ಸಮಾಜದ ಏಕತೆ, ಸೇವೆ ಮತ್ತು ಪಂಚ ಪರಿವರ್ತನೆ: ಮೋಹನ್ ಭಾಗವತರ ವಿಜಯದಶಮಿ ಭಾಷಣ ಮೆಚ್ಚಿದ ಪ್ರಧಾನಿ ಮೋದಿ
ಪ್ರಧಾನಿ ಮೋದಿ ಅವರು ಮೋಹನ್ ಭಾಗವತ್ ಅವರ ವಿಜಯದಶಮಿ ಭಾಷಣವನ್ನು ಶ್ಲಾಘಿಸಿದ್ದಾರೆ. ರಾಷ್ಟ್ರ ಪ್ರಗತಿ, ಸಾಮಾಜಿಕ ಏಕತೆ, ನಿಸ್ವಾರ್ಥ ಸೇವೆ ಮತ್ತು 'ಪಂಚ ಪರಿವರ್ತನೆ' ತತ್ವಗಳ ಕುರಿತಾದ ಭಾಗವತ್ ಅವರ ಆಲೋಚನೆಗಳು ಸ್ಪೂರ್ತಿದಾಯಕವೆಂದು ಮೋದಿ ಬಣ್ಣಿಸಿದ್ದಾರೆ. ಸಾಮಾಜಿಕ ಸಾಮರಸ್ಯ, ಕುಟುಂಬ ಪ್ರಬೋಧನ, ಪರ್ಯಾವರಣ, ಸ್ವದೇಶಿ ಮತ್ತು ನಾಗರಿಕ ಕರ್ತವ್ಯಗಳ ಕುರಿತು ಭಾಗವತ್ ಪ್ರತಿಪಾದಿಸಿದ್ದಾರೆ. ಆರ್‌ಎಸ್‌ಎಸ್‌ನ ಶತಮಾನೋತ್ಸವ ವರ್ಷದಲ್ಲಿ ಈ ಸಂದೇಶಗಳು ಮಹತ್ವ ಪಡೆದಿವೆ.
ನವದೆಹಲಿ, ಅಕ್ಟೋಬರ್ 20: ಮಹಾರಾಷ್ಟ್ರದ ನಾಗ್ಪುರದಲ್ಲಿ ನಡೆದ ರಾಷ್ಟ್ರೀಯ ಸ್ವಯಂಸೇವಕ ಸಂಘದ (ಆರ್‌ಎಸ್‌ಎಸ್) ಶತಮಾನೋತ್ಸವ ವರ್ಷದ ವಿಜಯದಶಮಿ ಉತ್ಸವದಲ್ಲಿ ಸರಸಂಘಚಾಲಕ ಡಾ. ಮೋಹನ್ ಭಾಗವತ್ ಅವರು ಮಾಡಿದ ಭಾಷಣವನ್ನು ಪ್ರಧಾನಿ ನರೇಂದ್ರ ಮೋದಿ ಮುಕ್ತಕಂಠದಿಂದ ಶ್ಲಾಘಿಸಿದ್ದಾರೆ. ಈ ಭಾಷಣವು ಅತ್ಯಂತ ಸ್ಪೂರ್ತಿದಾಯಕ ಹಾಗೂ ಮಾರ್ಗದರ್ಶಕವಾಗಿದೆ ಎಂದು ಅವರು ಬಣ್ಣಿಸಿದ್ದಾರೆ.
ಸಾಮಾಜಿಕ ಜಾಲತಾಣ ಎಕ್ಸ್ನಲ್ಲಿ ಪೋಸ್ಟ್ ಹಂಚಿಕೊಂಡಿರುವ ಪ್ರಧಾನಿ ಮೋದಿ, ರಾಷ್ಟ್ರದ ಪ್ರಗತಿ, ಸಾಮಾಜಿಕ ಒಗ್ಗಟ್ಟು, ನಿಸ್ವಾರ್ಥ ಸೇವೆ ಹಾಗೂ ಸಮಾಜದ ಚಾರಿತ್ರ್ಯ ನಿರ್ಮಾಣದ ಕುರಿತು ಭಾಗವತ್ ಅವರು ಮಂಡಿಸಿದ ಪ್ರಬುದ್ಧ ಆಲೋಚನೆಗಳನ್ನು ಕೊಂಡಾಡಿದ್ದಾರೆ.
ಪ್ರಧಾನಿ ಮೋದಿ ಅವರ ಪೋಸ್ಟ್‌ನ ಪ್ರಮುಖ ಅಂಶಗಳು
ರಾಷ್ಟ್ರ ಪ್ರಗತಿ ಮತ್ತು ಸಾಮಾಜಿಕ ಏಕತೆ: ರಾಷ್ಟ್ರೀಯ ಪ್ರಗತಿ, ಸ್ವಾವಲಂಬನೆ , ಸಾಮಾಜಿಕ ಸಾಮರಸ್ಯ ಮತ್ತು ಸಮಾಜದ ನೈತಿಕ ಚಾರಿತ್ರ್ಯವನ್ನು ಬಲಪಡಿಸುವ ಕುರಿತು ಸರಸಂಘಚಾಲಕರು ಸಮಗ್ರವಾಗಿ ಮತ್ತು ವಿಸ್ತಾರವಾಗಿ ಮಾತನಾಡಿದ್ದಾರೆ.
ಸ್ವಯಂಸೇವಕರ ಸೇವಾ ಮನೋಭಾವ: ಪ್ರತಿ ಆರ್‌ಎಸ್‌ಎಸ್ ಸ್ವಯಂಸೇವಕನ ಮೂಲ ಧ್ಯೇಯವಾಗಿರುವ ನಿಸ್ವಾರ್ಥ ಸೇವೆ ಮತ್ತು ರಾಷ್ಟ್ರ ನಿರ್ಮಾಣದ ಬದ್ಧತೆಗೆ ಮೋಹನ್ ಭಾಗವತ್ ನೀಡಿದ ಒತ್ತು ಅತ್ಯಂತ ಗಮನಾರ್ಹವಾಗಿತ್ತು.
‘ಪಂಚ ಪರಿವರ್ತನೆ’ಯ ಮಹತ್ವ: ಸಮಾಜದಲ್ಲಿ ಧನಾತ್ಮಕ ಮತ್ತು ರಚನಾತ್ಮಕ ಬದಲಾವಣೆ ತರಲು ಮೋಹನ್ ಭಾಗವತ್ ಅವರು ಪ್ರಸ್ತಾಪಿಸಿದ ‘ಪಂಚ ಪರಿವರ್ತನೆ’ ತತ್ತ್ವಗಳು ಅತ್ಯಂತ ಪ್ರಸ್ತುತವಾಗಿದ್ದು, ದೇಶದ ಪ್ರತಿಯೊಬ್ಬ ಪ್ರಜೆಗೂ ಅರ್ಥಪೂರ್ಣ ಕೊಡುಗೆ ನೀಡಲು ದಾರಿದೀಪವಾಗಿವೆ ಎಂದು ಮೋದಿ ಉಲ್ಲೇಖಿಸಿದ್ದಾರೆ.
ಪೋಸ್ಟ್
ಏನಿದು ‘ಪಂಚ ಪರಿವರ್ತನೆ’?: ಆರ್‌ಎಸ್‌ಎಸ್‌ನ ಶತಮಾನೋತ್ಸವ ವರ್ಷದಲ್ಲಿ (1925–2025/2026) ಸಮಾಜ ಸುಧಾರಣೆಗಾಗಿ ರೂಪಿಸಲಾದ ಐದು ಪ್ರಮುಖ ಆಯಾಮಗಳಿವು.
ಸಾಮಾಜಿಕ ಸಾಮರಸ್ಯ : ಜಾತಿ ತಾರತಮ್ಯ ಹೋಗಲಾಡಿಸಿ ಸಮಾಜದಲ್ಲಿ ಒಗ್ಗಟ್ಟು ಮೂಡಿಸುವುದು.
ಕುಟುಂಬ ಪ್ರಬೋಧನ : ಕುಟುಂಬ ವ್ಯವಸ್ಥೆಯಲ್ಲಿ ಭಾರತೀಯ ಸಂಸ್ಕಾರ ಮತ್ತು ಮೌಲ್ಯಗಳನ್ನು ಗಟ್ಟಿಗೊಳಿಸುವುದು.
ಪರ್ಯಾವರಣ : ಪರಿಸರ ಸಂರಕ್ಷಣೆ, ಗಿಡ ನೆಡುವುದು, ನೀರಿನ ಮಿತವ್ಯಯ ಮತ್ತು ಪ್ಲಾಸ್ಟಿಕ್ ಮುಕ್ತ ಜೀವನ.
ಸ್ವದೇಶಿ ಮತ್ತು ಸ್ವಾವಲಂಬನೆ : ಸ್ಥಳೀಯ ಉತ್ಪನ್ನಗಳಿಗೆ ಆದ್ಯತೆ ನೀಡಿ ದೇಶದ ಆರ್ಥಿಕತೆಯನ್ನು ಬಲಪಡಿಸುವುದು.
ನಾಗರಿಕ ಕರ್ತವ್ಯ : ಸಂವಿಧಾನ, ಕಾನೂನು ಪಾಲನೆ ಹಾಗೂ ನಾಗರಿಕ ಶಿಸ್ತನ್ನು ಪ್ರತಿಯೊಬ್ಬ ಪ್ರಜೆಯ ದಿನಚರಿಯನ್ನಾಗಿಸುವುದು.
ಮತ್ತಷ್ಟು ಓದಿ: ಬಾಂಗ್ಲಾ, ಫ್ರಾನ್ಸ್ ಮಾದರಿಯಲ್ಲಿ ಭಾರತದಲ್ಲೂ ಆಡಳಿತ ಬದಲಾವಣೆಯ ಹುನ್ನಾರ: ಮೋಹನ್ ಭಾಗವತ್ ಕಳವಳ
ಆರ್‌ಎಸ್‌ಎಸ್ ಶತಮಾನೋತ್ಸವದ ಮಹತ್ವ: 1925 ರ ವಿಜಯದಶಮಿಯಂದು ಡಾ. ಕೇಶವ ಬಲಿರಾಮ್ ಹೆಡ್ಗೆವಾರ್ ಅವರಿಂದ ಆರಂಭವಾದ ಆರ್‌ಎಸ್‌ಎಸ್ ಇದೀಗ 100 ವರ್ಷಗಳನ್ನು ಪೂರೈಸಿದೆ. ಈ ಮಹತ್ವದ ಮೈಲಿಗಲ್ಲಿನ ಸಂದರ್ಭದಲ್ಲಿ ಸಂಘದ ಶತಮಾನೋತ್ಸವ ವರ್ಷದ ದಸರಾ ಭಾಷಣಕ್ಕೆ ದೇಶ-ವಿದೇಶಗಳಲ್ಲಿ ವ್ಯಾಪಕ ಗಮನ ದೊರೆತಿದೆ.
ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ