Artificial Intelligence: ಸುಪ್ರೀಂಕೋರ್ಟ್​ನ ಕೃತಕ ಬುದ್ಧಿಮತ್ತೆ ಆಧಾರಿತ ತಂತ್ರಜ್ಞಾನದ ಹಿಂದೆ ಮೂವರು ಬೆಂಗಳೂರಿಗರ ಸಾಹಸ

ಸುಪ್ರೀಂಕೋರ್ಟ್(Supreme Court) ​ನ ಕಲಾಪದ ನೇರ ಪ್ರಸಾರದ ಸಂದರ್ಭದಲ್ಲಿ ವಾದ ವಿವಾದಗಳನ್ನು ಸ್ಕ್ರಿಪ್ಟ್​ಗೆ ರೂಪಾಂತರಿಸುವ ಕೃತಕ ಬುದ್ಧಿಮತ್ತೆ(AI)ತಂತ್ರಜ್ಞಾನದ ಹಿಂದೆ ಮೂವರು ಬೆಂಗಳೂರಿಗರ ಸಾಹಸ ಅಡಗಿದೆ. ಬೆಂಗಳೂರಿನ ತಂತ್ರಜ್ಞರಾದ ವಿಕಾಸ್ ಮಹೀಂದ್ರಾ, ವಿನಯ್ ಮಹೀಂದ್ರಾ, ಬದರಿ ವಿಕಾಸ್ ಕಿನ್ಹಾಲ್ ಅವರ TERES( Technology Enabled Resolution) ನೆರವಿನಿಂದ ಸದ್ಯಕ್ಕೆ ಸುಪ್ರೀಂಕೋರ್ಟ್​ ಸಂವಿಧಾನ ಪೀಠದ ವಿಚಾರಣೆಯ ನೇರ ಪ್ರಸಾರದ ಸಂದರ್ಭದಲ್ಲಿ ನ್ಯಾಯಮೂರ್ತಿಗಳು ಹಾಗೂ ವಕೀಲರ ಸಂಭಾಷಣೆ ಟ್ರಾನ್ಸ್​ಸ್ಕ್ರಿಪ್ಟ್​ ಅನ್ನು ಜತೆ ಜತೆಗೆ ಪ್ರಸಾರ ಮಾಡಲಾಗುತ್ತಿದೆ.

ದಿನದ ಕೊನೆಗೆ ಈ ಟ್ರಾನ್ಸ್​ಸ್ಕ್ರಿಪ್ಟ್​ ಅನ್ನು ಸುಪ್ರೀಂಕೋರ್ಟ್​ನ ಅಧಿಕೃತ ವೆಬ್​ಸೈಟ್​ನಲ್ಲಿ ಪ್ರಕಟಿಸಲಾಗುತ್ತಿದೆ. ಭಾರತದ ನ್ಯಾಯಾಂಗ ವ್ಯವಸ್ಥೆಗೆ ಹೊಸ ದಿಶೆಯನ್ನು ಕೊಡಬಲ್ಲಂತಹ ಈ ತಂತ್ರಜ್ಞಾನವನ್ನು ಈಗ ಪ್ರಾಯೋಗಿಕವಾಗಿ ಸುಪ್ರೀಂಕೋರ್ಟ್​ನಲ್ಲಿ ಬಳಸಲಾಗುತ್ತದೆ.

ಐದು ವರ್ಷಗಳ ಹಿಂದೆ ನಾನು ಹಾಗೂ ವಿನಯ್ ಮತ್ತು ಕಿನ್ಹಾಲ್ ಊಟ ಮಾಡುತ್ತಾ ಕುಳಿತಾಗ ಈ ತಂತ್ರಜ್ಞಾನವನ್ನು ಪರಿಚಯಿಸುವ ಅಗತ್ಯತೆಗಳ ಬಗ್ಗೆ ಚರ್ಚಿಸಿದ್ದೆವು. ಆಗ ಈ TERES ಹುಟ್ಟಿಕೊಂಡಿತು. ನಾವು ಎಐನ ನೈಸರ್ಗಿಕ ಭಾಷಾ ಸಂಸ್ಕರಣಾ ಸಾಮರ್ಥ್ಯವನ್ನು ಬಳಸಿಕೊಂಡು ಕಲಾಪವನ್ನು ಪಠ್ಯವಾಗಿ ಪರಿವರ್ತಿಸಿದ್ದೇವೆ.

ಇವರಲ್ಲಿ ವಿನಯ್ ಹಾಗೂ ವಿಕಾಸ್ ಸಹೋದರರಾಗಿದ್ದಾರೆ, ಬದರಿ ಭಾವ. ವಿನಯ್ ಬೆಂಗಳೂರಿನ ಆರ್​ವಿ ಕಾಲೇಜಿನಲ್ಲಿ ಎಂಜಿನಿಯರಿಂಗ್ ಪದವಿ ಮಾಡಿದ್ದಾರೆ.

ಸುಪ್ರೀಂಕೋರ್ಟ್​ ಪಯಣ ಹೇಗೆ?
ಕಳೆದ ಫೆಬ್ರವರಿ 16 ರಿಂದ 19ರವರೆಗೆ ನ್ಯಾಯಾಂಗದ ಕುರಿತ ಒಂದು ಸಮಾವೇಶದಲ್ಲಿ ಸುಪ್ರೀಂಕೋರ್ಟ್​ನ ಮುಖ್ಯ ನ್ಯಾಯಮೂರ್ತಿ ಡಿವೈ ಚಂದ್ರಚೂಡ್ ಭಾಗವಹಿಸಿದ್ದರು. ಆ ಕಾರ್ಯಕ್ರಮದಲ್ಲಿ ವಿಕಾಸ್, ವಿನಯ್ ಕೂಡ ಭಾಗಿಯಾಗಿದ್ದರು.
ನ್ಯಾಯಾಂಗ ವ್ಯವಸ್ಥೆಯಲ್ಲಿ ಟ್ರಾನ್ಸ್​ಕ್ರಿಪ್ಟ್​ ಸೇವೆಗಳ ಬಗ್ಗೆ ಒತ್ತು ನೀಡಬೇಕು ಎನ್ನುವುದು ಚಂದ್ರಚೂಡ್ ಅವರ ವಾದವಾಗಿತ್ತು. ಕಾಕತಾಳೀಯ ಎನ್ನುವಂತೆ ಆ ಕಾರ್ಯಕ್ರಮದ ನೇರ ಪ್ರಸಾರದ ಸಂದರ್ಭದಲ್ಲಿ ಈ ಯುವಕರು ಟ್ರಾನ್ಸ್​ಕ್ರಿಪ್ಟ್​ ಸೇವೆಯನ್ನು ಒದಗಿಸುತ್ತಿದ್ದರು. ಇದನ್ನು ಕಂಡು ಅಚ್ಚರಿಗೊಳಗಾದ ಚಂದ್ರಚೂಡ್ ಸುಪ್ರೀಂಕೋರ್ಟ್​ನಲ್ಲಿಯೂ ಇಂತಹ ವ್ಯವಸ್ಥೆಯನ್ನು ಜಾರಿಮಾಡಬಹುದೇ ಎಂದು ಈ ಯುವಕರನ್ನು ಪ್ರಶ್ನಿಸಿದರು.

ಇದರ ಪರಿಣಾಮವಾಗಿಯೇ ಶಿವಸೇನಾ ಪಕ್ಷದ ಚಿಹ್ನೆ ಹಾಗೂ ಅಧಿಕೃತ ಸ್ಥಾನಮಾನದ ಕುರಿತ ವಿಚಾರಣೆಯ ನೇರ ಪ್ರಸಾರವನ್ನು ಟ್ರಾನ್ಸ್​ಕ್ರಿಪ್ಟ್​ ರೂಪದಲ್ಲಿ ನೀಡಲು ಸಹಾಯವಾಯಿತು.

ಸಿಜೆಐ ಮನವಿ ಬಳಿಕ ಬೆಂಗಳೂರಿಗೆ ಹಿಂದಿರುಗುವುದನ್ನು ರದ್ದುಪಡಿಸಿ ದೆಹಲಿಯಲ್ಲಿಯೇ ಉಳಿದು, ಇದಕ್ಕೆ ಬೇಖಾದ ಅಗತ್ಯಗಳನ್ನು ತಯಾರಿಸಿಕೊಂಡು ಪ್ರಸಾರ ಮಾಡಲಾಯಿತು. ಸುಪ್ರೀಂಕೋರ್ಟ್​ನ ಈ ಪ್ರಯೋಗದ ಬಳಿಕ ಕರ್ನಾಟಕ, ಒಡಿಶಾ, ಕೇರಳ ಹೈಕೋರ್ಟ್​ಗಳು ಕೂಡ ತಂತ್ರಜ್ಞಾನ ಬಳಕೆಗೆ ಒಲವು ತೋರಿಸಿದೆ.

ಇದರಿಂದ ಕೋರ್ಟ್​ ಕಲಾಪಗಳ ಗುಣಮಟ್ಟವೂ ವೃದ್ಧಿಸುವ ಸಾಧ್ಯತೆಯೂ ಹೆಚ್ಚಿರುತ್ತದೆ. ಮೊದಲನೆಯದಾಗಿ ವಕೀಲರು ಅಥವಾ ನ್ಯಾಯಮೂರ್ತಿಗಳು ಅಗತ್ಯಕ್ಕಿಂತ ಹೆಚ್ಚಿನ ವಿಚಾರಗಳನ್ನು ಪ್ರಸ್ತಾಪಿಸಲು ಹಿಂಜರಿಯುತ್ತಾರೆ, ಅನಗತ್ಯ ವಿವಾದಗಳಿಂದ ದೂರವಿರಬಹುದು.

ಇನ್ನೊಂದೆಡೆ ಕೋರ್ಟ್​ ಕಲಾಪದಲ್ಲಿ ಏನಾಗಿದೆ ಎನ್ನುವ ನಿಖರ ವಿವರವು ಕಕ್ಷಿದಾರರಿಗೆ ತಿಳಿಯಲಿದೆ. ಇದರಿಂದ ನ್ಯಾಯಾಂಗದಲ್ಲಿ ಪಾರದರ್ಶಕ ವ್ಯವಸ್ಥೆ ಜಾರಿಗೆ ಬರುತ್ತದೆ. ಇನ್ನೊಂದೆಡೆ ತನ್ನ ವಾದವನ್ನು ನ್ಯಾಯಪೀಠ ಪರಿಗಣಿಸಿಲ್ಲ ಎಂದು ವಕೀಲರು ಮಾಡುವ ಆರೋಪಗಳು ಕೂಡ ದೂರವಾಗಲಿವೆ.ಹಾಗೆಯೇ ಕೋರ್ಟ್​ ಕಲಾಪವನ್ನು ಅಧ್ಯಯನವನ್ನು ಮಾಡುವ ನ್ಯಾಯಾಂಗ ವಿದ್ಯಾರ್ಥಿಗಳಿಗೂ ಸಹಾಯವಾಗಲಿದೆ.

ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ