ಮೂವರು ಸ್ನೇಹಿತೆಯರ ಜತೆ ಸೇರಿ ಅಜ್ಜನನ್ನು ಹತ್ಯೆ ಮಾಡಿದ ಅಪ್ರಾಪ್ತ ಬಾಲಕಿ, ತಿಂಗಳಿಂದಲೇ ನಡೆದಿತ್ತು ಸಂಚು

ಕೊಟ್ಟಾಯಂ,ನವೆಂಬರ್ 14: ಹಣಕ್ಕಾಗಿ ಮೂವರು ಸ್ನೇಹಿತರ ಜತೆ ಸೇರಿ ಅಪ್ರಾಪ್ತ ಬಾಲಕಿ ಅಜ್ಜನನ್ನೇ ಕೊಲೆ ಮಾಡಿರುವ ಘಟನೆ ಕೇರಳದಲ್ಲಿ ನಡೆದಿದೆ. ಈ ಪ್ರಕರಣದಲ್ಲಿ ಮೃತ ವ್ಯಕ್ತಿಯ 13 ವರ್ಷದ ಮೊಮ್ಮಗಳು ಸೇರಿದಂತೆ ನಾಲ್ವರು ಅಪ್ರಾಪ್ತ ವಯಸ್ಕರನ್ನು ಆರೋಪಿಗಳೆಂದು ಹೆಸರಿಸಲಾಗಿದೆ. ಮೊಮ್ಮಗಳಿಗೆ ಐಫೋನ್ ಖರೀದಿಸಲು ಮತ್ತು ಆಕೆಯ ಸ್ನೇಹಿತನಿಗೆ ಬೈಕ್ ಕೊಡಿಸಲು ಹಣ ಹೊಂದಿಸುವ ಉದ್ದೇಶದಿಂದ ಈ ಕೃತ್ಯಕ್ಕೆ ಸಂಚು ರೂಪಿಸಲಾಗಿತ್ತು ಎಂದು ಪೊಲೀಸರು ಆರೋಪಪಟ್ಟಿಯಲ್ಲಿ ತಿಳಿಸಿದ್ದಾರೆ.

ಆರೋಪಿಗಳಲ್ಲಿ ಇಬ್ಬರು 17 ವರ್ಷದ ಬಾಲಕರು, ಒಬ್ಬ 16 ವರ್ಷದ ಬಾಲಕ ಮತ್ತು 13 ವರ್ಷದ ಬಾಲಕಿ ಸೇರಿದ್ದಾರೆ. ಎಲ್ಲರೂ 18 ವರ್ಷಕ್ಕಿಂತ ಕಡಿಮೆ ವಯಸ್ಸಿನವರಾಗಿರುವುದು ಈ ಪ್ರಕರಣದ ವಿಶೇಷವಾಗಿದೆ.

ಎರಡು ತಿಂಗಳ ಹಿಂದಿನಿಂದಲೇ ಸಂಚು

ಪೊಲೀಸರ ಪ್ರಕಾರ, ಆರೋಪಿಗಳು ಸುಮಾರು ಎರಡು ತಿಂಗಳಿನಿಂದ ಇನ್‌ಸ್ಟಾಗ್ರಾಮ್ ಮೂಲಕ ಸಂಪರ್ಕದಲ್ಲಿದ್ದು, ಕೃತ್ಯದ ಬಗ್ಗೆ ಚರ್ಚಿಸಿದ್ದರು. ಮನೆಯಲ್ಲಿ ಇದ್ದ ಚಿನ್ನಾಭರಣ ಕದ್ದು ಮಾರಾಟ ಮಾಡಿ ಹಣ ಸಂಗ್ರಹಿಸುವುದು ಅವರ ಯೋಜನೆಯಾಗಿತ್ತು ಎನ್ನಲಾಗಿದೆ. ಆಗಸ್ಟ್ 15ರಂದು ಬಾಲಕಿ ಮನೆಯ ಬೀರುವಿನಿಂದ ಚಿನ್ನ ತೆಗೆಯಲು ಪ್ರಯತ್ನಿಸಿದಾಗ ಅಜ್ಜನಿಗೆ ಸಿಕ್ಕಿಬಿದ್ದಿದ್ದಳು. ಈ ವೇಳೆ ಅಜ್ಜ ಆಕೆಯನ್ನು ಗದರಿಸಿದ್ದರು. ಇದಾದ ಬಳಿಕ ಕಳ್ಳತನದ ಯೋಜನೆ ವಿಫಲವಾಗಬಹುದು ಎಂಬ ಭಯದಿಂದ ಅಜ್ಜನನ್ನು ಹತ್ಯೆ ಮಾಡುವ ನಿರ್ಧಾರಕ್ಕೆ ಬಂದಿದ್ದಳು ಎಂದು ಆರೋಪಪಟ್ಟಿಯಲ್ಲಿ ಉಲ್ಲೇಖಿಸಲಾಗಿದೆ.

ಶೌಚಾಲಯದ ಮೇಲ್ಛಾವಣಿ ಮೂಲಕ ಮನೆಗೆ ಪ್ರವೇಶ

ಆಗಸ್ಟ್ 15ರ ರಾತ್ರಿ ಮೂವರು ಬಾಲಕರು ಆ ವ್ಯಕ್ತಿಯ ಮನೆಗೆ ಬಂದಿದ್ದರು. ಸ್ನಾನಗೃಹದ ಮೇಲ್ಛಾವಣಿಯ ಹೆಂಚನ್ನು ತೆಗೆದು, ಗಾಳಿ ಬರುವ ಕಿಂಡಿಯ ಮೂಲಕ ಮನೆಯೊಳಗೆ ಪ್ರವೇಶಿಸಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.

ನಂತರ ವ್ಯಕ್ತಿಯ ಮುಖದ ಮೇಲೆ ಬೆಡ್‌ಶೀಟ್ ಒತ್ತಿ, ಬಾಯಿಗೆ ಬಟ್ಟೆ ತುರುಕಿದ್ದರು. ಕೈಗಳನ್ನು ಧೋತಿಯಿಂದ ತೊಡೆಗೆ ಕಟ್ಟಿ, ಕಾಲುಗಳನ್ನು ಟವೆಲ್‌ನಿಂದ ಬಿಗಿದಿದ್ದರು. ಬಳಿಕ ತಲೆ ಮತ್ತು ಕುತ್ತಿಗೆಯ ಭಾಗಕ್ಕೆ ಒದ್ದು, ಹಲ್ಲೆ ನಡೆಸಿದ್ದರಿಂದ ವೃದ್ಧ ಮೃತಪಟ್ಟಿದ್ದಾರೆ ಎಂದು ಆರೋಪಪಟ್ಟಿಯಲ್ಲಿ ಹೇಳಲಾಗಿದೆ. ಈ ಕೃತ್ಯಕ್ಕೆ ಯಾವುದೇ ಆಯುಧ ಬಳಸಿಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ. ಮನೆಯಲ್ಲಿದ್ದ ಸುಮಾರು ನಾಲ್ಕೂವರೆ ಪೌಂಡ್ ಚಿನ್ನವನ್ನೂ ಆರೋಪಿಗಳು ಕದ್ದಿದ್ದಾರೆ ಎನ್ನಲಾಗಿದೆ.

ಇದನ್ನೂ ಓದಿ: 6 ವರ್ಷದ ಬಾಲಕಿ ಫ್ಲೈದುಬೈ ವಿಮಾನದಲ್ಲಿ ಟಾಯ್ಲೆಟ್​​ಗೆ ಹೋಗಿದ್ದಾಗ ಬಯಲಾಯ್ತು ಪೈಲಟ್ ಮೇಲಿನ ದಾಳಿಯ ಸಂಗತಿ

ವಾಟ್ಸ್‌ಆ್ಯಪ್ ವಿಡಿಯೋ ಕಾಲ್ ಮೂಲಕ ಹತ್ಯೆಯ ದೃಶ್ಯ?

ತನಿಖೆಯ ವೇಳೆ ಮತ್ತೊಂದು ಆಘಾತಕಾರಿ ಸಂಗತಿ ಬೆಳಕಿಗೆ ಬಂದಿದೆ. ಕೃತ್ಯ ನಡೆಯುವಾಗ ಬಾಲಕಿ ಮನೆಯಲ್ಲಿರಲಿಲ್ಲ. ಮೂವರು ಬಾಲಕರು ವಾಟ್ಸ್‌ಆ್ಯಪ್ ವಿಡಿಯೋ ಕಾಲ್ ಮೂಲಕ ಆಕೆಗೆ ಮನೆಯ ಒಳಗಿನ ದೃಶ್ಯಗಳನ್ನು ತೋರಿಸಿದ್ದರು ಎಂದು ಪೊಲೀಸರು ಆರೋಪಿಸಿದ್ದಾರೆ. ಆರೋಪಿಗಳ ಮೊಬೈಲ್‌ಗಳಿಂದ ಇನ್‌ಸ್ಟಾಗ್ರಾಮ್ ಚಾಟ್‌ಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಆ ಚಾಟ್‌ಗಳ ಸತ್ಯಾಸತ್ಯತೆ ಪರಿಶೀಲಿಸಲು ಮೆಟಾ ಕಂಪನಿಯಿಂದಲೂ ಮಾಹಿತಿ ಕೇಳಲಾಗಿದೆ. ಆರೋಪಿಗಳ ಫೋನ್‌ಗಳಿಂದ ಆರು ಸಿಮ್ ಕಾರ್ಡ್‌ಗಳನ್ನು ವಶಪಡಿಸಿಕೊಳ್ಳಲಾಗಿದ್ದು, ಅವುಗಳಲ್ಲಿ ಒಂದು ಸಿಮ್ ಹತ್ಯೆ ನಡೆದ ದಿನ ಮಾತ್ರ ಸಕ್ರಿಯವಾಗಿತ್ತು ಎಂದು ಆರೋಪಪಟ್ಟಿಯಲ್ಲಿ ತಿಳಿಸಲಾಗಿದೆ.

740 ಪುಟಗಳ ಆರೋಪಪಟ್ಟಿಯಲ್ಲಿ ಏನೇನಿದೆ?

– 87 ಸಾಕ್ಷಿಗಳ ಹೇಳಿಕೆಗಳು – 98 ದಾಖಲೆಗಳು – 12 ಪ್ರಮುಖ ಭೌತಿಕ ಸಾಕ್ಷ್ಯಗಳು – ಆರೋಪಿಗಳ ಚಲನವಲನ ಪತ್ತೆಹಚ್ಚಲು ಆರು ಸಿಸಿಟಿವಿ ದೃಶ್ಯಗಳು – ಮೊಬೈಲ್ ಚಾಟ್‌ಗಳು ಮತ್ತು ಸಿಮ್ ಕಾರ್ಡ್‌ಗಳ ವಿವರಗಳು ಆಗಸ್ಟ್ 17ರಂದು ಪ್ರಕರಣ ಬೆಳಕಿಗೆ ಬಂದಿದ್ದು, ಅದೇ ದಿನ ಆರೋಪಿಗಳನ್ನು ವಶಕ್ಕೆ ಪಡೆಯಲಾಗಿತ್ತು. ತನಿಖೆ ಪೂರ್ಣಗೊಳಿಸಿದ ಪೊಲೀಸರು ನವೆಂಬರ್ 12ರಂದು ಬಾಲ ನ್ಯಾಯ ಮಂಡಳಿಗೆ 740 ಪುಟಗಳ ಆರೋಪಪಟ್ಟಿ ಸಲ್ಲಿಸಿದ್ದಾರೆ.

ಅಪ್ರಾಪ್ತ ಆರೋಪಿಗಳಿಗೆ ಮುಂದೇನು?

ಮೂವರು ಬಾಲಕರು 16ರಿಂದ 17 ವರ್ಷದೊಳಗಿನವರಾಗಿರುವುದರಿಂದ, ಅವರನ್ನು ವಯಸ್ಕರಂತೆ ವಿಚಾರಣೆ ನಡೆಸಲು ಪೊಲೀಸರು ಬಾಲ ನ್ಯಾಯ ಮಂಡಳಿಗೆ ಮನವಿ ಮಾಡಿದ್ದಾರೆ. ಆದರೆ ಈ ಮನವಿಗೆ ಸಂಬಂಧಿಸಿದಂತೆ ಅಂತಿಮ ನಿರ್ಧಾರವನ್ನು ಮಂಡಳಿಯೇ ತೆಗೆದುಕೊಳ್ಳಬೇಕು. 13 ವರ್ಷದ ಬಾಲಕಿಯ ವಿಚಾರಣೆ ಬಾಲ ನ್ಯಾಯ ಮಂಡಳಿಯಲ್ಲಿಯೇ ನಡೆಯಲಿದೆ. ಆರೋಪಪಟ್ಟಿ ಸಲ್ಲಿಕೆಯಾಗಿದೆ ಎಂದ ಮಾತ್ರಕ್ಕೆ ಆರೋಪ ಸಾಬೀತಾಗಿದೆ ಎಂದರ್ಥವಲ್ಲ; ಪ್ರಕರಣದ ವಿಚಾರಣೆ ಮತ್ತು ನ್ಯಾಯಾಲಯದ ನಿರ್ಧಾರ ಇನ್ನೂ ಬಾಕಿಯಿದೆ.

ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ 

Published On - 2:31 pm, Sat, 14 November 26