ದೇಶಾದ್ಯಂತ 71ನೇ ಗಣರಾಜ್ಯೋತ್ಸವ ಸಂಭ್ರಮ, ದೆಹಲಿ ರಾಜಪಥ್​ನಲ್ಲಿ ತಿರಂಗ ಜಗಮಗ

ದೆಹಲಿ: ಇವತ್ತು ಗಣತಂತ್ರ ದಿನ. ಸಂವಿಧಾನ ಅಸ್ತಿತ್ವಕ್ಕೆ ಬಂದ ಸುದಿನ. ಡಾ. ಬಿ.ಆರ್. ಅಂಬೇಡ್ಕರ್ ರಚಿಸಿದ ಸಂವಿಧಾನ ಜಾರಿಗೆ ಬಂದ ದಿನ. ಹೀಗಾಗೇ, ಇಂದು ದೇಶಾದ್ಯಂತ ಗಣತಂತ್ರ ದಿನದ ಸಂಭ್ರಮ ಜೋರಾಗಿದೆ. ಎಲ್ಲೆಲ್ಲೂ ಸಡಗರ ಮನೆಮಾಡಿದೆ.

ದೇಶಾದ್ಯಂತ 71ನೇ ಗಣರಾಜ್ಯೋತ್ಸವ ಸಂಭ್ರಮ: ಎಲ್ಲೆಲ್ಲೂ 71ನೇ ಗಣರಾಜ್ಯೋತ್ಸವದ ಸಂಭ್ರಮ ಮನೆಮಾಡಿದೆ. ಅದ್ರಲ್ಲೂ ರಾಷ್ಟ್ರ ರಾಜಧಾನಿ ನವದೆಹಲಿ ಸಕಲ ರೀತಿಯಲ್ಲಿ ಸಜ್ಜಾಗಿದೆ. ರಾಜಪಥ್ ರಸ್ತೆ ಗಣರಾಜ್ಯೋತ್ಸವಕ್ಕಾಗಿ ಸಂಪೂರ್ಣ ಸಿಂಗಾರಗೊಂಡಿದೆ. ರಾಷ್ಟ್ರಪತಿ ಭವನ ಹಾಗೂ ಸಂಸತ್ ಭವನ, ಕೆಂಪುಕೋಟೆ ಸೇರಿದಂತೆ ಪ್ರಮುಖ ಕಟ್ಟಡಗಳಿಗೆ ಲೈಟಿಂಗ್ಸ್ ಅಳವಡಿಸಲಾಗಿದ್ದು, ವಿದ್ಯುತ್ ದೀಪಾಲಂಕಾರಗಳಿಂದ ಕಂಗೊಳಿಸ್ತಿವೆ.

ಬೆಳಗ್ಗೆ ಗಣರಾಜ್ಯೋತ್ಸವದ ಅತಿಥಿ ಬ್ರೆಜಿಲ್‌ ಅಧ್ಯಕ್ಷ ಜೈರ್‌ ಬೋಲ್ಸನಾರೊ, ಪ್ರಧಾನಿ ನರೇಂದ್ರ ಮೋದಿ ಹಾಗೂ ಚೀಫ್ ಆಫ್ ಡಿಫೆನ್ಸ್ ಸ್ಟಾಫ್ ಬಿಪಿನ್ ರಾವತ್‌ ಹಾಗೂ ಮೂರು ಸೇನಾ ಮುಖ್ಯಸ್ಥರು ಹುತಾತ್ಮ ಯೋಧರಿಗೆ ಶ್ರದ್ಧಾಂಜಲಿ ಸಲ್ಲಿಸಲಿದ್ದಾರೆ. ಬಳಿಕ ರಾಷ್ಟ್ರಪತಿ ರಾಮನಾಥ್ ಕೋವಿಂದ್ ಧ್ವಜಾರೋಹಣ ನೆರವೇರಿಸಲಿದ್ದಾರೆ. ಈ ವೇಳೆ ರಾಷ್ಟ್ರಗೀತೆ ಮೊಳಗಲಿದೆ. ಬಳಿಕ ಶೌರ್ಯ ಸಾಹಸ ಮೆರೆದ ಸೈನಿಕರಿಗೆ ಪರಮ ವೀರ ಚಕ್ರ ಪ್ರದಾನ ಮಾಡಲಾಗುತ್ತೆ. ಇದಾದ ನಂತ್ರ ಒಂದೂವರೆ ಗಂಟೆ ಕಾಲ ಆಕರ್ಷಕ ಪರೇಡ್ ನಡೆಯಲಿದ್ದು, ರಾಜ್‌ಪಥ್ ನಿಂದ ಕೆಂಪುಕೋಟೆಯವರೆಗೂ ಮೆರವಣಿಗೆ ಸಾಗಲಿದೆ.

ರಾಷ್ಟ್ರರಾಜಧಾನಿ ದೆಹಲಿಯಲ್ಲಿ ಕನ್ನಡದ ಕಂಪು: ಗಣರಾಜ್ಯೋತ್ಸವ ಪರೇಡ್‌ನಲ್ಲಿ ವಿವಿಧ ರಾಜ್ಯಗಳ ಕಲೆ, ಸಂಸ್ಕೃತಿ, ಇತಿಹಾಸ, ವೈವಿಧ್ಯತೆ ಬಿಂಬಿಸುವ ಸ್ತಬ್ಧಚಿತ್ರಗಳು ಸಾಗಲಿವೆ. ಬಸವಣ್ಣ ಹಾಗೂ ಅನುಭವ ಮಂಟಪದ ಸ್ತಬ್ಧಚಿತ್ರ ಪರೇಡ್‌ನಲ್ಲಿ ಸಾಗಲಿದೆ. ಕರ್ನಾಟಕದ ಸ್ತಬ್ಧಚಿತ್ರ ಸಾಗುವ ವೇಳೆ ವಚನಕಾರರ ವಚನಗಾಯನದ ಮೂಲಕ ರಾಜ್​ಪಥ್​ನಲ್ಲಿ ಕನ್ನಡದ ಕಹಳೆ ಮೊಳಗಲಿದೆ. ಭೂಸೇನೆ, ವಾಯುಸೇನೆ ಹಾಗೂ ನೌಕಾಪಡೆಯ ಶಕ್ತಿ ಸಾಮರ್ಥ್ಯದ ಪ್ರದರ್ಶನವೂ ಆಗಲಿದೆ. ಸೇನೆಯ 3 ಪಡೆಗಳು ಪಥಸಂಚಲನದಲ್ಲಿ ಭಾಗವಹಿಸಲಿವೆ. ಸಂಪೂರ್ಣ ಪುರುಷರೇ ಇರೋ ಸೇನೆಯನ್ನು ಮಹಿಳಾಧಿಕಾರಿ ತಾನಿಯಾ ಶೇರ್​ಗಿಲ್ ಮುನ್ನಡೆಸುತ್ತಿರೋದು ವಿಶೇಷ. ಕಳೆದ ವರ್ಷ ಭಾವನಾ ಕಸ್ತೂರಿ ಪರೇಡ್ ಮುನ್ನಡೆಸಿದ್ರು.

7 ಸುತ್ತಿನ ಭದ್ರ ಕೋಟೆಯಾದ ‘ರಾಜ್‌ಪಥ್’: ಇನ್ನು, ದೆಹಲಿ ಸೇರಿದಂತೆ ದೇಶದ ವಿವಿಧೆಡೆ ಸಿಎಎ ವಿರೋಧಿ ಪ್ರತಿಭಟನೆಗಳು ನಡೆಯುತ್ತಿವೆ. ಹೀಗಾಗಿ, ಗಣರಾಜ್ಯೋತ್ಸವಕ್ಕೆ ಯಾವುದೇ ತೊಂದರೆಯಾಗದಂತೆ ದೆಹಲಿಯಲ್ಲಿ ಬಿಗಿ ಬಂದೋಬಸ್ತ್ ಮಾಡಲಾಗಿದೆ. ದೆಹಲಿಯ ರಾಜ್‌ ಪಥ್ ಏಳು ಸುತ್ತಿನ ಭದ್ರಕೋಟೆಯಾಗಿದೆ. ಎಲ್ಲೆಲ್ಲೂ ಖಾಕಿ ಹದ್ದಿನ ಕಣ್ಣಿಟ್ಟಿದೆ.

ದಿಲ್ಲಿಯಲ್ಲಿ ಖಾಕಿ ಹೈ ಅಲರ್ಟ್​: ದೆಹಲಿಯಲ್ಲಿ ನಾಲ್ಕು ಹಂತದ ಭದ್ರತಾ ವ್ಯವಸ್ಥೆ ಮಾಡಿರುವುದಾಗಿ ಪೊಲೀಸರು ಹೇಳಿದ್ದಾರೆ. ದೆಹಲಿ ಒಳಭಾಗದ ಭದ್ರತೆ, ಮಧ್ಯ ಭಾಗದ ಭದ್ರತೆ, ಹೊರಭಾಗದ ಭದ್ರತೆ ಹಾಗೂ ದೆಹಲಿ ಗಡಿಭಾಗದ ಭದ್ರತೆ ವ್ಯವಸ್ಥೆ ಮಾಡಲಾಗಿದೆ. ಭದ್ರತೆಗಾಗಿ 10 ಸಾವಿರ ಭದ್ರತಾ ಸಿಬ್ಬಂದಿಯನ್ನು ನಿಯೋಜಿಸಲಾಗಿದೆ. ಈ ಬಾರಿಯ ಭದ್ರತಾ ವಿಶೇಷತೆ ಅಂದ್ರೆ ಮುಖದ ಚಹರೆ ಗುರುತಿಸುವ ತಂತ್ರಜ್ಞಾನವನ್ನು ಅಳವಡಿಸಿಕೊಳ್ಳಲಾಗಿದೆ. ಇದ್ರಿಂದ ಅನುಮಾನಾಸ್ಪದ ವ್ಯಕ್ತಿಗಳ ಪತ್ತೆಗೆ ಅನುಕೂಲವಾಗಲಿದೆ. ರಾಜ್‌ಪಥ್ ನಿಂದ ಕೆಂಪುಕೋಟೆಯವರೆಗೂ ಇರುವ ಎತ್ತರದ ಕಟ್ಟಡಗಳ ಮೇಲೆ ಶಾರ್ಪ್‌ ಶೂಟರ್‌, ಸ್ನಿಪರ್‌ ಗನ್ ಹಿಡಿದ ಭದ್ರತಾ ಸಿಬ್ಬಂದಿಯನ್ನು ನಿಯೋಜಿಸಲಾಗಿದೆ. ರೆಡ್‌ ಪೋರ್ಟ್, ಯಮುನಾ ಖಾದರ್ ಪ್ರದೇಶದಲ್ಲಿ 150 ಸಿಸಿಟಿವಿಗಳನ್ನು ಅಳವಡಿಸಲಾಗಿದೆ. ಜತೆಗೆ ಭಯೋತ್ಪಾದನಾ ನಿಗ್ರಹದ ಕ್ರಮಗಳನ್ನು ಸಹ ಕೈಗೊಳ್ಳಲಾಗಿದೆ.

ಇನ್ನು, ಮುಂಬೈನ ಛತ್ರಪತಿ ಶಿವಾಜಿ ಏರ್​ಪೋರ್ಟ್​, ಪಂಜಾಬ್​ನ ಅಟ್ಟಾರಿ ಗಡಿ ಸೇರಿದಂತೆ ದೇಶದ ಬಹುತೇಕ ಕಡೆ ಸರ್ಕಾರಿ ಕಟ್ಟಡಗಳಿಗೆ ಲೈಟಿಂಗ್ಸ್ ಅಳವಡಿಸಲಾಗಿದ್ದು, ನೋಡುಗರ ಕಣ್ ಕುಕ್ಕುತ್ತಿವೆ. ಒಟ್ನಲ್ಲಿ, ಎಲ್ಲೆಲ್ಲೂ 71ನೇ ಗಣರಾಜ್ಯೋತ್ಸವ ದಿನಾಚರಣೆಯ ಸಂಭ್ರಮ ಮನೆಮಾಡಿದ್ದು, ಹರ್ಷೋದ್ಗಾರ ಮುಗಿಲು ಮುಟ್ಟಿದೆ.