ಜನನಿಬಿಡ ಪ್ರದೇಶಗಳಿಂದಲೇ ಬೈಕ್ಗಳನ್ನು ಎಗರಿಸುತ್ತಿದ್ದ ಖತರ್ನಾಕ್ ಖದೀಮ ಅರೆಸ್ಟ್
ಷಣ್ಮುಖ ಕದ್ದ ಬೈಕ್ಗಳನ್ನು ಎಷ್ಟು ಬೆಲೆ ಸಿಗತ್ತೋ ಅಷ್ಟಕ್ಕೆ ಮಾರಾಟ ಮಾಡುತ್ತಿದ್ದ. ಬಂದ ಹಣದಲ್ಲಿ ಸಾರಾಯಿ ಕುಡಿಯುವುದು, ಜೂಜಾಟದಂತ ದುಶ್ಚಟಗಳನ್ನು ಮಾಡುತ್ತಿದ್ದ.
ಹಾವೇರಿ: ಜನನಿಬಿಡ ಪ್ರದೇಶದಿಂದಲೇ ರಾಜಾರೋಷವಾಗಿ ಬೈಕ್ಗಳನ್ನು ಕಳ್ಳತನ ಮಾಡುತ್ತಿದ್ದ ಖತರ್ನಾಕ್ ಕಳ್ಳನನ್ನು ರಾಣೆಬೆನ್ನೂರು ನಗರ ಠಾಣೆ ಪೊಲೀಸರು ಬಂಧಿಸಿದ್ದಾರೆ. ಷಣ್ಮುಖ ಬಂಧಿತ ಕಳ್ಳ.. ಈತ ದಾವಣೆಗೆರೆ ತಾಲೂಕಿನ ಕುರ್ಕಿ ಗ್ರಾಮದವನು ಎನ್ನಲಾಗಿದೆ.
ಜನರಿರುವ ಪ್ರದೇಶವೇ ಟಾರ್ಗೆಟ್
ನಿರ್ಜನ ಪ್ರದೇಶದಲ್ಲಿ ಇರುವ ವಾಹನಗಳನ್ನು ಕಳುವು ಮಾಡುವುದು ಸಾಮಾನ್ಯ. ಆದರೆ ಷಣ್ಮುಖ ಜನನಿಬಿಡ ಪ್ರದೇಶಗಳಲ್ಲಿ ಇದ್ದ ಬೈಕ್ಗಳನ್ನೇ ಟಾರ್ಗೆಟ್ ಮಾಡುತ್ತಿದ್ದ. ನಕಲಿ ಕೀ ಬಳಸಿ ಕಳವು ಮಾಡುತ್ತಿದ್ದ. ಹರಿಹರದಲ್ಲಿ 2 ಮತ್ತು ದಾವಣಗೆರೆಯಲ್ಲಿ 2 ಬೈಕ್ಗಳನ್ನು ಕಳವು ಮಾಡಿದ್ದ. ಜನರೆಲ್ಲ ಓಡಾಡಿಕೊಂಡು ಇರುವ ಪ್ರದೇಶದಲ್ಲಿಯ ಬೈಕ್ಗಳೇ ಕಳವು ಆಗುತ್ತಿರುವುದು ಪೊಲೀಸರಿಗೆ ದೊಡ್ಡ ತಲೆನೋವಾಗಿತ್ತು.
ಹೀಗಾಗಿ ಆರೋಪಿಗಳ ಪತ್ತೆಗೆ ರಾಣೆಬೆನ್ನೂರು ನಗರ ಠಾಣೆ ಸಿಪಿಐ ಎಂ.ಐ.ಗೌಡಪ್ಪಗೌಡರ ಹಾಗೂ ಪಿಎಸ್ಐ ಪ್ರಭು ಕೆಳಗಿನಮನಿ ನೇತೃತ್ವದಲ್ಲಿ ತಂಡ ರಚಿಸಲಾಗಿತ್ತು. ಇದೀಗ ಷಣ್ಮುಖನನ್ನು ಬಂಧಿಸುವಲ್ಲಿ ಪೊಲೀಸರು ಯಶಸ್ವಿಯಾಗಿದ್ದಾರೆ. ಬಂಧಿತನಿಂದ ಮೂರೂವರೆ ಲಕ್ಷ ರುಪಾಯಿ ಮೌಲ್ಯದ ಆರು ಬೈಕ್ಗಳನ್ನು ಜಪ್ತಿ ಮಾಡಿದ್ದಾರೆ.
ಈತ ದುಶ್ಚಟಕ್ಕೆ ದಾಸ
ಷಣ್ಮುಖ ಕದ್ದ ಬೈಕ್ಗಳನ್ನು ಎಷ್ಟು ಬೆಲೆ ಸಿಗತ್ತೋ ಅಷ್ಟಕ್ಕೆ ಮಾರಾಟ ಮಾಡುತ್ತಿದ್ದ. ಬಂದ ಹಣದಲ್ಲಿ ಸಾರಾಯಿ ಕುಡಿಯುವುದು, ಜೂಜಾಟದಂತ ದುಶ್ಚಟಗಳನ್ನು ಮಾಡುತ್ತಿದ್ದ. ಸದ್ಯ ಬಂಧಿತ ಆರೋಪಿಯಿಂದ ಆರು ಬೈಕ್ಗಳನ್ನಷ್ಟೇ ವಶಪಡಿಸಿಕೊಳ್ಳಲಾಗಿದೆ..ಆದರೆ ಈತ ಇನ್ನಷ್ಟು ಬೈಕ್ಗಳನ್ನು ಕದ್ದಿರಬಹುದು ಎಂಬ ಶಂಕೆಯನ್ನು ಪೊಲೀಸರು ವ್ಯಕ್ತಪಡಿಸಿದ್ದಾರೆ. ಜೈಲಿನಲ್ಲಿರುವ ಷಣ್ಮುಖನನ್ನು ಮತ್ತೆ ವಶಕ್ಕೆ ಪಡೆದು, ಹೆಚ್ಚಿನ ವಿಚಾರಣೆ ನಡೆಸಲಾಗುವುದು ಎಂದಿದ್ದಾರೆ.