ಝಾಕಿರ್ ನಾಯಕ್​ನ ಐಆರ್‌ಎಫ್ ಸಂಘಟನೆ ಮೇಲಿನ ನಿಷೇಧ ಮತ್ತೆ 5 ವರ್ಷಗಳವರೆಗೆ ವಿಸ್ತರಣೆ

ನವದೆಹಲಿ, ನವೆಂಬರ್ 13: ವಿವಾದಾತ್ಮಕ ಇಸ್ಲಾಮಿಕ್ ಧರ್ಮಪ್ರಚಾರಕ ಝಾಕಿರ್ ನಾಯಕ್ ಸ್ಥಾಪಿಸಿರುವ ಇಸ್ಲಾಮಿಕ್ ರಿಸರ್ಚ್ ಫೌಂಡೇಶನ್ (IRF) ಸಂಘಟನೆಯ ಮೇಲಿನ ನಿಷೇಧವನ್ನು ಕೇಂದ್ರ ಸರ್ಕಾರ ಮತ್ತೆ ಐದು ವರ್ಷಗಳ ಕಾಲ ವಿಸ್ತರಿಸಿದೆ. ಕಾನೂನುಬಾಹಿರ ಚಟುವಟಿಕೆಗಳ (ತಡೆಗಟ್ಟುವಿಕೆ) ಕಾಯ್ದೆ ಅಡಿಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ.

ಗೃಹ ಸಚಿವಾಲಯ ಶುಕ್ರವಾರ ಈ ಕುರಿತು ಅಧಿಸೂಚನೆ ಹೊರಡಿಸಿದೆ. ಧಾರ್ಮಿಕ ಸಮುದಾಯಗಳ ನಡುವೆ ದ್ವೇಷ ಮತ್ತು ವೈಮನಸ್ಸು ಹರಡುವ ಚಟುವಟಿಕೆಗಳಿಗೆ ಸಂಘಟನೆ ಮತ್ತು ಅದರ ಸ್ಥಾಪಕ ಝಾಕಿರ್ ನಾಯಕ್ ಪ್ರೋತ್ಸಾಹ ನೀಡುತ್ತಿದ್ದಾರೆ ಎಂಬುದು ಸರ್ಕಾರದ ಆರೋಪ. ಇಂತಹ ಚಟುವಟಿಕೆಗಳು ದೇಶದ ಕೋಮು ಸೌಹಾರ್ದತೆ ಮತ್ತು ರಾಷ್ಟ್ರೀಯ ಭದ್ರತೆಗೆ ಅಪಾಯ ಉಂಟುಮಾಡಬಹುದು ಎಂದು ಸರ್ಕಾರ ಹೇಳಿದೆ.

ಮೊದಲ ಬಾರಿಗೆ ನಿಷೇಧ ಹೇರಿದ್ದು ಯಾವಾಗ?

2016ರ ನವೆಂಬರ್ 17ರಂದು ಕೇಂದ್ರ ಸರ್ಕಾರ ಮೊದಲ ಬಾರಿಗೆ ಐಆರ್‌ಎಫ್ ಸಂಘಟನೆಯನ್ನು ಯುಎಪಿಎ ಕಾಯ್ದೆಯಡಿ ಕಾನೂನುಬಾಹಿರ ಸಂಘಟನೆ ಎಂದು ಘೋಷಿಸಿತ್ತು. ಝಾಕಿರ್ ನಾಯಕ್ ಅವರ ಭಾಷಣಗಳು ಧಾರ್ಮಿಕ ಸಮುದಾಯಗಳ ನಡುವೆ ದ್ವೇಷ ಹರಡುತ್ತಿವೆ, ಯುವಕರನ್ನು ಮೂಲಭೂತವಾದದತ್ತ ಪ್ರೇರೇಪಿಸುತ್ತಿವೆ ಎಂಬ ಆರೋಪಗಳನ್ನು ಸರ್ಕಾರ ಮುಂದಿಟ್ಟಿತ್ತು. ಈ ನಿರ್ಧಾರವನ್ನು ಪರಿಶೀಲಿಸಿದ ನ್ಯಾಯಮಂಡಳಿ 2017ರ ಮೇ ತಿಂಗಳಲ್ಲಿ ನಿಷೇಧಕ್ಕೆ ಅನುಮೋದನೆ ನೀಡಿತ್ತು.

2021ರಲ್ಲೂ ವಿಸ್ತರಣೆಯಾಗಿತ್ತು ನಿಷೇಧ

2016ರಲ್ಲಿ ವಿಧಿಸಿದ್ದ ಐದು ವರ್ಷಗಳ ನಿಷೇಧದ ಅವಧಿ ಮುಗಿಯುವ ಮೊದಲು, 2021ರ ನವೆಂಬರ್ 15ರಂದು ಕೇಂದ್ರ ಸರ್ಕಾರ ಮತ್ತೊಮ್ಮೆ ಐದು ವರ್ಷಗಳ ಕಾಲ ನಿಷೇಧವನ್ನು ವಿಸ್ತರಿಸಿತ್ತು. 2022ರ ಮಾರ್ಚ್‌ನಲ್ಲಿ ಯುಎಪಿಎ ನ್ಯಾಯಮಂಡಳಿ ಈ ನಿರ್ಧಾರವನ್ನು ಎತ್ತಿಹಿಡಿದಿತ್ತು. ಸಂಘಟನೆಯ ವಿರುದ್ಧ ಕ್ರಮ ಕೈಗೊಳ್ಳಲು ಸಾಕಷ್ಟು ಆಧಾರಗಳಿವೆ ಎಂದು ನ್ಯಾಯಮಂಡಳಿ ಅಭಿಪ್ರಾಯಪಟ್ಟಿತ್ತು.

ಇದನ್ನೂ ಓದಿ:

ಆಹಾರ, ಶಿಕ್ಷಣ, ಹಕ್ಕುಗಳಿಗಾಗಿ ಹೋರಾಟ: ಪಾಕ್ ಆಕ್ರಮಿತ ಕಾಶ್ಮೀರದಲ್ಲಿ ಮತ್ತೆ ಹಿಂಸಾಚಾರ, 18 ಮಂದಿ ಸಾವು

ಯುಎಪಿಎ ಎಂದರೇನು?

ಯುಎಪಿಎ ಎಂದರೆ Unlawful Activities (Prevention) Act. ಇದನ್ನು ಕಾನೂನುಬಾಹಿರ ಚಟುವಟಿಕೆಗಳ ತಡೆ ಕಾಯ್ದೆ ಎಂದು ಕರೆಯಲಾಗುತ್ತದೆ. – ದೇಶದ ಸಾರ್ವಭೌಮತ್ವ, ಏಕತೆ ಮತ್ತು ಭದ್ರತೆಗೆ ಧಕ್ಕೆ ತರುವ ಚಟುವಟಿಕೆಗಳನ್ನು ತಡೆಯಲು ಈ ಕಾಯ್ದೆ ಜಾರಿಯಲ್ಲಿದೆ. – ಇದರ ಅಡಿಯಲ್ಲಿ ಸಂಘಟನೆಯೊಂದನ್ನು ಕಾನೂನುಬಾಹಿರ ಎಂದು ಘೋಷಿಸಿ ನಿಷೇಧಿಸಬಹುದು. – ಕೇಂದ್ರ ಸರ್ಕಾರದ ನಿಷೇಧದ ನಿರ್ಧಾರವನ್ನು ಪರಿಶೀಲಿಸಲು ನ್ಯಾಯಮಂಡಳಿಯ ವ್ಯವಸ್ಥೆಯೂ ಇದೆ. ಐಆರ್‌ಎಫ್ ಮೇಲಿನ ನಿಷೇಧ ವಿಸ್ತರಣೆಯಾದ ಹಿನ್ನೆಲೆಯಲ್ಲಿ, ಸಂಘಟನೆಯ ಚಟುವಟಿಕೆಗಳು ಭಾರತದಲ್ಲಿ ಮುಂದಿನ ಐದು ವರ್ಷಗಳ ಕಾಲ ನಿಷೇಧಿತವಾಗಿರಲಿವೆ

ಝಾಕಿರ್ ನಾಯಕ್ ಇಸ್ಲಾಮಿಕ್ ಧರ್ಮಪ್ರಚಾರಕ, 1991ರಲ್ಲಿ ಇಸ್ಲಾಮಿಕ್ ರಿಸರ್ಚ್ ಫೌಂಡೇಶನ್ (IRF) ಸ್ಥಾಪಿಸದ್ದರು. ಧಾರ್ಮಿಕ ಉಪನ್ಯಾಸಗಳು ಮತ್ತು ಭಾಷಣಗಳ ಮೂಲಕ ಅವರು ಪರಿಚಿತರಾಗಿದ್ದಾರೆ. ಅವರ ಭಾಷಣಗಳ ಕುರಿತು ಭಾರತದಲ್ಲಿ ಹಲವು ವರ್ಷಗಳಿಂದ ವಿವಾದಗಳಿವೆ. 2016ರಲ್ಲಿ ಭಾರತವನ್ನು ತೊರೆದ ಬಳಿಕ ಅವರು ಮಲೇಷ್ಯಾದಲ್ಲಿ ನೆಲೆಸಿದ್ದಾರೆ. ಅವರಿಗೆ ಅಲ್ಲಿ ಶಾಶ್ವತ ನಿವಾಸದ ಸ್ಥಾನಮಾನವಿದೆ ಎಂದು ವರದಿಯಾಗಿದೆ. ಅವರ ಭಾಷಣಗಳು ಧಾರ್ಮಿಕ ದ್ವೇಷ ಮತ್ತು ಮೂಲಭೂತವಾದಕ್ಕೆ ಪ್ರೇರಣೆ ನೀಡುತ್ತವೆ ಎಂಬುದು ಭಾರತ ಸರ್ಕಾರದ ಆರೋಪವಾಗಿದೆ.

ಈ ನಿರ್ಧಾರದಿಂದ ಏನಾಗಲಿದೆ?

– ಐಆರ್‌ಎಫ್ ಸಂಘಟನೆಯ ಮೇಲಿನ ನಿಷೇಧ ಇನ್ನೂ ಐದು ವರ್ಷ ಮುಂದುವರಿಯಲಿದೆ. – ಸಂಘಟನೆಯ ಹೆಸರಿನಲ್ಲಿ ಭಾರತದಲ್ಲಿ ಕಾನೂನುಬದ್ಧವಾಗಿ ಚಟುವಟಿಕೆ ನಡೆಸಲು ಸಾಧ್ಯವಿರುವುದಿಲ್ಲ. – ಸಂಘಟನೆಯ ಚಟುವಟಿಕೆಗಳು ಮತ್ತು ಸದಸ್ಯರ ವಿರುದ್ಧದ ಆರೋಪಗಳ ಮೇಲೆ ಕಾನೂನು ಪ್ರಕ್ರಿಯೆಗಳು ಮುಂದುವರೆಯಬಹುದು.

2016ರಲ್ಲಿ ಆರಂಭವಾದ ಐಆರ್‌ಎಫ್ ಮೇಲಿನ ನಿಷೇಧಕ್ಕೆ ಈಗ ಮೂರನೇ ಬಾರಿ ವಿಸ್ತರಣೆ ದೊರೆತಿದೆ. ರಾಷ್ಟ್ರೀಯ ಭದ್ರತೆ ಮತ್ತು ಕೋಮು ಸೌಹಾರ್ದತೆಯ ವಿಚಾರಗಳನ್ನು ಮುಂದಿಟ್ಟುಕೊಂಡು ಕೇಂದ್ರ ಸರ್ಕಾರ ಈ ನಿರ್ಧಾರ ಕೈಗೊಂಡಿದೆ.

ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ