Dating App: ಟಿಕ್​ಟಾಕ್​ ಬಳಕೆದಾರರನ್ನು ಸೆಳೆಯಲೆಂದೇ ಬಂತು ಹೊಸ ಡೇಟಿಂಗ್​ ಆ್ಯಪ್​ ಸ್ನ್ಯಾಕ್​

ಮಹಿಳೆಯರಿಗಾಗಿಯೇ ರೂಪುಗೊಂಡ ಬಂಬಲ್​ ಆ್ಯಪ್​ ಅತಿದೊಡ್ಡ ಮಟ್ಟದ ಯಶಸ್ಸಿಗೆ ಸಾಕ್ಷಿಯಾದ ಬೆನ್ನಲ್ಲೇ ಅದೇ ಮಾದರಿಯ ಮತ್ತೊಂದು ಆ್ಯಪ್​ ಮಾರುಕಟ್ಟೆಗೆ ಬಹು ನಿರೀಕ್ಷೆಯೊಂದಿಗೆ ಕಾಲಿಟ್ಟಿದೆ. ಕಿಂಬರ್ಲಿ ಕಪ್ಲಾನ್​ ಒಡೆತನದ ಸ್ನ್ಯಾಕ್​ ಹೆಸರಿನ ಡೇಟಿಂಗ್​ ಆ್ಯಪ್​ ಭಾರೀ ಸದ್ದು ಮಾಡುತ್ತಿದೆ. ಈಗಿರುವ ಡೇಟಿಂಗ್​ ಆ್ಯಪ್​ಗಳಿಗಿಂತಲೂ ಹಲವು ವಿಶೇಷತೆಗಳೊಂದಿಗೆ ರೂಪುಗೊಂಡಿರುವ ಸ್ನ್ಯಾಕ್​ನಲ್ಲಿ ಟಿಕ್​ಟಾಕ್​ ಅಭಿಮಾನಿಗಳನ್ನು ಸೆಳೆಯುವ ಅಂಶವೂ ಇದೆಯಂತೆ. ಹೀಗಾಗಿ ಟಿಕ್​ಟಾಕ್​ ಮತ್ತು ಡೇಟಿಂಗ್​ ಆ್ಯಪ್​ನ ಸಮ್ಮಿಲನದಂತೆ ಕಂಡುಬರುವ ಈ ಆ್ಯಪ್​ ಹೆಚ್ಚಿನ ಜನರನ್ನು ಸೆಳೆಯುವ ನಿರೀಕ್ಷೆ ಇದೆ.

ಸ್ನ್ಯಾಕ್​ ಸಂಸ್ಥಾಪಕಿ ಕಿಂಬರ್ಲಿ ಕಪ್ಲಾನ್​ ಅವರು ಈ ಹಿಂದೆ ‘ಪ್ಲೆಂಟಿ ಆಫ್​ ಫಿಶ್​’ನಂತಹ ಡೇಟಿಂಗ್​ ಆ್ಯಪ್​ನಲ್ಲಿ ಕೆಲಸ ಮಾಡುವಾಗ, ಹೊಸ ತಲೆಮಾರಿನ ಯುವಕ ಯುವತಿಯರು ಡೇಟಿಂಗ್​ ಆ್ಯಪ್​ನಲ್ಲಿ ಪರಿಚಿತಗೊಂಡು ನಂತರ ಚಾಟ್​ ಮಾಡಲು ಟಿಕ್​ಟಾಕ್​, ಇನ್​ಸ್ಟಾಗ್ರಾಂ, ಸ್ನ್ಯಾಪ್​ಚಾಟ್​ನಂತಹ ಆ್ಯಪ್​ಗಳ ಮೊರೆ ಹೋಗುವುದನ್ನು ಗಮನಿಸಿದ್ದರಂತೆ ಹೀಗಾಗಿ, ಡೇಟಿಂಗ್​ ಆ್ಯಪ್​ಗಳಲ್ಲಿರುವ ಕೊರತೆಯನ್ನು ನೀಗಿಸಲೆಂದೇ ಸ್ನ್ಯಾಕ್​ ಮೂಲಕ ಮಾರುಕಟ್ಟೆಗೆ ಲಗ್ಗೆ ಇಡಲಾಗಿದೆ ಎಂದು ಕಪ್ಲಾನ್ ತಿಳಿಸಿದ್ದಾರೆ.

ಸ್ನ್ಯಾಕ್​ ಹೇಗೆ ಕೆಲಸ ಮಾಡಲಿದೆ?
ಸ್ನ್ಯಾಕ್​ನಲ್ಲಿ ಬೇರೆ ಡೇಟಿಂಗ್​ ಆ್ಯಪ್​ಗಳಲ್ಲಿರುವ ಎಲ್ಲಾ ಸೌಲಭ್ಯಗಳೂ ಇರಲಿವೆ. ಆದರೆ, ಡೇಟಿಂಗ್​ ಆ್ಯಪ್​ಗಳಲ್ಲಿರುವಂತೆ ಫೋಟೋ ಅಪ್ಲೋಡ್​ ಮಾಡುವ ಬದಲು ಟಿಕ್​ಟಾಕ್​ನಲ್ಲಿ ಮಾಡುವಂತೆ ಶಾರ್ಟ್​ ವಿಡಿಯೋಗಳನ್ನು ಅಪ್ಲೋಡ್ ಮಾಡಲು ಅವಕಾಶ ಇರುತ್ತದೆ. ಈ ಮೂಲಕ ತನಗೆ ಸೂಕ್ತ ಎನಿಸುವ ವ್ಯಕ್ತಿಯನ್ನು ಫೋಟೋಗಳ ಮೂಲಕ ನೋಡುವ ಬದಲು ವಿಡಿಯೋಗಳಲ್ಲಿ ನೋಡಿ ಆರಿಸಿಕೊಳ್ಳಬಹುದಾಗಿದೆ. ಇನ್ನು ಕ್ರಿಯಾತ್ಮಕವಾಗಿ ವಿಡಿಯೋ ಮಾಡಲು ಅವಕಾಶವನ್ನೂ ನೀಡಲಾಗಿದ್ದು, ಅದು ಮುಖ್ಯ ಆಕರ್ಷಣೆ ಆಗಿರಲಿದೆ ಎಂದು ಸ್ನ್ಯಾಕ್ ಹೇಳಿಕೊಂಡಿದೆ.

ಸ್ನ್ಯಾಕ್​ ಬಗ್ಗೆ ಅಭಿಪ್ರಾಯ ವ್ಯಕ್ತಪಡಿಸಿರುವ ಸಂಸ್ಥಾಪಕಿ ಕಪ್ಲಾನ್​ ಈ ಆ್ಯಪ್​ ತಯಾರಿಕೆಗೆ ಟಿಕ್​ಟಾಕ್​ನಂತಹ ಆ್ಯಪ್​ಗಳೇ ಕಾರಣ. ಟಿಕ್​ಟಾಕ್​ ಬಳಸುವಾಗೊಮ್ಮೆ ಜನರು ಅಲ್ಲಿ ಡೇಟಿಂಗ್​ ಮಾಡಲು ಹೆಚ್ಚು ಇಷ್ಟಪಡುತ್ತಿದ್ದಾರೆ ಎಂಬ ಅಂಶ ಗಮನ ಸೆಳೆಯಿತು. ಆದರೆ, ಟಿಕ್​ಟಾಕ್​ನ ಮೂಲ ಉದ್ದೇಶ ಡೇಟಿಂಗ್​ ಆಗಿರಲಿಲ್ಲ. ಹೀಗಾಗಿ ಅದರಿಂದ ಪ್ರೇರಣೆ ಪಡೆದ ನಾನು ಸ್ನ್ಯಾಕ್​ ಅಭಿವೃದ್ಧಿಪಡಿಸಲು ನಿರ್ಧರಿಸಿದೆ ಎಂದು ತಿಳಿಸಿದ್ದಾರೆ.

ಸದ್ಯ ಇನ್​ಸ್ಟಾಗ್ರಾಂ ಮತ್ತು ಟಿಕ್​ಟಾಕ್​ನ ಎಲ್ಲಾ ಅಂಶಗಳನ್ನು ಒಳಗೊಂಡು ರೂಪುಗೊಂಡಿರುವ ಸ್ನ್ಯಾಕ್​ ಮಾರುಕಟ್ಟೆಯಲ್ಲಿ ಹೆಚ್ಚಿನ ಬಳಕೆದಾರರನ್ನು ಸೆಳೆಯುವ ನಿರೀಕ್ಷೆ ಇದೆ. ಅಲ್ಲದೇ ಡೇಟಿಂಗ್​ ಮಾಡಲಿಚ್ಛಿಸುವ ಯುವ ಸಮೂಹದ ಮೊದಲ ಆಯ್ಕೆಯೂ ಇದೇ ಆಗಲಿದೆ ಎಂಬ ಮಾತುಗಳು ಕೇಳಿಬರುತ್ತಿದ್ದು ಜಾಗತಿಕ ಮಾರುಕಟ್ಟೆಯ ಡೇಟಿಂಗ್​ ಕ್ಷೇತ್ರದಲ್ಲಿ ಪ್ರಾಬಲ್ಯ ಸಾಧಿಸುವ ಸಾಧ್ಯತೆ ಇದೆ.

ಇದನ್ನೂ ಓದಿ: ಟಿಕ್​ಟಾಕ್​ ಮತ್ತು ಟಿಂಡರ್​ ಸಮ್ಮಿಶ್ರಣದಿಂದ ಹುಟ್ಟಿತು ಹೊಸ ಆ್ಯಪ್​!

ಇರಲಿ ಎಚ್ಚರ, ಬೇಡ ಆತುರ.. Dating App ಬಳಸುವ ಮುನ್ನ ನೀವು ಓದಲೇಬೇಕಾದ ಸ್ಟೋರಿ ಇದು