ನಮ್ಮನ್ನು ಶತ್ರುಗಳಂತೆ ನೋಡುತ್ತಿದ್ದರು: ಮೇನಕಾ ಜೊತೆಗಿನ ಕಹಿ ಸಂಬಂಧ ಬಿಚ್ಚಿಟ್ಟ ಸೋನಿಯಾ ಗಾಂಧಿ

ನವದೆಹಲಿ, ನವೆಂಬರ್ 10: ಗಾಂಧಿ ಕುಟುಂಬದೊಳಗಿನ ಸಂಬಂಧಗಳು, ಭಿನ್ನಾಭಿಪ್ರಾಯಗಳು ಮತ್ತು ರಾಜಕೀಯ ಸಂಘರ್ಷಗಳ ಬಗ್ಗೆ ಹಲವು ವರ್ಷಗಳಿಂದ ಚರ್ಚೆಗಳು ನಡೆಯುತ್ತಿವೆ. ಇದೀಗ ಕಾಂಗ್ರೆಸ್‌ನ ಹಿರಿಯ ನಾಯಕಿ ಸೋನಿಯಾ ಗಾಂಧಿ ತಮ್ಮ ಹೊಸ ಆತ್ಮಚರಿತ್ರೆ ಬಿಲಾಂಗಿಂಗ್: ಎ ಜರ್ನಿ ಆಫ್ ಲವ್ ಪುಸ್ತಕದಲ್ಲಿ ಕುಟುಂಬದೊಳಗಿನ ಕೆಲವು ಕಹಿ ಅನುಭವಗಳನ್ನು ಹಂಚಿಕೊಂಡಿದ್ದಾರೆ. ವಿಶೇಷವಾಗಿ ಮೇನಕಾ ಗಾಂಧಿ ಮತ್ತು ಅವರ ನಡುವಿನ ಸಂಬಂಧ ಹೇಗೆ ಹದಗೆಟ್ಟಿತು ಎಂಬುದನ್ನು ವಿವರಿಸಿದ್ದಾರೆ.

1970ರ ದಶಕದಲ್ಲಿ ಮೇನಕಾ ಗಾಂಧಿ ಕುಟುಂಬಕ್ಕೆ ಬಂದಾಗ ಅವರ ಬಗ್ಗೆ ಸೋನಿಯಾ ಅವರಿಗೆ ಒಳ್ಳೆಯ ಅಭಿಪ್ರಾಯವಿತ್ತು. ಆದರೆ ಕಾಲಕ್ರಮೇಣ ಮನೆಯೊಳಗಿನ ಭಿನ್ನಾಭಿಪ್ರಾಯಗಳು ಹೆಚ್ಚಾದವು. ಮೇನಕಾ ತಮ್ಮನ್ನು ಮತ್ತು ರಾಜೀವ್ ಗಾಂಧಿಯನ್ನು ಶತ್ರುಗಳಂತೆ ನೋಡುತ್ತಿದ್ದರು. ಪತ್ರಕರ್ತರ ಮೂಲಕ ತಮ್ಮ ಕುಟುಂಬದ ಬಗ್ಗೆ ತಪ್ಪು ಸುದ್ದಿಗಳನ್ನು ಹರಡುತ್ತಿದ್ದರು ಎಂದು ಸೋನಿಯಾ ಪುಸ್ತಕದಲ್ಲಿ ಬರೆದಿದ್ದಾರೆ.

ಆರಂಭದಲ್ಲಿ ಮೇನಕಾ ಬಗ್ಗೆ ಸೋನಿಯಾ ಅವರ ಅಭಿಪ್ರಾಯವೇನಿತ್ತು? ಸೋನಿಯಾ ಗಾಂಧಿ ಅವರ ಪ್ರಕಾರ, 1973ರ ಕೊನೆಯಲ್ಲಿ ಸಂಜಯ್ ಗಾಂಧಿ ಮೇನಕಾ ಅವರನ್ನು ಪರಿಚಯಿಸಿದ್ದರು. ಆಗ ಮೇನಕಾ ಕೇವಲ 16 ವರ್ಷದ ಯುವತಿಯಾಗಿದ್ದರು. ಸೋನಿಯಾ ಅವರನ್ನು ಸುಂದರ, ಉತ್ಸಾಹಭರಿತ ಮತ್ತು ಮಾತನಾಡುವ ಸ್ವಭಾವದ ಹುಡುಗಿ ಎಂದು ವಿವರಿಸಿದ್ದಾರೆ.

ಮೇನಕಾ ಕುಟುಂಬದ ಕಿರಿಯ ಸೊಸೆಯಾಗಿ ಬಂದಾಗ, ಇಬ್ಬರೂ ಮನೆಯ ಸಮಾನ ಹೆಣ್ಣುಮಕ್ಕಳಂತೆ ಬದುಕಬಹುದು ಎಂದು ಸೋನಿಯಾ ಭಾವಿಸಿದ್ದರು. ಆದರೆ ಕೆಲವೇ ವರ್ಷಗಳಲ್ಲಿ ಪರಿಸ್ಥಿತಿ ಬದಲಾಗತೊಡಗಿತು. ಸಣ್ಣಪುಟ್ಟ ಭಿನ್ನಾಭಿಪ್ರಾಯಗಳು ದೊಡ್ಡ ಜಗಳಗಳಾಗಿ ಮಾರ್ಪಟ್ಟವು ಎಂದು ಅವರು ನೆನಪಿಸಿಕೊಂಡಿದ್ದಾರೆ.

ಮನೆಯಲ್ಲೇ ಜಗಳ, ಅತ್ತೆಯ ಮುಂದೆಯೇ ಅಸಭ್ಯ ಮಾತು ಸೋನಿಯಾ ಬರೆದಿರುವ ಪ್ರಕಾರ, ಸಂಜಯ್ ಮತ್ತು ಮೇನಕಾ ನಡುವೆ ಆಗಾಗ ಜಗಳಗಳು ನಡೆಯುತ್ತಿದ್ದವು. ಕುಟುಂಬದ ಸದಸ್ಯರೆಲ್ಲರೂ ಈ ಜಗಳಗಳನ್ನು ಗಮನಿಸುತ್ತಿದ್ದರು. ಕೆಲವೊಮ್ಮೆ ಮೇನಕಾ, ಇಂದಿರಾ ಗಾಂಧಿ ಅವರ ಮುಂದೆಯೇ ಅಸಭ್ಯ ಪದಗಳನ್ನು ಬಳಸುತ್ತಿದ್ದರು. ಇದರಿಂದ ಕುಟುಂಬದವರಿಗೆ ಮುಜುಗರ ಮತ್ತು ಆಘಾತವಾಗುತ್ತಿತ್ತು ಎಂದು ಸೋನಿಯಾ ಹೇಳಿದ್ದಾರೆ.

ಮನೆಯ ಶಾಂತಿ ಕಾಪಾಡಲು ತಾವು ಆರಂಭದಲ್ಲಿ ಮೌನವಾಗಿರುತ್ತಿದ್ದೆವು. ಆದರೆ ಸಹಿಸಲಾಗದ ಸಂದರ್ಭಗಳಲ್ಲಿ ಮಾತ್ರ ಪ್ರತಿಕ್ರಿಯಿಸುತ್ತಿದ್ದೆವು ಎಂದು ಅವರು ಬರೆದಿದ್ದಾರೆ.

ಇದನ್ನೂ ಓದಿ: ಪ್ರಧಾನಿಯಾಗಲು ಬಯಸಿದ್ದರಾ ಪ್ರಣಬ್ ಮುಖರ್ಜಿ?; ಸೋನಿಯಾ ಗಾಂಧಿ ಆತ್ಮಕತೆಯಲ್ಲಿ ಸ್ಫೋಟಕ ಸಂಗತಿ ಬಯಲು

ರಾಜೀವ್ ಮತ್ತು ಸಂಜಯ್ ನಡುವೆ ಹೆಚ್ಚಿದ ಭಿನ್ನಾಭಿಪ್ರಾಯ 1978ರ ಚುನಾವಣೆಯಲ್ಲಿ ಕಾಂಗ್ರೆಸ್‌ಗೆ ಉಂಟಾದ ಹಿನ್ನಡೆಗೆ ಸಂಜಯ್ ಗಾಂಧಿ ಅವರ ನಿರ್ಧಾರಗಳೂ ಕಾರಣ ಎಂದು ರಾಜೀವ್ ಭಾವಿಸಿದ್ದರು ಎಂದು ಸೋನಿಯಾ ಉಲ್ಲೇಖಿಸಿದ್ದಾರೆ. ಸಂಜಯ್ ಅವರ ಆತುರದ ನಿರ್ಧಾರಗಳು, ತಾಯಿಯ ಗಮನಕ್ಕೆ ತರದೆ ಕೈಗೊಂಡ ಕ್ರಮಗಳು ಮತ್ತು ಹಿರಿಯರ ಸಲಹೆಗಳನ್ನು ನಿರ್ಲಕ್ಷಿಸಿದ್ದು ಪಕ್ಷಕ್ಕೆ ಹಾನಿ ಮಾಡಿದೆ ಎಂಬುದು ರಾಜೀವ್ ಅವರ ಅಭಿಪ್ರಾಯವಾಗಿತ್ತು. ಒಂದು ಕುಟುಂಬದ ಚರ್ಚೆಯ ಸಂದರ್ಭದಲ್ಲಿ, “ನೀನು ಅಮ್ಮನನ್ನು ಈ ಸ್ಥಿತಿಗೆ ತಂದಿದ್ದೀಯ, ನಿನ್ನನ್ನು ಕ್ಷಮಿಸಲು ಸಾಧ್ಯವಿಲ್ಲ” ಎಂದು ರಾಜೀವ್ ಸಂಜಯ್‌ಗೆ ಹೇಳಿದ್ದರು ಎಂಬುದನ್ನೂ ಸೋನಿಯಾ ನೆನಪಿಸಿಕೊಂಡಿದ್ದಾರೆ.

ಸಂಜಯ್ ನಿಧನದ ಬಳಿಕ ಮತ್ತಷ್ಟು ಬಿರುಕು 1980ರ ಜೂನ್ 23ರಂದು ವಿಮಾನ ಅಪಘಾತದಲ್ಲಿ ಸಂಜಯ್ ಗಾಂಧಿ ನಿಧನರಾದರು. ಆಗ ಮೇನಕಾ ಅವರಿಗೆ ಕೇವಲ 23 ವರ್ಷ ವಯಸ್ಸಾಗಿತ್ತು. ಅವರ ಮಗ ವರುಣ್ ಗಾಂಧಿ ಮೂರು ತಿಂಗಳ ಮಗುವಾಗಿದ್ದರು. ಸಂಜಯ್ ನಿಧನದ ಬಳಿಕ ಮೇನಕಾ ಅವರಿಗೆ ರಾಜಕೀಯದಲ್ಲಿ ಸ್ಥಾನ ನೀಡಬೇಕು ಎಂಬ ಒತ್ತಡ ಕುಟುಂಬದೊಳಗೆ ಉಂಟಾಗಿತ್ತು ಎಂದು ಸೋನಿಯಾ ಬರೆದಿದ್ದಾರೆ. ಆದರೆ ಇಂದಿರಾ ಗಾಂಧಿ, ಮೇನಕಾ ಇನ್ನೂ ಚಿಕ್ಕವರಾಗಿದ್ದು, ಮಗುವಿನ ಆರೈಕೆಗೆ ಸಮಯ ನೀಡಬೇಕು ಎಂದು ಭಾವಿಸಿದ್ದರು ಎನ್ನಲಾಗಿದೆ.

ಇದಾದ ಬಳಿಕ ಮೇನಕಾ ಮತ್ತು ಇಂದಿರಾ ಗಾಂಧಿ ನಡುವಿನ ಸಂಬಂಧವೂ ಹದಗೆಟ್ಟಿತು. ವರುಣ್ ಗಾಂಧಿ ಮೊದಲ ಹುಟ್ಟುಹಬ್ಬದ ಆಚರಣೆಯನ್ನು ಇಂದಿರಾ ಸೂಚಿಸಿದ ರೀತಿಯಲ್ಲಿ ನಡೆಸದೆ, ಬಿಜೆಪಿ ನಾಯಕಿ ವಸುಂಧರಾ ರಾಜೆ ಅವರ ಮನೆಯಲ್ಲಿ ಆಯೋಜಿಸಿದ್ದು ಇಂದಿರಾ ಅವರಿಗೆ ನೋವುಂಟು ಮಾಡಿತ್ತು ಎಂದು ಸೋನಿಯಾ ವಿವರಿಸಿದ್ದಾರೆ.

ಇಂದಿರಾ ಗಾಂಧಿ ಮನೆಯಿಂದ ಮೇನಕಾ ಹೊರಬಂದಿದ್ದು ಏಕೆ? ಸೋನಿಯಾ ಅವರ ಬರಹದ ಪ್ರಕಾರ, ಮೇನಕಾ ತಮ್ಮ ರಾಜಕೀಯ ಚಟುವಟಿಕೆಗಳನ್ನು ಮುಂದುವರಿಸುತ್ತಿದ್ದ ರೀತಿಗೆ ಇಂದಿರಾ ಗಾಂಧಿ ಅಸಮಾಧಾನಗೊಂಡಿದ್ದರು. ಒಂದು ಹಂತದಲ್ಲಿ ಮೇನಕಾ ಮನೆಯಲ್ಲಿದ್ದ ತಮ್ಮ ವಸ್ತುಗಳನ್ನು ಹೊರಗೆ ಸಾಗಿಸಲು ಆರಂಭಿಸಿದರು. ಲಂಡನ್ ಪ್ರವಾಸದಲ್ಲಿದ್ದ ಇಂದಿರಾ ಅವರಿಗೆ ಈ ವಿಷಯ ತಿಳಿದಿತ್ತು. ಭಾರತಕ್ಕೆ ಮರಳಿದ ಬಳಿಕ ಮೇನಕಾ ಅವರೊಂದಿಗೆ ಮಾತನಾಡಿ, ಕುಟುಂಬದೊಂದಿಗೆ ಇರಬೇಕೇ ಅಥವಾ ಬೇರೆಡೆ ವಾಸಿಸಬೇಕೇ ಎಂಬುದನ್ನು ನಿರ್ಧರಿಸುವಂತೆ ಸೂಚಿಸಿದ್ದರು ಎಂದು ಸೋನಿಯಾ ಬರೆದಿದ್ದಾರೆ.

ಆ ಬಳಿಕ ಮೇನಕಾ ಮನೆಯಿಂದ ಹೊರಬಂದರು. ಈ ಘಟನೆಯು ಮಾಧ್ಯಮಗಳಲ್ಲಿ ದೊಡ್ಡ ಸುದ್ದಿಯಾಯಿತು. ಇಡೀ ಘಟನೆಯನ್ನು ಸಾರ್ವಜನಿಕ ಪ್ರಚಾರದ ಭಾಗವಾಗಿ ರೂಪಿಸಲಾಯಿತು ಎಂಬುದು ಸೋನಿಯಾ ಅವರ ಆರೋಪ.

ಮೊಮ್ಮಗ ವರುಣ್ ಗಾಂಧಿಯನ್ನು ಭೇಟಿಯಾಗುವ ವಿಚಾರದಲ್ಲೂ ವಿವಾದ ಮೇನಕಾ ಮನೆಯಿಂದ ಹೊರಬಂದ ಬಳಿಕ, ಗಾಂಧಿ ಕುಟುಂಬ ಮತ್ತು ಅವರ ನಡುವೆ ವರುಣ್ ಗಾಂಧಿಯನ್ನು ಭೇಟಿಯಾಗುವ ವಿಚಾರದಲ್ಲೂ ಭಿನ್ನಾಭಿಪ್ರಾಯ ಉಂಟಾಯಿತು. ವರುಣ್ ಅವರನ್ನು ಭೇಟಿಯಾಗಲು ಇಂದಿರಾ ಗಾಂಧಿ ಕಾನೂನು ಹೋರಾಟವನ್ನೂ ನಡೆಸಿದ್ದರು ಎಂದು ಸೋನಿಯಾ ಬರೆದಿದ್ದಾರೆ.

ವರುಣ್ ಅವರ ನಾಲ್ಕನೇ ಹುಟ್ಟುಹಬ್ಬದ ಸಂದರ್ಭದಲ್ಲಿ, ಇಂದಿರಾ ಗಾಂಧಿ ಪಂಜಾಬ್ ಪ್ರವಾಸದಲ್ಲಿದ್ದ ಕಾರಣ ಮಗುವಿಗೆ ಉಡುಗೊರೆಗಳನ್ನು ತಲುಪಿಸಲು ಸೋನಿಯಾ ಅವರನ್ನು ಕೇಳಿದ್ದರು. ಆದರೆ ಮರುದಿನ ಪತ್ರಿಕೆಗಳಲ್ಲಿ ವರುಣ್ ಅವರನ್ನು ಅಪಹರಿಸಲು ಸೋನಿಯಾರನ್ನು ಕಳುಹಿಸಲಾಗಿತ್ತು ಎಂಬ ಆರೋಪ ಪ್ರಕಟವಾಯಿತು ಎಂದು ಅವರು ನೆನಪಿಸಿಕೊಂಡಿದ್ದಾರೆ.

ರಾಜಕೀಯವಾಗಿ ಬೇರೆ ಹಾದಿ ಹಿಡಿದ ಮೇನಕಾ ಸಂಜಯ್ ಗಾಂಧಿ ನಿಧನದ ನಂತರ ಮೇನಕಾ ಗಾಂಧಿ ತಮ್ಮದೇ ರಾಜಕೀಯ ಹಾದಿಯನ್ನು ಆಯ್ಕೆ ಮಾಡಿಕೊಂಡರು. 1984ರ ಲೋಕಸಭಾ ಚುನಾವಣೆಯಲ್ಲಿ ಅವರು ಸ್ವತಂತ್ರ ಅಭ್ಯರ್ಥಿಯಾಗಿ ಸ್ಪರ್ಧಿಸಿ ರಾಜೀವ್ ಗಾಂಧಿ ವಿರುದ್ಧ ಸೋಲು ಅನುಭವಿಸಿದರು. 1988ರಲ್ಲಿ ವಿ.ಪಿ. ಸಿಂಗ್ ನೇತೃತ್ವದ ಜನತಾದಳ ಸೇರಿದರು. ನಂತರ 2004ರಲ್ಲಿ ಭಾರತೀಯ ಜನತಾ ಪಕ್ಷಕ್ಕೆ ಸೇರ್ಪಡೆಯಾದರು.ಮೇನಕಾ ಗಾಂಧಿ ಮತ್ತು ಅವರ ಪುತ್ರ ವರುಣ್ ಗಾಂಧಿ ಇಬ್ಬರೂ ಹಲವು ವರ್ಷಗಳ ಕಾಲ ಬಿಜೆಪಿಯಲ್ಲಿ ರಾಜಕೀಯವಾಗಿ ಸಕ್ರಿಯರಾಗಿದ್ದರು.

ಆತ್ಮಚರಿತ್ರೆ ಈಗೇಕೆ ಚರ್ಚೆಯಲ್ಲಿದೆ? ಸೋನಿಯಾ ಗಾಂಧಿ ಅವರ 544 ಪುಟಗಳ ಬಿಲಾಂಗಿಂಗ್: ಎ ಜರ್ನಿ ಆಫ್ ಲವ್ ಆತ್ಮಚರಿತ್ರೆ 2026ರ ನವೆಂಬರ್ 10ರಂದು ಬಿಡುಗಡೆಯಾಗಿದೆ. ಈ ಪುಸ್ತಕದಲ್ಲಿ ಇಟಲಿಯಲ್ಲಿನ ಬಾಲ್ಯ, ರಾಜೀವ್ ಗಾಂಧಿ ಜೊತೆಗಿನ ಪ್ರೀತಿ, ಗಾಂಧಿ ಕುಟುಂಬದ ಜೀವನ, ಇಂದಿರಾ ಗಾಂಧಿ ಅವರೊಂದಿಗಿನ ಸಂಬಂಧ, ಕುಟುಂಬದ ದುರಂತಗಳು ಮತ್ತು ರಾಜಕೀಯ ಪ್ರವೇಶದ ಬಗ್ಗೆ ಸೋನಿಯಾ ತಮ್ಮ ನೆನಪುಗಳನ್ನು ಹಂಚಿಕೊಂಡಿದ್ದಾರೆ. ಇದು ರಾಜಕೀಯ ಪುಸ್ತಕವಲ್ಲ, ತಮ್ಮ ಜೀವನ ಮತ್ತು ಕುಟುಂಬದ ಅನುಭವಗಳನ್ನು ಪ್ರಾಮಾಣಿಕವಾಗಿ ದಾಖಲಿಸುವ ವೈಯಕ್ತಿಕ ಬರಹ ಎಂದು ಸೋನಿಯಾ ಈ ಹಿಂದೆ ಹೇಳಿದ್ದರು.

ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ 

Published On - 9:25 pm, Tue, 10 November 26