ಕೊವಿಡ್ ಪಿಡುಗು ಆರಂಭವಾದ ನಂತರ ಇದೇ ಮೊದಲ ಬಾರಿಗೆ ದೆಹಲಿಯಲ್ಲಿ ಶೂನ್ಯ ಕೊವಿಡ್

ದೆಹಲಿ: ಕಳೆದ 24 ಗಂಟೆಗಳಲ್ಲಿ ರಾಷ್ಟ್ರರಾಜಧಾನಿ ದೆಹಲಿಯಲ್ಲಿ ಒಂದೂ ಹೊಸ ಕೊವಿಡ್-19 (Covid 19) ಪ್ರಕರಣಗಳು ವರದಿಯಾಗಿಲ್ಲ. ಕಳೆದ ಮಾರ್ಚ್ 2020ರಿಂದ ಪ್ರತಿದಿನ ವರದಿಯಾಗುತ್ತಿದ್ದ ಪ್ರಕರಣಗಳು ಇದೀಗ ಶೂನ್ಯಕ್ಕಿಳಿದಿರುವುದು ಆರೋಗ್ಯ ಇಲಾಖೆ (Health Department) ಅಧಿಕಾರಿಗಳಲ್ಲಿ ಮತ್ತು ಜನಸಾಮಾನ್ಯರಿಗೆ ನೆಮ್ಮದಿ ಮೂಡಿಸಿದೆ. ದೆಹಲಿ ಆರೋಗ್ಯ ಇಲಾಖೆಯು ಸೋಮವಾರ ಹೊರಡಿಸಿರುವ ಆರೋಗ್ಯ ಮಾಹಿತಿಯಲ್ಲಿ (Health Bulletin) ಈ ಅಂಶ ಉಲ್ಲೇಖವಾಗಿದೆ.

ದೆಹಲಿಯಲ್ಲಿ ಪ್ರಸ್ತುತ 10 ಸಕ್ರಿಯ ಪ್ರಕರಣಗಳಿವೆ. ಪಾಸಿಟಿವಿಟಿ ಪ್ರಮಾಣವು 0.00 ಆಗಿದೆ ಎಂದು ಬುಲೆಟಿನ್ ಹೇಳಿದೆ. ಬುಲೆಟಿನ್ ಪ್ರಕಾರ 9 ಕೊವಿಡ್ ರೋಗಿಗಳು ಕಳೆದ 24 ಗಂಟೆಗಳಲ್ಲಿ ಚೇತರಿಸಿಕೊಂಡಿದ್ದಾರೆ. ಈವರೆಗೆ ಚೇತರಿಸಿಕೊಂಡವರ ರೋಗಿಗಳ ಸಂಖ್ಯೆಯು 19,80,781ಕ್ಕೆ ಏರಿದೆ. ಕಳೆದ 24 ಗಂಟೆಗಳಲ್ಲಿ ಕೊವಿಡ್​ನಿಂದ ಯಾರೊಬ್ಬರೂ ಮೃತಪಟ್ಟಿಲ್ಲ. ದೆಹಲಿಯಲ್ಲಿ ಈವರೆಗೆ ಕೊವಿಡ್​ನಿಂದ 26,522 ಮಂದಿ ಸಾವನ್ನಪ್ಪಿದ್ದಾರೆ.

ಭಾರತದಲ್ಲಿ ಪ್ರಸ್ತುತ ನಡೆಯುತ್ತಿರುವ ಲಸಿಕಾಕರಣ ಅಭಿಯಾನವು ಯಶಸ್ವಿಯಾಗಿದೆ. ದೆಹಲಿಯಲ್ಲಿ ಕಳೆದ 24 ಗಂಟೆಗಳಲ್ಲಿ 150 ಕೊವಿಡ್ ಲಸಿಕೆಗಳನ್ನು ಈವರೆಗೆ ಜನರಿಗೆ ಈ ಪೈಕಿ 15 ಮಂದಿ ಮೊದಲ ಡೋಸ್, 32 ಮಂದಿ 2ನೇ ಡೋಸ್ ಮತ್ತು 103 ಮಂದಿ 3ನೇ (ಮುಂಜಾಗ್ರತಾ) ಡೋಸ್ ಪಡೆದುಕೊಂಡಿದ್ದಾರೆ. ದೆಹಲಿಯಲ್ಲಿ ಈವರೆಗೆ 3,73,70,636 (3.73 ಕೋಟಿ) ಮಂದಿಗೆ ಲಸಿಕೆ ನೀಡಿದಂತೆ ಆಗಿದೆ.

ಕಳೆದ 24 ಗಂಟೆಗಳಲ್ಲಿ 931 ಕೊವಿಟ್ ಮಾದರಿಗಳನ್ನು ತಪಾಸಣೆಗೆ ಒಳಪಡಿಸಲಾಗಿದೆ. ಇದರೊಂದಿಗೆ ಒಟ್ಟು ತಪಾಸಣೆ ಮಾಡಿದ ಕೊವಿಡ್ ಮಾದರಿಗಳ ಸಂಖ್ಯೆಯು 4,06,50,119 ಗೆ (4.06 ಕೋಟಿ) ಏರಿಕೆಯಾಗಿದೆ. ರಾಷ್ಟ್ರ ರಾಜಧಾನಿಯನ್ನು ಈವರೆಗೆ ಮೂರು ಕೊವಿಡ್ ಅಲೆಗಳು ಬಾಧಿಸಿವೆ. ಈ ಪೈಕಿ ಏಪ್ರಿಲ್-ಮೇ 2021ರಲ್ಲಿ ಕಾಣಿಸಿಕೊಂಡಿದ್ದ 2ನೇ ಕೊವಿಡ್ ಅಲೆಯು ಮಾರಣಾಂತಿಕ ಎಂದು ವಿಶ್ಲೇಷಿಸಲಾಗಿತ್ತು. ಈ ಸಂದರ್ಭದಲ್ಲಿ ಕೊರೊನಾ ವೈರಾಣುಗಳ ಡೆಲ್ಟಾ ರೂಪಾಂತರಿ ಜನರನ್ನು ಬಾಧಿಸಿತ್ತು.

ಇದನ್ನೂ ಓದಿ: ಬೆಂಗಳೂರಿಗೆ ಸದ್ಯಕ್ಕೆ ಕೊರೊನಾ ಆತಂಕ ಇಲ್ಲ: ನೆಮ್ಮದಿಯ ಫಲಿತಾಂಶ ಕೊಟ್ಟ ಒಳಚರಂಡಿ ನೀರಿನ ಮಾದರಿ ಪರಿಶೀಲನೆ