ಭ್ರೂಣಹತ್ಯೆ ತಡೆಗೆ ಚನ್ನೇಶ್ ರೂಪಿಸಿದ ಮಾಸ್ಟರ್ಪ್ಲಾನ್ ಇದು: ಒಂದೇ ನಂಬರ್ನಲ್ಲಿ ಸಮಗ್ರ ಮಾಹಿತಿ
ಗರ್ಭಿಣಿಯ ತಪಾಸಣೆಯ ಮಾಹಿತಿಯೂ ಇದೇ ಕೋಡ್ನಲ್ಲಿ ದಾಖಲಾಗಿರುತ್ತದೆ. ಒಂದು ವೇಳೆ ಆಕೆ ಮೂರ್ನಾಲ್ಕು ತಿಂಗಳು ತಪಾಸಣೆಗೆ ಬಾರದಿದ್ದರೆ ಅಂಥವರು ಭ್ರೂಣ ಹತ್ಯೆಗೆ ಮುಂದಾಗಿರಬಹುದು ಎಂಬ ಶಂಕೆ ಮೂಡುತ್ತದೆ. ಅಂಥವರನ್ನು ಆರೋಗ್ಯಕಾರ್ಯಕರ್ತರು ಭೇಟಿಯಾಗಿ ವಾಸ್ತವ ಪರಿಶೀಲಿಸಬಹುದು.
ದಾವಣಗೆರೆ: ತಾಯಿಯ ಗರ್ಭದಲ್ಲಿರುವಾಗಲೇ ಭ್ರೂಣಕ್ಕೊಂದು ಕೋಡ್ ಕೊಡುವ ಹೊನ್ನಾಳಿ ತಾಲ್ಲೂಕು ಹಳ್ಳೂರು ಗ್ರಾಮದ ಸಾಮಾಜಿಕ ಕಾರ್ಯಕರ್ತ ಚನ್ನೇಶ್ ಜಕ್ಕಳ್ಳಿ ಅಭಿವೃದ್ಧಿಪಡಿಸಿದ್ದಾರೆ.
ಸ್ತ್ರೀ ಭ್ರೂಣಹತ್ಯೆ ತಡೆಯುವ ಪರಿಣಾಮಕಾರಿ ಕ್ರಮಗಳ ಬಗ್ಗೆ ಯೋಚಿಸುತ್ತಿದ್ದ ಚನ್ನೇಶ್ ಅವರಿಗೆ ಹೊಸತೊಂದು ಆಲೋಚನೆ ಬಂತು. ತಾಯಿಯ ಗರ್ಭದಲ್ಲಿ ಇರುವಾಗಲೇ ಮದರ್ ನಂಬರ್ ರೂಪಿಸಿ, ಭ್ರೂಣಕ್ಕೆ ಡಿಜಿಟಲ್ ಸಂಕೇತ ಕೊಡುವ ಮೂಲಕ ಸಮಗ್ರ ಮಾಹಿತಿಯನ್ನು ಒಂದೆಡೆ ಕ್ರೋಡೀಕರಿಸಬಹುದು ಎನಿಸಿತು ಅವರಿಗೆ.
ಇದು ಬಹುತೇಕ ಕಂಡಕ್ಟರ್ ಇಟಿಎಂ ಯಂತ್ರ ಬಳಸಿ ಟಿಕೆಟ್ ಕೊಡುವ ವ್ಯವಸ್ಥೆಯನ್ನೇ ಹೋಲುತ್ತದೆ. ಗ್ರಾಮದಲ್ಲಿರುವ ಗರ್ಭಿಣಿಯ ಮಾಹಿತಿಯನ್ನು ಆಶಾ ಕಾರ್ಯಕರ್ತೆಯರು ಮೇಲಾಧಿಕಾರಿಗಳಿಗೆ ವರದಿ ಮಾಡುತ್ತಾರೆ. ಆದರೆ ಈ ವ್ಯವಸ್ಥೆಯಲ್ಲಿ ಸಂಗ್ರಹಗೊಳ್ಳುವ ಮಾಹಿತಿ ಒಂದೆಡೆಯೇ ಸಿಗಲು ಸಾಧ್ಯವಿಲ್ಲ. ಮಾಹಿತಿ ಒಂದೆಡೆ ಸಿಗುವಂತಾಗಲು ಮದರ್ ನಂಬರ್ ಅಗತ್ಯ ಎಂದು ಪ್ರತಿಪಾದಿಸುತ್ತಾರೆ ಚನ್ನೇಶ್.
ಹೀಗಿರುತ್ತೆ ಮದರ್ ನಂಬರ್
ಚನ್ನೇಶ್ ಆಲೋಚನೆಯ ಮದರ್ನಂಬರ್ ಒಟ್ಟು 12 ಅಂಕಿಗಳನ್ನು ಹೊಂದಿರುತ್ತದೆ. ಇದರಲ್ಲಿ ಮೊದಲ 2 ಅಂಕಿಗಳು ಆಯಾ ರಾಜ್ಯದ ಗುರುತು, ಮುಂದಿನ 3 ಅಂಕಿಗಳು ತಾಲೂಕಿನ ಕೋಡ್, ಇನ್ನೆರಡು ಅಂಕಿಗಳು ಹಿರಿಯ ಆರೋಗ್ಯ ಸಹಾಯಕಿಯರ ಕೋಡ್ ಮತ್ತು ಉಳಿದ 5 ಅಂಕಿಗಳು ತಾಯಿ ಹೆಸರಿನ ಕೋಡ್ ಆಗಿರುತ್ತದೆ. ಅಂದರೆ, 99 000 33 44231 ಎನ್ನುವ ಕೋಡ್ ಇದ್ದರೆ 99 ಎನ್ನುವುದು ಕರ್ನಾಟಕ, 000 ಹೊನ್ನಾಳಿ, 33 ಅಲ್ಲಿನ ಹಿರಿಯ ಆರೋಗ್ಯ ಸಹಾಯಕಿ, 44231 ಅಂದ್ರೆ ಗರ್ಭಿಣಿಯ ಹೆಸರಾಗಿರುತ್ತದೆ. ಇದು ಜಿಪಿಎಸ್ ಮೂಲಕ ಕೆಲಸ ಮಾಡುತ್ತದೆ.
ಪ್ರತಿ ಬಾರಿ ಮಾಹಿತಿ ಅಪ್ಡೇಟ್ ಮಾಡುವವರು ಈ ಕೋಡ್ ಬಳಸಿದರೆ, ಒಂದೆಡೆಯೇ ಗರ್ಭಿಣಿಯೊಬ್ಬರ ಸಮಗ್ರ ಮಾಹಿತಿ ಸಂಗ್ರಹಿಸಬಹುದು. ಜಿಲ್ಲಾ ಆರೋಗ್ಯಾಧಿಕಾರಿ ಕಚೇರಿಯಲ್ಲಿರುವ ಸರ್ವರ್ನಲ್ಲಿ ಈ ಮಾಹಿತಿಯನ್ನು ಸುರಕ್ಷಿತವಾಗಿ ಸಂಗ್ರಹಿಸಿಡಬಹುದು ಎನ್ನುತ್ತಾರೆ ಅವರು.
ಇದರ ಜೊತೆಗೆ ಗರ್ಭಿಣಿಯ ತಪಾಸಣೆಯ ಮಾಹಿತಿಯೂ ಇದೇ ಕೋಡ್ನಲ್ಲಿ ದಾಖಲಾಗಿರುತ್ತದೆ. ಒಂದು ವೇಳೆ ಆಕೆ ಮೂರ್ನಾಲ್ಕು ತಿಂಗಳು ತಪಾಸಣೆಗೆ ಬಾರದಿದ್ದರೆ ಅಂಥವರು ಭ್ರೂಣ ಹತ್ಯೆಗೆ ಮುಂದಾಗಿರಬಹುದು ಎಂಬ ಶಂಕೆ ಮೂಡುತ್ತದೆ. ಅಂಥವರನ್ನು ಆರೋಗ್ಯಕಾರ್ಯಕರ್ತರು ಭೇಟಿಯಾಗಿ ವಾಸ್ತವ ಪರಿಶೀಲಿಸಬಹುದು.
ತಮ್ಮ ಆಲೋಚನೆಯ ಬಗ್ಗೆ ಪ್ರಧಾನಿ ನರೇಂದ್ರ ಮೋದಿ, ಕೇಂದ್ರ ಕಾನೂನು ಸಚಿವ ಸದಾನಂದ ಗೌಡ, ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಸೇರಿದಂತೆ ದೇಶದ ಪ್ರತಿಷ್ಠಿತ 70 ವ್ಯಕ್ತಿಗಳಿಗೆ ಪತ್ರ ಬರೆದು ತಮ್ಮ ಯೋಜನೆಯನ್ನು ವಿವರಿಸಿದ್ದಾರೆ.
ಹತ್ತಾರು ವರ್ಷಗಳಿಂದ ಸಮಾಜ ಸೇವೆ, ದೇವದಾಸಿಯರ ಕಲ್ಯಾಣ, ಹೆಣ್ಣು ಮಕ್ಕಳ ಸುರಕ್ಷತೆ ಸೇರಿದಂತೆ ಹಲವು ಕಾರ್ಯಕ್ರಮದಲ್ಲಿ ಚನ್ನೇಶ್ ತಮ್ಮನ್ನು ತಾವು ತೊಡಗಿಸಿಕೊಂಡಿದ್ದಾರೆ. ಇದಕ್ಕೆಂದೇ ಹೊಸಬೆಳಕು ಎಂಬ ಎನ್ಜಿಒ ಪ್ರಾರಂಭಿಸಿದ್ದಾರೆ. ಸಂಪರ್ಕ ಸಂಖ್ಯೆ 94492 48545.
-ಬಸವರಾಜ್ ದೊಡ್ಮನಿ
ವರದಕ್ಷಿಣೆ ಕಾಟ, ಗರ್ಭಪಾತ ಮಾಡಿಸಿಕೊಳ್ಳಲು ಕಿರುಕುಳ ಆರೋಪ: ಗರ್ಭಿಣಿ ನೇಣಿಗೆ ಶರಣು