ಹೊಸ ಅಭಿಯಾನ ಶುರು ಮಾಡಿದ ರಾಹುಲ್ ಗಾಂಧಿ: ಇದು ಅನ್ಯಾಯದ ವಿರುದ್ಧ ಹೋರಾಡುವವರ ಧ್ವನಿಗಳಿಗೆ ಸಾಥ್

ದೆಹಲಿ, ಅ.3: ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ (Rahul Gandhi) ಅವರು ಶನಿವಾರ “ಸತ್ಯಾಗ್ರಹ” (Satyagraha) ಎಂಬ ವಿಶಿಷ್ಟ ಹಾಗೂ ಬೃಹತ್ ನೂತನ ಅಭಿಯಾನಕ್ಕೆ ಚಾಲನೆ ನೀಡಿದ್ದಾರೆ. ಭೂಮಿ, ಮಹಿಳೆಯರ ಹಕ್ಕುಗಳು, ದಲಿತ ಮತ್ತು ಒಬಿಸಿ ಹಕ್ಕುಗಳು, ಶಿಕ್ಷಣ ಹಾಗೂ ಪರೀಕ್ಷಾ ಅಕ್ರಮಗಳ ವಿರುದ್ಧ ದೇಶಾದ್ಯಂತ ವೈಯಕ್ತಿಕವಾಗಿ ಹೋರಾಡುತ್ತಿರುವ ಸಾರ್ವಜನಿಕರು ಮತ್ತು ಸಂಘಟನೆಗಳನ್ನು ಒಂದೇ ಡಿಜಿಟಲ್ ವೇದಿಕೆಯಡಿಯಲ್ಲಿ ತರುವುದು ಈ ಅಭಿಯಾನದ ಪ್ರಮುಖ ಉದ್ದೇಶವಾಗಿದೆ.

ಸಾಮಾಜಿಕ ಜಾಲತಾಣ ಎಕ್ಸ್​​​ನಲ್ಲಿ ನೂತನ ಯೋಜನೆಯನ್ನು ಘೋಷಿಸಿ ವೀಡಿಯೋ ಸಂದೇಶ ಹಂಚಿಕೊಂಡಿರುವ ರಾಹುಲ್ ಗಾಂಧಿ, ದೇಶಾದ್ಯಂತ ಲಕ್ಷಾಂತರ ಜನರು ತಮ್ಮ ಹಕ್ಕುಗಳಿಗಾಗಿ ಒಂಟಿಯಾಗಿ ಹೋರಾಡುತ್ತಿದ್ದು, ಅವರ ಧ್ವನಿಗಳನ್ನು ಡಿಜಿಟಲ್ ಭೂಪಟದ ಮೂಲಕ ಒಂದೇ ಕಡೆ ತರಲಾಗುವುದು ಎಂದು ತಿಳಿಸಿದ್ದಾರೆ.

“ಸತ್ಯ ನಮಗಿರುವ ಅತಿ ದೊಡ್ಡ ಅಸ್ತ್ರ”: ಸತ್ಯಾಗ್ರಹ ಅಭಿಯಾನದ ಉದ್ದೇಶಗಳೇನು?

ಡಿಜಿಟಲ್ ಮ್ಯಾಪ್ ಮೂಲಕ ಪ್ರಾದೇಶಿಕ ಚಳವಳಿಗಳ ಜೋಡಣೆ: ದೇಶದ ಯಾವುದೇ ಮೂಲೆಯಲ್ಲಿ ಅನ್ಯಾಯದ ವಿರುದ್ಧ ಹೋರಾಟ ನಡೆಸುತ್ತಿರುವವರು ‘ಸತ್ಯಾಗ್ರಹ’ ವೆಬ್‌ಸೈಟ್‌ಗೆ ಭೇಟಿ ನೀಡಿ ಕೇವಲ 2 ನಿಮಿಷಗಳಲ್ಲಿ ತಮ್ಮ ಚಳವಳಿ ಹಾಗೂ ಕಥೆಯನ್ನು ನೋಂದಾಯಿಸಿಕೊಳ್ಳಬಹುದು. ಈ ಮೂಲಕ ತಮ್ಮಂತೆಯೇ ಬೇರೆಲ್ಲೆಲ್ಲಾ ಹೋರಾಟಗಳು ನಡೆಯುತ್ತಿವೆ ಎಂಬುದನ್ನು ‘ಸತ್ಯಾಗ್ರಹ ನಕ್ಷೆ’ಯಲ್ಲಿ ಸಾರ್ವಜನಿಕರು ವೀಕ್ಷಿಸಬಹುದು.

ಮಹಾತ್ಮ ಗಾಂಧೀಜಿಯವರ ತತ್ವದ ಉಲ್ಲೇಖ: “ಸತ್ಯವೇ ನಮ್ಮ ಅತ್ಯಂತ ದೊಡ್ಡ ಅಸ್ತ್ರ ಎಂದು ಬಾಪು (ಮಹಾತ್ಮ ಗಾಂಧಿ) ನಮಗೆ ಕಷ್ಟದ ಸಮಯದಲ್ಲಿ ಕಲಿಸಿಕೊಟ್ಟಿದ್ದಾರೆ. ಆದರೆ ಸತ್ಯದ ಪರವಾಗಿ ನಾವೆಲ್ಲರೂ ಒಗ್ಗಟ್ಟಾಗಿ ನಿಲ್ಲುವುದು ಅದಕ್ಕಿಂತ ದೊಡ್ಡ ಅಸ್ತ್ರವಾಗಿದೆ” ಎಂದು ರಾಹುಲ್ ಗಾಂಧಿ ಪ್ರತಿಪಾದಿಸಿದ್ದಾರೆ.

ಇಲ್ಲಿದೆ ನೋಡಿ ಎಕ್ಸ್​​ ಪೋಸ್ಟ್:

ಹೋರಾಟಗಳಿಗೆ ಆಯೋಜನಾತ್ಮಕ ಬೆಂಬಲ: ವಿವಿಧ ಹಕ್ಕುಗಳಿಗಾಗಿ ಪ್ರತ್ಯೇಕವಾಗಿ ನಡೆಯುತ್ತಿರುವ ಪ್ರತಿಭಟನೆಗಳನ್ನು ಸಂಘಟಿಸಲು, ಒಂದೇ ವೇದಿಕೆಯಲ್ಲಿ ಜೋಡಿಸಲು ಮತ್ತು ಸಮಸ್ಯೆಗಳ ಪರಿಹಾರಕ್ಕಾಗಿ ಜೊತೆಯಾಗಿ ಕೆಲಸ ಮಾಡಲು ಈ ಅಭಿಯಾನ ನೆರವಾಗಲಿದೆ.

ಇದನ್ನೂ ಓದಿ: ಮಿಡ್-ಏರ್ ಹೈಡ್ರಾಮಾ ತನಿಖೆಯಲ್ಲಿ ಶಾಕಿಂಗ್ ಸತ್ಯ: ಕ್ಯಾಪ್ಟನ್ ಸ್ಮಿತ್‌ಗೆ ಚಾಕು ಇರಿದಿದ್ದ ಕೋ-ಪೈಲಟ್ ಉಗ್ರ

“ವಿಪಕ್ಷ ನಾಯಕನಾಗಿ ನಿಮ್ಮ ಪರವಾಗಿ ರಸ್ತೆಯಲ್ಲೂ, ಸಂಸತ್ತಿನಲ್ಲೂ ಹೋರಾಡುವೆ”: ರಾಹುಲ್

ವೀಡಿಯೋ ಸಂದೇಶದಲ್ಲಿ ದೇಶದಲ್ಲಿ ‘ಸತ್ಯವನ್ನು ಹತೋಟಿ ಮಾಡಲಾಗುತ್ತಿದೆ’ ಎಂದು ಆರೋಪಿಸಿದ ರಾಹುಲ್ ಗಾಂಧಿ, ಪ್ರತಿಭಟನಾಕಾರರಿಗೆ ತಮ್ಮ ಸಂಪೂರ್ಣ ಬೆಂಬಲ ವ್ಯಕ್ತಪಡಿಸಿದ್ದಾರೆ. “ವಿಪಕ್ಷ ನಾಯಕನಾಗಿ ಸತ್ಯವನ್ನು ತುಳಿಯುತ್ತಿರುವ ಸ್ಥಳಗಳಲ್ಲಿ ಜನರಿಗೆ ಸಹಾಯ ಮಾಡುವುದು ನನ್ನ ಕರ್ತವ್ಯ. ಸಂಸತ್ತಿನ ಒಳಗಾಗಲಿ, ಬೀದಿ ಹೋರಾಟದಲ್ಲಾಗಲಿ ಅಥವಾ ಪತ್ರಗಳ ಮೂಲಕವಾಗಲಿ ನಾನು ನಿಮ್ಮೊಂದಿಗೆ ನಿಲ್ಲಲು ಏನೆಲ್ಲಾ ಮಾಡಲು ಸಾಧ್ಯವೋ ಅದನ್ನೆಲ್ಲಾ ಮಾಡುತ್ತೇನೆ” ಎಂದು ರಾಹುಲ್ ಗಾಂಧಿ ವೀಡಿಯೋದಲ್ಲಿ ಸ್ಪಷ್ಟಪಡಿಸಿದ್ದಾರೆ.

ಅನ್ಯಾಯದ ವಿರುದ್ಧ ಹೋರಾಡುತ್ತಿರುವ ಪ್ರತಿಯೊಬ್ಬರೂ ಸತ್ಯಾಗ್ರಹ ವೆಬ್‌ಸೈಟ್‌ಗೆ ಭೇಟಿ ನೀಡಿ ಫಾರ್ಮ್ ಭರ್ತಿ ಮಾಡುವ ಮೂಲಕ ತಮ್ಮ ಚಳವಳಿಯನ್ನು ನೋಂದಾಯಿಸಿಕೊಳ್ಳಿ, ನಮ್ಮ ತಂಡ ನಿಮ್ಮನ್ನು ನೇರವಾಗಿ ಸಂಪರ್ಕಿಸಲಿದೆ ಎಂದು ಕರೆ ನೀಡಿದ್ದಾರೆ. ಈ ನೂತನ ‘ಸತ್ಯಾಗ್ರಹ’ ಡಿಜಿಟಲ್ ಅಭಿಯಾನವು ದೇಶಾದ್ಯಂತ ಜನ್ಮತಾಳುತ್ತಿರುವ ಸ್ಥಳೀಯ ಪ್ರತಿಭಟನೆಗಳಿಗೆ ರಾಷ್ಟ್ರೀಯ ಮಟ್ಟದ ವೇದಿಕೆ ಕಲ್ಪಿಸುವ ಕಾಂಗ್ರೆಸ್‌ನ ಪ್ರಮುಖ ರಾಜಕೀಯ ಹಾಗೂ ಸಾಮಾಜಿಕ ಹೆಜ್ಜೆಯಾಗಿ ಹೊರಹೊಮ್ಮಿದೆ.

ರಾಜಕೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ