ನಾನು ಹೇಳಿದ್ದೆಲ್ಲ ಸುಳ್ಳು.. ಪ್ರತಿಭಟನಾಕಾರರು ನನಗೆ ಹೊಡೆದು, ಬಲವಂತವಾಗಿ ಹೀಗೆ ಹೇಳಿಸಿದರು.. ಪೊಲೀಸರೆದುರು ಆರೋಪಿ ಉಲ್ಟಾ ಹೇಳಿಕೆ

ನವದೆಹಲಿ: ನಿನ್ನೆ ತಡರಾತ್ರಿ ಮುಖವನ್ನೆಲ್ಲ ಮುಚ್ಚಿಕೊಂಡ ವ್ಯಕ್ತಿಯೋರ್ವನನ್ನು ಕೂರಿಸಿಕೊಂಡು ಸಿಂಘು ಗಡಿಯಲ್ಲಿನ ಪ್ರತಿಭಟನಾ ನಿರತ ರೈತರು ಸುದ್ದಿಗೋಷ್ಠಿ ನಡೆಸಿದ್ದರು. ಜ. 26ರಂದು ಟ್ರ್ಯಾಕ್ಟರ್ ಱಲಿಯ ದಿನ ಈ ವ್ಯಕ್ತಿ ಹಾಗೂ ಇವರೊಂದಿಗೆ ಇನ್ನೂ 9 ಜನರು ಸೇರಿ ಹಿಂಸಾಚಾರ ನಡೆಸುವ ಪಿತೂರಿ ನಡೆಸಿದ್ದರು. ಅಲ್ಲದೆ, ನಾಲ್ವರು ರೈತ ಮುಖಂಡರ ಹತ್ಯೆಗೂ ಸಂಚು ರೂಪಿಸಿದ್ದರು ಎಂದು ಅವರು ಆರೋಪಿಸಿದ್ದರು.

ಹಾಗೇ, ಸಿಕ್ಕಿಬಿದ್ದಿದ್ದಾನೆ ಎನ್ನಲಾದ ವ್ಯಕ್ತಿಯೂ ಸಹ, ನಮಗೆ ಹಿಂಸಾಚಾರ ನಡೆಸುವಂತೆ ಹೇಳಿದ್ದು ಪೊಲೀಸ್​. ಹಣಕ್ಕಾಗಿ ಈ ಕೆಲಸ ಮಾಡಲು ಒಪ್ಪಿಕೊಂಡಿದ್ದೇವೆ. ನಾವ್ಯಾರನ್ನು ಹತ್ಯೆ ಮಾಡಬೇಕೋ, ಆ ರೈತ ಮುಖಂಡರ ಫೋಟೋ ಕೂಡ ಇಟ್ಟುಕೊಂಡಿದ್ದೇವೆ ಎಂದಿದ್ದ. ಅದಾದ ಬಳಿಕ ಆತನನ್ನು ಪೊಲೀಸರ ವಶಕ್ಕೆ ನೀಡಲಾಗಿತ್ತು.

ಆದರೆ ಈಗ ಆತ ಉಲ್ಟಾ ಹೊಡೆದಿದ್ದಾನೆ. ವ್ಯಕ್ತಿಯನ್ನು ಯೋಗೇಶ್​ (19) ಎಂದು ಗುರುತಿಸಲಾಗಿದ್ದು, ಸೋನಿಪತ್​ ನಿವಾಸಿಯಾಗಿದ್ದಾನೆ. ಹರ್ಯಾಣ ಪೊಲೀಸರ ಬಳಿ ತಾನು ಹೇಳಿದ್ದೆಲ್ಲ ಸುಳ್ಳು. ನಾವು ಹಿಂಸಾಚಾರ ನಡೆಸಲು ಯಾವುದೇ ಸಂಚು ರೂಪಿಸಿರಲಿಲ್ಲ ಎಂದಿದ್ದಾನೆ. ಅಷ್ಟೇ ಅಲ್ಲ, ರೈತರು ನನ್ನನ್ನು ಅಪಹರಿಸಿ, ಈ ಸುಳ್ಳುಗಳನ್ನು ಬಲವಂತವಾಗಿ ಹೇಳಿಸಿದ್ದಾರೆ ಎಂಬುದನ್ನೂ ತಿಳಿಸಿದ್ದಾನೆ.

ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದ ಕೆಲವರು ನನ್ನನ್ನು ಮನಬಂದಂತೆ ಥಳಿಸಿದರು. ಮೈ ಕಪ್ಪಾಗುವಷ್ಟು ಹೊಡೆದ ಬಳಿಕ, ಬಲವಂತದಿಂದ ಮದ್ಯ ಕುಡಿಸಿದರು. ನಾವು ನಿನ್ನನ್ನು ಕೊಂದು ಹಾಕಿದರೂ, ಅದು ಹೊರಗಿನ ಯಾರಿಗೂ ಗೊತ್ತಾಗುವುದಿಲ್ಲ ಎಂದು ಬೆದರಿಸಿದರು ಎಂದು ಯೋಗೇಶ್​ ಹರ್ಯಾಣ ಪೊಲೀಸರಿಗೆ ಹೇಳಿದ್ದಾಗಿ ವರದಿಯಾಗಿದೆ.

ರೈತ ಮುಖಂಡರಾದ ಬಲ್​ಬೀರ್​ ಸಿಂಗ್ ರಾಜೇವಾಲ್​, ಬಲದೇವ್​ ಸಿಂಗ್ ಸಿರ್ಸಾ, ಕುಲದೀಪ್​ ಸಂಧು ಮತ್ತು ಜಗಜೀತ್​ ಸಿಂಗ್​​ರ ಫೋಟೋ ಇದ್ದ ಈತನ ಮೊಬೈಲ್​ನ್ನೂ ಕೂಡ ಪೊಲೀಸರು ವಶಪಡಿಸಿಕೊಂಡಿದ್ದಾರೆ.