ಒಂದು ಟಿ20 ಪಂದ್ಯದಲ್ಲಿ ಬರೋಬ್ಬರಿ 36 ಸಿಕ್ಸರ್, 501 ರನ್..! ವಿಶ್ವದಾಖಲೆ ಪುಡಿಪುಡಿ
CSA T20 Challenge: ಸೋತ ನೈಟ್ಸ್ ತಂಡದ ಬ್ಯಾಟ್ಸ್ಮನ್ಗಳು ಗರಿಷ್ಠ 19 ಸಿಕ್ಸರ್ಗಳನ್ನು ಬಾರಿಸಿದರೆ, ಗೆದ್ದ ಟೈಟಾನ್ಸ್ ತಂಡದಿಂದ ಒಟ್ಟು 17 ಸಿಕ್ಸರ್ಗಳು ಸಿಡಿದವು.
ಟಿ20 ಕ್ರಿಕೆಟ್ನಲ್ಲಿ ವಿಶ್ವದಾಖಲೆಯೊಂದು ನೆಲಸಮಗೊಂಡಿದೆ. ದಕ್ಷಿಣ ಆಫ್ರಿಕಾದ ಟಿ20 ಚಾಲೆಂಜ್ ಪಂದ್ಯಾವಳಿಯಲ್ಲಿ ನಡೆದ ಟೈಟಾನ್ಸ್ ಮತ್ತು ನೈಟ್ಸ್ ನಡುವಿನ ಪಂದ್ಯ ಈ ದಾಖಲೆಗೆ ಸಾಕ್ಷಿಯಾಗಿದೆ. ಈ ಪಂದ್ಯದಲ್ಲಿ ಮೊದಲ ಬಾರಿಗೆ 500 ಕ್ಕೂ ಹೆಚ್ಚು ರನ್ ಗಳಿಸಿದ ದಾಖಲೆ ಸೃಷ್ಟಿಯಾಗಿದೆ.
‘ಈ ಪಂದ್ಯದಲ್ಲಿ, ಮೊದಲು ಬ್ಯಾಟಿಂಗ್ ಮಾಡಿದ ಟೈಟಾನ್ಸ್ ತಂಡ ಡೆವಲ್ಡ್ ಬ್ರೆವಿಸ್ ಅವರ ಬಿರುಸಿನ 162 ರನ್ಗಳ ನೆರವಿನಿಂದ 20 ಓವರ್ಗಳಲ್ಲಿ 271 ರನ್ ಗಳಿಸಿತು. ಉತ್ತರವಾಗಿ ಗುರಿ ಬೆನ್ನಟ್ಟಿದ ನೈಟ್ಸ್ ತಂಡ ನಿಗದಿತ 20 ಓವರ್ಗಳಲ್ಲಿ 230 ರನ್ ಗಳಿಸಲಷ್ಟೇ ಶಕ್ತವಾಯಿತು. ಈ ಮೂಲಕ ಈ ಪಂದ್ಯದಲ್ಲಿ ಒಟ್ಟು 501 ರನ್ಗಳು ಹರಿದುಬಂದವು. ಈ ಹಿಂದೆ 2016 ರಂದು ನ್ಯೂಜಿಲೆಂಡ್ನಲ್ಲಿ ಒಟಾಗೊ (249) ಮತ್ತು ಸೆಂಟ್ರಲ್ ಡಿಸ್ಟ್ರಿಕ್ಟ್ಸ್ (248) ತಂಡಗಳ ನಡುವೆ ನಡೆದಿದ್ದ ಪಂದ್ಯದಲ್ಲಿ 497 ರನ್ ಕಲೆಹಾಕಲಾಗಿತ್ತು.
ಅಲ್ಲದೆ ಈ ಪಂದ್ಯದಲ್ಲಿ 162 ರನ್ ಚಚ್ಚಿದ ಡೆವಾಲ್ಡ್ ಬ್ರೆವಿಸ್ ಅತ್ಯಂತ ವೇಗವಾಗಿ 150 ರನ್ ಗಳಿಸಿದ ಆಟಗಾರ ಎನಿಸಿಕೊಂಡಿದ್ದಲ್ಲದೆ 250 ಸ್ಟ್ರೈಕ್ ರೇಟ್ನಲ್ಲಿ ಶತಕ ಗಳಿಸಿದ ಮೊದಲ ಆಟಗಾರ ಎಂಬ ಖ್ಯಾತಿಗೆ ಪಾತ್ರರಾಗಿದ್ದಾರೆ.
ಟೈಟಾನ್ಸ್ ಮತ್ತು ನೈಟ್ಸ್ ನಡುವೆ ನಡೆದ ಈ ಪಂದ್ಯದಲ್ಲಿ ಒಟ್ಟು 36 ಸಿಕ್ಸರ್ಗಳು ದಾಖಲಾಗಿವೆ. ಅಂದರೆ ಕೇವಲ ಸಿಕ್ಸರ್ಗಳೊಂದಿಗೆ 216 ರನ್ ಸಂಗ್ರಹಗೊಂಡಿವೆ. ಕುತೂಹಲಕಾರಿ ಸಂಗತಿಯೆಂದರೆ, ಸೋತ ನೈಟ್ಸ್ ತಂಡದ ಬ್ಯಾಟ್ಸ್ಮನ್ಗಳು ಗರಿಷ್ಠ 19 ಸಿಕ್ಸರ್ಗಳನ್ನು ಬಾರಿಸಿದರೆ, ಗೆದ್ದ ಟೈಟಾನ್ಸ್ ತಂಡದಿಂದ ಒಟ್ಟು 17 ಸಿಕ್ಸರ್ಗಳು ಸಿಡಿದವು.
ಈ ಪಂದ್ಯದಲ್ಲಿ ಟೈಟಾನ್ಸ್ ಪರ ಆಡಿದ ಡೆವಲ್ಡ್ ಬ್ರೆವಿಸ್ ಕೇವಲ 57 ಎಸೆತಗಳಲ್ಲಿ 162 ರನ್ ಗಳಿಸಿದರು. ತಮ್ಮ ಇನ್ನಿಂಗ್ಸ್ನಲ್ಲಿ 13 ಸಿಕ್ಸರ್ ಮತ್ತು 13 ಬೌಂಡರಿಗಳನ್ನು ಬಾರಿಸಿದ ಬ್ರೆವಿಸ್, ಒಟ್ಟಾರೆ ಸಿಕ್ಸರ್ ಮತ್ತು ಬೌಂಡರಿಗಳ ನೆರವಿನಿಂದಲೇ 130 ರನ್ ಕಲೆಹಾಕಿದರು.
Published On - 3:12 pm, Tue, 1 November 22