ಡಿಪೋ ದರ್ಪಣ್, ಅನ್ನಮಿತ್ರ, ಅನ್ನ ಸಹಾಯತಾ ಆ್ಯಪ್​ ಬಿಡುಗಡೆ ಮಾಡಿದ ಕೇಂದ್ರ ಸಚಿವ ಪ್ರಲ್ಹಾದ್ ಜೋಶಿ

ನವದೆಹಲಿ, ಮೇ 20: ಇಚ್ಛಾಶಕ್ತಿ, ತಂತ್ರಜ್ಞಾನ ಎರಡಿದ್ದರೆ ದೇಶದಲ್ಲಿ ಯಾವ ಬದಲಾವಣೆಯೂ ಕಷ್ಟವಲ್ಲ ಎಂದು ಕೇಂದ್ರ ಗ್ರಾಹಕ ವ್ಯವಹಾರಗಳ ಸಚಿವ  ಪ್ರಲ್ಹಾದ್ ಜೋಶಿ(Pralhad Joshi) ಹೇಳಿದ್ದಾರೆ. ಈ ಮೊದಲು ನಮ್ಮ ಸರ್ಕಾರವು ಟಿಜಿಟಲ್ ಪೇಮೆಂಟ್ ಪರಿಚಯಿಸಿದಾಗ ಹಳ್ಳಿಗಳಲ್ಲಿರುವವರು, ರೈತರು ಇದೆಲ್ಲಾ ಹೇಗೆ ಬಳಸೋಕಾಗುತ್ತೆ ಎಂದು ಕೆಲವರು ಹೇಳಿದ್ದರು. ಆದರೆ ಈಗ ಹಳ್ಳಿಗಳಿಂದ ಹಿಡಿದು ತರಕಾರಿ ವ್ಯಾಪಾರ, ಸಣ್ಣಪುಟ್ಟ ವ್ಯವಹಾರ ಮಾಡುವವರು ಕೂಡ ಈ ಡಿಜಿಟಲ್ ಪಾವತಿಯನ್ನು ಬಳಕೆ ಮಾಡುತ್ತಿದ್ದಾರೆ ಎಂದರು.

ಪ್ರಲ್ಹಾದ್ ಜೋಶಿ ಇಂದು ನವದೆಹಲಿಯಲ್ಲಿ ಡಿಪೋ ದರ್ಪಣ್, ಅನ್ನ ಮಿತ್ರ ಮತ್ತು ಅನ್ನ ಸಹಾಯತ ಅಪ್ಲಿಕೇಶನ್‌ಗಳನ್ನು ಬಿಡುಗಡೆ ಮಾಡಿದರು. ಡಿಜಿಟಲ್ ನಾವೀನ್ಯತೆಯ ಮೂಲಕ ದೇಶದ ಆಹಾರ ಭದ್ರತೆಯನ್ನು ಮುನ್ನಡೆಸುವ ಸರ್ಕಾರದ ಗುರಿಯೊಂದಿಗೆ ಈ ಅಪ್ಲಿಕೇಶನ್‌ಗಳು ಹೊರಬಂದಿವೆ ಎಂದರು.
ಸಮಾಜದ ಕಟ್ಟ ಕಡೆಯ ವ್ಯಕ್ತಿಯವರೆಗೆ ಯೋಜನೆಗಳು ತಲುಪುವಂತಾಗಬೇಕು ಎಂಬುದು ಸರ್ಕಾರದ ಆಲೋಚನೆ. ಈ ಇಚ್ಛಾಶಕ್ತಿ ಮೊದಲೇ ಇದ್ದರೂ ಅದನ್ನು ಕಾರ್ಯರೂಪಕ್ಕೆ ತರುವುದು ಮುಖ್ಯವಾಗುತ್ತದೆ ಎಂದರು. ಕಳೆದ 11 ವರ್ಷಗಳಲ್ಲಿ ಭಾರತ ಸರ್ಕಾರವು ಡಿಬಿಟಿ, ಬ್ಯಾಂಕ್ ರಾಷ್ಟ್ರೀಕರಣ ಸೇರಿದಂತೆ ಹಲವು ಕ್ರಮಗಳನ್ನು ತೆಗೆದುಕೊಂಡಿದೆ.

ಇ-ಆಡಳಿತದ ಸಾಧನವಾಗಿ ಈ ಅಪ್ಲಿಕೇಶನ್‌ಗಳು ದೇಶದ ಕೃಷಿ ಮೂಲಸೌಕರ್ಯ ಮತ್ತು ಸಾರ್ವಜನಿಕ ವಿತರಣಾ ವ್ಯವಸ್ಥೆಯನ್ನು ಆಧುನೀಕರಿಸಲು ಸಹಾಯ ಮಾಡುತ್ತದೆ ಎಂದು ಹೇಳಿದರು. ಹೆಚ್ಚಿದ ದಕ್ಷತೆ, ಸೇವಾ ಗುಣಮಟ್ಟ, ಮೂಲಸೌಕರ್ಯ ಮತ್ತು ಕಾರ್ಯಾಚರಣೆಯ ದಕ್ಷತೆಯನ್ನು ಅವು ಬೆಳೆಸುತ್ತವೆ ಎಂದರು.
ಇತ್ತೀಚಿನ ತಂತ್ರಜ್ಞಾನದ ಮೂಲಕ ಈ ಅಪ್ಲಿಕೇಶನ್‌ಗಳು ಪಾರದರ್ಶಕತೆ ಮತ್ತು ಹೊಣೆಗಾರಿಕೆಯನ್ನು ಸುಗಮಗೊಳಿಸುತ್ತವೆ.

ಡಿಪೋ ದರ್ಪಣ್ ಮೊಬೈಲ್ ಅಪ್ಲಿಕೇಶನ್ ಮೇಲ್ವಿಚಾರಣಾ ಅಧಿಕಾರಿಗಳಿಗೆ ಯಾವುದೇ ಸಮಯದಲ್ಲಿ, ಎಲ್ಲಿಯಾದರೂ ಗೋದಾಮಿನ ಕಾರ್ಯಕ್ಷಮತೆಯನ್ನು ಟ್ರ್ಯಾಕ್ ಮಾಡಲು ಅನುವು ಮಾಡಿಕೊಡುತ್ತದೆ. ಇದು ಸ್ಮಾರ್ಟ್ ಗೋದಾಮಿನ ತಂತ್ರಜ್ಞಾನಗಳು, ಸಿಸಿಟಿವಿ ಕಣ್ಗಾವಲು ಮತ್ತು ಐಒಟಿ ಸಂವೇದಕಗಳೊಂದಿಗೆ ಸಂಯೋಜಿಸಲ್ಪಟ್ಟಿದೆ.

ಮತ್ತಷ್ಟು ಓದಿ: ಇ-ಕಾಮರ್ಸ್‌ ತಾಣಗಳಲ್ಲಿ ಪಾಕ್‌ ಸರಕು ಮಾರಿದರೆ ಹುಷಾರ್‌: ಕೇಂದ್ರ ಸಚಿವ ಪ್ರಲ್ಹಾದ್ ಜೋಶಿ ಎಚ್ಚರಿಕೆ

ಮತ್ತೊಂದೆಡೆ, ಅನ್ನ ಸಹಾಯತಾ ಅಪ್ಲಿಕೇಶನ್ ಇದೇ ಮೊದಲ ಬಾರಿಗೆ ಧ್ವನಿ ಮತ್ತು ಸಂದೇಶ ಕುಂದುಕೊರತೆ ವೇದಿಕೆಯಾಗಿದ್ದು, ನಾಗರಿಕರು ತಮ್ಮ ಸ್ಥಳೀಯ ಭಾಷೆಗಳಲ್ಲಿ ನೈಜ-ಸಮಯದ ಟ್ರ್ಯಾಕಿಂಗ್ ಮತ್ತು ಪ್ರತಿಕ್ರಿಯೆಯೊಂದಿಗೆ ದೂರುಗಳನ್ನು ನೋಂದಾಯಿಸಲು ಅನುವು ಮಾಡಿಕೊಡುತ್ತದೆ.

ಇದಲ್ಲದೆ, ಅನ್ನ ಮಿತ್ರ ಎಫ್‌ಡಿಎಸ್ ಡೀಲರ್‌ಗಳು, ಆಹಾರ ನಿರೀಕ್ಷಕರು, ಜಿಲ್ಲಾ ಅಧಿಕಾರಿಗಳು ಸೇರಿದಂತೆ ಇತರರಿಗೆ ಪಡಿತರ ವಿತರಣೆಗೆ ನೈಜ-ಸಮಯದ ಕಮಾಂಡ್ ಕೇಂದ್ರವಾಗಿ ಕಾರ್ಯನಿರ್ವಹಿಸುತ್ತದೆ. ಇದು ಮಾಸಿಕ ಮಾರಾಟ, ತಪಾಸಣೆ ವರದಿಗಳು ಮತ್ತು ಸರ್ಕಾರಿ ನವೀಕರಣಗಳ ಮಾಹಿತಿಯನ್ನು ಸಹ ಒದಗಿಸುತ್ತದೆ.

ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ