ಮತ್ತೊಂದು ಮಹಾ ಎಡವಟ್ಟು: ಕುಟುಂಬಸ್ಥರಿಂದಲೇ ಕೊರೊನಾ ಶಂಕಿತನ ಅಂತ್ಯಸಂಸ್ಕಾರ

ತುಮಕೂರು: ಆರೋಗ್ಯ ಇಲಾಖೆ ಸಿಬ್ಬಂದಿಯ ಬೇಜವಾಬ್ದಾರಿ, ಅಮಾನವೀಯ ವರ್ತನೆಯಿಂದಾಗಿ ಈಗ ಒಂದು ಕುಟುಂಬ ಮತ್ತು ಗ್ರಾಮದ ಜನತೆ ಭಯ ಹಾಗೂ ಆತಂಕದಲ್ಲಿರಬೇಕಾದ ಸ್ಥಿತಿ ತುಮಕೂರು ಜಿಲ್ಲೆ ಕುಣಿಗಲ್ ತಾಲೂಕಿನ ತಿಮ್ಮೇಗೌಡನಪಾಳ್ಯ ಗ್ರಾಮಸ್ಥರಿಗೆ ಎದುರಾಗಿದೆ.

ಹೌದು, ಕುಣಿಗಲ್ ತಾಲೂಕಿನ ತಿಮ್ಮೇಗೌಡನಪಾಳ್ಯ ಗ್ರಾಮದಲ್ಲಿ ಜೂನ್‌ 25ರಂದು ಮಹಿಳೆಯೊಬ್ಬಳು ಬೆಂಗಳೂರಿನಿಂದ ಹಿಂದಿರುಗಿದ್ದಳು. ಎರಡು ದಿನಗಳ ನಂತರ ಮಹಿಳೆಗೆ ಜ್ವರ ಕಾಣಿಸಿಕೊಂಡಿದೆ. ಆಗ ಕುಟುಂಬಸ್ಥರು ಮತ್ತು ಗ್ರಾಮಸ್ಥರು ಆರೋಗ್ಯಾಧಿಕಾರಿಗಳಿಗೆ ತಿಳಿಸಿದ್ದಾರೆ. ಅಧಿಕಾರಿಗಳು ಬೇಜವಾಬ್ದಾರಿಯಿಂದ ಮಹಿಳೆಯನ್ನ ಪರೀಕ್ಷಿಸಿ ವಾಪಸ್‌ ಕಳಿಸಿದ್ದಾರೆ.

ಇದಾದ ನಂತರ ಜೂನ್ 30ರಂದು ಮಹಿಳೆಯ ಪತಿ ಸಾವನ್ನಪ್ಪಿದ್ದಾನೆ. ಮಹಿಳೆಯ ಪತಿ ಸಾವನ್ನಪ್ಪಿದ ಬಳಿಕ ಕೋವಿಡ್‌ ಪರೀಕ್ಷೆ ಮಾಡಲಾಗಿದ್ದು, ಆತನಿಗೆ ಕೊರೊನಾ ಇರೋ ಶಂಕೆ ಇದೆ. ಜತೆಗೆ ಅಧಿಕಾರಿಗಳು ಪತಿ ಸತ್ತ ನಂತರ ಮಹಿಳೆಗೆ ಕೊರೊನಾ‌ ಟೆಸ್ಟ್‌ ಮಾಡಿ ಆಸ್ಪತ್ರೆಗೆ ಕರೆದುಕೊಂಡು ಹೋಗಿದ್ದಾರೆ.

ಆದ್ರೆ ಇದೆಲ್ಲಕ್ಕಿಂತ ಘೋರ ಅಂದ್ರೆ ಸಾವನ್ನಪ್ಪಿದ ವೃದ್ಧನನ್ನ ಅಧಿಕಾರಿಗಳು ಪ್ರೋಟೋಕಾಲ್‌ ಪ್ರಕಾರ ಅಂತ್ಯಕ್ರಿಯೆ ಮಾಡದೇ ಸಂಬಂಧಿಕರಿಗೆ ಪಿಪಿಇ ಕಿಟ್‌ ನೀಡಿ ನಿವೇ ಅಂತ್ಯಕ್ರಿಯೆ ಮಾಡಿ ಎಂದು ಕೈತೊಳೆದುಕೊಂಡಿದ್ದಾರೆ. ಹೀಗಾಗಿ ಮೃತನ ಮಗ ಮತ್ತು ಅಳಿಯ ಪಿಪಿಇ ಕಿಟ್‌ ಧರಿಸಿ ಅಂತ್ಯಕ್ರಿಯೆ ಮಾಡಿದ್ದಾರೆ. ಇಷ್ಟೇ ಅಲ್ಲ ಗ್ರಾಮದ ಸುಮಾರು ನೂರು ಜನರು ಪಾಲ್ಗೊಂಡಿದ್ದಾರೆ ಎನ್ನಲಾಗ್ತಿದೆ.

Published On - 11:52 am, Thu, 2 July 20