ಆ್ಯಂಟಿಬಾಡಿ ಱಪಿಡ್ ಟೆಸ್ಟ್ ಕಿಟ್​ಗಳ ಆಮದು, ಮಾರಾಟದಲ್ಲಿ ಭಾರಿ ಗೋಲ್ ಮಾಲ್

ನವದೆಹಲಿ: ಭಾರತಕ್ಕೆ ಚೀನಾದಿಂದ ಆಮದು ಆದ ಆ್ಯಂಟಿಬಾಡಿ ಱಪಿಡ್ ಟೆಸ್ಟ್ ಕಿಟ್​ಗಳಿಂದ ಭಾರಿ ಗೋಲ್‌ಮಾಲ್ ಆಗಿದೆ. ದೆಹಲಿ ಹೈಕೋರ್ಟ್ ಆದೇಶದಲ್ಲಿ ಗೋಲ್‌ಮಾಲ್ ಬಯಲಾಗಿದೆ. ಚೀನಾದಿಂದ 5 ಲಕ್ಷ ಱಪಿಡ್ ಕಿಟ್​ಗಳ ಆಮದಾಗಿದ್ದು, ಖಾಸಗಿ ಕಂಪನಿಗಳು ತಮಗೆ ಇಷ್ಟವಾದ ಬೆಲೆಗೆ ಮಾರಾಟ ಮಾಡಿ ಭಾರಿ ಗೋಲ್‌ಮಾಲ್ ಮಾಡಿವೆ.

ಕೆಲ ಖಾಸಗಿ ಕಂಪನಿ ಚೀನಾದಿಂದ ಆ್ಯಂಟಿಬಾಡಿ ಱಪಿಡ್ ಟೆಸ್ಟ್ ಕಿಟ್​ಗಳನ್ನು ಆಮದು ಮಾಡಿಕೊಂಡು ಬೇರೆ ಬೇರೆ ಕಂಪನಿಗಳಿಗೆ ಬೇರೆ ಬೇರೆ ಮೌಲ್ಯದಲ್ಲಿ ಕಿಟ್​ಗಳನ್ನು ಮಾರಾಟ ಮಾಡಿದೆ. ಹಣ ನೀಡದ ಹಿನ್ನೆಲೆಯಲ್ಲಿ ಖಾಸಗಿ ಕಂಪನಿ ಹೈಕೋರ್ಟ್ ಮೆಟ್ಟಿಲೇರಿದೆ. ಈ ವೇಳೆ ಱಪಿಡ್ ಟೆಸ್ಟ್ ಕಿಟ್‌ನ ಅಸಲಿ ಮೌಲ್ಯವೆಷ್ಟು, ಲಾಭವೆಷ್ಟು, ಕಮಿಷನ್ ಎಷ್ಟು ಎಂಬುದು ಬಹಿರಂಗವಾಗಿದೆ. ದೆಹಲಿ ಹೈಕೋರ್ಟ್ ಆದೇಶದಲ್ಲಿ ಎಲ್ಲವೂ ಉಲ್ಲೇಖ ಮಾಡಲಾಗಿದೆ.

ಮ್ಯಾಟ್ರಿಕ್ಸ್ ಲ್ಯಾಬ್ ಎನ್ನುವ ಕಂಪನಿ ₹12.25 ಕೋಟಿ ರೂಪಾಯಿಗೆ 5 ಲಕ್ಷ ಆ್ಯಂಟಿಬಾಡಿ ಱಪಿಡ್ ಟೆಸ್ಟ್ ಕಿಟ್​ಗಳನ್ನು ಚೀನಾದಿಂದ ಅಮದು ಮಾಡಿಕೊಂಡಿದೆ. ಆದರೆ ಅದೇ 5 ಲಕ್ಷ ಟೆಸ್ಟಿಂಗ್ ಕಿಟ್​ಗಳನ್ನು ₹21 ಕೋಟಿ ರೂಪಾಯಿಗೆ ರೇರ್ ಮೆಟಬಾಲಿಕ್ಸ್ ಕಂಪನಿಗೆ ಮಾರಾಟ ಮಾಡಿದೆ. ಬಳಿಕ ರೇರ್ ಮೆಟಬಾಲಿಕ್ಸ್ ಕಂಪನಿಯು ರಾಪಿಡ್ ಟೆಸ್ಟಿಂಗ್ ಕಿಟ್ ಗಳನ್ನು 30 ಕೋಟಿ ರೂಪಾಯಿಗೆ ICMR‌ಗೆ ಮಾರಾಟ ಮಾಡಿದೆ.

ಇನ್ನು ಈ ಖರೀದಿ, ಮಾರಾಟದಲ್ಲಿ 18.75 ಲಕ್ಷ ರೂಪಾಯಿಯನ್ನು ಮಧ್ಯವರ್ತಿಗೆ ನೀಡಲಾಗಿದೆ. ಈ ಬಗ್ಗೆಯೂ ಹೈಕೋರ್ಟ್‌ನ ಆದೇಶದಲ್ಲಿ ಉಲ್ಲೇಖಿಸಲಾಗಿದೆ. ರೇರ್ ಮೆಟಬಾಲಿಕ್ಸ್ ಕಂಪನಿಯಿಂದ ಮ್ಯಾಟ್ರಿಕ್ಸ್ ಲ್ಯಾಬ್ ಕಂಪನಿಗೆ ಬಾಕಿ ಇರುವ 8.25 ಕೋಟಿ ರೂಪಾಯಿ ಹಣ ಪಾವತಿ ಮಾಡಲು ಕೋರ್ಟ್ ಆದೇಶ ನೀಡಿದೆ. ಈಗಾಗಲೇ ಮ್ಯಾಟ್ರಿಕ್ಸ್ ಲ್ಯಾಬ್ ಕಂಪನಿ 12.75 ಕೋಟಿ ರೂಪಾಯಿ ಹಣ ಪಡೆದಿದೆ.