟಿವಿ9 ರಾಮನಗರ

ಇದನ್ನೂ ಓದಿ:
ಜಗತ್ತಿನ ಯಾರೂ ಕೈಲಾಸ ಪರ್ವತ ಹತ್ತುವ ಧೈರ್ಯ ಮಾಡಲ್ಲ! ಹಾಗಾದರೆ ಕೈಲಾಸ ಪರ್ವತದಲ್ಲಿ ಏನಿದೆ ಅಂತಹ ರಹಸ್ಯ?