Fact Check | ಭಾರತೀಯ ರೈಲ್ವೆಯನ್ನು ಅದಾನಿ ಖರೀದಿಸಿದ್ದಾರೆ ಎಂಬ ವೈರಲ್ ವಿಡಿಯೊ ಹಿಂದಿನ ಮರ್ಮವೇನು?

ಬೆಂಗಳೂರು: ಭಾರತೀಯ ರೈಲ್ವೆಯನ್ನು ಗೌತಮ್ ಅದಾನಿ ಮಾಲೀಕತ್ವದ ಅದಾನಿ ಗ್ರೂಪ್ ಖರೀದಿಸಿದೆ ಎಂದು ಹೇಳುವ ವಿಡಿಯೊವೊಂದು ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್ ಆಗಿದೆ. WAP 7 ರೈಲು ಎಂಜಿನ್​​ನ್ನು ತೋರಿಸುವ ವಿಡಿಯೊ ಇದಾಗಿದ್ದು ಇದರಲ್ಲಿ ವಡೋದರಾದ ಸ್ಟೇಷನ್ ಕೋಡ್ ಬಿಆರ್​ಸಿ ಎಂದು ಇದೆ. ಈ ಎಂಜಿನ್​​ನ ಬದಿಯಲ್ಲಿ ಅದಾನಿ ವಿಲ್ಮರ್ ಹೆಸರು ಮತ್ತು ಸಫೋಲಾ ಗೋಧಿ ಹಿಟ್ಟಿನ ಜಾಹೀರಾತು ಕಾಣಿಸುತ್ತದೆ. ಅದಾನಿ ಗ್ರೂಪ್ ಮತ್ತು ಸಿಂಗಾಪುರದ ವಿಲ್ಮರ್ ಇಂಟರ್ ನ್ಯಾಷನಲ್ ಲಿಮಿಟೆಡ್​​ನ ಜಂಟಿ ವ್ಯಾಪಾರ ಸಂಸ್ಥೆಯಾಗಿದೆ. ಅಡುಗೆ ತೈಲ ಮತ್ತು ಆಹಾರ ಧಾನ್ಯಗಳು ಈ ಸಂಸ್ಥೆಯ ಉತ್ಪನ್ನಗಳು.

ದೆಹಲಿಯಲ್ಲಿ ರೈತರು ಕೇಂದ್ರದ ಕೃಷಿ ಕಾನೂನು ವಿರುದ್ಧ ಪ್ರತಿಭಟನೆ ನಡೆಸುತ್ತಿರುವ ಹೊತ್ತಲ್ಲಿಯೇ ಈ ವಿಡಿಯೊ ವೈರಲ್ ಆಗಿದೆ. ಅದಾನಿ ವಿಮಾನ ನಿಲ್ದಾಣ, ಅದಾನಿ ಬಂದರು, ಅದಾನಿ ಪವರ್, ಅದಾನಿ ಕಲ್ಲಿದ್ದಲು, ಅದಾನಿ ರೈಲ್ವೆ ಎಂಬ ಶೀರ್ಷಿಕೆಯೊಂದಿಗೆ ಹಲವಾರು ನೆಟ್ಟಿಗರು ಈ ವಿಡಿಯೊ ಶೇರ್ ಮಾಡಿದ್ದಾರೆ.

ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ಪ್ರಿಯಾಂಕಾ ಗಾಂಧಿ ವಾದ್ರಾ ಅವರ ಫೇಸ್​ಬುಕ್ ಪುಟದಲ್ಲಿಯೂ ಇದೇ ವಿಡಿಯೊ ಶೇರ್ ಆಗಿತ್ತು. ಕಾಂಗ್ರೆಸ್ ಪಕ್ಷದ ಗುಜರಾತ್ ಘಟಕದ ಅಧ್ಯಕ್ಷ ಹಾರ್ದಿಕ್ ಪಟೇಲ್ ಈ ವಿಡಿಯೊವನ್ನು ಶೇರ್ ಮಾಡಿದ್ದರು.

ಫ್ಯಾಕ್ಟ್ ಚೆಕ್
ಈ ವೈರಲ್ ವಿಡಿಯೊದ ಫ್ಯಾಕ್ಟ್​ಚೆಕ್ ಮಾಡಿದ ಬೂಮ್ ಲೈವ್, ಇದು ಲೋಕೋಮೋಟಿವ್ ಎಂಜಿನ್​ನಲ್ಲಿರುವ ಜಾಹೀರಾತು ಅದು ಎಂದು ವರದಿ ಮಾಡಿದೆ. ವಿಡಿಯೊದಲ್ಲಿರುವ ಎಂಜಿನ್ ನಂಬರ್ WAP7 30502 ಆಗಿದೆ. Adani WAP 7 Engines ಎಂಬ ಕೀವರ್ಡ್ ಬಳಸಿ ಗೂಗಲಿಸಿದಾಗ ಲೋಕೋಮೋಟಿವ್ ಬ್ರಾಂಡಿಂಗ್ ಬಗ್ಗೆ ಇರುವ ಪುಟವೊಂದು ಸಿಗುತ್ತದೆ. ರೈಲ್ವೆ ಎಂಜಿನ್​ಗಳ ಮೇಲೆ ಜಾಹೀರಾತು ಪ್ರದರ್ಶಿಸಿರುವುದು ಇಲ್ಲಿ ಕಾಣಿಸುತ್ತದೆ.

ಫೈನಾನ್ಶಿಯನ್ ಎಕ್ಸ್​ಪ್ರೆಸ್ ಪತ್ರಿಕೆಯ ವರದಿ ಪ್ರಕಾರ ವಡೋದರಲ್ಲಿ (ಪಶ್ಚಿಮ ರೈಲ್ವೆಯ ಗುಜರಾತ್ ವಿಭಾಗದಲ್ಲಿ) ಕೋಮೋಟಿವ್ ಬ್ರಾಂಡಿಂಗ್​ನಿಂದ ಭಾರತೀಯ ರೈಲ್ವೆ ವಾರ್ಷಿಕ ₹73.26 ಲಕ್ಷ ಆದಾಯ ಗಳಿಸುತ್ತದೆ. 2020ರ ಫೆಬ್ರುವರಿ 27ರಂದು ಐದು WAP 7 ಲೋಕೋಮೋಟಿವ್​​ಗಳಲ್ಲಿ ಅದಾನಿ-ವಿಲ್ಮರ್ ಕಂಪನಿಯ ಜಾಹೀರಾತು ಪ್ರಕಟಿಸಲಾಗಿತ್ತು. The Rail Zone ಯುಟ್ಯೂಬ್ ಖಾತೆಯಲ್ಲಿರುವ ವಿಡಿಯೊದಲ್ಲಿ ಜಾಹೀರಾತುಗಳನ್ನು ಕಾಣಬಹುದು. ಅದಾನಿ ವಿಲ್ಮರ್ ವೆಬ್​ಸೈಟ್​ನ ಪತ್ರಿಕಾ ಪ್ರಕಟಣೆಯಲ್ಲಿಯೂ ಲೋಕೊಮೋಟಿವ್ ಎಂಜಿನ್​ಗಳಲ್ಲಿನ ಜಾಹೀರಾತು ಬಗ್ಗೆ ಇದೆ.

ಸರ್ಕಾರದ ಫ್ಯಾಕ್ಟ್ ಚೆಕಿಂಗ್ ವಿಭಾಗವಾದ ಪಿಐಬಿ ಫ್ಯಾಕ್ಟ್ ಚೆಕ್ ಕೂಡಾ ವೈರಲ್ ವಿಡಿಯೊ ಸುಳ್ಳು ಸುದ್ದಿ ಎಂದು ಟ್ವೀಟ್ ಮಾಡಿದೆ.