ಚಲಿಸುತ್ತಿದ್ದ ರೈಲಿನ ಅರ್ಧದಷ್ಟು ಬೋಗಿಗಳು ಮಾರ್ಗ ಮಧ್ಯದಲ್ಲಿ ನಾಪತ್ತೆ

ಚಲಿಸುತ್ತಿದ್ದ ರೈಲಿನ ಅರ್ಧದಷ್ಟು ಬೋಗಿಗಳು ಮಾರ್ಗಮಧ್ಯದಲ್ಲಿ ನಾಪತ್ತೆಯಾಗಿರುವ ಘಟನೆ ಉತ್ತರ ಪ್ರದೇಶದ ಬಿಜ್ನೋರ್​ನಲ್ಲಿ ನಡೆದಿದೆ. ಫಿರೋಜ್​ಪುರದಿಂದ ಧನ್​ಬಾದ್​ಗೆ ಹೋಗುತ್ತಿದ್ದ ಕಿಸಾನ್ ಎಕ್ಸ್​ಪ್ರೆಸ್​ ರೈಲು ಸಂಪರ್ಕ ಕಡಿತಗೊಂಡಿದ್ದರಿಂದ ಎರಡು ಭಾಗಗಳಾಗಿ ವಿಂಗಡಣೆಗೊಂಡಿತ್ತು.

ಎಂಜಿನ್​ಗೆ ಸಂಪರ್ಕಗೊಂಡಿದ್ದ ಭಾಗವು ಎಂಜಿನೊಂದಿಗೆ ಮುಂದೆ ಹೋದರೆ ಇನ್ನರ್ಧ ಭಾಗವು ರೈಲ್ವೆ ಹಳಿ ಮೇಲೆ ಸ್ವಲ್ಪ ದೂರ ಓಡಿ ಬಳಿಕ ನಿಂತಿದ್ದವು. 8 ಬೋಗಿಗಳು ನಾಪತ್ತೆಯಾಗಿದ್ದವು. ರೈಲ್ವೆ ನಿಲ್ದಾಣಕ್ಕೆ ರೈಲು ಬಂದ ನಂತರ ಈ ಬಗ್ಗೆ ಮಾಹಿತಿ ಸಿಕ್ಕಿತ್ತು, ಈ ಘಟನೆಯಲ್ಲಿ ಯಾವುದೇ ಅಪಾಯ ಸಂಭವಿಸಿಲ್ಲ, ಸ್ಥಳಕ್ಕಾಗಮಿಸಿರುವ ರೈಲ್ವೆ ಅಧಿಕಾರಿಗಳು ರೈಲಿನ ಎರಡೂ ಭಾಗಗಳಿಗೆ ಸಂಪರ್ಕ ಕಲ್ಪಿಸುವ ಪ್ರಯತ್ನ ಆರಂಭಿಸಿದ್ದಾರೆ. ಈ ಘಟನೆ ಇಂದು ಮುಂಜಾನೆ ಸಂಭವಿಸಿದೆ. ಅದೃಷ್ಟವಶಾತ್ ಯಾವುದೇ ಪ್ರಯಾಣಿಕರಿಗೆ ಗಾಯಗಳಾಗಿಲ್ಲ. ಘಟನೆ ವೇಳೆ ರೈಲಿನ ವೇಗ 80.ಕಿ.ಮೀಗಿಂತಲೂ ಹೆಚ್ಚಿತ್ತು.

ಮೊರಾದಾಬಾದ್​ನ ಮುಂದೆ ಸಿಯೋಹರಾ ಹಾಗೂ ಧಂಪುರ್ ನಿಲ್ದಾಣಗಳ ನಡುವೆ ಅಪಘಾತ ಸಂಭವಿಸಿದೆ. ಚಕ್ರಮಲ್ ಗ್ರಾಮದ ಬಳಿ ಎಸ್​3 ಮತ್ತು ಎಸ್​4 ಬೋಗಿಗೆ ಸಂಪರ್ಕ ಕಲ್ಪಿಸುವ ಬೋಗಿಯ ಜೋಡಣೆ ಮುರಿದುಬಿದ್ದಿತ್ತು. ಈ ಕಾರಣದಿಂದಾಗಿ ಎಂಜಿನ್​ 13 ಬೋಗಿಗಳನ್ನು ಹೊತ್ತು 4 ಕಿ.ಮೀ ಮುಂದಕ್ಕೆ ಚಲಿಸಿತು. 8 ಬೋಗಿಗಳ ಹಿಂದೆ ಉಳಿದಿದ್ದವು.

ಮತ್ತಷ್ಟು ಓದಿ: Train Accident: ಪಶ್ಚಿಮ ಬಂಗಾಳದಲ್ಲಿ ಕಾಂಚನಜುಂಗಾ ಎಕ್ಸ್​ಪ್ರೆಸ್​ಗೆ ಗೂಡ್ಸ್​ ರೈಲು ಡಿಕ್ಕಿ, 8 ಮಂದಿ ಸಾವು, 30 ಜನರಿಗೆ ಗಾಯ

ಪೊಲೀಸ್​ ನೇಮಕಾತಿ ಪರೀಕ್ಷೆಗೆ ಹಾಜರಾಗಲು ಅನೇಕ ಅಭ್ಯರ್ಥಿಗಳು ಈ ರೈಲಿನಲ್ಲಿ ಕುಳಿತಿದ್ದರು. ಪೊಲೀಸರು ಮತ್ತು ಆಡಳಿತ ಮಂಡಳಿ ತರಾತುರಿಯಲ್ಲಿ ಬಸ್ ಹಾಗೀ ಇತರೆ ಮಾರ್ಗಗಳ ಮೂಲಕ ಅವರೆಲ್ಲರನ್ನೂ ಪರೀಕ್ಷಾ ಕೇಂದ್ರಕ್ಕೆ ಕಳುಹಿಸಿದರು.

ತಾಂತ್ರಿಕ ದೋಷದಿಂದ ಈ ಅವಘಡ ಸಂಭವಿಸಿದೆ ಎಂದು ರೈಲ್ವೆ ಅಧಿಕಾರಿಗಳು ತಿಳಿಸಿದ್ದಾರೆ. ಕಿಸಾನ್ ರೈಲಿನ ಹಿಂದೆ ಬೇರೆ ಯಾವುದೇ ರೈಲು ಬರದಿರುವುದು ಅದೃಷ್ಟ, ಇಲ್ಲದಿದ್ದರೆ ದೊಡ್ಡ ಅನಾಹುತ ಸಂಭವಿಸುತ್ತಿತ್ತು ಎಂದು ರೈಲ್ವೆ ಅಧಿಕಾರಿಗಳು ಹೇಳಿದ್ದಾರೆ.ಈ ರೈಲಿನಲ್ಲಿ ಒಟ್ಟು 22 ಬೋಗಿಗಳಿದ್ದು, ಈ ಪೈಕಿ 8 ಬೋಗಿಗಳು ಸಂಪರ್ಕ ಕಳೆದುಕೊಂಡಿದ್ದವು.

ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ