ಊಟ ಮಾಡಿದ ತಕ್ಷಣ ನೀರು ಕುಡಿಯಬಾರದು ಎನ್ನುವುದು ನಿಜವೇ? ವಿಜ್ಞಾನ ಹೇಳುವುದೇನು?

‘‘ಊಟ ಮಾಡಿದ ತಕ್ಷಣ ನೀರು (Water) ಕುಡಿಯಬಾರದು. ಹಾಗೆ ಮಾಡಿದರೆ ಜೀರ್ಣಕ್ರಿಯೆ ನಿಧಾನವಾಗುತ್ತದೆ’’ ಎಂದು ಹಿರಿಯರು ಹೇಳುವುದನ್ನು ನೀವು ಕೇಳಿರಬಹುದು. ಈ ಕಾರಣಕ್ಕೆ ಕೆಲವರು ಊಟ ಮುಗಿಸಿದ ನಂತರ ಅರ್ಧ ಗಂಟೆ ಅಥವಾ ಒಂದು ಗಂಟೆ ನೀರು ಕುಡಿಯುವುದನ್ನೇ ತಪ್ಪಿಸುತ್ತಾರೆ. ಆದರೆ ಊಟದ ನಂತರ ನೀರು ಕುಡಿಯುವುದರಿಂದ ನಿಜವಾಗಿಯೂ ಜೀರ್ಣಕ್ರಿಯೆಗೆ ತೊಂದರೆಯಾಗುತ್ತದೆಯೇ?.

ಸಾಮಾನ್ಯವಾಗಿ ಆರೋಗ್ಯವಂತ ವ್ಯಕ್ತಿ ಊಟದ ನಂತರ ನೀರು ಕುಡಿಯುವುದರಿಂದ ಜೀರ್ಣಕ್ರಿಯೆ ಹಾಳಾಗುತ್ತದೆ ಎಂಬುದಕ್ಕೆ ಬಲವಾದ ವೈಜ್ಞಾನಿಕ ಪುರಾವೆಗಳಿಲ್ಲ. ಬದಲಾಗಿ, ಊಟದ ಸಮಯದಲ್ಲಿ ಅಥವಾ ನಂತರ ನೀರು ಕುಡಿಯುವುದು ಆಹಾರವನ್ನು ನುಂಗಲು ಸುಲಭವಾಗಿಸುತ್ತದೆ. ನೀರು ದೇಹಕ್ಕೆ ಅಗತ್ಯವಾದ ದ್ರವವನ್ನು ಒದಗಿಸುವುದರ ಜೊತೆಗೆ, ಜೀರ್ಣಕ್ರಿಯೆಯ ಸಾಮಾನ್ಯ ಪ್ರಕ್ರಿಯೆಯಲ್ಲೂ ಭಾಗವಹಿಸುತ್ತದೆ.

ನೀರು ಕುಡಿದರೆ ಜೀರ್ಣರಸ ದುರ್ಬಲವಾಗುತ್ತದೆಯೇ?

ಊಟದ ನಂತರ ನೀರು ಕುಡಿದರೆ ಹೊಟ್ಟೆಯಲ್ಲಿರುವ ಜೀರ್ಣರಸ ದುರ್ಬಲವಾಗಿ ಆಹಾರ ಜೀರ್ಣವಾಗುವುದಿಲ್ಲ ಎಂಬ ಮಾತು ಸಾಮಾನ್ಯವಾಗಿದೆ. ಆದರೆ ನಮ್ಮ ಜೀರ್ಣಾಂಗ ವ್ಯವಸ್ಥೆ ಅಷ್ಟು ಸರಳವಾಗಿ ಕಾರ್ಯನಿರ್ವಹಿಸುವುದಿಲ್ಲ. ಆಹಾರ ಹೊಟ್ಟೆಗೆ ಬಂದಾಗ ದೇಹವು ಅಗತ್ಯಕ್ಕೆ ತಕ್ಕಂತೆ ಜೀರ್ಣರಸ ಮತ್ತು ಇತರ ದ್ರವಗಳನ್ನು ಉತ್ಪಾದಿಸುತ್ತದೆ. ಆದ್ದರಿಂದ ಸಾಮಾನ್ಯ ಪ್ರಮಾಣದಲ್ಲಿ ನೀರು ಕುಡಿಯುವುದರಿಂದ ಹೊಟ್ಟೆಯ ಜೀರ್ಣಕ್ರಿಯೆ ನಿಂತುಹೋಗುವುದಿಲ್ಲ.

ಹಾಗಾದರೆ ಊಟದ ನಂತರ ಎಷ್ಟು ನೀರು ಕುಡಿಯಬೇಕು?

ಇದಕ್ಕೆ ಎಲ್ಲರಿಗೂ ಒಂದೇ ಪ್ರಮಾಣ ಎಂಬ ನಿಯಮವಿಲ್ಲ. ಬಾಯಾರಿಕೆಯಾದರೆ ಊಟದ ನಂತರ ನೀರು ಕುಡಿಯಬಹುದು. ಊಟದ ವೇಳೆ ಹೆಚ್ಚು ನೀರು ಕುಡಿಯುವುದರಿಂದ ಕೆಲವರಿಗೆ ಹೊಟ್ಟೆ ತುಂಬಿದಂತೆ ಅಥವಾ ಉಬ್ಬಿದಂತೆ ಅನಿಸಬಹುದು. ಅಂತಹ ಅನುಭವವಿದ್ದರೆ ಒಂದೇ ಬಾರಿಗೆ ಹೆಚ್ಚು ನೀರು ಕುಡಿಯುವ ಬದಲು ಸ್ವಲ್ಪ ಸ್ವಲ್ಪವಾಗಿ ಕುಡಿಯಬಹುದು.

ಮನೆಗೆ ಬಂದ ತಕ್ಷಣ ಬಟ್ಟೆ ಬದಲಾಯಿಸುತ್ತೀರಾ? ಈ ಸಣ್ಣ ಅಭ್ಯಾಸದ ಪ್ರಯೋಜನ ಗೊತ್ತೇ?

ಊಟದ ನಂತರ ನೀರು ಕುಡಿಯುವುದರಿಂದ ಏನಾದರೂ ಪ್ರಯೋಜನವಿದೆಯೇ?

ನೀರು ಆಹಾರವನ್ನು ನುಂಗಲು ಮತ್ತು ಬಾಯಿಯಲ್ಲಿರುವ ಆಹಾರದ ಕಣಗಳನ್ನು ಕೆಳಗೆ ಸಾಗಿಸಲು ಸಹಾಯ ಮಾಡುತ್ತದೆ. ಸಾಕಷ್ಟು ನೀರು ಕುಡಿಯುವುದು ದೇಹದಲ್ಲಿ ದ್ರವ ಸಮತೋಲನ ಕಾಪಾಡಿಕೊಳ್ಳಲು ಮುಖ್ಯ. ಹೀಗಾಗಿ ಊಟದ ನಂತರ ನೀರು ಕುಡಿಯುವುದನ್ನು ಸಂಪೂರ್ಣವಾಗಿ ತಪ್ಪಿಸುವ ಅಗತ್ಯವಿಲ್ಲ.

ಆದರೆ ಊಟದ ನಂತರ ನೀರು ಕುಡಿದಾಗ ಪ್ರತಿಬಾರಿಯೂ ಹೊಟ್ಟೆ ನೋವು, ತೀವ್ರ ಉಬ್ಬರ, ಎದೆಯುರಿ ಅಥವಾ ಅಸ್ವಸ್ಥತೆ ಉಂಟಾಗುತ್ತಿದ್ದರೆ ಅದನ್ನು ನಿರ್ಲಕ್ಷಿಸಬಾರದು. ಇಂತಹ ಸಮಸ್ಯೆಗಳು ಪದೇಪದೇ ಕಂಡುಬಂದರೆ ವೈದ್ಯರ ಸಲಹೆ ಪಡೆಯುವುದು ಉತ್ತಮ.

ಜೀವನಶೈಲಿ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ