AstraZeneca Side Effects: ಆಸ್ಟ್ರಾಜೆನಿಕಾ ಲಸಿಕೆಯ ಅಡ್ಡಪರಿಣಾಮಗಳನ್ನು ಪರಿಶೀಲನೆ ನಡೆಸಲು ನಿರ್ಧರಿಸಿದ ಭಾರತ
ಜನೆವರಿ 16ರಂದು ಆರಂಭಗೊಂಡ ಲಸಿಕಾ ಅಭಿಯಾನದಲ್ಲಿ ಮಾರ್ಚ್ 12 ರಂದು 20 ಲಕ್ಷಕ್ಕೂ (20,53,537) ಹೆಚ್ಚು ಜನರಿಗೆ ಲಸಿಕೆ ನೀಡಲಾಗಿದೆ. ಇದುವರೆಗೆ ಒಂದು ದಿನದಲ್ಲಿ ಗರಿಷ್ಠ ಪ್ರಮಾಣದ ಲಸಿಕೆಗಳನ್ನು ನೀಡಿದ ದಾಖಲೆ ಇದಾಗಿದೆ.
ನವದೆಹಲಿ: ಆಸ್ಟ್ರಾಜೆನಿಕಾ ಕೊವಿಡ್ ಲಸಿಕೆ ಅಡ್ಡ ಪರಿಣಾಮಗಳ ಕುರಿತು ಆಳವಾದ ಪರಿಶೀಲನೆಯೊಂದನ್ನು ಮುಂದಿನವಾರದಲ್ಲಿ ನಡೆಸಲು ಭಾರತ ಸರ್ಕಾರ ನಿರ್ಧರಿಸಿದೆ. ಡೆನ್ಮಾರ್ಕ್, ನಾರ್ವೆ, ಐಸ್ಲ್ಯಾಂಡ್ ಮತ್ತು ಥೈಲ್ಯಾಂಡ್ ಮೊದಲಾದ ದೇಶಗಳಲ್ಲಿ ಲಸಿಕೆ ಹಾಕಿಸಿಕೊಂಡವರಲ್ಲಿ ರಕ್ತ ಹೆಪ್ಪುಗಟ್ಟುವಿಕೆಯ ಪ್ರಕರಣಗಳು ತಲೆದೋರಿದ ನಂತರ ಭಾರತ ಆಸ್ಟ್ರಾಜೆನಿಕಾ ಲಸಿಕೆಯ ಪರೀಕ್ಷಣೆ ನಡೆಸಲು ನಿರ್ಧರಿಸಿದೆ.
‘ಅಡ್ಡ ಪರಿಣಾಮದ ಎಲ್ಲ ಆಯಾಮಗಳ ಅದರಲ್ಲೂ ವಿಶೇಷವಾಗಿ ಮರಣ ಮತ್ತು ಆಸ್ಪತ್ರೆಗೆ ಸೇರಿಸುವಂಥ ಅನಿವಾರ್ಯತೆ ಸೃಷ್ಟಿಸುವ ಗಂಭೀರ ಸ್ವರೂಪದ ಆಯಾಮಗಳನ್ನು ನಾವು ಪರಿಶಿಲಿಸಲಿದ್ದೇವೆ. ಕಳವಳ ಹುಟ್ಟಿಸುವಂಥದ್ದೇನಾದರೂ ನಮ್ಮ ಗಮನಕ್ಕೆ ಬಂದರೆ, ನಾವು ಅದನ್ನು ಬಹಿರಂಗಪಡಿಸಲಿದ್ದೇವೆ,’ ಎಂದು ಸುದ್ದಿಸಂಸ್ಥೆಯೊಂದರ ಜೊತೆ ಮಾತಾಡಿದ ಕೊವಿಡ್-19 ರಾಷ್ಟ್ರೀಯ ಟಾಸ್ಕ್ಫೋರ್ಸ್ ಸದಸ್ಯ ಎನ್ ಕೆ ಅರೋರಾ ಹೇಳಿದರು.
ಕಳವಳಪಡುವ ಸಂಗತಿಯೇನೂ ಇದಲ್ಲವೆಂದು ಹೇಳಿರುವ ಅರೋರಾ, ‘ಭಾರತದಲ್ಲಿ ವರದಿಯಾಗಿರುವ ಅಡ್ಡ ಪರಿಣಾಮಗಳ ಸಂಖ್ಯೆ ತೀರಾ, ತೀರಾ ಕಡಿಮೆ. ಹಾಗೆ ಸಮಸ್ಯೆಗೊಳಗಾದವವರಲ್ಲಿ ರಕ್ತ ಹೆಪ್ಪುಗಟ್ಟುವುದು ಸಂಭವಿಸಿದೆಯೇ ಎನ್ನುವುದನ್ನು ನಾವು ಪರಿಶೀಲಿಸಲಿದ್ದೇವೆ,’ ಎಂದರು.
ಭಾರತದಲ್ಲಿ ಲಸಿಕಾ ಅಭಿಯಾನ
‘ನಿನ್ನೆಯವರೆಗೆ (ಶುಕ್ರವಾರ) 59 ರಿಂದ 60 ಸಾವುಗಳು ಸಂಭವಿಸಿವೆ. ಅದರೆ ಅವೆಲ್ಲ ಕಾಕತಾಳೀಯ ಸಾವುಗಳು. ಅಸ್ಪತ್ರೆ ಸೇರಿಸಬೇಕಾದ ಸ್ಥಿತಿ ಎದುರಿಸಿದ ಪ್ರಕರಣಗಳನ್ನು ನಾವು ಮರು-ಪರೀಕ್ಷಣೆ ನಡೆಸಲಿದ್ದೇವೆ,’ ಎಂದು ಅರೋರಾ ಹೇಳಿದರು.
ಜನೆವರಿ 16ರಂದು ಆರಂಭಗೊಂಡ ಲಸಿಕಾ ಅಭಿಯಾನದಲ್ಲಿ ಮಾರ್ಚ್ 12 ರಂದು 20 ಲಕ್ಷಕ್ಕೂ (20,53,537) ಹೆಚ್ಚು ಜನರಿಗೆ ಲಸಿಕೆ ನೀಡಲಾಗಿದೆ. ಇದುವರೆಗೆ ಒಂದು ದಿನದಲ್ಲಿ ಗರಿಷ್ಠ ಪ್ರಮಾಣದ ಲಸಿಕೆಗಳನ್ನು ನೀಡಿದ ದಾಖಲೆ ಇದಾಗಿದೆ.
ಲಸಿಕೆ ನೀಡಿಕೆ ಪ್ರಮಾಣದ ಶೇಕಡಾ 74ರಷ್ಟು 8 ರಾಜ್ಯಗಳಲ್ಲಿ ನಡೆದಿದೆ. ಈ ಪಟ್ಟಿಯಲ್ಲಿ ಉತ್ತರ ಪ್ರದೇಶ ಎಲ್ಲರಿಗಿಂತ ಮುಂದಿದ್ದು ರಾಜ್ಯದಲ್ಲಿ 3.3 ಲಕ್ಷ ಲಸಿಕಾ ಡೋಸ್ಗಳನ್ನು ನೀಡಲಾಗಿದೆ.
ಒಟ್ಟಾರೆಯಾಗಿ ಭಾರತದಲ್ಲಿ ಇದುವರೆಗೆ 2.82 ಕೋಟಿ ಲಸಿಕಾ ಡೋಸ್ಗಳನ್ನು ನೀಡಲಾಗಿದೆ. ಸಾಮೂಹಿಕ ಲಸಿಕಾ ಕಾರ್ಯಕ್ರಮದಡಿಯಲ್ಲಿ ಭಾರತವು ಕೊವಿಶೀಲ್ಡ್ ಮತ್ತು ಭಾರತ್ ಬಯೋಟೆಕ್ನ ಕೊವ್ಯಾಕ್ಸಿನ್ ಲಸಿಕೆಗಳನ್ನು ಬಳಸುತ್ತಿದೆ.
ಪ್ರಸ್ತುವಾಗಿ ಭಾರತದಲ್ಲಿ 2.02 ಲಕ್ಷ ಸಕ್ರಿಯ ಕೊವಿಡ್-19 ಪ್ರಕರಣಗಳಿವೆ. ಕಳೆದ 24 ಗಂಟೆಗಳಲ್ಲಿ 24,882 ಹೊಸ ಪ್ರಕರಣಗಳು ದಾಖಲಾಗಿದ್ದು ಇದು ಈ ವರ್ಷ ದಾಖಲಾಗಿರುವ ಗರಿಷ್ಠ ಪ್ರಕರಣಗಳ ಸಂಖ್ಯೆಯಾಗಿದೆ. ಓದುಗರಿಗೆ ನೆನಪಿರಬಹುದು, ಕಳೆದ ವರ್ಷ ಡಿಸೆಂಬರ್ 20ರಂದು 26,624 ಪ್ರಕರಣಗಳು ವರದಿಯಾಗಿದ್ದವು. ಭಾರತದ ಆರೋಗ್ಯ ಸಚಿವಾಲಯ ಬಿಡುಗಡೆ ಮಾಡಿರುವ ಅಂಕಿ-ಅಂಶಗಳ ಪ್ರಕಾರ ಪ್ರಸಕ್ತ ವರ್ಷ ಇದುವರೆಗೆ 1,13,33,728 ಪ್ರಕರಣಗಳು ದಾಖಲಾಗಿವೆ.