National Defence: ಕೂನೂರಿನ ಬಟ್ಟಲಿನಂಥ ಹೆಲಿಪ್ಯಾಡ್, ಮಂಜಿನ ಆಟ ಮತ್ತು ವಿಎಫ್​ಆರ್​ ಹಾರಾಟ ನಿಯಮಗಳು

CDS Bipin Rawat: ತಮಿಳುನಾಡಿನ ಕೂನೂರು ಸಮೀಪ ಡಿ.8ರಂದು ಹೆಲಿಕಾಪ್ಟರ್ ಪತನಗೊಂಡು ಭಾರತದ ಮೊದಲ ರಕ್ಷಣಾ ಸಿಬ್ಬಂದಿ ಮುಖ್ಯಸ್ಥರಾದ ಜನರಲ್ ಬಿಪಿನ್ ರಾವತ್ ಮತ್ತು ಇತರರು ನಿಧನರಾದರು. ಭಾರತೀಯ ವಾಯುಪಡೆಯ ತಂತ್ರಜ್ಞರು ಹೆಲಿಕಾಪ್ಟರ್‌ನ ಅವಶೇಷಗಳಿಂದ ಕಾಕ್‌ಪಿಟ್ ದತ್ತಾಂಶವನ್ನು ಪಡೆದಿದ್ದರೂ, ದುರ್ಘಟನೆಗೆ ಕಾರಣವೇನು ಎಂಬುದು ಈ ಲೇಖನ ಸಿದ್ಧಪಡಿಸುತ್ತಿರುವ ಡಿ.12ರ ರಾತ್ರಿ 9.30ರವರೆಗೂ ಸ್ಪಷ್ಟವಾಗಿಲ್ಲ. ಜನರಲ್ ರಾವತ್ ಮತ್ತು ಇತರರನ್ನು ಹೊತ್ತೊಯ್ದಿದ್ದ Mi-17V5 ಹೆಲಿಕಾಪ್ಟರ್, ಸೂಲೂರಿನಲ್ಲಿರುವ ಐಎಎಫ್‌ನ 109 ಹೆಲಿಕಾಪ್ಟರ್ ಯುನಿಟ್ ಏರ್​ಫೋರ್ಸ್ ಸ್ಟೇಷನ್‌ನಿಂದ ಹೊರಟು, ನೀಲಗಿರಿ, ಬ್ಲೂ ಮೌಂಟೇನ್​ ಹಾಗೂ ವೆಲ್ಲಿಂಗ್‌ಟನ್‌ನಲ್ಲಿರುವ ಮಿಲಿಟರಿ ಕಂಟೋನ್​ಮೆಂಟ್​ಗೆ ತೆರಳುತ್ತಿತ್ತು.

ಲ್ಯಾಂಡ್ ಆಗಲು ಇನ್ನೇನು 10 ಕಿಮೀ ದೂರವಷ್ಟೇ ಉಳಿದಿದೆ ಎನ್ನುವಾಗ ಹೆಲಿಕಾಪ್ಟರ್ ಅಪಘಾತಕ್ಕೀಡಾಯಿತು. ಈ ವೇಳೆ ಹೆಲಿಕಾಪ್ಟರ್‌ನಲ್ಲಿದ್ದ 13 ಜನರು ಅಸುನೀಗಿದ್ದರು. ಅಪಘಾತದಲ್ಲಿ ಬದುಕುಳಿದಿರುವ ಏಕೈಕ ವ್ಯಕ್ತಿ ಗ್ರೂಪ್ ಕ್ಯಾಪ್ಟನ್ ವರುಣ್ ಸಿಂಗ್. ಅವರನ್ನು ಬೆಂಗಳೂರನ ಕಮಾಂಡೊ ಆಸ್ಪತ್ರೆಗೆ ಸ್ಥಳಾಂತರಿಸಲಾಗಿದ್ದು, ಆರೋಗ್ಯ ಸ್ಥಿತಿ ಗಂಭೀರವಾಗಿದೆ. ಈ ಹೆಲಿಕಾಪ್ಟರ್ ವಿಐಪಿಗಳನ್ನು ಇಳಿಸಿ, ನಿಲ್ಲದೆ ಮತ್ತೆ ಸೂಲೂರಿಗೆ ಹಿಂತಿರುಗಬೇಕಿತ್ತು. ದಕ್ಷಿಣ ಭಾರತದ ರಾಜ್ಯವಾದ ತಮಿಳುನಾಡಿನ ಕೂನೂರ್‌ನಿಂದ ವಸಾಹತು ಪ್ರದೇಶಕ್ಕೆ ಸುಮಾರು ಐದು ಮೈಲಿ (ಎಂಟು ಕಿಲೋಮೀಟರ್) ಸಮೀಪವಿರುವ ದಟ್ಟವಾದ-ಕಾಡುಗಳಿಂದ ಕೂಡಿದ ಕಮರಿಯಲ್ಲಿ ಈ ಅಪಘಾತ ಸಂಭವಿಸಿದೆ. ಅಪಘಾತದ ಬಳಿಕ ಹೆಲಿಕಾಪ್ಟರ್ ಹೊತ್ತಿ ಉರಿದಿದೆ. ಘಟನಾ ಸ್ಥಳಕ್ಕೆ ರಕ್ಷಣಾ ಸಿಬ್ಬಂದಿ ಮತ್ತು ಅಗ್ನಿಶಾಮಕ ಸಿಬ್ಬಂದಿ ಆಗಮಿಸುವ ಪೂರ್ವದಲ್ಲೇ ಸ್ಥಳೀಯರು ಬೆಂಕಿ ನಂದಿಸಲು ಧಾವಿಸಿದ್ದಾರೆ.

ಘಟನೆಯ ಕುರಿತು ವಾಯುಪಡೆ ತನಿಖೆಗೆ ಆದೇಶಿಸಿದೆ. ಡಿಸೆಂಬರ್ 9ರಂದು ನೀಡಲಾದ ಅಧಿಕೃತ ಅಪ್​ಡೇಟ್​ನಲ್ಲೂ ಅಪಘಾತಕ್ಕೆ ಯಾವುದೇ ಸಂಭವನೀಯ ಕಾರಣವನ್ನು ನೀಡಲಾಗಿಲ್ಲ. ಅಪಘಾತದ ಸ್ಥಳದಿಂದ ಕಾಕ್‌ಪಿಟ್ ಧ್ವನಿ ರೆಕಾರ್ಡರ್ ಮತ್ತು ಫ್ಲೈಟ್ ಡೇಟಾ ರೆಕಾರ್ಡರ್ ಸಂಗ್ರಹಿಸಲಾಗಿದೆ ಮತ್ತು ಅವುಗಳನ್ನು ವಿಶ್ಲೇಷಣೆಗೆ ಕಳುಹಿಸಲಾಗಿದೆ. ಆದರೆ, ಕಾಲೋಚಿತ ಚಳಿಗಾಲದ ಹವಾಮಾನ, ಮೋಡ ಕವಿದ ವಾತಾವರಣದಿಂದ ಕಡಿಮೆ ಗೋಚರತೆಯು ಹೆಲಿಕಾಪ್ಟರ್ ಪತನಕ್ಕೆ ಕಾರಣವಾಗಿರುವ ಸಾಧ್ಯತೆ ಇದೆ ಎಂದು ಮಾಧ್ಯಮ ವರದಿಗಳು ಈಗಾಗಲೇ ಹೇಳಿವೆ.

ಕೂನೂರಿನ ವೆಲ್ಲಿಂಗ್ಟನ್ ಜಿಮ್‌ಖಾನಾ ಕ್ಲಬ್‌ನಲ್ಲಿರುವ (ಡಬ್ಲ್ಯುಜಿಸಿ) ಹೆಲಿಪ್ಯಾಡ್ ಒಂದು ಬೌಲ್‌ ಆಕಾರದಲ್ಲಿದ್ದು, ಒಂದು ದಿಕ್ಕಿನಿಂದ ಮಾತ್ರ ಪ್ರವೇಶಿಸಬಹುದು. ಸೇನಾ ಹೆಲಿಕಾಪ್ಟರ್‌ಗಳು ಸಾಂದರ್ಭಿಕವಾಗಿ ಎಎಫ್ಎಸ್ ಸೂಲೂರು ಅಥವಾ ಹತ್ತಿರದ ಕೊಯಮತ್ತೂರಿನ ಸಿವಿಲ್ ಏರ್‌ಪೋರ್ಟ್‌ನಿಂದ ಈ ಮಾರ್ಗದಲ್ಲಿ ಹಾರುತ್ತವೆ. Mi-17V5 ಹೆಲಿಕಾಪ್ಟರ್ 50 ಮೈಲಿಗಿಂತ (80 ಕಿಲೋಮೀಟರ್) ಕಡಿಮ ಎತ್ತರದಲ್ಲಿ ಹಾರುತ್ತದೆ. ಪೂರ್ವನಿರ್ಧರಿತ ಮಾರ್ಗದಲ್ಲಿ ಚಲಿಸಲು ಸುಮಾರು 30 ನಿಮಿಷಗಳನ್ನು ತೆಗೆದುಕೊಳ್ಳುತ್ತದೆ. ಗಮ್ಯಸ್ಥಾನವು ನ್ಯಾವಿಗೇಷನ್ ಅಥವಾ ಲ್ಯಾಂಡಿಂಗ್ ಸಾಧನಗಳನ್ನು ಹೊಂದಿರದ ಕಾರಣ ಅಂತಹ ಹಾರಾಟಗಳನ್ನು ದೃಶ್ಯ ಹಾರಾಟ ನಿಯಮಗಳ (Visual Flight Rules – VFR) ಅಡಿಯಲ್ಲಿ ಕೈಗೊಳ್ಳಲಾಗುತ್ತದೆ. ಈ ಹೆಲಿಪ್ಯಾಡ್‌ಗೆ ಏರಿಯಾ ನ್ಯಾವಿಗೇಶನ್ ಅಥವಾ ಉಪಕರಣ ಹಾರಾಟದ ನಿಯಮಗಳ ಕಾರ್ಯವಿಧಾನಗಳು ಅಸ್ತಿತ್ವದಲ್ಲಿಲ್ಲ.

ಕೂನೂರ್ ಒಂದು ಗಿರಿಧಾಮವಾಗಿದ್ದು, ಉತ್ತಮ ಗೋಚರತೆ ಮತ್ತು ಶುಭ್ರ ಆಕಾಶದೊಂದಿಗೆ ಉತ್ತಮ ಹವಾಮಾನಕ್ಕೆ ಹೆಸರುವಾಸಿಯಾಗಿದೆ. ಆದರೆ, ಚಳಿಗಾಲದಲ್ಲಿ, ತೀರಾ ಕೆಳಮಟ್ಟದಲ್ಲಿ ತೇಲುತ್ತಿರುವ ಮೋಡಗಳನ್ನು ಹೊಂದಿರುತ್ತದೆ; ಮಂಜು ಮತ್ತು ಇಬ್ಬನಿ ಅನಿರೀಕ್ಷಿತವಾಗಿ ಉಂಟಾಗುತ್ತವೆ. ಇದರಿಂದ ಗೋಚರತೆ ಕಡಿಮೆಯಾಗಿ, ‘ನೋಡಿ-ಮತ್ತು-ತಪ್ಪಿಸಿ’ ಸ್ಥಿತಿಯು ವಿಎಫ್ಆರ್ ವಿಮಾನಗಳನ್ನು ಅಪಾಯಕ್ಕೆ ತಳ್ಳುತ್ತದೆ. ತಾಂತ್ರಿಕ ಸಮಸ್ಯೆಗಳು, ಯಾವುದಾದರೂ ಇದ್ದರೆ, ಗುಡ್ಡಗಾಡು ಪ್ರದೇಶ ಮತ್ತು ನಿರ್ಬಂಧಿತ ಕಾರ್ಯಕ್ಷಮತೆಯಿಂದಾಗಿ ಅಪಾಯವನ್ನು ಹೇರಬಹುದು.

ಐಎಎಫ್ 2011 ಮತ್ತು 2018ರ ನಡುವೆ ಎರಡು ಹಂತಗಳಲ್ಲಿ 150 Mi-17V5ಗಳನ್ನು ಖರೀದಿಸಿತ್ತು. ಅವುಗಳನ್ನು ಖರೀದಿಸಿದ ಬಳಿಕ ಒಟ್ಟು ಐದು ಅಪಘಾತಗಳು ಸಂಭವಿಸಿವೆ ಮೂರು ಮಾರಣಾಂತಿಕವಾಗಿದ್ದರೆ, ಒಂದು ಹೆಲಿಕಾಪ್ಟರ್ ಅನ್ನು ಫೆಬ್ರವರಿ 27, 2019ರಂದು ಭಾರತ-ಪಾಕಿಸ್ತಾನದ ವಾಯು ಕದನದ ಸಮಯದಲ್ಲಿ ಐಎಎಫ್‌ನ ಸ್ವಂತ ವಾಯು ರಕ್ಷಣೆಯೇ ಆಕಸ್ಮಿಕವಾಗಿ ಹೊಡೆದುರುಳಿಸಿತು. ಏಪ್ರಿಲ್ 2011ರಲ್ಲಿ, ಮತ್ತೊಂದು ಅಪಘಾತದಲ್ಲಿ ಹೆಲಿಪ್ಯಾಡ್ ಮೇಲೆ Mi-17 ಹೆಲಿಕಾಪ್ಟರ್‌ನ ಮುಂಭಾಗವು ಡಿಕ್ಕಿ ಹೊಡೆದು ಕೆಳಗುರುಳಿದ್ದಲ್ಲದೆ, 19 ಜೀವಗಳನ್ನು ಬಲಿ ತೆಗೆದುಕೊಂಡಿತು.

ಎಂಐ-17ವಿ5 ಹೆಲಿಕಾಪ್ಟರ್ (ಒಳಚಿತ್ರದಲ್ಲಿ ಲೇಖಕ ಗಿರೀಶ್ ಲಿಂಗಣ್ಣ)

ಅವಳಿ-ಎಂಜಿನ್, ಸುಧಾರಿತ ಗ್ಲಾಸ್ ಕಾಕ್‌ಪಿಟ್, ಚಲಿಸುವ ಮ್ಯಾಪ್ ಡಿಸ್‌ಪ್ಲೇ, ಹವಾಮಾನ ರಾಡಾರ್ ಮತ್ತು ಆಟೋಪೈಲಟ್‌ಗಳನ್ನು ಹೊಂದಿರುವ 13 ಟನ್ ತೂಕದ ಹೆಲಿಕಾಪ್ಟರ್‌ಗಳನ್ನು ಹಿಮಾಲಯದ ಹೆಲಿಪ್ಯಾಡ್‌ಗಳವರೆಗೂ ಐಎಎಫ್ ಬಳಸುತ್ತದೆ. ಬುಧವಾರ ಪತನಗೊಂಡಿರುವ ಹೆಲಿಕಾಪ್ಟರ್ ವಿಐಪಿಗಳ ಏರ್‌ಲಿಫ್ಟ್‌ಗಾಗಿ ವಿನ್ಯಾಸಗೊಳಿಸಿದ್ದಾದರೂ, ಇದರ ಸಶಸ್ತ್ರ ಆವೃತ್ತಿಯೂ ಲಭ್ಯವಿದೆ. ರಾವತ್ ನೇತೃತ್ವದಲ್ಲಿ ಸೇನಾ ವ್ಯವಹಾರಗಳ ಇಲಾಖೆ (ಡಿಎಂಎ) ಮೂರೂ ಸೇವೆಗಳ ಆಧುನೀಕರಣ ಮತ್ತು ಜಂಟಿ ‘ಥಿಯೇಟರ್ ಕಮಾಂಡ್‌ಗಳಿಗೆ’ ಏಕೀಕರಣಕ್ಕಾಗಿ ಭಾರತವು ನಡೆಸುತ್ತಿರುವ ಪ್ರಕ್ರಿಯೆಯ ಮೇಲೆ ಈ ಅಪಘಾತವು ವ್ಯತಿರಿಕ್ತ ಪರಿಣಾಮ ಬೀರಬಹುದು. ಭಾರತೀಯ ರಕ್ಷಣಾ ಸಚಿವಾಲಯವು ಮುಂದಿನ ವಾರದಲ್ಲಿ ಹೊಸ ಸಿಡಿಎಸ್ ಅವರನ್ನು ಘೋಷಿಸುವ ನಿರೀಕ್ಷೆಯಿದೆ. ‘ಥಿಯೇಟರೈಸೇಶನ್’ ನಿಟ್ಟಿನಲ್ಲಿ ಇಲ್ಲಿಯವರೆಗೆ ಸಾಧಿಸಿದ ಆವೇಗವನ್ನು ಕುಂಠಿತಗೊಳಿಸಲು ರಕ್ಷಣಾ ಸಚಿವಾಲಯವು ಬಯಸುವುದಿಲ್ಲ. ಈಗ ಸೇವೆಯಲ್ಲಿರುವ ಹಿರಿಯರಾದ 4-ಸ್ಟಾರ್ ಜನರಲ್, ಪ್ರಸ್ತುತ ಸೇನಾ ಮುಖ್ಯಸ್ಥರಾಗಿರುವ ಜನರಲ್ ಎಂ.ಎಂ. ನರವಾಣೆ ಅವರು ಸಿಡಿಎಸ್ ಹುದ್ದೆ ವಹಿಸಿಕೊಳ್ಳುವಲ್ಲಿ ಮುಂಚೂಣಿಯಲ್ಲಿ ಇದ್ದಾರೆಂದು ಪರಿಗಣಿಸಲಾಗಿದೆ.

(ಬರಹ: ಗಿರೀಶ್ ಲಿಂಗಣ್ಣ, ಲೇಖಕರು ಎಡಿಡಿ ಎಂಜಿನಿಯರಿಂಗ್ ಇಂಡಿಯಾ ಕಂಪನಿಯ ವ್ಯವಸ್ಥಾಪಕ ನಿರ್ದೇಶಕರು)

ಇದನ್ನೂ ಓದಿ: National Defence: ಕೈಲಿ ಮಿಠಾಯಿ, ಬಗಲಲ್ಲಿ ದೊಣ್ಣೆ: ಭಾರತವನ್ನು ಬಾಗಿಸುವ ಅಮೆರಿಕದ ಯತ್ನ ಎಸ್​-400 ವಿಚಾರದಲ್ಲಿ ವಿಫಲವಾಗಿದ್ದು ಏಕೆ?
ಇದನ್ನೂ ಓದಿ: National Defence: ಹಗುರ ಯುದ್ಧ ಹೆಲಿಕಾಪ್ಟರ್​ ಖರೀದಿಗೆ ಭೂಸೇನೆಗೇಕೆ ನಿರಾಸಕ್ತಿ